Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၂၅ 

လႆႈၶၢမ်ႇၶုၼ်ၽိတ်ႉတုၸႅတ်ႈထၢမ်

၁ ၶုၼ်ၽိတ်ႉတုႁွတ်ႈထိုင်ၵႃႈတီႈမိူင်းၼၼ်ႉသေယဝ်ႉမိူဝ်ႈဢၼ်လႆႈသၢမ်ဝၼ်းၸိုင်လုၵ်ႉသေၵႃႈတီႈဝဵင်းၵေႇသရိၶိုၼ်းၵႂႃႇၵႃႈတီႈဝဵင်းယေႇရုသလႅမ်ႇဢေႃႈ။

၂ မိူဝ်ႈၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းယုတဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလဝ်ႈလၢတ်ႈလွင်ႈပေႃးလုလႄႈ

၃ မီးၸႂ်ဢၼ်ၵျၢမ်ႇပွင်ပႂ်ႉလွမ်ၵႃႈတီႈႁိမ်းတၢင်းႁႂ်ႈလႆႈဢဝ်မၼ်းတၢႆလႄႈၶဝ်တွင်းပၢၼ်ႇႁႂ်ႈၸဝ်ႈၶုၼ်ပွႆႇၸႂ်ႉမၼ်းၵႂႃႇၵႃႈတီႈဝဵင်းယေႇရုသလႅမ်ႇဢေႃႈ။

၄ ၶုၼ်ၽိတ်ႉတုၵေႃႈၶိုၼ်းလၢတ်ႈလႄႈဝႃႈ၊-ပေႃးလုလႆႈၶၢမ်ႇတူၵ်းၵႅၼ်းယူႇၵႃႈၼႂ်းဝဵင်းၵေႇသရိပုၼ်ႉလႄႈဢမ်ႇပေႃးႁိုင်တူဝ်ၵဝ်တၵ်းၵႂႃႇၵႃႈတီႈဝဵင်းၼၼ်ႉဢေႃႈ။

၅ ႁႂ်ႈၵူၼ်းႁူဝ်သူၵမ်ႈၽွင်ႈၸွမ်းၵဝ်ၵႂႃႇလႄႈပေႃးမီးတီႈတၢင်ႇဢပျႅတ်ႈတီႈမၼ်းၸိုင်၊ႁႂ်ႈၶဝ်တၢင်ႇဢပျႅတ်ႈၵႃႈတီႈၼၼ်ႉတႃႉ၊ဝႃႈၼင်ႇၼႆဢေႃႈ။

၆ ဝၢႆးသေမၼ်းယူႇၵႃႈတီႈၶဝ်သိပ်းဝၼ်းၸမ်ၸမ်ယဝ်ႉၸင်ႇလူင်းၵႂႃႇၵႃႈတီႈဝဵင်းၵေႇသရိဢေႃ။ၼႂ်းဝၼ်းမိူဝ်ႈၽုၵ်ႈမၼ်းၼင်ႈၵႃႈၼိူဝ်ပလၢင်ႇဢၼ်ၸီႇယၢင်ႇတြႃးသေယဝ်ႉမီးဢမိင်ႉႁႂ်ႈဢဝ်ပေႃးလုမႃးဢေႃႈ။

၇ မိူဝ်ႈဢၼ်ပေႃးလုႁွတ်ႈထိုင်ၼၼ်ႉၸိုင်ၵူၼ်းယုတဢၼ်လုၵ်ႉသေၵႃႈတီႈဝဵင်းယေႇရုသလႅမ်ႇမႃးၸိူဝ်းၼၼ်ႉလွမ်ႉႁွပ်ႈမၼ်းသေလႄႈတၢင်ႇဢပျႅတ်ႈဢၼ်ၼၵ်းၼႃႇၼမ်ၼႃႇၵႃႈၼိူဝ်မၼ်းဢၼ်ဢမ်ႇၸၢင်ႊၼႄသၢၵ်ႈသေႇလႆႈၼၼ်ႉဢေႃႈ။

