Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၁

ၼုၵ်ႉၵပၢတ်ႈၸဝ်ႈၶၢမ်ႇဢဝ်ၸႃႇတိၵူၼ်း

၁ မိူဝ်ႈၵေႃႇၸႃႉႁူဝ်ပိုင်းၼၼ်ႉမီးၼုၵ်ႉၵပၢတ်ႈၸဝ်ႈဢေႃႈ။ၼုၵ်ႉၵပၢတ်ႈၸဝ်ႈၼၼ်ႉမီးယူႇလူၺ်ႈၵၼ်တင်းၽြႃးပဵၼ်ၸဝ်ႈဢေႃႈ။ၼုၵ်ႉၵပၢတ်ႈၸဝ်ႈၼၼ်ႉၵေႃႈပဵၼ်ၽြႃးပဵၼ်ၸဝ်ႈဢေႃႈ။

၂ မၼ်းၸဝ်ႈၼၼ်ႉမီးယူႇလူၺ်ႈၵၼ်တင်းၽြႃးပဵၼ်ၸဝ်ႈၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉဢေႃႈ။

၃ မၼ်းၸဝ်ႈၽၢၼ်ႇသၢင်းႁဵတ်းပဵၼ်ၶိူင်ႈပိူင်တင်းသဵင်ႈတင်းမူတ်းဢေႃႈ။ၶိူင်ႈပိူင်ဢၼ်ၵၢင်းလွတ်ႈသေတၢင်းဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉဢမ်ႇမီးသေၸိူဝ်ႉသေမဵဝ်း။

၄ ၵႃႈၼႂ်းမၼ်းၸဝ်ႈၼၼ်ႉမီးဢသၢၵ်ႈဢေႃႈ။ဢသၢၵ်ႈၼၼ်ႉၵေႃႈပဵၼ်ဢၼ််လႅင်းတီႈၵူၼ်းတင်းလၢႆဢေႃႈ။

၅ ဢၼ်လႅင်းၼၼ်ႉႁိူဝ်လႅင်းၵႃႈၼႂ်းဢၼ်လပ်းသိင်ႇလႄႈဢၼ်လပ်းသိင်ႇဢမ်ႇၶၢမ်ႇလႆႈ။

၆ ၽြႃးပဵၼ်ၸဝ်ႈပွႆႇၸႂ်ႉမႃးၵူၼ်းၵေႃႉၼိုင်ႈဢၼ်လႆႈၸိုဝ်ယုဝ်းႁၢၼ်ႇၼၼ်ႉဢေႃႈ။

၇ မၼ်းမႃးႁႂ်ႈလႆႈပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈဢၼ်လႅင်းၸဝ်ႈလႄႈႁႂ်ႈၵူၼ်းတင်းသဵင်ႈတင်းလူင်လႆႈဢိင်ပိုင်ႈမၼ်းၸဝ်ႈသေယဝ်ႉႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။

၈ မၼ်းၼၼ်ႉပဵၼ်ဢၼ်လႅင်းဢမ်ႇၸႂ်ႈ။မၼ်းမႃးႁႂ်ႈလႆႈၶၢမ်ႇသၢၵ်ႈသေႇဢၼ်လႅင်းၼၼ်ႉၵူၺ်းဢေႃႈ။

၉ ဢၼ်လႅင်းဢၼ်ၸိုဝ်ႈဢၼ်ၸႂ်ႈၼၼ်ႉပေႃႇမႃးၵႃႈၼႂ်းလေႃးၵႃႉၼႆႉလႄႈပဵၼ်ၵေႃႉဢၼ်ပၼ်ဢၼ်လႅင်းတီႈၵူၼ်းတင်းသဵင်ႈတင်းလူင်ဢေႃႈ။

၁၀ မၼ်းၸဝ်ႈမႃးၵႃႈၼႂ်းလေႃးၵႃႉၼႆႉယဝ်ႉ။လေႃးၵႃႉၼႆႉၵေႃႈပဵၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ယဝ်ႉ။ၼႂ်းဝႃႈၼၼ်သေၵေႃႈလေႃးၵႃႉၼႆႉဢမ်ႇႁူႉၸၵ်းမၼ်းၸဝ်ႈ။

