Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၉

သေႃးလုယုမ်ႇမၢတ်ႈၸဝ်ႈယေႇသု

၁ သေႃးလုၼၼ်ၼင်ႇႁိုဝ်တၵ်းလႆႈယူႇၽၢႆႇၼိုင်ႈတင်းတပႄးၸဝ်ႈၽြႃးတင်းလၢႆလႄႈလွၵ်ႇငိုတ်ႈဢဝ်တၢႆၸိုင်ထူၺ်ႈၸႂ်ႁႅင်းယႂ်ႇၼႃႇလူင်လၢင်သေယဝ်ႉၶဝ်ႈၸူး

၂ ၵႃႈတီႈၶုၼ်ယိတ်ႉပရေႃးႁိၵ်ႈသေလႄႈယွၼ်းဢဝ်လိၵ်ႈႁႂ်ႈလႆႈၵႂႃႇၵႃႈတီႈၸရွပ်ႈႁေႃးတြႃးဢၼ်မီးၵႃႈၼႂ်းဝဵင်းထမ်ႇမသႅတ်ႈၼၼ်ႉလႄႈပေႃးထူပ်းႁၼ်ၽူႈယိင်းၽူႈၸၢႆးၶဝ်ၸိူဝ်းဢၼ်ၶဝ်ႈၸွမ်းၼႂ်းသဵၼ်ႈတၢင်းၸဝ်ႈယေႇသုၼၼ်ႉၸိုင်ႁႂ်ႈလႆႈမတ်ႉၽုၵ်ႇဢဝ်ၵႂႃႇၵႃႈတီႈဝဵင်းယေႇရုသလႅမ်ႇမိူၼ်ၵူၼ်းတူၵ်းထွင်ႇဢေႃႈ။

၃ ၼႂ်းမိူဝ်ႈဢၼ်မၼ်းယင်းတိူၵ်ႈၵႂႃႇယူႇၸမ်တၵ်းႁွတ်ႈထိုင်ၵႃႈတီႈႁိမ်းဝဵင်းထမ်ႇမသႅတ်ႈၼၼ်ႉဢၼ်လႅင်းလူင်လုၵ်ႉသေၵႃႈၼိူဝ်ၵၢင်ႁၢဝ်ထွင်ႇႁိူဝ်ႈလႅင်းမႃးႁွပ်ႈႁိမ်းမၼ်းၵမ်းလဵဝ်ဢေႃႈ။

၄ မၼ်းလူမ်ႉဢူပ်ႇပူပ်ႇၵႃႈၼိူဝ်လိၼ်သေယဝ်ႉလႆႈငိၼ်းသဵင်ဢၼ်လၢတ်ႈတေႃႇမၼ်းလႄႈဝႃႈ၊-သေႃးလုဢိူၺ်း၊သေႃးလုဢိူၺ်း၊ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသေးၵဝ်ၸိူဝ်ႉၼင်ႇၼႆ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈလဝ်ႈထၢမ်လႄႈဝႃႈ၊-

၅ ၸဝ်ႈႁဝ်းပဵၼ်ၽူႈလႂ်ၶႃႈ၊ဝႃႈၼင်ႇၼႆဢေႃႈ။သဵင်ၼၼ်ႉၵေႃႈပေႃႇမႃးလႄႈဝႃႈ၊-ၵဝ်ပဵၼ်ယေႇသုဢၼ်မႂ်းၼိၵ်ႈၸၢၵ်ႈငႅၼ်းသေးၼၼ်ႉဢေႃႈ။

၆ ၼႂ်းဝႃႈၼၼ်သေၵေႃႈမႂ်းလုၵ်ႉလႄႈၶဝ်ႈၵႂႃႇၵႃႈၼႂ်းဝဵင်းတႃႉ။မႂ်းတၵ်းလႆႈႁဵတ်းၼၼ်ႉသင်ဢၼ်ဝႃႈၼၼ်ႉမႂ်းတၵ်းလႆႈၶၢမ်ႇတၢင်းဢၼ်လၢတ်ႈၼႄယူႇဢေႃႈ၊ဝႃႈၼင်ႇၼႆဢေႃႈ။

