Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၂၄

ဢိၸၵ်ႉတင်းယေႇပိၵ်ႉၶ

၁ဢႃႇပြႁမ်ႇ ဢသၢၵ်ႈယႂ်ႇလႄႈ ၵႄႇထဝ်ႈၼႃႇလူင်လၢင်ယဝ်ႉ။ထႃႇဝရႃႉၽြႃးပၼ်တၢင်းလီတီႈမၼ်းၼႂ်း လွင်ႈတၢင်းၵူႈၸိူဝ်ႉၵူႈပိူင်ယဝ်ႉ။

၂ ဢႃႇပြႁမ်ႇ လၢတ်ႈတီႈၶႃႈမၼ်း ၵေႃႉဢၼ်ဢသၢၵ်ႈယႂ်ႇၵႃႈၼႂ်း ၵူၼ်းႁိူၼ်းၵူၼ်းယေးမၼ်း ဢၼ်ပဵၼ်ၽူႈထိင်းငိုၼ်းၼၼ်ႉလႄႈ ဝႃႈ၊-

၃ ဢဝ်မိုဝ်းမႂ်းဝႆႉၵႃႈတႂ်ႈၶႃၵဝ်တႃႉ။ ၵဝ်တၵ်းႁႂ်ႈမႂ်းတိူင်ႇထႃႇဝရႃႉၽြႃးၽြႃးပဵၼ်ၸဝ်ႈၵၢင်ႁၢဝ် ၽြႃးပဵၼ်ၸဝ်ႈလိၼ်မိူင်းၼၼ်ႉ လွင်ႈဢၼ်ဝႃႈ၊ မႂ်းတၵ်းဢမ်ႇႁႃဢဝ်လုၵ်ႈယိင်းၸိူဝ်ႉၶိူဝ်းၵူၼ်းမဵဝ်း ၶႃႇၼၼ်ႇ ႁႂ်ႈလႆႈ ပဵၼ်မေးလုၵ်ႈၸၢႆးၵဝ်ၼၼ်ႉလႄႈ

၄ မႂ်းတၵ်းလႆႈၵွႃႇၵႃႈတီႈမိူင်းၵဝ်၊ ၵႃႈတီႈပီႈၼွင်ႉၸိူဝ်ႉၶိူဝ်းၵဝ်ပုၼ်ႉသေယဝ်ႉႁႃမေးပၼ်လုၵ်ႈၸၢႆးၵဝ် ဢိၸၵ်ႉ ၼၼ်ႉဢေႃႈ၊ ဝႃႈ ၼင်ႇၼႆဢေႃႈ။

၅ ၶႃႈမၼ်းၼၼ်ႉၵေႃႈထၢမ်လႄႈဝႃႈ၊-ပေႃးမေႈယိင်းၼၼ်ႉ ဢမ်ႇၶႂ်ႈၸွမ်းမႃးၵႃႈတီႈမိူင်းၼႆႉၸိုင်၊ ၸွင်ႇၵဝ်ၶႃႈတၵ်းလႆႈႁွင်ႉဢဝ်လုၵ်ႈၸၢႆးၸဝ်ႈႁဝ်းၵွႃႇ ၵႃႈတီႈမိူင်းဢၼ်ၸဝ်ႈႁဝ်းဢွၵ်ႇမႃးၼၼ်ႉၶႃႈႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊ ဢႃႇပြႁမ်ႇ ၶိုၼ်း လၢတ်ႈတီႈမၼ်းဝႃႈ၊-

၆ ႁဵတ်းသတိတႃႉ။ယႃႇပေႁွင်ႉဢဝ်လုၵ်ႈၸၢႆးၵဝ်ၵွႃႇၵႃႈတီႈမိူင်းၼၼ်ႉ။ထႃႇဝရႃႉၽြႃးၽြႃးပဵၼ်ၸဝ်ႈၽုင်ႇၵၢင်ႁၢဝ် ဢၼ်ႁွင်ႉဢဝ်ၵဝ်ဢွၵ်ႇသေၵႃႈၼႂ်းႁိူၼ်းပေႃႈၵဝ် မိူင်းတီႈယူႇပီႈၼွင်ႉၸိူဝ်ႉၶိူဝ်း ၵဝ်တင်းလၢႆၼၼ်ႉ၊ပၼ်ပျႃႇတိၵ်ႈတီႈၵဝ်ဝႆႉဝႃႈ၊-

၇ ၵဝ်တၵ်းပၼ်မိူင်းၼႆႉတီႈၸိူဝ်ႉၶိူဝ်းမႂ်းဢေႃႈ၊ ဝႃႈၼင်ႇၼႆၼၼ်ႉ မၼ်းၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈႁႂ်ႈလႆႈဢွၼ်ႁူဝ်မႂ်းၵွႃႇလႄႈ မႂ်းတၵ်းလႆႈဢဝ်မေး ပုၼ်ႈလုၵ်ႈၸၢႆးၵဝ်ၵႃႈတီႈမိူင်းၼၼ်ႉမႃးဢေႃႈ။

၈ ပေႃးမေႈယိင်းၼၼ်ႉ ဢမ်ႇၶႂ်ႈၸွမ်းၵၼ်တင်းမႂ်းမႃးၸိုင်ႁႂ်ႈမႂ်းၵၢင်းလွတ်ႈတင်း တၢင်းဢၼ်ၵိၼ်ႇဝႃႈ ဢၼ်ၵဝ်ပၼ်တေႃႈလဵဝ်ၼႆႉၼၼ်ႉတႃႉ။ၵူၺ်းၵႃႈယႃႇပေႁွင်ႉဢဝ်လုၵ်ႈၸၢႆးၵဝ်ၵွႃႇၵႃႈတီႈမိူင်းၼၼ်ႉ၊ ဝႃႈၼင်ႇၼႆသေ ယဝ်ႉ၊