၁၁ ပဵၵ်ႉသမ်ႉမၼ်းၸဝ်ႈမႃးၸူးတီႈယူႇမၼ်းၸဝ်ႈသေၵေႃႈၵူၼ်းမဵဝ်းမၼ်းၸဝ်ႈတင်းလၢႆယင်းဢမ်ႇႁပ်ႉဢမ်ႇတုင်းဢဝ်မၼ်းၸဝ်ႈလႄႈယူႇဢေႃႈ။

၁၂ တီႈၶဝ်ၸိူဝ်းဢၼ်ႁပ်ႉတုင်းဢဝ်မၼ်းၸဝ်ႈၵႃႈမီးတင်းသဵင်ႈတင်းလူင်ဢၼ်ပဵၼ်ၶဝ်ၸိူဝ်းဢၼ်ယုမ်ႇမၢတ်ႈၼႃႇမႃႉၸိုဝ်သဵင်မၼ်းၸဝ်ႈတင်းလၢႆၼၼ်ႉမၼ်းၸဝ်ႈပၼ်ဢၶႂၢင်ႉႁႂ်ႈလႆႈပဵၼ်လုၵ်ႈၽြႃးပဵၼ်ၸဝ်ႈဢေႃႈ။

၁၃ လုၵ်ႈၸိူဝ်းၼၼ်ႉၸမ်းပဵၼ်လုၵ်ႈဢၼ်ၸၢပ်ႈသႅင်ႇၵၼ်တင်းလိူတ်ႈၵူၼ်းလႄႈၵိူတ်ႇလဵင်ႉမႃးဢမ်ႇၸႂ်ႈ။ပဵၼ်လုၵ်ႈဢၼ်ၵိူတ်ႇလဵင်ႉမႃးၵွပ်ႈပိူဝ်ႈဢလူဝ်ႇၼိူဝ်ႉၵူၼ်းဢမ်ႇၸႂ်ႈ။ပဵၼ်လုၵ်ႈဢၼ်ၵိူတ်ႇလဵင်ႉမႃးၸွမ်းၼင်ႇဢလူဝ်ႇၵူၼ်းဢမ်ႇၸႂ်ႈ။ပဵၼ်လုၵ်ႈဢၼ်ၵိူတ်ႇလဵင်ႉမႃးၵွပ်ႈပိူဝ်ႈၽြႃးပဵၼ်ၸဝ်ႈဢေႃႈ။

၁၄ ၼုၵ်ႉၵပၢတ်ႈၸဝ်ႈၼၼ်ႉၶၢမ်ႇဢဝ်ၸႃႇတိၵူၼ်းသေယဝ်ႉတႄႇယူႇၼႂ်းႁဝ်းဢေႃႈ။ႁဝ်းလႆႈႁၼ်မူၼ်ၽုင်းမၼ်းၸဝ်ႈသူႇလဵဝ်ပႃးလဵဝ်ဢၼ်တဵမ်ထူၼ်ႈဝႆႉတင်းၵျေးၸူးၸဝ်ႈဢိၵ်ႇတင်းသႅတ်ႈၸႃႇၸဝ်ႈဢၼ်မီးၵႃႈတီႈပေႃႈၸဝ်ႈၼၼ်ႉဢေႃႈ။

၁၅ ယုဝ်းႁၢၼ်ႇၶၢမ်ႇသၢၵ်ႈသေႇလွင်ႈမၼ်းၸဝ်ႈၼၼ်ႉသေလႄႈႁွင်ႉပၢဝ်ႇလၢတ်ႈလႄႈဝႃႈၸမ်း၊-ဢၼ်ၵဝ်လၢတ်ႈလႄႈဝႃႈ၊-ၵေႃႉဢၼ်မႃးလိုၼ်းၵဝ်ၼၼ်ႉၸူဝ်ႈဢၼ်ၵဝ်ဢမ်ႇပႆႇမီးၼၼ်ႉပိူဝ်ႈဢၼ်မၼ်းပေႃးမီးဝႆႉယူႇယဝ်ႉလႄႈယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ၊ဝႃႈၼင်ႇၼႆၼၼ်ႉၶႂ်ႈဝႃႈၵေႃႉၼၼ်ႉဢေႃႈ၊ဝႃႈၼင်ႇၼႆဢေႃႈ။

