Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၂၇

ယုတဢိသၵႃႇရေႇဢုတ်ႉၶႅၼ်ၶေႃးတၢႆ

၁ မိူဝ်ႈဢၼ်ႁွတ်ႈထိုင်ၶိင်ႇၵၢင်ၼႂ်ၸိုင်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းတင်းလၢႆၸိူဝ်းၼၼ်ႉတိူင်ႇပၢင်ႇၵၼ်

၂ ႁႂ်ႈလႆႈဢဝ်ၸဝ်ႈယေႇသုတၢႆလႄႈမတ်ႉၽုၵ်ႇမၼ်းၸဝ်ႈယဝ်ႉၸင်ႇဢဝ်ၵႂႃႇဢၢပ်ႈပၼ်တီႈၶုၼ်ပွၼ်ႇတိပိလၢတ်ႉဢေႃႈ။ 

၃ မိူဝ်ႈၼၼ်ႉယုတဢိသၵႃႇရေႇဢုတ်ႉဢၼ်ဢဝ်မၼ်းၸဝ်ႈဢၢပ်ႈၼၼ်ႉႁူႉႁၼ်လွင်ႈဢၼ်ၶဝ်ၸီႇယၢင်ႇႁႂ်ႈဢဝ်မၼ်းၸဝ်ႈတၢႆၼၼ်ႉၸိုင်မၼ်းၶုၵ်းၸႂ်လႆႈမႆႈၸႂ်လႄႈဢဝ်ငိုၼ်းသၢမ်သိပ်းၶႅပ်းၼၼ်ႉပၼ်ၶိုၼ်းတီႈယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉသေလႄႈလၢတ်ႈဝႃႈ၊-

၄ ၵဝ်ၶႃႈၽိတ်းပိူင်ႈၶႃႈယဝ်ႉ။ ၵဝ်ၶႃႈလႆႈဢဝ်လိူတ်ႈၵေႃႉဢၼ်ဢမ်ႇမီးဢပျႅတ်ႈသင်ၼၼ်ႉဢၢပ်ႈမႅၼ်ႈၶႃႈယဝ်ႉဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈလၢတ်ႈလႄႈဝႃႈ၊-

၅ ၸၢပ်ႈသႅင်ႇၵၼ်တင်းႁဝ်းၸိူဝ်ႉၼင်ႇႁိုဝ်။ မႂ်းတူၺ်းလွင်ႈဢၼ်မႂ်းႁဵတ်းၼၼ်ႉတႃႉ၊မိူဝ်ႈဢၼ်ဝႃႈၼင်ႇၼၼ်ၸိုင်၊မၼ်းၵေႃႈဢဝ်ငိုၼ်းၼၼ်ထိမ်ႈၶျႃးတူၵ်းပႅတ်ႈဝႆႉၵႃႈၼႂ်းပိၵ်ႉမၢၼ်ႇၸဝ်ႈသေယဝ်ႉၵႂႃႇတၢင်ႇတီႈတၢင်ႇလႅၼ်သေလႄႈၶႅၼ်ၶေႃးမၼ်းတၢႆပႅတ်ႈသေဢေႃႈ။ 

၆ ယိတ်ႉပရေႃးႁိၵ်ႈလူင်ၸိူဝ်းၼၼ်ႉၵေႃႈဢဝ်ငိုၼ်းၼၼ်ႉလႄႈလၢတ်ႈဝႃႈ၊-ပိူဝ်ႈဢၼ်ပဵၼ်ငိုၼ်းၵႃႊလိူတ်ႈလႄႈဢမ်ႇထုၵ်ႇလီဢဝ်သႂ်ႇၼႂ်းတိူၵ်ႈၽၼ်ႇတႃႇၸဝ်ႈ၊