၉ ၶႃႈမၼ်းၼၼ်ႉၵေႃႈဢဝ်မိုဝ်းမၼ်းဝႆႉၵႃႈတႂ်ႈၶႃၸဝ်ႈမၼ်းဢႃႇပြႁမ်ႇ ၼၼ်ႉသေလႄႈၵိၼ်ႇဝႃႈလူၺ်ႈလွင်ႈတၢင်းၼၼ်ႉဢေႃႈ။

၁၀ ၶႃႈမၼ်းၼၼ်ႉၵေႃႈလုၵ်ႉလႄႈ ဢဝ်ၵလႃႇဢုၵ်ႉၵႃႈၼႂ်းၽုင်ၵလႃႇဢုၵ်ႉၸဝ်ႈမၼ်းၼၼ်ႉသိပ်းတူဝ် ဢိၵ်ႇတင်းဢုၵ်ႉၸႃႇၶူဝ်းလဵင်း ၵႃႈဢၼ်ပဵၼ်ဢၼ်လီတီႈၸဝ်ႈမၼ်းၼၼ်ႉသေယဝ်ႉဢွၵ်ႇၵွႃႇႁွတ်ႈထိုင်ဝဵင်း ၼႃႇၶေႃႇ မိူင်း မေႇသေႃးပေႃးတႃႉမိ ဢေႃႈ။

၁၁ ၶိင်ႇႁူဝ်ၶမ်ႈၶိင်ႇဢၼ်ၽူႈယိင်းတင်းလၢႆမႃးတဵၵ်းၼမ်ႉၼၼ်ႉ မၼ်းႁႂ်ႈၵလႃႇဢုၵ်ႉမၼ်းၸိူဝ်းၼၼ်ႉ ၶုပ်ႉၶဝ်ႇၵႃႈၼွၵ်ႈဝဵင်းၵႃႈ တီႈႁိမ်းၼမ်ႉမေႃႇဢေႃႈ။

၁၂ မၼ်းသူးတွင်းဝႃႈ၊-ထႃႇဝရႃႉႉၽြႃး၊ၽြႃးပဵၼ်ၸဝ်ႈ ဢႃႇပြႁမ်ႇ ၸဝ်ႈၵဝ်ၶႃႈၼၼ်ႉတီႈၶႃႈ။ဝၼ်းမိူဝ်ႈၼႆႉၶႅၼ်းတေႃႈႁႂ်ႈတၢင်းၵျၢမ်ႇတၢင်းပွင်ၶႃႈၸဝ်ႈပဵၼ်လႄႈ ႁဵတ်းၵျေးၸူးတီႈ ဢႃႇပြႁမ်ႇ ၸဝ်ႈ ၵဝ်ၶႃႈၼၼ်ႉသေၵမ်းတီႈၶႃႈ။

၁၃ ၶႃႈၸဝ်ႈၸုၵ်းယူႇၵႃႈတီႈႁိမ်းၼမ်ႉမေႃႇၼႆႉလႄႈ ၼႂ်းမိူဝ်ႈဢၼ်လုၵ်ႈယိင်းသၢဝ်ၵူၼ်းဝဵင်းၸိူဝ်းၼႆႉမႃးတဵၵ်းၼမ်ႉၼၼ်ႉ လုၵ်ႈယိင်း သၢဝ်ၵေႃႉလႂ်သေဢမ်ႇဝႃႈ ပေႃးၶႃႈၸဝ်ႈဝႃႈ၊-

၁၄ ၶျႃးၼမ်ႉတဝ်ႈမႂ်းပုၼ်ႈဢၼ်ၵဝ်တၵ်းၵိၼ်သေၵမ်း ဝႃႈၼင်ႇၼႆလႄႈပေႃးမၼ်းၶိုၼ်းလၢတ်ႈဝႃႈ၊- ၵိၼ်သေၵမ်းၶႃႈ။တီႈၵလႃႇဢုၵ်ႉၸဝ်ႈၸိူဝ်းၼႆႉၵေႃႈ တၵ်းတိုၵ်းပၼ်ၼမ်ႉဢေႃႈ၊ ဝႃႈၼင်ႇၼႆၼၼ်ႉၸိုင်ႁႂ်ႈလုၵ်ႈယိင်းသၢဝ်ၵေႃႉၼၼ်ႉပဵၼ်ၵေႃႉဢၼ်ၸဝ်ႈႁဝ်းၶၢၼ်းဝႆႉပုၼ်ႈ ဢိၸၵ်ႉၼၼ်ႉသေၵမ်းတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၶႃႈၸဝ်ႈတၵ်းလႆႈႁူႉလွင်ႈဢၼ် ၸဝ်ႈႁဝ်းႁဵတ်းၵျေးၸူးတီႈၵဝ်ၶႃႈၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။

၁၅ ၼႂ်းမိူဝ်ႈဢၼ် မၼ်းယင်းတိုၵ်ႉလဝ်ႈလၢတ်ႈၸိူဝ်ႉၼင်ႇၼၼ်ဢမ်ႇပႆႇယဝ်ႉၼၼ်ႉမၼ်းႁၼ် ရေႇပိၵ်ႉၵ ဢၼ်ပဵၼ်လုၵ်ႈယိင်း ပေႇသူၺ်ႇလ၊ ဢၼ်ပဵၼ်လုၵ်ႈၸၢႆးမိလၶ၊ ဢၼ်ပဵၼ်မေးၼႃႇၶေႃႇ၊ ဢၼ်ပဵၼ်ပီႈၸၢႆးဢႃႇႁမ်ႇ ၼၼ်ႉ ႁၢပ်ႇၼမ်ႉတဝ်ႈတၢင်ႇၵႃႈၼိူဝ်ႁူဝ်မႃႇ မၼ်းသေလႄႈဢွၵ်ႇမႃးဢေႃႈ။