၁၆ ၵႃႈၼႂ်းတၢင်းဢၼ်ၵျေးၸူးမၼ်းၸဝ်ႈတဵမ်ထူၼ်ႈၼၼ်ႉၵေႃႈႁဝ်းၵႃႈမီးတင်းသဵင်ႈတင်းလူင်လႆႈၶၢမ်ႇဢဝ်ၵျေးၸူးပႃးၼိုင်ႈယဝ်ႉသမ်ႉထၢပ်ႈသႂ်ႇထႅင်ႈၵျေးၸူးပႃးၼိုင်ႈဢေႃႈ။

၁၇ လွင်ႈမၼ်းၸမ်းမၼ်းၸဝ်ႈပၼ်ပိင်းၺၢပ်ႈတြႃးၼႂ်းမိုဝ်းမုဝ်းသေႇဢေႃႈ။ၵျေးၸူးတြႃးတင်းသႅတ်ႈၸႃႇတြႃးၸမ်းပဵၼ်မႃးၵႃႈၼႂ်းၸဝ်ႈယေႇသုၶရိၸ်ႉဢေႃႈ။

၁၈ ပဵၵ်ႉသမ်ႉၽူႈလႂ်ဢမ်ႇပႆႇတွၼ်ႉႁၼ်ၽြႃးပဵၼ်ၸဝ်ႈသေၵေႃႈလုၵ်ႈၸဝ်ႈပႃးလဵဝ်ၵူၺ်းဢၼ်မီးၼႂ်းဝၢင်ႁူဝ်ဢူၵ်းပေႃႈၸဝ်ႈၼၼ်ႉႁႂ်ႈမၼ်းၸဝ်ႈထၢင်ႇသႃးမႃးယဝ်ႉ။

ယုဝ်းႁၢၼ်ႇဢမ်ႇၸႂ်ႈၸဝ်ႈၶရိၸ်ႉ

၁၉ မိူဝ်ႈဢၼ်ၵူၼ်းယုတတင်းလၢႆပွႆႇၸႂ်ႉယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းလေႇဝိတင်းလၢႆဢွၵ်ႇသေၵႃႈၼႂ်းဝဵင်းယေႇရုသလႅမ်ႇၵႂႃႇၸူးၵႃႈတီႈယုဝ်းႁၢၼ်ႇႁႂ်ႈလႆႈထၢမ်မၼ်းလႄႈဝႃႈ၊-မႂ်းပဵၼ်ၽူႈလႂ်၊ဝႃႈၼင်ႇၼႆၼၼ်ႉၸိုင်၊ယုဝ်းႁၢၼ်ႇၵေႃႈယင်းဢမ်ႇသိူင်ႇဢမ်ႇမႅပ်းလႄႈၶၢမ်ႇသၢၵ်ႈသေႇလႅင်းလႅင်းလႄႈဝႃႈ၊-

၂၀ ၵဝ်ဢမ်ႇၸႂ်ႈၸဝ်ႈၶရိၸ်ႉ၊ဝႃႈၼႆဢေႃႈ။ၶဝ်ၵေႃႈသမ်ႉၶိုၼ်းထၢမ်ထႅင်ႈလႄႈဝႃႈ၊-ပေႃးၼႆမႂ်းပဵၼ်ၽူႈလႂ်။