၈ ပေႃးလုၵေႃႈလၢတ်ႈၵႂၢမ်းၽေႇဢပျႅတ်ႈတူဝ်ၸဝ်ႈၵဝ်ႇလႄႈဝႃႈ၊-တြႃးယုတလႄႈသင်ပိၵ်ႉမၢၼ်ႇၸဝ်ႈလႄႈသင်ၶုၼ်ႁေႃၶမ်းၵေႇသႃႇလႄႈသင်ၵဝ်ၶႃႈဢမ်ႇၽိတ်းဢမ်ႇပိူင်ႈသင်ၶႃႈ၊ဝႃႈၼင်ႇၼႆဢေႃႈ။

၉ ၵူၺ်းၵႃႈၶုၼ်ၽိတ်ႉတုၼၼ်ႉမီးတင်းၸႂ်ဢၼ်ၶႂ်ႈပၼ်ၼႃႈပၼ်တႃတီႈၵူၼ်းယုတတင်းလၢႆလႄႈထၢမ်တီႈပေႃးလုလႄႈဝႃႈ၊-မႂ်းတၵ်းၵႂႃႇၵႃႈတီႈဝဵင်းယေႇရုသလႅမ်ႇပုၼ်ႉလႄႈၶၢမ်ႇတၢင်းဢၼ်ၸီႇယၢင်ႇၵႃႈတီႈၽၢႆႇၼႃႈၵဝ်ၵႃႈတီႈၼၼ်ႉႁိုဝ်၊ဝႃႈၼင်ႇၼႆဢေႃႈ။

၁၀ ပေႃးလုၵေႃႈလဝ်ႈလၢတ်ႈလႄႈဝႃႈ၊-ၵဝ်ၶႃႈၸုၵ်းယူႇၵႃႈတီႈၽၢႆႇၼႃႈပလၢင်ႇဢၼ်ၸီႇယၢင်ႇတြႃးၶုၼ်ႁေႃၶမ်းၵေႇသႃႇယူႇၶႃႈဢေႃႈ။ၵႃႈၼင်ႇဢၼ်ၸဝ်ႈႁဝ်းႁူႉယူႇလီလီငၢမ်းငၢမ်းၼႆႉၵဝ်ၶႃႈဢမ်ႇၽိတ်းဢမ်ႇပိူင်ႈၵူၼ်းယုတတင်းလၢႆသေဢိတ်းၶႃႈ။

၁၁ ပေႃးၵဝ်ၶႃႈၽိတ်းပိူင်ႈလႄႈႁဵတ်းဢပျႅတ်ႈဢၼ်ထိူၵ်ႈတၢႆၸိုင်ၵဝ်ၶႃႈဢမ်ႇဝေႈတၢင်းတၢႆၶႃႈ။ၵူၺ်းၵႃႈပေႃးဢပျႅတ်ႈဢၼ်ၶဝ်တၢင်ႇၼၼ်ႉဢမ်ႇၸိုဝ်ႈဢမ်ႇၸႂ်ႈသေၸိူဝ်ႉသေပိူင်ၸိုင်ၽူႈလႂ်ဢမ်ႇဢဝ်ၵဝ်ၶႃႈဢၢပ်ႈၵႃႈၼႂ်းမိုဝ်းၶဝ်လႆႈၶႃႈ။ၵဝ်ၶႃႈတၵ်းၶၢမ်ႇဢယူႇၵႃႈတီႈၶုၼ်ႁေႃၶမ်းၵေႇသႃႇၶႃႈဢေႃႈ၊ဝႃႈၼင်ႇၼႆဢေႃႈ။

၁၂ မိူဝ်ႈၼၼ်ႉၶုၼ်ၽိတ်ႉတုတိူင်ႇပၢင်ႇၵၼ်တင်းၵူၼ်းဢၼ်တိူင်ႇပၢင်ႇႁူမ်ႈၵၼ်ၸိူဝ်းၼၼ်ႉသေယဝ်ႉလၢတ်ႈလႄႈဝႃႈ၊-မႂ်းဝႃႈမႂ်းတၵ်းၶၢမ်ႇဢယူႇတီႈၶုၼ်ႁေႃၶမ်းၵေႇသႃႇဝႃႈၼင်ႇၼႆယဝ်ႉ။မႂ်းတၵ်းလႆႈၵႂႃႇၵႃႈတီႈၶုၼ်ႁေႃၶမ်းၵေႇသႃႇဢေႃႈ၊ဝႃႈၼင်ႇၼႆဢေႃႈ။