၁၆ လုၵ်ႈယိင်းသၢဝ်ၼၼ်ႉႁၢင်ႊလီၽၢင်လီၼႃႇလူင်လၢင်လႄႈ ပဵၼ်သဝ်ၵၼ်ႇၺႃႇဢၼ်ဢမ်ႇပႆႇသိူၵ်ႈသမ်ႇၵၼ်တင်းၵူၼ်းၸၢႆးၼၼ်ႉဢေႃႈ။မၼ်းလူင်းၸူးၵႃႈတီႈၼမ်ႉမေႃႇလႄႈ ထႅမ်ၼမ်ႉတဵမ်ၼမ်ႉတဝ်ႈသေယဝ်ႉၶိုၼ်ႈမႃးဢေႃႈ။

၁၇ ၶႃႈၼၼ်ႉၵေႃႈ လႅၼ်ႈၵွႃႇၸူးႁႂ်ႈလႆႈထူပ်းၵၼ်တင်းမၼ်းသေယဝ်ႉယွၼ်းဝႃႈ၊-ႁႂ်ႈလႆႈၵိၼ်ၼမ်ႉၼႂ်းၼမ်ႉတဝ်ႈမႂ်းၼႆႉဢိတ်းၼိုင်ႈ၊မိူဝ်ႈဢၼ်ဝႃႈၼင်ႇၼႆၸိုင် မေႈယိင်း ၼၼ်ႉၵေႃႈလၢတ်ႈလႄႈဝႃႈ၊-

၁၈ ၵိၼ်ၶႃႈလႄႈၸဝ်ႈ၊ဝႃႈၼင်ႇၼႆသေယဝ်ႉ ၶျႃးၼမ်ႉတဝ်ႈလူင်းသႂ်ႇၵႃႈၼိူဝ်မိုဝ်းမၼ်းၵမ်းလဵဝ်လႄႈပၼ်ၵိၼ်ၼမ်ႉဢေႃႈ။

၁၉ မၼ်းပၼ်ၵိၼ်ၼမ်ႉယဝ်ႉလႄႈ သမ်ႉလၢတ်ႈလႄႈဝႃႈ၊-ပုၼ်ႈၵလႃႇဢုၵ်ႉၸဝ်ႈႁဝ်းၸိူဝ်းၼၼ်ႉၵေႃႈ ၵဝ်ၶႃႈတၵ်းတဵၵ်းပၼ် ႁႂ်ႈၶဝ်ပေႃးလႆႈၵိၼ်ဢိမ်ႇဢိမ်ႇတဵမ်တဵမ်ၶႃႈ ဢေႃႈ၊ဝႃႈၼင်ႇၼႆသေယဝ်ႉ၊

၂၀ မၼ်းဢဝ်ၼမ်ႉဢၼ်မီးၵႃႈၼႂ်းတဝ်ႈၼၼ်ႉ ထွၵ်ႇသႂ်ႇၼႂ်းႁၢင်းဢၼ်တိုၵ်းၼမ်ႉၼၼ်ႉသေယဝ်ႉ သမ်ႉၶိုၼ်းလႅၼ်ၵွႃႇၸူးၵႃႈတီႈၼမ်ႉမေႃႇ ႁႂ်ႈလႆႈတဵၵ်းၼမ်ႉထႅင်ႈလႄႈ ပၼ်ပုၼ်ႈၵလႃႇဢုၵ်ႉၸိူဝ်း ၼၼ်ႉဢေႃႈ။

၂၁ ၶႃႈၼၼ်ႉဢၢမ်းလွင်ႈမေႈယိင်းၼၼ်ႉလႄႈၶႂ်ႈႁူႉလွင်ႈဢၼ်ၸွင်ႇထႃႇဝရႃႉၽြႃး ပွင်ႁဵတ်းဢမူႉဢၼ်မၼ်းႁွတ်ႈမႃးၼၼ်ႉႁိုဝ်၊ ဢမ်ႇပွင်ႁဵတ်းႁိုဝ်ဢၼ်ဝႃႈၼၼ်ႉလႄႈမၼ်းယူႇတဵတ်ႇတဵတ်ႇဢေႃႈ။

၂၂ လိုၼ်းသေ ၵလႃႇဢုၵ်ႉၸိူဝ်းၼၼ်ႉၵိၼ်ၼမ်ႉယဝ်ႉ ၶႃႈၵူၼ်းၸၢႆးၼၼ်ႉၵေႃႈ ဢဝ်သွႆႈၶမ်း ဢၼ်ႁွႆးၶူႈလင်ဢၼ်ၼမ်ႉၼၵ်းမၼ်းမီးၶိုင်ႈၵျၢပ်ႈသၶေႇလ ဢိၵ်ႇတင်းဝႅၼ်ၶမ်းၵူႈၼိုင်ႈ ဢၼ်ၼမ်ႉၼၵ်းမီး ၵျၢပ်ႈသၶေႇလသိပ်းၵျၢပ်ႈၸိူဝ်းၼၼ်ႉဢွၵ်ႇသေယဝ်ႉ၊ထၢမ်ဝႃႈ၊- မႂ်းပဵၼ်လုၵ်ႈယိင်းၽူႈလႂ်၊ မွၵ်ႇလၢတ်ႈတီႈၵဝ်သေၵမ်း။

၂၃ ၵႃႈတီႈႁိူၼ်းပေႃႈမႂ်းၼၼ်ႉ မီးပုၼ်ႈတႃႇဢၼ်ႁဝ်းၶႃႈတၵ်းလိုဝ်ႈသဝ်းယူႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊မေႈယိင်းၼၼ်ႉၵေႃႈလၢတ်ႈဝႃႈ၊-

၂၄ ၵဝ်ၶႃႈပဵၼ်လုၵ်ႈယိင်း ပေႇသူၺ်ႇလ၊ လၢၼ် မိလၶႃႇ တင်းၼႃႇၶေႃႇၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းသမ်ႉလၢတ်ႈဝႃႈ၊-

၂၅ ၵႃႈတီႈႁဝ်းၶႃႈမီးယိူဝ်ႈႁႅင်ႈပုၼ်ႈဢၼ်လီၵိၼ်လီၶူပ်းလႂ်၊ ဢိၵ်ႇတင်းတီႈဢၼ်တၵ်းလိုဝ်ႈသဝ်းယူႇ ၶႃႈဢေႃႈ၊ဝႃႈၼင်ႇၼႆဢေႃႈ။