၂၁ ပဵၼ်ဢေးလိယႁိုဝ်၊ဝႃႈၼင်ႇၼႆဢေႃႈ။ယုဝ်းႁၢၼ်ႇၵေႃႈလၢတ်ႈလႄႈဝႃႈ၊-ၵဝ်ဢမ်ႇၸႂ်ႈဢေးလိယဝႃႈၼင်ႇၼႆဢေႃႈ။ၶဝ်ၼၼ်ႉသမ်ႉၶိုၼ်းထၢမ်လႄႈဝႃႈ၊-ပဵၼ်ပရေႃးၽႅတ်ႈဢၼ်ဝႃႈၼၼ်ႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းသမ်ႉၶိုၼ်းလၢတ်ႈလႄႈဝႃႈ၊-ဢမ်ႇၸႂ်ႈၵူၺ်း၊ဝႃႈၼင်ႇၼႆဢေႃႈ။

၂၂ ၶဝ်ၼၼ်ႉသမ်ႉၶိုၼ်းထၢမ်လႄႈဝႃႈ၊-မႂ်းပဵၼ်ၽူႈလႂ်။ၼင်ႇႁိုဝ်ႁဝ်းတၵ်းၶိုၼ်းလႆႈလၢတ်ႈတီႈၶဝ်ၸိူဝ်းဢၼ်ပွႆႇၸႂ်ႉႁဝ်းမႃးၼၼ်ႉမႂ်းၶႂ်ႈဝႃႈတူဝ်ၸဝ်ႈၵဝ်ႇပဵၼ်ၽူႈလႂ်၊ဝႃႈၼင်ႇၼႆဢေႃႈ။

၂၃ မၼ်းၵေႃႈလၢတ်ႈလႄႈဝႃႈ၊-ၵႃႈၼင်ႇဢၼ်ပရေႃးၽႅတ်ႈဢိသႃႇယႁေႃးလၢတ်ႈဝႆႉၼၼ်ႉၵဝ်ပဵၼ်သဵင်ၵေႃႉဢၼ်ႁွင်ႉပၢဝ်ႇၵႃႈၼႂ်းထိူၼ်ႇလႄႈဝႃႈ၊-ႁႂ်ႈသဵၼ်ႈတၢင်းထႃႇဝရႃႉၽြႃးသိုဝ်ႈလီတႃႉ၊ဝႃႈၼင်ႇၼႆၼၼ်ႉယဝ်ႉ၊ဝႃႈၼင်ႇၼႆဢေႃႈ။

၂၄ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ပွႆႇၸႂ်ႉမႃးၸိူဝ်းၼၼ်ႉၸမ်းပဵၼ်ၽႃႇရိသေးဢေႃႈ။

၂၅ ၶဝ်ၼၼ်ႉသမ်ႉၶိုၼ်းထၢမ်တီႈမၼ်းလႄႈဝႃႈ၊-ပေႃးမႂ်းဢမ်ႇၸႂ်ႈၸဝ်ႈၶရိၸ်ႉ၊ဢမ်ႇၸႂ်ႈဢေးလိယ၊ဢမ်ႇၸႂ်ႈပရေႃးၽႅတ်ႈ၊ဝႃႈၼႆၸိုင်ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈမႂ်းပၼ်ပပ်ႉတိၸၢမ်ႇ၊ဝႃႈၼင်ႇၼႆဢေႃႈ။

၂၆ ယုဝ်းႁၢၼ်ႇၵေႃႈၶိုၼ်းလၢတ်ႈလႄႈဝႃႈ၊-ၵဝ်ပၼ်ပပ်ႉတိၸၢမ်ႇၼႂ်းၼမ်ႉဢေႃႈ။ၼႂ်းၵၢင်သူၼၼ်ႉမီးၵေႃႉၼိုင်ႈဢၼ်သူဢမ်ႇႁူႉၼၼ်ႉဢေႃႈ။

၂၇ ၵေႃႉၼၼ်ႉပဵၵ်ႉသမ်ႉမၼ်းမႃးလိုၼ်းၵဝ်သေၵေႃႈမၼ်းယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ။ၵဝ်ယင်းဢမ်ႇထိူၵ်ႈဢမ်ႇတၢၼ်ႇႁႂ်ႈလႆႈၵႄႈဢဝ်သၢႆၶႅပ်းတိၼ်မၼ်း၊ဝႃႈၼင်ႇၼႆဢေႃႈ။