ၶုၼ်ၽိတ်ႉတုတိူင်ႇပၢင်ႇၶုၼ်ႁေႃၶမ်းဢၵိပ်ႉပ

၁၃ လိုၼ်းၼၼ်ႉဢမ်ႇပေႃးႁိုင်ၶုၼ်ႁေႃၶမ်းဢၵိပ်ႉပတင်းပေႇရၼိတ်ႉႁွတ်ႈထိုင်မႃးၵႃႈတီႈဝဵင်းၵေႇသရိလႄႈႁႂ်ႈလႆႈတၵ်ႉလၢတ်ႈၶုၼ်ၽိတ်ႉတုဢေႃႈ။

၁၄ ၶဝ်ယူႇႁိုင်တၢၼ်ႇတၢၼ်ႇသေယဝ်ႉၶုၼ်ၽိတ်ႉတုၼၼ်ႉဢဝ်လွင်ႈပေႃးလုလၢတ်ႈတီႈၶုၼ်ႁေႃးၶမ်းလႄႈဝႃႈ၊-ၵူၼ်းဢၼ်ၶုၼ်ၽေးလိတ်ႉႁႂ်ႈၶၢမ်ႇတူၵ်းၵႅၼ်းၼၼ်ႉယင်းၵိုတ်းဝႆႉယူႇၵေႃႉၼိုင်ႈၶႃႈဢေႃႈ။

၁၅ မိူဝ်ႈဢၼ်ၵဝ်ၶႃႈယင်းမီးယူႇၵႃႈၼႂ်းဝဵင်းယေႇရုသလႅမ်ႇၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းယုတဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလဝ်ႈလၢတ်ႈလွင်ႈမၼ်းလႄႈတွင်းပၢၼ်ႇႁႂ်ႈလႆႈၸီႇယၢင်ႇဢပျႅတ်ႈတီႈမၼ်းဢေႃႈ။

၁၆ ၵဝ်ၶႃႈၵေႃႈလႆႈလၢတ်ႈလႄႈဝႃႈ၊ၸူဝ်ႈဢၼ်ၵေႃႉဢၼ်လႆႈၶၢမ်ႇတၢင်းဢၼ်တၢင်ႇဢပျႅတ်ႈၼၼ်ႉဢမ်ႇပႆႇလႆႈတေႃႇၼႃႈၵၼ်တင်းၶဝ်ၸိူဝ်းဢၼ်တၢင်ႇဢပျႅတ်ႈၼၼ်ႉၸိုင်မၼ်းမီးဢၶႂၢင်ႉဢၼ်လႆႈၽေႇလိတ်ႉဢပျႅတ်ႈဢၼ်ၶဝ်တၢင်ႇၵႃႈၼိူဝ်ႈမၼ်းၼၼ်ႉယူႇဢေႃႈ။ဢမ်ႇထုၵ်ႇလီဢဝ်မၼ်းဢၢပ်ႈပၼ်တီႈၽူႈလႂ်၊ဝႃႈၼႆထုင်းၸၢမ်ႇရူဝ်းမမီးဝႆႉၼင်ႇၼႆယဝ်ႉ၊ဝႃႈၼင်ႇၼႆဢေႃႈ။

၁၇ မိူဝ်ႈဢၼ်ၶဝ်ႁွတ်ႈမႃးၵႃႈတီႈဝဵင်းၼႆႉၼၼ်ႉၵဝ်ၶႃႈယင်းဢမ်ႇၵိုတ်းဢမ်ႇသဝ်းလႄႈဝၼ်းမိူဝ်ႈၽုၵ်ႈၼၼ်ႉၵဝ်ၶႃႈၼင်ႈၵႃႈၼိူဝ်ပလၢင်ႇဢၼ်ၸီႇယၢင်ႇတြႃးၼၼ်ႉသေယဝ်ႉႁွင်ႉဢဝ်မၼ်းမႃးၶႃႈဢေႃႈ။

၁၈ ၶဝ်ၸိူဝ်းဢၼ်တၢင်ႇဢပျႅတ်ႈၼၼ်ႉၸုၵ်းလွမ်ႉႁွပ်ႈမၼ်းသေယဝ်ႉဢမ်ႇတၢင်ႇဢပျႅတ်ႈမၼ်းၸိူဝ်ႉၼင်ႇဢၼ်ၵဝ်ၶႃႈထၢင်ႇမိူဝ်ႈဢွၼ်တၢင်းၼၼ်ႉ။