၂၆ မိူဝ်ႈၼၼ်ႉၶႃႈၵူၼ်းၸၢႆးၼၼ်ႉၵူမ်ႈႁူဝ်ၵူဝ်းၵွႃႇႇထႃႇဝရႃႉၽြႃးသေလႄႈ ဢွၵ်ႇ သူပ်းဝႃႈ၊-

၂၇ ႁႂ်ႈထႃႇဝရႃႉၽြႃးၽြႃး ဢႃႇပြႁမ်ႇ ဢၼ်ဢမ်ႇသိမ်းဢဝ် ၵရူႉၼႃႇတင်းသႅတ်ႉၸႃႇသေၵႃႈတီႈၸဝ်ႈၵဝ်ၶႃႈၼၼ်ႉမီးမင်ႇၵလႃႇ သေၵမ်းလူၺ်ႈတီႈၶႃႈ။ၼႂ်းမိူဝ်ႈဢၼ် ၵဝ်ၶႃႈယင်းတိုၵ်ႉၸွမ်းၼႂ်းသဵၼ်ႈတၢင်းၵွႃႇယူႇၼၼ်ႉ ထႃႇဝရႃႉၽြႃးဢဝ်ၵဝ်ၶႃႈသေလႄႈသူင်ႇႁွတ်ႈၵႃႈတီႈႁိူၼ်းပီႈၼွင်ႉၸဝ်ႈၵဝ်ၶႃႈယဝ်ႉလူင်ပေႇ၊ ဝႃႈ ၼင်ၼႆဢေႃႈ။

၂၈ လုၵ်ႈယိင်းသၢဝ်ၼၼ်ႉၵေႃႈ လႅၼ်ႈၵွႃႇမွၵ်ႇလၢတ်ႈလွင်ႈတၢင်းၸိူဝ်းၼၼ်ႉ ၵႃႈတီႈႁိူၼ်းမေႈမၼ်းဢေႃႈ။

၂၉ရေႇပိၵ်ႉၵ မီးပီႈၸၢႆးၵေႃႉၼိုင်ႈဢၼ်လႆႈၸိုဝ်ႈလႃႇပၢၼ်ႇ ၼၼ်ႉဢေႃႈ။ မိူဝ်ႈဢၼ်မၼ်းလႆႈႁၼ်သွႆႈၶမ်းႁွႆးၶူႈလင်တင်း ဝႅၼ်ဢၼ်မီးၵႃႈတီႈမိုဝ်းၼွင်ႉယိင်းမၼ်းၼၼ်ႉလႄႈ သမ်ႉလႆႈငိၼ်းၵႂၢမ်းဢၼ်ၼွင်ႉယိင်း မၼ်း ရေႇပိၵ်ႉၵ ၶႆၼႄၼၼ်ႉလႄႈ

၃၀ လႃႇပၢၼ်ႇ ၵေႃႈၶုၼ်ႇလႅၼ်ႈၵွႃႇၸူးၵႃႈတီႈၼမ်ႉမေႃႇ ဢၼ်ၶႃႈၵူၼ်းၸၢႆးမီးၼၼ်ႉဢေႃႈ။မၼ်းႁွတ်ႈထိုင်ၵႃႈတီႈၵေႃႉၼၼ်ႉသေယဝ်ႉ လႆႈႁၼ်ၵေႃႉၼၼ်ႉ ၸုၵ်းယူႇၵႃႈႁိမ်းၵလႃႇဢုၵ်ႉၸိူဝ်းၼၼ်ႉၵႃႈတီႈႁိမ်းၼမ်ႉမေႃႇၼၼ်ႉဢေႃႈ။

၃၁ မၼ်းၵေႃႈလၢတ်ႈဝႃႈ၊-ၵေႃႉဢၼ်ထႃႇဝရႃႉၽြႃးပၼ်တၢင်းလီၼႆႉဢိူၺ်း။ၶဝ်ႈၵႃႈၼႂ်းႁိူၼ်းၵဝ်ၶႃႈသေၵမ်း။ ႁဵတ်းသၢင်လႄႈၸုၵ်းယူႇၵႃႈတီႈၼွၵ်ႈၼႆႉ။ၵဝ်ၶႃႈမႄးႁႅၼ်းႁိူၼ်းဢိၵ်ႇတင်း တီႈဢၼ်ၵလႃႇဢုၵ်ႉလႂ်တၵ်းယူႇၼၼ်ႉၶႃႈယဝ်ႉ၊ ဝႃႈၼင်ႇၼႆလႄႈႁွင်ႉဢဝ်ၵူၼ်းၸၢႆးၼၼ်ႉမိူဝ်းၸူးၵႃႈတီႈႁိူၼ်းလႄႈ ပူတ်းၶိူင်ႈဢၼ်တၢင်ႇၼိူဝ်ၵလႃႇဢုၵ်ႉၼၼ်ႉသေယဝ်ႉ ပၼ်ယိူဝ်ႈႁႅင်ႈ ဢိၵ်ႇတင်းတၢင်းၵိၼ်တီႈ ၵလႃႇဢုၵ်ႉတင်းလၢႆလႄႈ ပၼ်ၼမ်ႉပုၼ်ႈဢၼ်ၶႃႈၵူၼ်းၸၢႆး ဢိၵ်ႇတင်းၶဝ်ၸိူဝ်းဢၼ်ၸွမ်းမၼ်းမႃးၸိူဝ်းၼၼ်ႉ တၵ်းသုၵ်ႈတိၼ်ၼၼ်ႉ ဢေႃႈ။

၃၃ မိူဝ်ႈဢၼ်ဢဝ်တၢင်းၵိၼ်သႂ်ႇတမ်းပၼ်ၵႃႈတီႈၽၢႆႇၼႃႈၵေႃႉၼၼ်ႉၸိုင် ၵေႃႉၼၼ်ႉလၢတ်ႈလႄႈဝႃႈ၊-