၂၈ လွင်ႈတၢင်းၸိူဝ်းၼႆႉပဵၼ်ၼႂ်းဝၢၼ်ႈပေႇထၼိၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇတီႈဢၼ်ယုဝ်းႁၢၼ်ႇပၼ်ပပ်ႉတိၸၢမ်ႇၼၼ်ႉဢေႃႈ။

သုဝ်းဢွၼ်ႇၽြႃးပဵၼ်ၸဝ်ႈ

၂၉ ဝၼ်းမိူဝ်ႈၽုၵ်ႈယုဝ်းႁၢၼ်ႇႁၼ်ၸဝ်ႈယေႇသုမႃးယူႇလႄႈမၼ်းလၢတ်ႈလႄႈဝႃႈ၊-တူၺ်းသူဝ်းဢွၼ်ႇၽြႃးပဵၼ်ၸဝ်ႈဢၼ်ဢဝ်ဢပျႅတ်ႈလေႃးၵႃႉၼႆႉၵႂႃႇၼၼ်ႉတႃႉ။ဢၼ်ၵဝ်လၢတ်ႈဝႃႈ၊-

၃၀ ၵေႃႉဢၼ်မႃးလိုၼ်းၵဝ်ၼၼ်ႉပိူဝ်ႈဢၼ်မၼ်းမီးဝႆႉၸူဝ်ႈဢၼ်ၵဝ်ဢမ်ႇပႆႇမီးၼၼ်ႉလႄႈယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ၊၃၁ ဢၼ်ဝႃႈၼၼ်ႉၶႂ်ႈဝႃႈၵေႃႉၼၼ်ႉယဝ်ႉ။

၃၁ မိူဝ်ႈၸႃႉမၼ်းၵဝ်ဢမ်ႇႁူႉၵေႃႉၼၼ်ႉ။ၼႂ်းဝႃႈၼၼ်သေၵေႃႈၼင်ႇႁိုဝ်ၵေႃႉၼၼ်ႉတၵ်းလႆႈထၢင်ႇသႃးၵႃႈတီႈၵူၼ်းဢိသရေႇလတင်းလၢႆၸိုင်ၵဝ်ၸင်ႇမႃးပၼ်ပပ်ႉတိၸၢမ်ႇၼႂ်းၼမ်ႉဢေႃႈ၊ဝႃႈၼင်ႇၼႆဢေႃႈ။

၃၂ လိူဝ်သေၼၼ်ႉယုဝ်းႁၢၼ်ႇၶၢမ်ႇသၢၵ်ႈသေႇလႄႈဝႃႈ၊ၵဝ်လႆႈႁၼ်ဝိၺိၺ်ႇမူတ်းၸၢင်ႇၸဝ်ႈလူင်းသေၵႃႈၼိူဝ်ၵၢင်ႁၢဝ်မႃးမိူၼ်ၸိူဝ်ႉၼင်ႇႁၢင်ႊၼူၵ်ႉတူႈလႄႈၸပ်းယူႇၵႃႈၼိူဝ်မၼ်းၸဝ်ႈၼၼ်ႉယဝ်ႉ။မိူဝ်ႈၸႃႉမၼ်းၵဝ်ဢမ်ႇႁူႉၵေႃႉၼၼ်ႉ။

၃၃ ၵေႃႉဢၼ်ပွႆႇၸႂ်ႉၵဝ်မႃးႁႂ်ႈလႆႈပၼ်ပပ်ႉတိၸၢမ်ႇၼႂ်းၼမ်ႉၼၼ်ႉလၢတ်ႈတီႈၵဝ်လႄႈဝႃႈ၊-ၵႃႈၼိူဝ်ၽူႈလႂ်သေဢမ်ႇဝႃႈၵေႃႉဢၼ်မႂ်းလႆႈႁၼ်ဝိၺိၺ်ႇမူတ်းၸၢင်ႇၸဝ်ႈလူင်းမႃးလႄႈၸပ်းယူႇၼၼ်ႉၵေႃႉၼၼ်ႉပဵၼ်ၵေႃႉဢၼ်ပၼ်ပပ်ႉတိၸၢမ်ႇၼႂ်းဝိၺိၺ်ႇမူတ်းၸၢင်ႇၸဝ်ႈဢေႃႈ၊