၇ ဝႃႈၼင်ႇၼႆယဝ်ႉၸင်ႇတိူင်ႇပၢင်ႇၵၼ်သေယဝ်ႉဢဝ်ငိုၼ်းၼၼ်ႉသိုဝ်ႉဢဝ်ၵႂၢၵ်ႉလိၼ်ၸၢင်ႊမေႃႈလိၼ်ၵႂၢၵ်ႉၼိုင်ႈႁႂ်ႈလႆႈပဵၼ်ပႃႇႁဵဝ်ႈသၢင်းၶျႅင်းပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢေႃႈ။ 

၈ ပိူဝ်ႈၼႆၸင်ႇၵႂၢၵ်ႉလိၼ်ၼၼ်ႉလႆႈႁွင်ႉႁိၵ်ႈဝႃႈၵႂၢၵ်ႉလိၼ်လိူတ်ႈဝႃႈၼႆတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။ 

၉ ၵႂၢမ်းဢၼ်ပရေႃးၽႅတ်ႈယေႇရမိႁေႃးလၢတ်ႈဝႆႉဝႃႈ၊-ၶဝ်ဢဝ်ငိုၼ်းသၢမ်သိပ်းၶႅပ်းဢၼ်ပဵၼ်ၵႃႊၶၼ်ၵေႃႉဢၼ်လႆႈၶၢမ်ႇတၢင်းဢၼ်ၵူၼ်းဢိသရေႇလတင်းလႆပျၢတ်ႉၵႃႊပျၢတ်ႉၶၼ်မၼ်းၼၼ်ႉ

၁၀ သိုဝ်ႉဢဝ်ၵႂၢၵ်ႉလိၼ်ၸၢင်ႊမေႃႈလိၼ်ၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈၵဝ်ၼႆႉၼၼ်ႉဢေႃႈ၊ဝႃႈၼင်ႇၼႆၼၼ်ႉလႆႈတဵမ်ထူၼ်ႈမိူဝ်ႈၼၼ်ႉဢေႃႈ။ 

ၸဝ်ႈယေႇသုၸုၵ်းၽၢႆႇၼႃႈၶုၼ်လူင်ပိလၢတ်ႉ

၁၁ ၸဝ်ႈယေႇသုၸုၵ်းယူႇၵႃႈတီႈၽၢႆႇၼႃႈၶုၼ်ၼၼ်ႉလႄႈၶုၼ်ၼၼ်ႉၵေႃႈထၢမ်လႄႈဝႃႈ၊-မႂ်းၸႂ်ႈၶုၼ်ႁေႃၶမ်းယုတတႄႉႁိူဝ်၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈလႄႈဝႃႈ၊-

၁၂ မႅၼ်ႈၼင်ႇၵႃႈဢၼ်မႂ်းဝႃႈၼႆႉယဝ်ႉ၊ဝႃႈၼင်ႇၼႆဢေႃႈ။ မိူဝ်ႈဢၼ်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉတၢင်ႇဢပျႅတ်ႈယူႇၼၼ်ႉၸိုင်မၼ်းၸဝ်ႈဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်း။ 

၁၃ ၶုၼ်ပိလၢတ်ႉၵေႃႈထၢမ်လႄႈဝႃႈ၊-မႂ်းဢမ်ႇငိၼ်းႁိူဝ်။ ၶဝ်ယူႇၽၢႆႇၼိုင်ႈတင်းမႂ်းသေလႄႈၶၢမ်ႇသၢၵ်ႈသေႇၼမ်ၵႃႈႁိုဝ်၊

၁၄ ဝႃႈၼႆသေၵေႃႈမၼ်းၸဝ်ႈဢမ်ႇၶိုၼ်းတွပ်ႇၶိုၼ်းလၢတ်ႈၵႂၢမ်းသေၶေႃႈသေၵမ်းတေႃႇထိုင်ႁွတ်ႈထၼ်ႈပေႃးၶုၼ်ပိလၢတ်ႉဢၢမ်းၼႃႇလူင်လၢင်ဢေႃႈ။ 