၃၄ ၸူဝ်ႈဢၼ် ၵဝ်ၶႃႈ ဢမ်ႇပႆႇလႆႈလၢတ်ႈလွင်ႈတၢင်းဢၼ်ၵဝ်ၶႃႈမႃးၼၼ်ႉၸိုင် ၵဝ်ၶႃႈတၵ်းဢမ်ႇပႆႇၵိၼ်တၢင်းၵိၼ်တၢင်းၶူပ်းၵူၺ်း၊ ဝႃႈၼင်ႇၼႆလႄႈ မၼ်းၵေႃႈလၢတ်ႈဝႃႈ၊-လၢတ်ႈသေၵမ်းဝႃႈၼင်ႇၼႆဢေႃႈ။

၃၅ ၵေႃႉၼၼ်ႉၵေႃႈလၢတ်ႈလႄႈဝႃႈ၊- ၵဝ်ၶႃႈပဵၼ် ၶႃႈဢႃႇပြႁမ်ႇ ဢေႃႈ။ ပိူဝ်ႈဢၼ် ထႃႇဝရႃႉၽြႃး ပၼ်တၢင်းလီတီႈၸဝ်ႈၵဝ်ၶႃႈ ၼမ်ၼႃႇလူင်လၢင် လႄႈမၼ်းႁွတ်ႈထိုင် တၢင်းဢၼ်ယႂ်ႇမျၢတ်ႈယဝ်ႉ။ မၼ်းၸဝ်ႈပၼ်ၽုင်သူဝ်း၊ၽုင်ဝူဝ်း၊ငိုၼ်းၶမ်း၊ ၶႃႈၵူၼ်းၸၢႆးၶႃႈၵူၼ်းယိင်း ၵလႃႇဢုၵ်ႉလႂ် ဢိၵ်ႇတင်း မႃႉလီႈလႂ် ယဝ်ႉ။

၃၆ ၸႃႇရႃႇ၊ မေးၸဝ်ႈၵဝ်ၶႃႈၼၼ်ႉၵေႃႈ၊မိူဝ်ႈဢၼ်ဢသၢၵ်ႈထဝ်ႈၼၼ်ႉ လႆႈၵိူတ်ႇလဵင်ႉလုၵ်ႈၸၢႆးမႃးလႄႈတီႈလုၵ်ႈၸၢႆးၼၼ်ႉၵေႃႈ၊ မၼ်းဢဝ်ဢုၵ်ႉၸႃႇၵႃႈမီးတင်းသဵင်ႈတင်းလူင်ဢၢပ်ႈပၼ်ယဝ်ႉ။

၃၇ ၸဝ်ႈၵဝ်ၶႃႈၼၼ်ႉႁႂ်ႈၵဝ်ၶႃႈတိူင်ႇဝႃႈ၊-မႂ်းတေဢမ်ႇလႆႈလိူၵ်ႈၵဵပ်းဢဝ်မေးပုၼ်ႈလုၵ်ႈၸၢႆးၵဝ် ၵႃႈၼႂ်းလုၵ်ႈယိင်းၸိူဝ်ႉၶိူဝ်းၵူၼ်း ၶႃႇၼၼ်ႇ၊

၃၈ မိူင်းတီႈဢၼ်ၵဝ်ယူႇၼႆႉလႄႈ မႂ်းတၵ်းလႆႈၵွႃႇၵႃႈတီႈႁိူၼ်းပေႃႈၵဝ် တီႈပီႈၼွင်ႉၸိူဝ်ႉၶိူဝ်းၵဝ်ၼၼ်ႉလႄႈ လိူၵ်ႈၵဵပ်းဢဝ်မေးပုၼ်ႈလုၵ်ႈၸၢႆးၵဝ်တႃႉ၊ဝႃႈ ၼင်ႇၼႆဢေႃႈ။

၃၉ ၵဝ်ၶႃႈၵေႃႈထၢမ်လႄႈဝႃႈ၊- ပေႃးမေႈယိင်းၼၼ်ႉဢမ်ႇမီးဢလူဝ်ႇၶႂ်ႈၸွမ်းမႃးၸိုင်၊ တၵ်းလႆႈႁဵတ်းၸိူဝ်ႉၼင်ႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်မၼ်း ၵေႃႈလၢတ်ႈဝႃႈ၊-

၄၀ ထႃႇဝရႃႉၽြႃးဢၼ်ၵဝ်လႆႈပႆမႃးၽၢႆႇၼႃႈမၼ်းၸဝ်ႈၼၼ်ႉ တၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈ ၵွႃႇလူၺ်ႈၵၼ်တင်းမႂ်းလႄႈပွင်ႁဵတ်းလွင်ႈၼၼ်ႉပုၼ်ႈမႂ်းဢေႃႈ။ မႂ်းတၵ်းလႆႈလိူၵ်ႈၵဵပ်းဢဝ်မေးပုၼ်ႈလုၵ်ႈၸၢႆးၵဝ် ၵႃႈၼႂ်းပီႈၼွင်ႉၸိူဝ်ႉၶိူဝ်းၵဝ်၊ ၵႃႈၼႂ်း ႁိူၼ်းပေႃႈၵဝ်ၼၼ်ႉဢေႃႈ။

၄၁ မိူဝ်ႈဢၼ်မႂ်းႁွတ်ႈထိုင်ၵႃႈတီႈပီႈၼွင်ႉၸိူဝ်ႉၶိူဝ်းၵဝ်ၼၼ်ႉၸိုင် ႁႂ်ႈမႂ်းၵၢင်းလွတ်ႈတင်းတၢင်းဢၼ်ၵိၼ်ႇဝႃႈဢၼ်ၵဝ်ပၼ်ၼႆႉဢေႃႈ၊ ဝႃႈ ၼႆၶႃႈဢေႃႈ။