၇ ၵူၼ်းဢၼ်ၵႂႃႇလူၺ်ႈၵၼ်တင်းမၼ်းၸိူဝ်းၼၼ်ႉၵေႃႈလႆႈငိၼ်းသဵင်ၼၼ်ႉၵူၺ်းလႄႈဢမ်ႇလႆႈႁၼ်ၽူႈလႂ်သေၵေႃႉသေၵူၼ်း။ၶဝ်ယင်းဢမ်ႇၸၢင်ႈလၢတ်ႈၵႂၢမ်းၵႃႈသင်လႄႈဢွၼ်ၵၼ်ၸုၵ်းဢႃႉဝႆႉယူႇဢေႃႈ။

၈ သေႃးလုၼၼ်ႉၶိုၼ်းလုၵ်ႉသေယဝ်ႉမိူဝ်ႈဢၼ်မိုၼ်းတႃမၼ်းၼၼ်ႉၸိုင်တႃမၼ်းဢမ်ႇႁၼ်ၵႃႈသင်သေဢိတ်းယဝ်ႉ။ပိူၼ်ႈၸုင်ဢဝ်မိုဝ်းမၼ်းသေယဝ်ႉၶဝ်ႈၵႂႃႇၵႃႈၼႂ်းဝဵင်းထမ်ႇမသႅတ်ႈဢေႃႈ။

၉ သၢမ်ဝၼ်းတဵမ်တဵမ်တႃမၼ်းမွတ်ႇဢေႃႈ။မၼ်းဢမ်ႇၵိၼ်ဢမ်ႇၶူပ်းသင်လႄႈယူႇဢေႃႈ။

၁၀ မိူဝ်ႈၼၼ်ႉမီးတပႄးၸဝ်ႈၵေႃႉၼိုင်ႈဢၼ်လႆႈၸိုဝ်ဢႃႇၼႃႇၼိၼၼ်ႉမီးယူႇၵႃႈၼႂ်းဝဵင်းထမ်ႇမသႅတ်ႈၼၼ်ႉဢေႃႈ။ၸဝ်ႈၽြႃးလၢတ်ႈတီႈမၼ်းၼႂ်းရူႇပႃႇရူင်ႇမၼ်းၼၼ်ႉလႄႈဝႃႈ၊-ဢႃႇၼႃႇၼိဢိူၺ်း၊ဝႃႈၼင်ႇၼႆလႄႈဢႃႇၼႃႇၼိၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၵဝ်ၶႃႈမီးယူႇၶႃႈ၊ဝႃႈၼင်ႇၼႆဢေႃႈ။

၁၁ ၸဝ်ႈၽြႃးၵေႃႈလၢတ်ႈလႄႈဝႃႈ၊-မႂ်းလုၵ်ႉလႄႈၵႂႃႇၵႃႈတီႈသဵၼ်ႈတၢင်းဢၼ်လႆႈႁွင်ႉႁိၵ်ႈၸိုဝ်ဝႃႈတၢင်းသိုဝ်ႈၼၼ်ႉတႃႉ။ၵႂႃႇႁႃၵူၼ်းဝဵင်းတႃႇသုၵေႃႉၼိုင်ႈဢၼ်လႆႈမီးၸိုဝ်ဝႃႈသေႃးလုၼၼ်ႉၵႃႈၼႂ်းႁိူၼ်းယုတၼၼ်ႉတႃႉ။