၁၉ ၵူၺ်းၵႃႈၶဝ်တၢင်ႇဢပျႅတ်ႈလွင်ႈပုၵ်ႉသႃႇတီႈတွင်ႉတီႈထၢမ်ဢၼ်ၸၢပ်ႈသႅင်ႇၵၼ်တင်းၽႃႇသႃႇၶဝ်ဢိၵ်ႇတင်းလွင်ႈၸဝ်ႈယေႇသုဢၼ်တၢႆၵႂႃႇယဝ်ႉၼၼ်ႉၶႃႈဢေႃႈ။ၸဝ်ႈယေႇသုၼၼ်ႉဢသၢၵ်ႈလိပ်းယူႇဝႃႈၼႆ၊ပေႃးလုလၢတ်ႈၶႃႈဢေႃႈ။

၂၀ ပိူဝ်ႈဢၼ်ၵဝ်ၶႃႈဢမ်ႇပေႃးႁူႉၸႅင်ႈလွင်ႈပုၵ်ႉသႃႇတီႈတွင်ႈတီႈထၢမ်ၸိူဝ်းၼၼ်ႉလႄႈၵဝ်ၶႃႈထၢမ်တီႈပေႃးလုလႄႈဝႃႈ၊-မႂ်းတၵ်းၵႂႃႇၵႃႈတီႈဝဵင်းယေႇရုသလႅမ်ႇပုၼ်ႉလႄႈၶၢမ်ႇတၢင်းဢၼ်ၸီႇယၢင်ႇဢမူႉၼႆႉႁိုဝ်၊

၂၁ မိူဝ်ႈဢၼ်ဝႃႈၼင်ႇၼႆၼၼ်ႉပိူဝ်ႈဢၼ်ပေႃးလုတွင်းပၢၼ်ႇႁႂ်ႈလႆႈၶၢမ်ႇဢယူႇတီႈၶုၼ်ဢၼ်မူၼ်ယႂ်ႇၼၼ်ႉလႄႈၸူဝ်ႈဢၼ်ၵဝ်ၶႃႈဢမ်ႇပႆႇပွႆႇၸႂ်ႉမၼ်းၵႂႃႇၵႃႈတီႈၶုၼ်ႁေႃၶမ်းၵေႇသႃႇပုၼ်ႉၼၼ်ႉၸိုင်၊ၵဝ်ၶႃႈၸီႇယၢင်ႇႁႂ်ႈဢဝ်မၼ်းၶင်ဝႆႉၶႃႈဢေႃႈ၊ဝႃႈၼင်ႇၼႆဢေႃႈ။

၂၂ ၶုၼ်ဢၵိပ်ႉပၵေႃႈလၢတ်ႈတီႈၶုၼ်ၽိတ်ႉတုလႄႈဝႃႈ၊-တူဝ်ၵဝ်မီးဢလူဝ်ႇၶႂ်ႈထွမ်ႇၶႂ်ႈငိၼ်းၵႂၢမ်းမၼ်းဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶုၼ်ၽိတ်ႉတုၵေႃႈလၢတ်ႈလႄႈဝႃႈ၊-ဝၼ်းမိူဝ်ႈၽုၵ်ႈထွမ်ႇငိၼ်းၵႂၢမ်းမၼ်းသေၵမ်းၶႃႈ၊ဝႃႈၼင်ႇၼႆဢေႃႈ။

လႆႈၶၢမ်ႇၶုၼ်ဢၵိပ်ႉပၸႅတ်ႈထၢမ်

၂၃ ဝၼ်းမိူဝ်ႈၽုၵ်ႈၼၼ်ႉၶုၼ်ဢၵိပ်ႉပတင်းပေႇရၼိတ်ႉႁဵတ်းမူၼ်သရေႇၼမ်ၼႃႇလူင်လၢင်လႄႈပႃးတင်းၵႄႇသိုၵ်းဢိၵ်ႇတင်းၵူၼ်းယႂ်ႇၵူၼ်းလူင်ၵႃႈၼႂ်းဝဵင်းၼၼ်ႉတင်းလၢႆၶဝ်ႈၵႃႈၼႂ်းႁေႃသေယဝ်ႉ၊ၶုၼ်ၽိတ်ႉတုၵေႃႈႁႂ်ႈဢဝ်ပေႃးလုမႃးဢေႃႈ။