၄၂ ဝၼ်းမိူဝ်ႈၼႆႉၵဝ်ၶႃႈႁွတ်ႈထိုင်မႃးၵႃႈတီႈၼမ်ႉမေႃႇသေယဝ်ႉသူးတွင်းဝႃႈ၊-ထႃႇဝရႃႉၽြႃး၊ ၽြႃး ပဵၼ်ၸဝ်ႈၵဝ်ၶႃႈ ဢႃႇပြႁမ်ႇ ၼၼ်ႉတီႈၶႃႈ။

၄၃ ပေႃးၸဝ်ႈႁဝ်းပွင်ႁဵတ်းလွင်ႈတၢင်း ဢၼ်ၶႃႈၸဝ်ႈႁွတ်ႈမႃးၼႆႉတေႃႈလဵဝ်ၼႆႉၸိုင်၊ မိူဝ်ႈဢၼ်ၶႃႈၸဝ်ႈယင်းတိုၵ်ႉၸုၵ်းယူႇၵႃႈတီႈႁိမ်းၼမ်ႉမေႃႇၼႆႉသေလႄႈ ပေႃးၵဝ်ၶႃႈယွၼ်းတီႈ ၵၼ်ႇၺႃႇလုၵ်ႈယိင်းသၢဝ်သေၵေႃႉၵေႃႉ ဢၼ်မႃးတဵၵ်းၼမ်ႉၼၼ်ႉလႄႈဝႃႈ၊-ပၼ်ၼမ်ႉၼႂ်းၼမ်ႉတဝ်ႈမႂ်း ပုၼ်ႈဢၼ်ၵဝ်ၶႃႈတၵ်းၵိၼ်ဢိတ်းၼိုင်ႈသေ ၵမ်း ဝႃႈၼင်ႇၼႆလႄႈပေႃးမၼ်းၶိုၼ်းလၢတ်ႈဝႃႈ၊-

၄၄ ၵိၼ်သေၵမ်း။တီႈၵလႃႇဢုၵ်ႉၸဝ်ႈၸိူဝ်းၼႆႉၵေႃႈတၵ်းတဵၵ်းၼမ်ႉပၼ်ဢေႃႈ၊ဝႃႈၼင်ႇၼႆၸိုင်၊ ႁႂ်ႈၵေႃႉၼၼ်ႉပဵၼ်မေႈယိင်းဢၼ်ၸဝ်ႈႁဝ်းၶၢၼ်းဝႆႉ ပုၼ်ႈလုၵ်ႈၸၢႆးၸဝ်ႈၵဝ်ၶႃႈၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

၄၅ ၸူဝ်ႈဢၼ်ၵဝ်ၶႃႈလၢတ်ႈယူႇ ၼႂ်းႁူဝ်ၸႂ် ၸိူဝ်ႉၼင်ႇၼၼ်ယူႇလႄႈဢမ်ႇပႆႇယဝ်ႉၼၼ်ႉ၊တူၺ်းလူႊ၊ ရေႇပိၵ်ႉၵႁၢပ်ႇၼမ်ႉတဝ်ႈတၢင်ႇၵႃႈၼိူဝ်ႁူဝ်မႃႇမၼ်းလႄႈ ဢွၵ်ႇလူင်းၸူးၵႃႈတီႈၼမ်ႉမေႃႇတဵၵ်းၼမ်ႉလႄႈ ၵဝ်ၶႃႈၵေႃႈ ယွၼ်းတီႈမၼ်းဝႃႈ၊-

၄၆ ႁႂ်ႈၵဝ်လႆႈၵိၼ်ၼမ်ႉသေၵမ်း၊ ဝႃႈၼင်ႇၼႆသေယဝ်ႉ၊ မၼ်းၶျႃးၼမ်ႉတဝ်ႈလူင်းသေ ၵႃႈၼိူဝ်ႁူဝ်မႃႇမၼ်းၶၼ်ၶၼ်ၽႂ်းၽႂ်းလႄႈလၢတ်ႈဝႃႈ၊-ၵိၼ်သေၵမ်း။တီႈၵလႃႇဢုၵ်ႉၸဝ်ႈၸိူဝ်းၼၼ်ႉၵေႃႈၵဝ်ၶႃႈတၵ်းတိုၵ်းၼမ်ႉပၼ်ၶႃႈဢေႃႈ၊ ဝႃႈၼင်ႇၼႆလႄႈၵဝ်ၶႃႈလႆႈၵိၼ်ဢေႃႈ။ တီႈၵလႃႇဢုၵ်ႉတင်းလၢႆၵေႃႈ မၼ်းတိုၵ်းၼမ်ႉပၼ်ဢေႃႈ။

၄၇ ၵဝ်ၶႃႈၵေႃႈထၢမ်တီႈမၼ်းလႄႈဝႃႈ၊- မႂ်းပဵၼ်လုၵ်ႈယိင်းၽူႈလႂ်၊ မိူဝ်ႈဢၼ်ဝႃႈၼင်ႇၼႆၼၼ်ႉ၊ မၼ်းဝႃႈ၊-ၵဝ်ၶႃႈပဵၼ်လုၵ်ႈယိင်းပေႇသူၺ်ႇလ လုၵ်ႈၸၢႆး ၼႃႇၶေႃႇ ဢၼ် မိလၶႃႇၵိူတ်ႇလဵင်ႉမႃးၶႃႈဢေႃႈ၊ဝႃႈၼင်ႇၼႆဢေႃႈ။ ၵဝ်ၶႃႈၵေႃႈဢဝ်သွႆႈၶမ်းႁွႆႈၶူႈလင်သႂ်ႇပၼ်ၵႃႈတီႈၼႃႈမၼ်း၊ ဢဝ် ဝႅၼ်တိုဝ်းပၼ်ၵႃႈတီႈမိုဝ်းမၼ်းသေယဝ်ႉ၊