၃၄ ဝႃႈၼႆၵႃႈၼင်ႇဢၼ်မၼ်းၸဝ်ႈဝႃႈၼၼ်ႉၵဝ်လႆႈႁၼ်လႄႈၶၢမ်ႇသၢၵ်ႈသေႇလွင်ႈဢၼ်ဝႃႈၵေႃႉၼၼ်ႉပဵၼ်လုၵ်ႈၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆဢေႃႈ။

တပႄးၸဝ်ႈယေႇသုၵေႃႉဢွၼ်တၢင်းသုတ်းပိူၼ်ႈ

၃၅ ဝၼ်းမိူဝ်ႈၽုၵ်ႈယုဝ်းႁၢၼ်ႇၸုၵ်းယူႇလူၺ်ႈၵၼ်တင်းတပႄးမၼ်းသွင်ၵေႃႉၵႃႈတီႈၼၼ်ႉလႄႈမၼ်းႁၼ်ၸဝ်ႈယေႇသုပႆၵႂႃႇယူႇၼၼ်ႉၸိုင်မၼ်းလၢတ်ႈလႄႈဝႃႈ၊-

၃၆ တူၺ်းသူဝ်းဢွၼ်ႇၽြႃးပဵၼ်ၸဝ်ႈတႃႉ၊ဝႃႈၼင်ႇၼႆဢေႃႈ။

၃၇ တပႄးမၼ်းသွင်ၵေႃႉၼၼ်ႉၵေႃႈငိၼ်းၵႂၢမ်းၼၼ်ႉလႄႈၸွမ်းပႃႈလင်ၸဝ်ႈယေႇသုၵႂႃႇဢေႃႈ။ၸဝ်ႈယေႇသုဝၢႆႇတူၺ်းလႄႈမိူဝ်ႈဢၼ်ႁၼ်ၶဝ်ၸွမ်းယူႇၼၼ်ႉၸိုင်မၼ်းၸဝ်ႈထၢမ်လႄႈဝႃႈ၊-သူႁႃၵႃႈသင်၊ဝႃႈၼင်ႇၼႆဢေႃႈ။

၃၈ ၶဝ်ၼၼ်ႉၵေႃႈလဝ်ႈထၢမ်လႄႈဝႃႈ၊-ရၢပ်ႉပိ၊ၸဝ်ႈႁဝ်းယူႇၵႃႈတီႈလႂ်ၶႃႈ၊ဝႃႈၼင်ႇၼႆဢေႃႈ။ဢထိၵ်ႈပႄႇရၢပ်ႉပိၸမ်းၶႂ်ႈဝႃႈသြႃႇၸဝ်ႈဢေႃႈ။

၃၉ မၼ်းၸဝ်ႈၵေႃႈလၢတ်ႈလႄႈဝႃႈ၊-မႃးတူၺ်းတႃႉ၊ဝႃႈၼင်ႇၼႆဢေႃႈ။ၶဝ်ၵေႃႈၵႂႃႇလႄႈလူတူၺ်းတီႈဢၼ်မၼ်းၸဝ်ႈယူႇၼၼ်ႉဢေႃႈ။ပိူဝ်ႈဢၼ်ၶိင်ႇၼၼ်ႉပဵၼ်ၶိင်ႇသိပ်းၼႃႇရီႇလႄႈဝၼ်းၼၼ်ႉၶဝ်ယူႇၵႃႈတီႈမၼ်းၸဝ်ႈဢေႃႈ။