၁၅ ၼႂ်းပွႆးၼၼ်ႉၶဝ်မီးထုင်းၸၢမ်ႇဢၼ်တၵ်းလႆႈပွႆႇလွတ်ႈၵူၼ်းဢၼ်တူၵ်းထွင်ႇၵေႃႉၼိုင်ႈၸွမ်းၼင်ႇဢလူဝ်ႇၵူၼ်းတင်းလၢႆၶႂ်ႈႁႂ်ႈပွႆႇလွတ်ႈၼၼ်ႉဢေႃႈ။ 

၁၆ မိူဝ်ႈၶိင်ႇၼၼ်ႉၶဝ်မီးၵူၼ်းတူၵ်းထွင်ႇၵေႃႉၼိုင်ႈဢၼ်မီးၸိုဝ်ဝႃႈပႃႇရပ်ႉပဢၼ်ဢွၵ်ႇၸိုဝ်ဢွၵ်ႇသဵင်ၼၼ်ႉဢေႃႈ။ 

၁၇ မိူဝ်ႈဢၼ်ၶဝ်ၸူႉၵၼ်တုမ်ၵၼ်ယူႇၼၼ်ႉၸိုင်ၶုၼ်ပိလၢတ်ႉထၢမ်တီႈၶဝ်လႄႈဝႃႈ၊-သူၶႂ်ႈႁႂ်ႈၵဝ်ပွႆႇလွတ်ႈၸဝ်ႈယေႇသုဢၼ်လႆႈႁွင်ႉႁိၵ်ႈၸိုဝ်ၸဝ်ႈၶရိၸ်ႉၼၼ်ႉႁိုဝ်၊ဝႃႈၼင်ႇၼႆဢေႃႈ။ 

၁၈ ၵႂပ်ႈသင်လႄႈထၢမ်ၸိူဝ်ႉၼႆၸမ်းၶုၼ်လူင်ႁူႉလွင်ႈဢၼ်ၶဝ်ဢဝ်မၼ်းၸဝ်ႈဢၢပ်ႈၵွပ်ႈပိူဝ်ႈၸႂ်ဢၼ်သီႇၵေႉႁေႈတႃမၼ်းၸဝ်ႈၼၼ်ႉၵူၺ်းဢေႃႈ။ 

၁၉ လိူဝ်သေၼၼ်ႉဢမ်ႇၵႃးၼႂ်းမိူဝ်ႈဢၼ်ၶုၼ်လူင်ၼင်ႈယူႇၵႃႈၼိူဝ်ပလၢင်ႇတြႃးၼၼ်ႉမေးၶုၼ်လူင်ပွႆႇၸႂ်ႉၵူၼ်းၵေႃႉၼိုင်ႈမႃးၵႃႈတီႈၶုၼ်လူင်လႄႈလဝ်လၢတ်ႈဝႃႈ၊-ယႃႇပေႁဵတ်းၵႃႈသင်တီႈၵေႃႉဢၼ်သိုဝ်ႈတေႃႇၼၼ်ႉသေၵမ်း။ မိူဝ်ႈၼႆႉၵွပ်ႈပိူဝ်ႈမၼ်းလႄႈၵဝ်လႆႈၶၢမ်ႇၼမ်ၼႃႇလူင်လၢင်ၼႂ်းတင်းဢၼ်ၵဝ်ၼွၼ်းၽၼ်ႁၼ်ၼၼ်ႉယဝ်ႉ၊ဝႃႈၼင်ႇၼႆဢေႃႈ။ 

၂၀ ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၸိူဝ်းၼၼ်ႉၵေႃႈတိုၵ်းယူင်းၵူၼ်းၸူႉၵူၼ်းတုမ်ၸိူဝ်းၼၼ်ႉႁႂ်ႈၶဝ်ယွၼ်းဢဝ်ပႃႇရပ်ႉပလွတ်ႈလႄႈဢဝ်ၸဝ်ႈယေႇသုတၢႆဢေႃႈ။ 