၄၈ ၵူမ်ႈႁူဝ်လႄႈၵူဝ်းၵွႃႇႇထႃႇဝရႃႉၽြႃးလႄႈ ပၼ်တၢင်းလီတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈ ဢႃႇပြႁမ်ႇ ဢၼ်ဢဝ်သူင်ႇၵဝ်ၶႃႈမႃး ၼႂ်းသဵၼ်ႈတၢင်းဢၼ်ၸိုဝ်ႈဢၼ်ၸႂ်ႈ ႁႂ်ႈလႆႈဢဝ်လၢၼ်ယိင်းပီႈၸၢႆးၸဝ်ႈၵဝ်ၶႃႈ ပုၼ်ႈ လုၵ်ႈၸၢႆးၸဝ်ႈၵဝ်ၶႃႈၼၼ်ႉဢေႃႈ။

၄၉ တေႃႈလဵဝ်ၼႆႉသူၸဝ်ႈတၵ်းႁဵတ်းၵျေးၸူး ဢိၵ်ႇတင်းသႅတ်ႉၸႃႇတီႈၸဝ်ႈၵဝ်ၶႃႈႁိုဝ်၊တၵ်းဢမ်ႇႁဵတ်းႁိုဝ်၊ လၢတ်ႈသေၵမ်း။ၵဝ်ၶႃႈၵေႃႈၵႃႈတီႈတၢင်းၽၢႆႇၶႂႃလႄႈသင်၊ ၵႃႈတီႈတၢင်းၽၢႆႇသၢႆႉလႄႈသင်၊ တၵ်းၸွမ်းၵွႃႇသေတၢင်းတၢင်းဢေႃႈ၊ဝႃႈၼင်ၼႆဢေႃႈ။

၅၀ လႃႇပၢၼ်ႇ တင်း ပေႇသူၺ်ႇလ ၵေႃႈၶိုၼ်းလၢတ်ႈဝႃႈ၊-လွင်ႈတၢင်းၼႆႉပဵၼ်လွင်ႈတၢင်းဢၼ်ထႃႇဝရႃႉၽြႃးၸီႇယၢင်ႇဢေႃႈ။ႁဝ်းဢမ်ႇၸၢင်ႊၶိုၼ်းလၢတ်ႈ လွင်ႈဢၼ်လီဢမ်ႇလီတီႈမႂ်း။

၅၁ တူၺ်းလူႊ၊ ရေႇပိၵ်ႉၵမီးယူႇၵႃႈတီႈၽၢႆႇၼႃႈမႂ်းဢေႃႈ။ဢဝ်ၵွႃႇတႃႉ။ႁႂ်ႈမၼ်းပဵၼ်မေးလုၵ်ႈၸၢႆးၸဝ်ႈမႂ်း ၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉတႃႉ၊ဝႃႈၼင်ႇၼႆဢေႃႈ။

၅၂ မိူဝ်ႈဢၼ်ၶႃႈ ဢႃႇပြႁမ်ႇ ငိၼ်းၵႂၢမ်းၼၼ်ႉၸိုင်၊မၼ်းၵူမ်ႈႁူဝ်ၵွမ်းႁူဝ်လႄႈ ၵူဝ်းၵွႃႇႇထႃႇဝရႃႉၽြႃးသေယဝ်ႉ၊ဢဝ်ၵွၵ်းငိုၼ်းၵွၵ်းၶမ်းဢိၵ်ႇတင်း ၶူဝ်းၼုင်ႈတၢင်းမႆႊ ဢွၵ်ႇလႄႈ ပၼ်တီႈ ရေႇပိၵ်ႉၵ ဢေႃႈ။

၅၃ တီႈပီႈၸၢႆးတင်းမေးမၼ်းၵေႃႈ မၼ်းပၼ်လၢၵ်ႈသွင်ႇဢၼ်ထိူၵ်ႈ ၵႃႊထိူၵ်ႈၶၼ်ဢေႃႈ။

၅၄ မၼ်းဢိၵ်ႇတင်းၶဝ်ၸိူဝ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉႁူမ်ႈၵၼ်ၵိၼ်လႄႈ ႁႂ်ႈပူၼ်ႉၶိုၼ်းသေယဝ်ႉၶိင်ႇၵၢင်ၼႂ်လုၵ်ႉလႄႈဝႃႈ၊-ႁႂ်ႈၵဝ်ၶႃႈ လႆႈၶိုၼ်းမိူဝ်းၵွႃႇၵႃႈတီႈ ၸဝ်ႈၵဝ်ၶႃႈသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်၊ပီႈၸၢႆးမၼ်းတင်းမေႈမၼ်းလၢတ်ႈလႄႈဝႃႈ၊-

၅၅ ႁႂ်ႈမေႈယိင်းဢွၼ်ႇၼႆႉယူႇၵႃႈတီႈႁဝ်းသသေိပ်းဝၼ်းသေၵမ်း။ၵမ်းလိုၼ်းၸင်ႇႁႂ်ႈ မၼ်းၵွႃႇသေၵမ်း၊ဝႃႈၼင်ႇၼႆဢေႃႈ။

၅၆ ၵေႃႉၼၼ်ႉၵေႃႈလၢတ်ႈလႄႈဝႃႈ၊- ယႃႇပေႁႄႉၶႅၼ်ၵဝ်ၶႃႈသေၵမ်း။ထႃႇဝရႃႉၽြႃးပွင်ႁဵတ်း လွင်ႈတၢင်းဢၼ်ၵဝ်ၶႃႈႁွတ်ႈမႃးၼႆႉယဝ်ႉယဝ်ႉ။ ႁႂ်ႈၵဝ်ၶႃႈလႆႈၶိုၼ်းမိူဝ်းၵွႃႇၵႃႈတီႈၸဝ်ႈၵဝ်ၶႃႈပုၼ်ႉသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၵေႃႈလၢတ်ႈလႄႈဝႃႈ၊-

၅၇ ၵဝ်တၵ်းႁွင်ႉဢဝ်မေႈယိင်းဢွၼ်ႇလႄႈ ထၢမ်တူၺ်းဢလူဝ်ႇမၼ်းလူးၵွၼ်ႇဢေႃႈ၊ဝႃႈၼင်ႇၼႆလႄႈ ၶဝ်ႁွင်ႉဢဝ် ရေႇပိၵ်ႉၵ လႄႈထၢမ် ဝႃႈ၊-