၁၂ လွင်ႈမၼ်းၸမ်းၵေႃႉၼၼ်ႉႁဵတ်းတၢင်းဢၼ်သူးတွင်းယူႇဢေႃႈ။ၵႃႈၼႂ်းရူႇပႃႇရူင်ႇမၼ်းၼၼ်ႉၵေႃႈမၼ်းလႆႈႁၼ်မႂ်းၶဝ်ႈမႃးလႄႈဢဝ်မိုဝ်းတၢင်ႇၵႃႈၼိူဝ်မၼ်းႁႂ်ႈမၢၵ်ႇတႃမၼ်းၶိုၼ်းႁၼ်ၶိုၼ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။

၁၃ ဢႃႇၼႃႇၼိၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၵဝ်ၶႃႈယၢမ်ႈလႆႈငိၼ်းၵူၼ်းၼမ်ၼႃႇလၢတ်ႈလွင်ႈၵေႃႉၼၼ်ႉဝႃႈမၼ်းပဵၼ်ၵေႃႉဢၼ်ၼိၵ်ႈၸၢၵ်ႈငႅၼ်းသေးၵူၼ်းမူတ်းၸၢင်ႇၵႃႈၼႂ်းဝဵင်းယေႇရုသလႅမ်ႇၸိူဝ်းၼၼ်ႉထၢၼ်ႇႁိုဝ်ဢၼ်ဝႃႈၼၼ်ႉယူႇၶႃႈဢေႃႈ။

၁၄ မၼ်းလႆႈဢၶႂၢင်ႉတီႈယိတ်ႉပရေႃးႁိၵ်ႈလူင်တင်းလၢႆမႃးႁႂ်ႈလႆႈမတ်ႉၽုၵ်ႇၶဝ်ၸိူဝ်းဢၼ်ႁဵတ်းသူးတွင်းပထၼႃႇတီႈၸဝ်ႈႁဝ်းၵႃႈမီးၵႃႈတီႈၼႆႉၸိူဝ်းၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။

၁၅ ၸဝ်ႈၽြႃးၵေႃႈၶိုၼ်းလၢတ်ႈလႄႈဝႃႈ၊-မႂ်းၵႂႃႇတႃႉ။ၵေႃႉၼၼ်ႉၸမ်းပဵၼ်ၶိူင်ႈတိုဝ်းဢၼ်ၵဝ်လိူၵ်ႈၵဵပ်းဢဝ်ႁႂ်ႈလႆႈဢဝ်ၼႃႇမႃႉၸိုဝ်သဵင်ၵဝ်ၵႂႃႇသူင်ႇပၼ်ၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းဢိၵ်ႇတင်းၶုၼ်ႁေႃၶမ်းၵူၼ်းမဵဝ်းဢိသရေႇလတင်းလၢႆဢေႃႈ။

၁၆ ၵဝ်တၵ်းၼႄပျႃးတီႈမၼ်းၵွပ်ႈပိူဝ်ႈၼႃႇမႃႉၸိုဝ်သဵင်ၵဝ်ၼၼ်ႉမၼ်းတၵ်းလႆႈၶၢမ်ႇၼမ်ၼႃႇထၢၼ်ႇႁိုဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၁၇ ဢႃႇၼႃႇၼိၵေႃႈၵႂႃႇလႄႈၶဝ်ႈၵႃႈၼႂ်းႁိူၼ်းၼၼ်ႉသေယဝ်ႉဢဝ်မိုဝ်းမၼ်းတၢင်ႇၵႃႈၼိူဝ်သေႃးလုသေယဝ်ႉလၢတ်ႈဝႃႈ၊-ၼွင်ႉၵဝ်သေႃးလုဢိူၺ်း၊ၸဝ်ႈယေႇသုဢၼ်ပေႃႇမႃးၵႃႈတီႈမႂ်းၵႃႈတီႈၵၢင်တၢင်းၼၼ်ႉပွႆႇၸႂ်ႉၵဝ်မႃးႁႂ်ႈမၢၵ်ႇတႃမႂ်းၶိုၼ်းလႆႈႁၼ်ၵူၺ်းဢမ်ႇၵႃးႁႂ်ႈမႂ်းလႆႈတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈယဝ်ႉ၊ဝႃႈၼင်ႇၼႆဢေႃႈ။