၂၁ ပိူဝ်ႈၼႆလႄႈၶုၼ်လူင်ၵေႃႈသမ်ႉထၢမ်တီႈၶဝ်ၼၼ်ႉလႄႈဝႃႈ၊-သူၶႂ်ႈႁႂ်ႈၵဝ်ပွႆႇလွတ်ႈၵေႃႉလႂ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၵေႃႈလဝ်လၢတ်ႈလႄႈဝႃႈ၊-ၶႂ်ႈႁႂ်ႈပွႆႇလွတ်ႈပႃႇရပ်ႉပၶႃႈဢေႃႈ၊ဝႃႈၼင်ႇၼႆဢေႃႈ။ 

၂၂ ၶုၼ်ပိလၢတ်ႉၵေႃႈသမ်ႉထၢမ်တီႈၶဝ်ထႅင်ႈလႄႈဝႃႈ၊-ပေႃးပဵၼ်ၸိူဝ်ႉၼႆၸိုင်ၵဝ်တၵ်းလႆႈႁဵတ်းတီႈၸဝ်ႈယေႇသုဢၼ်လႆႈႁွင်ႉႁိၵ်ႈၸိုဝ်ၶရိၸ်ႉၼႆႉၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်တင်းသဵင်ႈတင်းလူင်ႁွင်ႉသႅၼ်ႇဝႃႈ၊-ႁႂ်ႈမၼ်းၶၢမ်ႇတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းၼၼ်ႉသေၵမ်းၶႃႈဝႃႈၼင်ႇၼႆဢေႃႈ။ 

၂၃ ၶုၼ်လူင်ၵေႃႈထၢမ်လႄႈဝႃႈ၊-ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်။ မၼ်းႁဵတ်းဢပျႅတ်ႈၵႃႈသင်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၸိူဝ်းၼၼ်ႉယဵင်ႈၶႅၼ်းႁွင်ႉသႅၼ်ႇဝႃႈ၊-ႁႂ်ႈမၼ်းၶၢမ်ႇတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းၼၼ်ႉသေၵမ်းၶႃႈ၊ဝႃႈၼင်ႇၼႆဢေႃႈ။ 

၂၄ ၶုၼ်ပိလၢတ်ႉၼၼ်ႉမိူဝ်ႈဢၼ်ႁၼ်လွင်ႈဢၼ်တူဝ်ၸဝ်ႈၵဝ်ႇဢမ်ႇပႄႉလႆႈလႄႈတၢင်းဢၼ်တူင်ႉတိုၼ်ႇဢူၼ်ဢဵၼ်မေႃးမႄးၸႃႉပဵၼ်မႃးၼၼ်ႉၸိုင်မၼ်းလၢတ်ႈဝႃႈ၊-ၵဝ်ၵၢင်းလွတ်ႈတင်းလိူတ်ႈၵေႃႉဢၼ်သိုဝ်ႈတေႃႇၼႆႉယဝ်ႉ။ သူတူၺ်းလွင်ႈတၢင်းၼႆႉတႃႉ၊ဝႃႈၼင်ႇၼႆသေယဝ်ႉမၼ်းဢဝ်ၼမ်ႉသုၵ်ႈမိုဝ်းမၼ်းၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။ 

၂၅ ၵူၼ်းတင်းသဵင်ႈတင်းလူင်ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ႁႂ်ႈလိူတ်ႈမၼ်းမီးၵႃႈၼိူဝ်ႁူဝ်ႁဝ်းၶႃႈ၊ဢိၵ်ႇတင်းၵႃႈၼိူဝ်ႁူဝ်လုၵ်ႈလၢၼ်ႁဝ်းၶႃႈသေၵမ်းတႃႉ၊ဝႃႈၼင်ႇၼႆဢေႃႈ။ 

၂၆ ၶုၼ်ပိလၢတ်ႉၵေႃႈပွႆႇလွတ်ႈပႃႇရပ်ႉပပၼ်တီႈၶဝ်ဢေႃႈ။ ၶဝ်ပေႃႉယႅၼ်ႉၸဝ်ႈယေႇသုလႄႈဢဝ်ဢၢပ်ႈပၼ်ၵႂႃႇႁႂ်ႈလႆႈတွၵ်ႇၵႃႈၼိူဝ်သဝ်လၵ်းဝႃးမိုဝ်းဢေႃႈ။ 