၄၀ ၼႂ်းၶဝ်သွင်ၵေႃႉဢၼ်ငိၼ်းၵႂၢမ်းယုဝ်းႁၢၼ်ႇလႄႈၸွမ်းပႃႈလင်မၼ်းၸဝ်ႈၵႂႃႇၼၼ်ႉၵေႃႉၼိုင်ႈပဵၼ်ဢၼ်ႇတရေႇဢေႃႈ။မၼ်းပဵၼ်ၼွင်ႉၸၢႆးသိမုၼ်ႇဢေႃႈ။

၄၁ မၼ်းထူပ်းႁၼ်ပီႈၸၢႆးမၼ်းသိမုၼ်ႇသေယဝ်ႉလၢတ်ႈလႄႈဝႃႈ၊-ႁဝ်းလႆႈထူပ်းႁၼ်မေႇသိယယဝ်ႉ၊ဝႃႈၼင်ႇၼႆလႄႈႁွင်ႉဢဝ်မၼ်းၵႂႃႇၸူးၵႃႈတီႈၸဝ်ႈယေႇသုဢေႃႈ။ဢထိၵ်ႈပႄႇမေႇသိယၸမ်းၶႂ်ႈပွင်ႇဝႃႈၸဝ်ႈၶရိၸ်ႉဢေႃႈ။

၄၂ ၸဝ်ႈယေႇသုလူႈတူၺ်းမၼ်းသေလႄႈလၢတ်ႈဝႃႈ၊-မႂ်းပဵၼ်သိမုၼ်ႇလုၵ်ႈၸၢႆးယုဝ်းၼဢေႃႈ။ၸိုဝ်မႂ်းတၵ်းလႆႈႁွင်ႉႁိၵ်ႈဝႃႈၵေႇၽဢေႃႈ၊ဝႃႈၼင်ႇၼႆဢေႃႈ။ဢထိၵ်ႈပႄႇၵေႇၽၸမ်းၶႂ်ႈပွင်ႇဝႃႈပေႇတရုဢေႃႈ။

ႁွင်ႉဢဝ်ၽိလိပ်ႉပုတင်းၼႃႇသၼေႇလ

၄၃ ၼႂ်းဝၼ်းမိူဝ်ႈၽုၵ်ႈမၼ်းၸဝ်ႈမီးဢလူဝ်ႇၶႂ်ႈၵႂႃႇမိူင်းၵႃႇလိလႄးဢေႃႈ။မၼ်းၸဝ်ႈထူပ်းႁၼ်ၽိလိပ်ႉပုလႄႈလၢတ်ႈဝႃႈ၊-ၸွမ်းပႃႈလင်ၵဝ်တႃႉ၊ဝႃႈၼင်ႇၼႆဢေႃႈ။

၄၄ ၽိလိပ်ႉပုၸမ်းပဵၼ်ၵေႃႉဢၼ်လုၵ်ႉသေၵႃႈတီႈဝဵင်းပိတ်ႉၸေႇတတီႈဢၼ်ဢၼ်ႇတရေႇတင်းပေႇတရုၶဝ်ၵိူတ်ႇၼၼ်ႉဢေႃႈ။

၄၅ ၽိလိပ်ႉပုထူပ်းႁၼ်ၼႃႇသၼေႇလလႄႈလၢတ်ႈဝႃႈ၊-ႁဝ်းလႆႈထူပ်းႁၼ်ၵေႃႉဢၼ်မုဝ်းသေႇတဵမ်ႈဝႆႉလွင်ႈမၼ်းၼႂ်းၵျၢမ်းပိင်းၺၢပ်ႈတိဢိၵ်ႇတင်းဢၼ်ပရေႃးၽႅတ်ႈတင်းလၢႆတႅမ်ႈဝႆႉၼႂ်းၵျၢမ်းလိၵ်ႈၶဝ်ဢၼ်ပဵၼ်ၸဝ်ႈယေႇသုလုၵ်ႈယုဝ်းသႅပ်ႉၵူၼ်းဝဵင်းၼႃႇၸရႅတ်ႉၼၼ်ႉယဝ်ႉ၊ဝႃႈၼင်ႇၼႆဢေႃႈ။