၁၈ ၼင်ႇၼၼ်လႄႈမၢၵ်ႇတႃသေႃးလုၼၼ်ႉမိူၼ်ၸိူဝ်ႉၼင်ႇၵဵတ်းပႃၵွၵ်းတူၵ်းၵႂႃႇၵမ်းလဵဝ်လႄႈတႃမၼ်းၶိုၼ်းႁၼ်မႃးသေယဝ်ႉမၼ်းလုၵ်ႉလႄႈၶၢမ်ႇဢဝ်ပပ်ႉတိၸၢမ်ႇလႄႈၵိၼ်တၢင်းၵိၼ်မီးႁႅင်းမႃးဢေႃႈ။

၁၉ လိုၼ်းၼၼ်ႉမၼ်းယူႇလူၺ်ႈၵၼ်တင်းတပႄးၸဝ်ႈဢၼ်မီးယူႇၵႃႈၼႂ်းဝဵင်းထမ်ႇမသႅတ်ႈၸိူဝ်းၼၼ်ႉၶိင်ႇၵႃႇလႃႉႁိုင်တၢၼ်ႇတၢၼ်ႇဢေႃႈ။

သေႃးလုယူႇၼႂ်းဝဵင်းထမ်ႇမသႅတ်ႈတင်းဝဵင်းယေႇရုသလႅမ်ႇ

၂၀ ဝၢႆးသေၼၼ်ႉမၼ်းႁေႃးလၢတ်ႈလွင်ႈၸဝ်ႈယေႇသုပဵၼ်လုၵ်ႈၽြႃးပဵၼ်ၸဝ်ႈၼၼ်ႉၵႃႈၼႂ်းၸရွပ်ႈႁေႃးတြႃးတင်းလၢႆၵမ်းလဵဝ်ဢေႃႈ။

၂၁ ၶဝ်တင်းသဵင်ႈတင်းလူင်ဢၼ်ငိၼ်းၸိူဝ်းၼၼ်ႉဢၢမ်းၼႃႇလႄႈဝႃႈ၊-ၵေႃႉၼႆႉပဵၼ်ၵေႃႉဢၼ်ယႃႉယုၵ်ႉၶဝ်ၸိူဝ်းဢၼ်ႁဵတ်းသူးတွင်းပထၼႃႇတီႈၼႃႇမႃႉၸိုဝ်သဵင်ၸဝ်ႈယေႇသုၵႃႈၼႂ်းဝဵင်းယေႇရုသလႅမ်ႇၼၼ်ႉဢမ်ႇၸႂ်ႈႁိုဝ်။မၼ်းပဵၼ်ၵေႃႉဢၼ်မႃးၵႃႈတီႈၼႆႉႁႂ်ႈလႆႈမတ်ႉၽုၵ်ႇဢဝ်ၶဝ်ၵႂႃႇၵႃႈတီႈယိတ်ႉပရေႃးႁိၵ်ႈလူင်ႁႂ်ႈပဵၼ်ၵူၼ်းတူၵ်းထွင်ႇဢမ်ႇၸႂ်ႈႁိုဝ်း၊ဝႃႈၼင်ႇၼႆဢေႃႈ။

၂၂ သေႃးလုၼၼ်ႉယဵင်ႈၶႅၼ်းႁႅင်းယႂ်ႇမႃးလႄႈၵႄႈလိတ်ႉၵႂၢမ်းၵူၼ်းယုတဢၼ်ယူႇၵႃႈၼႂ်းဝဵင်းထမ်ႇမသႅတ်ႈတင်းလၢႆၸိူဝ်းၼၼ်ႉလႄႈၽုၺ်ႇဢွၵ်ႇၼႄပျႃးလွင်ႈဢၼ်ဝႃႈၸဝ်ႈယေႇသုပဵၼ်ၸဝ်ႈၶရိၸ်ႉဢေႃႈ၊ဢၼ်ဝႃႈၼၼ်ႉၸႅင်ႈၸႅင်ႈလႅင်းလႅင်းဢေႃႈ။