၅၈ ၸွင်ႇမႂ်းတေၸွမ်းလူၺ်ႈၵၼ်တင်းၵေႃႉၼႆႉၵွႃႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလၢတ်ႈဝႃႈ၊-ၵဝ်ၶႃႈတၵ်းၸွမ်းၶႃႈဢေႃႈ၊ဝႃႈၼင်ႇၼႆဢေႃႈ။

၅၉ ၵမ်းၼၼ်ႉၶဝ်ပွႆႇ ရေႇပိၵ်ႉၵ တင်းၵေႃႉဢၼ်လူဢၼ်ထိင်းမၼ်းဢိၵ်ႇတင်းၶႃႈ ဢႃႇပြႁမ်ႇ တင်းၵူၼ်းမၼ်းၸိူဝ်းၼၼ်ႉမိူဝ်းၵွႃႇသေဢေႃႈ။

၆၀ ၶဝ်ပၼ်တၢင်းလီတီႈရေႇပိၵ်ႉၵ လႄႈဝႃႈ၊-ၼွင်ႉယိင်းႁဝ်းဢိူၺ်း။ႁႂ်ႈပဵၼ်မေႈမိုၼ်ႈမေႈသႅၼ်သေၵမ်း။ႁႂ်ႈၸိူဝ်ႉၶိူဝ်းမႂ်းဢုပ်ႉပိူင်ႇၽၵ်းတူဝဵင်းရၢၼ်ႇသူႇတင်းလၢႆသေၵမ်း၊ဝႃႈၼင်ႇၼႆဢေႃႈ။

၆၁ ရေႇပိၵ်ႉၵ ဢိၵ်ႇတင်းမေႈယိင်းဢွၼ်ႇမၼ်းၸိူဝ်းၼၼ်ႉလုၵ်ႉၶီႇၵလႃႇဢုၵ်ႉလႄႈ ၸွမ်းလူၺ်ႈၵၼ်တင်းၶႃႈၵူၼ်းၸၢႆးၼၼ်ႉၵွႃႇဢေႃႈ။ ၼင်ႇၼၼ်လႄႈ ၶႃႈဢႃႇပြႁမ်ႇၼၼ်ႉဢဝ် ရေႇပိၵ်ႉၵ လႄႈမိူဝ်းၵွႃႇဢေႃႈ။

၆၂ မိူဝ်ႈၼၼ်ႉ ဢိၸၵ်ႉ ၸွမ်းသဵၼ်ႈတၢင်း ပေႇလႁေႇရွႆႇလႄႈႁွတ်ႈမႃးဢေႃႈ။ လွင်ႈမၼ်းၸမ်း၊မၼ်းယူႇၵႃႈၼိူဝ်ပွတ်းတၢင်းၸၢၼ်းၼၼ်ႉဢေႃႈ။

၆၃ ၶိင်ႇႁူဝ်ၶမ်ႈဢိၸၵ်ႉ ဢွၵ်ႇၵွႃႇ ႁႂ်ႈလႆႈၶႆႈၸႂ်ဝူၼ်ႉၸႂ်ၵႃႈတီႈၼႂ်းထိူၼ်ႇလႄႈမုင်ႈတူၺ်းသေယဝ်ႉ လႆႈႁၼ်ၵလႃႇဢုၵ်ႉတင်းလၢႆ မႃးယူႇဢေႃႈ။

၆၄ ရေႇပိၵ်ႉၵ ၵေႃႈမုင်ႈတူၺ်းလႄႈမိူဝ်ႈဢၼ်ႁၼ် ဢိၸၵ်ႉ ၼၼ်ႉၸိုင်လူင်းသေၵႃႈၼိူဝ်ၵလႃႇ ဢုၵ်ႉသေယဝ်ႉထၢမ်ၶႃႈၼၼ်ႉဝႃႈ၊-

၆၅ ၵေႃႉဢၼ်မႃးၵႃႈတီႈၼႂ်းထိူၼ်ႇႁႂ်ႈလႆႈႁပ်ႉႁူဝ်တၢင်းႁဝ်းၼၼ်ႉၸမ်း ပဵၼ်ၽူႈလႂ်၊ ဝႃႈၼင်ႇၼႆလႄႈၶႃႈၼၼ်ႉၵေႃႈလၢတ်ႈလႄႈဝႃႈ၊-ၵေႃႉၼၼ်ႉပဵၼ်ၸဝ်ႈၵဝ်ၶႃႈယဝ်ႉ၊ ဝႃႈၼင်ႇၼႆဢေႃႈ။မိူဝ်ႈၼၼ်ႉမၼ်းဢဝ်ၽႃႈဢၼ်ႁူမ်ႇၼႃႈလႄႈ ႁူမ်ႇၼႃႈ မၼ်းသေဢေႃႈ။

၆၆ ၶႃႈၼၼ်ႉမွၵ်ႇလၢတ်ႈလွင်ႈတၢင်းၵႃႈဢၼ်မၼ်းလႆႈႁဵတ်းမႃးယဝ်ႉတင်းသဵင်ႈတင်းလူင်ၼၼ်ႉတီႈ ဢိၸၵ်ႉ လႄႈ ဢိၸၵ်ႉ ၸင်ႇဢဝ် ရေႇပိၵ်ႉၵၵွႃႇသူင်ၵႃႈတီႈသုမ်ႉထဵင်မေႈမၼ်းၸႃႇရႃႇ ၼၼ်ႉလႄႈ ဢဝ်မၼ်းႁဵတ်းမေးဢေႃႈ။

၆၇ ဢိၸၵ်ႉ ႁၵ်ႉပႅင်း ရေႇပိၵ်ႉၵလႄႈႁွတ်ႈထိုင်တၢင်းဢၼ်သၢၵ်ႈသႃႇ ၼႂ်းလွင်ႈတၢင်းဢၼ်မေႈမၼ်းတၢႆၼၼ်ႉဢေႃႈ။