၄၆ ၼႃႇသၼေႇလၵေႃႈထၢမ်လႄႈဝႃႈ၊-လွင်းတၢင်းဢၼ်လီဢၼ်ငၢမ်းသေၸိူဝ်ႉသေပိူင်ၸၢင်ႊဢွၵ်ႇၵႃႈၼႂ်းဝဵင်းၼႃႇၸရႅတ်ႉမႃးလႆႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၽိလိပ်ႉပုၵေႃႈလၢတ်ႈလႄႈဝႃႈ၊-မႃးလႄႈတူၺ်းသေၵမ်းၶႃႈ၊ဝႃႈၼင်ႇၼႆဢေႃႈ။

၄၇ ၸဝ်ႈယေႇသုႁၼ်ၼႃႇသၼေႇလမႃးလႄႈမၼ်းၸဝ်ႈလၢတ်ႈလွင်ႈမၼ်းလႄႈဝႃႈ၊-တူၺ်းၵူၼ်းဢိသရေႇလၸႅတ်ႈၸႅတ်ႈဢၼ်ၵၢင်းလွတ်ႈတင်းတၢင်းဢၼ်ပႅတ်ႉဢၼ်လႅၼ်ၼၼ်ႉတႃႉ၊ဝႃႈၼင်ႇၼႆဢေႃႈ။

၄၈ ၼႃႇသၼေႇလၵေႃႈလဝ်ႈထၢမ်လႄႈဝႃႈ၊-ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းႁူႉၸၵ်းၵဝ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၸူဝ်ႈဢၼ်ၽိလိပ်ႉပုယင်းဢမ်ႇပႆႇႁွင်ႉမႂ်းမႃးၼၼ်ႉၵဝ်လႆႈႁၼ်မႂ်းမီးယူႇၵႃႈတႂ်ႈတူၼ်ႈမၢၵ်ႇလိူဝ်ႇသၢင်းၽေႃးပုၼ်ႉဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၼႃႇသၼေႇလၵေႃႈၶိုၼ်းလၢတ်ႈလႄႈဝႃႈ၊-

၄၉ ၸဝ်ႈႁဝ်း၊ၸဝ်ႈႁဝ်းၼႆႉပဵၼ်လုၵ်ႈၽြႃးပဵၼ်ၸဝ်ႈတႄႉၶႃႈဢေႃႈ။ၶုၼ်ႁေႃၶမ်းၵူၼ်းဢိသရေႇလၵေႃႈၸႂ်ႈၶႃႈဢေႃႈ၊ဝႃႈၼင်ႇၼႆဢေႃႈ။

၅၀ ၸဝ်ႈယေႇသုသမ်ႉလၢတ်ႈလႄႈဝႃႈ၊-ၸွင်ႇမႂ်းယုမ်ႇလွင်ႈဢၼ်ၵဝ်ဝႃႈၵဝ်ႁၼ်မႂ်းၵႃႈတႂ်ႈတူၼ်ႈမၢၵ်ႇလိူဝ်ႇသၢင်းၽေႃးၼၼ်ႉဢေႃႈ၊ဢၼ်ဝႃႈၼၼ်ႉႁိုဝ်။မႂ်းတၵ်းလႆႈႁၼ်လွင်ႈတၢင်းဢၼ်ယဵင်ႈၶႅၼ်းယႂ်ႇၼႃႇသေဢၼ်ၼႆႉလူးၵွၼ်ႇဢေႃႈ။

၅၁ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်းၶိင်ႇၵႃႇလႃႉၵမ်းလိုၼ်းသူတၵ်းလႆႈႁၼ်ၵၢင်ႁၢဝ်ၽုၺ်ႇပိုတ်ႇဝႆႉဢိၵ်ႇတင်းတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆၶိုၼ်ႈယူႇလူင်းယူႇၵႃႈၼိူဝ်လုၵ်ႈၵူၼ်းဢေႃႈ၊ဝႃႈၼင်ႇၼႆဢေႃႈ။