၂၃ ပူၼ်ႉဝၼ်းၼမ်ၼႃႇယဝ်ႉလႄႈၵူၼ်းယုတၸိူဝ်းၼၼ်ႉတိူင်ႇပၢင်ႇလၢတ်ႈၸႃၵၼ်ႁႂ်ႈလႆႈဢဝ်မၼ်းတၢႆဢေႃႈ။သေႃးလုႁူႉတၢင်းၵျၢမ်ႇတၢင်းပွင်ၶဝ်ၼၼ်ႉယူႇဢေႃႈ။

၂၄ ၶဝ်ၵေႃႈပႂ်ႉၽၵ်းတူဝဵင်းတင်းလၢႆယူႇၵူႈဝၼ်းၵူႈၶိုၼ်းႁႂ်ႈလႆႈဢဝ်မၼ်းတၢႆဢေႃႈ။

၂၅ ၼႂ်းၶိင်ႇၵၢင်ၶိုၼ်းတပႄးၸဝ်ႈၸိူဝ်းၼၼ်ႉဢဝ်မၼ်းသႂ်ႇၵႃႈၼႂ်းပဵတ်ႈသေယဝ်ႉယွၼ်ႇတူၵ်းသေႁူးလမ်းဝဵင်းဢွၵ်ႇၵႂႃႇဢေႃႈ။

၂၆ မိူဝ်ႈဢၼ်မၼ်းႁွတ်ႈထိုင်ၵႃႈတီႈဝဵင်းယေႇရုသလႅမ်ႇၼၼ်ႉၸိုင်မၼ်းၵျၢမ်ႇႁႃႁႂ်ႈလႆႈႁဵတ်းၵေႃႉႁဵတ်းသေႈလူၺ်ႈၵၼ်တင်းတပႄးၸဝ်ႈတင်းလၢႆၸိူဝ်းၼၼ်ႉသေၵေႃႈၶဝ်ၸိူဝ်းၼၼ်ႉဢမ်ႇယုမ်ႇလွင်ႈဢၼ်ဝႃႈမၼ်းပဵၼ်တပႄးၸဝ်ႈယဝ်ႉ၊ဢၼ်ဝႃႈၼၼ်ႉလႄႈၶဝ်ၵူဝ်မၼ်းဢေႃႈ။

၂၇ မိူဝ်ႈၼၼ်ႉပႃႇၼပၸင်ႇႁွင်ႉဢဝ်မၼ်းၵႂႃႇသူင်ႇၵႃႈတီႈတမၢၼ်ႇၸဝ်ႈတင်းလၢႆယဝ်ႉၸင်ႇမွၵ်ႈလၢတ်ႈၶႆႊၼႄပၼ်ၶဝ်လွင်ႈဢၼ်ဝႃႈမၼ်းလႆႈႁၼ်ၸဝ်ႈၽြႃးၵႃႈတီႈၵၢင်တၢင်းလႄႈမၼ်းၸဝ်ႈလႆႈလၢတ်ႈၵႂၢမ်းတေႃႇမၼ်း၊မၼ်းၵေႃႈလႆႈဢိင်ပိုင်ႈၼႃႇမႃႉၸိုဝ်သဵင်ၸဝ်ႈယေႇသုသေယဝ်ႉႁေႃးလၢတ်ႈႁတ်းႁတ်းႁၢၼ်ႁၢၼ်ၵႃႈၼႂ်းဝဵင်းထမ်ႇမသႅတ်ႈၼၼ်ႉဢေႃႈ။