၂၇ မိူဝ်ႈၼၼ်ႉၵူၼ်းသိုၵ်းၶုၼ်တင်းလၢႆဢဝ်ၸဝ်ႈယေႇသုၵႂႃႇၵႃႈၼႂ်းတပ်ႉသေလႄႈႁႂ်ႈၵူၼ်းသိုၵ်းတင်းတပ်ႉၸူႉၵၼ်တုမ်ၵၼ်တီႈမၼ်းၸဝ်ႈသေယဝ်ႉ

၂၈ ထွတ်ႇၶူဝ်းၼုင်ႈမၼ်းၸဝ်ႈပႅတ်ႈလႄႈဢဝ်ၶူဝ်းၼုင်ႈဢၼ်လႅင်ႊၼုင်ႈပၼ်မၼ်းၸဝ်ႈဢေႃႈ။ ၶဝ်ဢဝ်ၼၢမ်သၢၼ်ႁဵတ်းပၢၼ်းၵုမ်းသေယဝ်ႉတၢင်ႇသႂ်ႇၵႃႈၼိူဝ်ႁူဝ်မၼ်းၸဝ်ႈဢေႃႈ။ 

၂၉ ၶွၼ်ႉမႆႉဢေႃႈလႅမ်ႈၼိုင်ႈၵေႃႈၶဝ်ႁႂ်ႈမၼ်းၸဝ်ႈဢဝ်မိုဝ်းၶွၼ်ၶႂႃယိပ်းၵမ်ယဝ်ႉၸင်ႇၶဝ်ၶုပ်ႉၶဝ်ႇပႃႈၼႃႈမၼ်းၸဝ်ႈသေလႄႈႁဵတ်းပျၢၵ်ႈလႄႈဝႃႈ၊-ၶုၼ်ႁေႃၶမ်းယုတတီႈၶႃႈဢိူၺ်း၊ႁႂ်ႈၸဝ်ႈႁဝ်းမီးမင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆဢေႃႈ။ 

၃၀ ၶဝ်ထုမ်ႇၼမ်ႉလၢႆးသႂ်ႇတီႈမၼ်းၸဝ်ႈဢေႃႈ။ ၶဝ်ဢဝ်မႆႉဢေႃႈပေႃႉယႅၼ်ႉႁူဝ်မၼ်းၸဝ်ႈဢေႃႈ။ 

၃၁ ဝၢႆးသေႁဵတ်းပျၢၵ်ႈတီႈမၼ်းၸဝ်ႈယဝ်ႉၶဝ်ထွတ်ႇဢဝ်ၶူဝ်းၼုင်ႈၸဝ်ႈဢၼ်လႅင်ႊၼၼ်ႉသေယဝ်ႉသမ်ႉၶိုၼ်းဢဝ်ၶူဝ်းၼုင်ႈမၼ်းၸဝ်ႈၼုင်ႈပၼ်ယဝ်ႉၸင်ႇဢဝ်မၼ်းၸဝ်ႈဢွၵ်ႇၵႂႃႇႁႂ်ႈလႆႈတွၵ်ႇၵႃႈၼိူဝ်သဝ်လၵ်းဝႃးမိုဝ်းဢေႃႈ။ 

ၸဝ်ႈယေႇသုၶၢမ်ႇတၢင်းတၢႆ

၃၂ ၼႂ်းမိူဝ်ႈဢၼ်ၶဝ်ဢွၵ်ႇၵႂႃႇယူႇၼၼ်ႉၸိုင်ၶဝ်ထူပ်းႁၼ်ၵူၼ်းၵေႃႉၼိုင်ႈဢၼ်လႆႈၸိုဝ်သိမုၼ်ႇၵူၼ်းမိူင်းၵုရေႇၼေႇၼၼ်ႉလႄႈၶဝ်ႁဵတ်းပႄႉႁဵတ်းၼႅင်ႇႁႂ်ႈမၼ်းႁၢပ်ႇဢဝ်သဝ်လၵ်းဝႃးမိုဝ်းမၼ်းၸဝ်ႈၵႂႃႇဢေႃႈ။ 