၂၄ ၶုၼ်ၽိတ်ႉတုၵေႃႈလၢတ်ႈလႄႈဝႃႈ၊-ၶုၼ်ႁေႃၶမ်းဢၵိပ်ႉပဢိၵ်ႇတင်းၵူၼ်းဢၼ်မီးယူႇၵႃႈတီႈၼႆႉတေႃႈလဵဝ်ၼႆႉတင်းသဵင်ႈတင်းလူင်ၶဝ်ဢိူၺ်း၊တူၺ်းၵေႃႉၼႆႉသေၵမ်းၶႃႈ။ၵူၼ်းယုတတင်းသဵင်ႈတင်းလူင်လဝ်ႈလၢတ်ႈလွင်ႈၵေႃႉၼႆႉတီႈၵဝ်ၶႃႈၵႃႈၼႂ်းဝဵင်းယေႇရုသလႅမ်ႇဢိၵ်ႇတင်းၵႃႈၼႂ်းဝဵင်းၼႆႉလႄႈႁွင်ႉသႅၼ်ႇဝႃႈ၊-ၵေႃႉၼႆႉၵမ်းဢွၼ်ႇၼိုင်ႈၵူၺ်းၵေႃႈဢမ်ႇထိူၵ်ႈဢသၢၵ်ႈလိပ်းသေဢိတ်းၶႃႈ၊ဝႃႈၼင်ႇၼႆယဝ်ႉ။

၂၅ ၵဝ်ၶႃႈႁူႉႁၼ်လွင်ႈဢၼ်ဝႃႈမၼ်းဢမ်ႇႁဵတ်းဢပျႅတ်ႈဢၼ်တၵ်းလႆႈထိူၵ်ႈၶၢမ်ႇတၢင်းတၢႆၼၼ်ႉ။ပိူဝ်ႈဢၼ်မၼ်းဝႃႈမၼ်းတၵ်းၶၢမ်ႇဢယူႇတီႈၶုၼ်ဢၼ်မူၼ်ယႂ်ႇၼၼ်ႉဝႃႈၼင်ႇၼႆလႄႈၵဝ်ၶႃႈၸင်ႇလႆႈၸီႇယၢင်ႇႁႂ်ႈမၼ်းၵႂႃႇၵႃႈတီႈၸဝ်ႈၶုၼ်ၶႃႈဢေႃႈ။

၂၆ ၵဝ်ၶႃႈဢမ်ႇမီးလွင်ႈဢၼ်တၵ်းတႅမ်ႈလွင်ႈမၼ်းပၼ်ၵႂႃႇၵႃႈတီႈၶုၼ်ႁေႃၶမ်းၼၼ်ႉသေႇသေႇၶျႃႇၶျႃႇသေၸိူဝ်ႉသေပိူင်။ပိူဝ်ႈၼႆလႄႈသူၸဝ်ႈၸႅတ်ႈထၢမ်ၸႅတ်ႈတူၺ်းမၼ်းသေယဝ်ႉၼင်ႇႁိုဝ်ၵဝ်ၶႃႈတၵ်းမီးလွင်ႈဢၼ်တၵ်းတႅမ်ႈပၼ်ၵႂႃႇၼၼ်ႉၸိုင်ၵဝ်ၶႃႈဢဝ်မၼ်းဢွၵ်ႇၼႄၵႃႈတီႈၽၢႆႇၼႃႈသူၸဝ်ႈၽၢႆႇၼႃႈၶုၼ်ႁေႃၶမ်းဢၵိပ်ႉပ၊ၵႃႈတီႈၽၢႆႇၼႃႈၸဝ်ႈႁဝ်းတႄႉတႄႉဝႃႈဝႃႈၶႃႈဢေႃႈ။

၂၇ လွင်ႈမၼ်းၸမ်းၵဝ်ၶႃႈထၢင်ႇပေႃးယင်းဢမ်ႇၼႄဢပျႅတ်ႈမၼ်းလႄႈပွႆႇၸႂ်ႉၵေႃႉဢၼ်ၶၢမ်ႇတူၵ်းၵႅၼ်းၼၼ်ႉၵႂႃႇၸိုင်ပဵၼ်ဢၼ်ဢမ်ႇထုၵ်ႇဢမ်ႇလီၶႃႈ၊ဝႃႈၼင်ႇၼႆဢေႃႈ။