၂၈ လိုၼ်းသေၼၼ်ႉသေႃးလုၸင်ႇလႆႈၶဝ်ႈၶဝ်ႈဢွၵ်ႇဢွၵ်ႇၵႃႈၼႂ်းဝဵင်းယေႇရုသလႅမ်ႇလူၺ်ႈၵၼ်တင်းတမၢၼ်ႇၸဝ်ႈၸိူဝ်းၼၼ်ႉလႄႈဢိင်ပိုင်ႈၼႃႇမႃႉၸိုဝ်သဵင်ၸဝ်ႈယေႇသုသေယဝ်ႉႁေႃးလၢတ်ႈတြႃးယူႇႁတ်းႁတ်းႁၢၼ်ႁၢၼ်ဢေႃႈ။

၂၉ မၼ်းဢုပ်ႇ

လၢတ်ႈထဵင်ၵၼ်တင်းၵူၼ်းႁေႇလေႇၼိတ်ႉတင်းလၢႆၸိူဝ်းၼၼ်ႉဢေႃႈ။ၶဝ်ၵေႃႈၵျၢမ်ႇႁႃႁႂ်ႈလႆႈဢဝ်မၼ်းတၢႆဢေႃႈ။

၃၀ မိူဝ်ႈဢၼ်ပီႈၼွင်ႉၸိူဝ်းၼၼ်ႉလႆႈငိၼ်းလွင်ႈတၢင်းၼၼ်ႉၸိုင်ၶဝ်ဢဝ်မၼ်းၵႂႃႇသူင်ႇၵႃႈတီႈဝဵင်းၵေႇသရိလႄႈႁႂ်ႈမၼ်းၵႂႃႇၵႃႈတီႈဝဵင်းတႃႇသုပုၼ်ႉသေဢေႃႈ။

၃၁ မိူဝ်ႈၼၼ်ႉၸိူဝ်းၸဝ်ႈဢၼ်မီးယူႇၵႃႈၼႂ်းမိူင်းယုတ၊မိူင်းၵႃႇလိလႄး၊မိူင်းသမႃႇရိ၊ၵူႈတီႈၵူႈလႅၼ်ၸိူဝ်းၼၼ်ႉ၊မီးတၢင်းဢၼ်ၼိမ်ၸႂ်ႈလႄႈတႄႇပဵၼ်ယူႇဢေႃႈ။ၵွပ်ႈပိူဝ်ႈဢၼ်ၸွမ်းလူၺ်ႈလွင်ႈတၢင်းဢၼ်ၵူဝ်ယမ်ၸဝ်ႈၽြႃးဢိၵ်ႇတင်းလွင်ႈတၢင်းဢၼ်ဝိၺိၺ်ႇမူတ်းၸၢင်ႇၸဝ်ႈသင်ႇသွၼ်ပၼ်ၼၼ်ႉလႄႈၵူၼ်းယုမ်ႇမၢတ်ႈၵေႃႈၼမ်မႃးၵိုၼ်းမႃးဢေႃႈ။

ဢေႇၼေႇတင်းတေႃႇၵႃႇ

၃၂ ၼႂ်းမိူဝ်ႈဢၼ်ပေႇတရုလႄႇလဵပ်ႈၵႂႃႇၵူႈတီႈၵူႈလႅၼ်ၵႃႈၼႂ်းၸိူဝ်းၸဝ်ႈတင်းသဵင်ႈတင်းလူင်ယူႇၼၼ်ႉၸိုင်မၼ်းၵႂႃႇႁွတ်ႈထိုင်ၵႃႈတီႈၵူၼ်းမူတ်းၸၢင်ႇဢၼ်မီးယူႇၵႃႈၼႂ်းဝဵင်းလုတ်ႉတၼၼ်ႉဢေႃႈ။