၃၃ မိူဝ်ႈဢၼ်ၶဝ်ႁွတ်ႈထိုင်ၵႂႃႇၵႃႈတီႈလွႆဢၼ်လႆႈႁွင်ႉႁိၵ်ႈၸိုဝ်ဝႃႈၵေႃးလၵေႃးသဢၼ်ၶႂ်ႈပွင်ႇဝႃႈလုပ်ႇၵွၵ်းႁူဝ်ၼၼ်ႉၸိုင်ၶဝ်ဢဝ်ၼမ်ႉပုင်းယေႇဢၼ်လေႃးၵၼ်တင်းယႃႈၶူမ်ၼၼ်ႉပၼ်တီႈမၼ်းၸဝ်ႈႁႂ်ႈမၼ်းၸဝ်ႈၵိၼ်ဢေႃႈ။ 

၃၄ မၼ်းၸဝ်ႈၸိမ်းတူၺ်းသေယဝ်ႉဢမ်ႇၵိၼ်လႄႈယူႇဢေႃႈ။ 

၃၅ ၶဝ်ဢဝ်မၼ်းၸဝ်ႈတွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းယဝ်ႉၸင်ႇဢဝ်ၶူဝ်းၼုင်ႈမၼ်းၸဝ်ႈတူၵ်းၸႃႇၵွၵ်ႈသေလႄႈၽႄမႅင်ႇပၼ်ၵၼ်ဢေႃႈ။ 

၃၆ ၶဝ်ၼင်ႈလႄႈပႂ်ႉယူႇၵႃႈတီႈၼၼ်ႉဢေႃႈ။ 

၃၇ ၶဝ်ဢဝ်လိၵ်ႈဢၼ်ၽုၺ်ႇၼႄဢပျႅတ်ႈမၼ်းၸဝ်ႈဢၼ်တႅမ်ႈဝႆႉလႄႈဝႃႈ၊-ၵေႃႉၼႆႉပဵၼ်ယေႇသုၶုၼ်ႁေႃၶမ်းၵူၼ်းယုတဢေႃႈ၊ဢၼ်ဝႃႈၼၼ်ႉတွၵ်ႇဝႆႉၵႃႈၼိူဝ်ႁူဝ်သဝ်လၵ်းဝႃးမိုဝ်းမၼ်းၸဝ်ႈၼၼ်ႉဢေႃႈ။ 

၃၈ မိူဝ်ႈၼၼ်ႉၶဝ်ဢဝ်ၸူၼ်သွင်ၵေႃႉတွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းပုၵ်းတင်ႈၵႃႈတီႈၽၢႆႇၶႂႃမၼ်းၸဝ်ႈၵေႃႉၼိုင်ႈၵႃႈတီႈၽၢႆႇသၢႆႉမၼ်းၸဝ်ႈၵေႃႉၼိုင်ႈဢေႃႈ။ 

၃၉ ၶဝ်ၸိူဝ်းဢၼ်ၵႂႃႇဢၼ်မႃးၵႃႈတီႈႁိမ်းမၼ်းၸဝ်ႈတင်းလၢႆၸိူဝ်းၼၼ်ႉၵေႃႈသေႉသွမ်းတၢင်ႇဢပျႅတ်ႈတီႈမၼ်းၸဝ်ႈဝၢႆႇႁူဝ်ၶွၼ်းႁူဝ်သေလႄႈလၢတ်ႈဝႃႈ၊-