၃၃ ၵႃႈတီႈၼၼ်ႉပေႇတရုထူပ်းႁၼ်ၵူၼ်းၵေႃႉၼိုင်ႈဢၼ်လႆႈၸိုဝ်ဢေႇၼေႇ၊ဢၼ်တိၼ်တၢႆမိုဝ်းတၢႆလႄႈၼွၼ်းယူႇၵႃႈၼိူဝ်ၽႃႈၵွပ်းပႅတ်ႇပီႊတဵမ်တဵမ်ၼၼ်ႉဢေႃႈ။

၃၄ ပေႇတရုၵေႃႈလၢတ်ႈဝႃႈ၊-ဢေႇၼေႇဢိူၺ်း၊ၸဝ်ႈယေႇသုၶရိၸ်ႉပၼ်ၵတ်းယဵၼ်ၶျၢမ်းသႃႇတီႈမႂ်းယဝ်ႉ။လုၵ်ႉလႄႈမႄးႁႅၼ်းၽႃႈၵွပ်းမႂ်းတႃႉ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈၽုတ်းလုၵ်ႉၵမ်းလဵဝ်ဢေႃႈ။

၃၅ ၵူၼ်းဢၼ်ယူႇၵႃႈၼႂ်းဝဵင်းလုတ်ႉတတင်းဝဵင်းသႃႇရူၼ်ႇတင်းသဵင်ႈတင်းလူင်ၸိူဝ်းၼၼ်ႉလႆႈႁၼ်ၵေႃႉၼၼ်ႉလႄႈဢွၼ်ၵၼ်ၶၢႆႉပုတ်ႈမႃးယူႇၵႃႈတီႈၽၢႆႇၸဝ်ႈၽြႃးၵမ်းလဵဝ်ဢေႃႈ။

၃၆ ၼႂ်းဝဵင်းယွပ်ႇပၼၼ်ႉမီးတပႄးၸဝ်ႈၵေႃႉၼိုင်ႈဢၼ်လႆႈၸိုဝ်တဝိထၼၼ်ႉဢေႃႈ။တေႃႇၵႃႇၼႆၵေႃႈၸႂ်ႈဢေႃႈ။မေႈယိင်းၼၼ်ႉတဵမ်ဝႆႉတင်းတၢင်းၵမ်တၢင်းၵျၢင်ႉဢၼ်လီဢၼ်ငၢမ်းဢိၵ်ႇတင်းတၢင်းဢၼ်ၽေးၸွၼ်းယိုၼ်ႈမႅင်ႇပၼ်ပိူၼ်ႈဢေႃႈ။

၃၇ မၼ်းမီးတၢင်းၶႆႈတၢင်းပဵၼ်လႄႈတၢႆၵႂႃႇဢေႃႈ။ၶဝ်ဢဝ်တူဝ်တၢႆမၼ်းဢၢပ်ႇၼမ်ႉသေယဝ်ႉတၢင်ႇဝႆႉၵႃႈတီႈလုၵ်းႁၢၼ်ႉၼိူဝ်ဢေႃႈ။

၃၈ ပိူဝ်ႈဢၼ်ဝဵင်းလုတ်ႉတမီးၸမ်ၵၼ်တင်းဝဵင်းယွပ်ႇပလႄႈတပႄးၸဝ်ႈၸိူဝ်းၼၼ်ႉမိူဝ်ႈဢၼ်လႆႈငိၼ်းလွင်ႈဢၼ်ဝႃႈပေႇတရုမီးယူႇၵႃႈၼႂ်းဝဵင်းၼၼ်ႉၸိုင်ၶဝ်ပွႆႇၸႂ်ႉၵူၼ်းသွင်ၵေႃႉၵႂႃႇႁႂ်ႈလႆႈတွင်းပၢၼ်ႇမၼ်းႁႂ်ႈမႃးၶၼ်ၶၼ်ၽႂ်းၽႂ်းဢေႃႈ။

၃၉ ပေႇတရုၵေႃႈလုၵ်ႉလႄႈၸွမ်းလူၺ်ႈၵၼ်တင်းၶဝ်ၵႂႃႇဢေႃႈ။မိူဝ်ႈဢၼ်မၼ်းႁွတ်ႈၽႅဝ်မႃးယဝ်ႉၸိုင်ၶဝ်ႁွင်ႉဢဝ်မၼ်းၶိုၼ်ႈၵႂႃႇၵႃႈတီႈလုၵ်းႁၢၼ်ႉၼိူဝ်ဢေႃႈ။မေႈမုၵ်ႉမေႈမၢႆႈတင်းလၢႆၵေႃႈၸုၵ်းယူႇၵႃႈတီႈႁိမ်းပေႇတရုၼၼ်ႉသေယဝ်ႉႁွင်ႉႁႆႈယူႇလႄႈဢွၼ်ၵၼ်ၼႄသိူဝ်ႈၶူဝ်းၼုင်ႈဢၼ်တေႃႇၵႃႇယဵပ်ႉဝႆႉမိူဝ်ႈဢၼ်မၼ်းယင်းဢသၢၵ်ႈလိပ်းယူႇလူၺ်ႈၵၼ်တင်းၶဝ်ၼၼ်ႉဢေႃႈ။

၄၀ ပေႇတရုႁႂ်ႈၶဝ်တင်းသဵင်ႈတင်းလူင်ဢွၵ်ႇၵႂႃႇၵႃႈၼွၵ်ႈသေယဝ်ႉ၊မၼ်းၸင်ႇၶုပ်ႉၶဝ်ႇသူးတွင်းႁဵတ်းပထၼႃႇယဝ်ႉၸင်ႇဝၢႆႇၼႃႈၸူးတူဝ်တၢႆၼၼ်ႉသေလႄႈလၢတ်ႈဝႃႈ၊-တပိထဢိူၺ်း၊လုၵ်ႉတႃႉ၊ဝႃႈၼင်ႇၼႆဢေႃႈ။မေႈယိင်းၼၼ်ႉၵေႃႈမိုၼ်းတႃမႃးလႄႈမိူဝ်ႈဢၼ်ႁၼ်ပေႇတရုၼၼ်ႉၸိုင်လုၵ်ႉလႄႈၼင်ႈၵမ်းလဵဝ်ဢေႃႈ။

၄၁ ပေႇတရုၵေႃႈဢဝ်မိုဝ်းယိုၼ်ႈပၼ်တီႈမေႈယိင်းၼၼ်ႉသေယဝ်ႉတိုတ်ႉၸၼ်ဢဝ်မၼ်းလုၵ်ႉလႄႈႁွင်ႉဢဝ်ၵူၼ်းမူတ်းၸၢင်ႇဢိၵ်ႇတင်းမေႈမုၵ်ႉမေႈမၢႆႈၸိူဝ်းၼၼ်ႉသေယဝ်ႉၼႄပျႃႉမေႈယိင်းဢၼ်လုၵ်ႉၶိုၼ်းလိပ်းၼၼ်ႉတီႈၶဝ်ဢေႃႈ။

၄၂ လွင်ႈတၢင်းၼၼ်ႉၸွတ်ႇတူဝ်ၵႂႃႇၵႃႈၼႂ်းဝဵင်းယွပ်ႇပလႄႈၵူၼ်းၼမ်ၼႃႇႁွတ်ႈထိုင်တၢင်းဢၼ်ယုမ်ႇမၢတ်ႈၸဝ်ႈၽြႃးဢေႃႈ။

၄၃ ပေႇတရုယူႇလူၺ်ႈၵၼ်တင်းၵူၼ်းၵေႃႉၼိုင်ႈဢၼ်လႆႈၸိုဝ်သိမုၼ်ႇဢၼ်ပဵၼ်ၵူၼ်းႁဵတ်းၵၢၼ်ၼင်၊ၵႃႈၼႂ်းဝဵင်းယွပ်ႇပႁိုင်တၢၼ်ႇတၢၼ်ႇဢေႃႈ။