၄၀ ၵေႃႉဢၼ်ဝႃႈတယေႃႉပႅတ်ႈလႆႈပိၵ်ႉမၢၼ်ႇၸဝ်ႈသေလႄႈၼႂ်းသၢမ်ဝၼ်းၵူၺ်းတၵ်းၶိုၼ်းတေမႄးႁဵတ်းၼႆႉဢိူၺ်း၊တူဝ်ၸဝ်ႈၵဝ်ႇၵႄႇၶျွတ်ႈဢဝ်တူဝ်ၸဝ်ႈၵဝ်ႇသေၵမ်းတႃႉ။ ပေႃးၸႂ်ႈလုၵ်ႈၽြႃးပဵၼ်ၸဝ်ႈၸိုင်လူင်းသေၵႃႈတီႈသဝ်လၵ်းဝႃးမိုဝ်းမႃးသေၵမ်း၊ဝႃႈၼင်ႇၼႆဢေႃႈ။ 

၄၁ မိူၼ်ၼင်ႇၼၼ်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၵေႃႈႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈလႄႈဝႃႈ၊-

၄၂ ၵေႃႉၼႆႉၸၢင်ႊၵႄႇၶျွတ်ႈဢဝ်ပိူၼ်ႈတၢင်ႇၵေႃႉဢေႃႈ။ တူဝ်ၸဝ်ႈၵဝ်ႇဢမ်ႇၵႄႇၶျွတ်ႈဢဝ်တူဝ်ၸဝ်ႈၵဝ်ႇလႆႈလူင်ပေႇ။ ပေႃးၸႂ်ႈၶုၼ်ႁေႃၶမ်းဢိသရေႇလၸိုင်တေႃႈလဵဝ်ၼႆႉလူင်းသေၵႃႈတီႈသဝ်လၵ်းဝႃးမိုဝ်းၼႆႉသေၵမ်း။ 

၄၃ ပေႃးလူင်းၸိုင်ႁဝ်းတၵ်းယုမ်ႇမၢတ်ႈဢေႃႈ။ မၼ်းဢိင်ပိုင်ႈၽြႃးပဵၼ်ၸဝ်ႈယဝ်ႉ။ 

၄၄ မၼ်းဝႃႈ၊-ၵဝ်ပဵၼ်လုၵ်ႈၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆဢိူဝ်း။ ပေႃးၽြႃးပဵၼ်ၸဝ်ႈမီးဢလူဝ်ႇတီႈမၼ်းၸိုင်တေႃႈလဵဝ်ၼႆႉႁႂ်ႈမၼ်းၸဝ်ႈၵႄႇၶျွတ်ႈဢဝ်မၼ်းသေၵမ်း၊ဝႃႈၼင်ႇၼႆဢေႃႈ။ မိူၼ်ၼင်ႇၼၼ်ၸူၼ်ဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းႁိမ်းမၼ်းၸဝ်ႈၸိူဝ်းၼၼ်ႉၵေႃႈသေႉသွမ်းတၢင်ႇဢပျႅတ်ႈတီႈမၼ်းၸဝ်ႈဢေႃႈ။ 

၄၅ ၸႃႉၸဵမ်ႁူၵ်းၼႃႇရီႇတေႃႇထိုင်ႁွတ်ႈၵဝ်ႈၼႃႇရီႇပဵၼ်ဢၼ်လပ်းသိင်ႇၵႂႃႇၽိတ်းၽိတ်းတင်းမိူင်းဢေႃႈ။ 

၄၆ ၶိင်ႇၵဝ်ႈၼႃႇရီႇၸမ်ၸမ်ၼၼ်ႉၸဝ်ႈယေႇသုဢဝ်တင်းသဵင်ဢၼ်ယႂ်ႇၼႃႇႁွင်ႉလႄႈဝႃႈ၊-ဢေးလိ၊ဢေးလိ၊လႃႇမႃႇ၊သႃႇပၵ်ႉသၼိ၊ဝႃႈၼႆဢေႃႈ။ မၼ်းပွင်ႇဝႃႈ၊-ၽြႃးၵဝ်ၶႃႈ၊ၽြႃးၵဝ်ၶႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸုၼ်ႉပႅတ်ႈၵဝ်ၶႃႈၸိူဝ်ႉၼင်ႇၼႆတီႈၶႃႈ၊ဝႃႈၼင်ႇၼႆဢေႃႈ။ 

၄၇ ၵူၼ်းၵမ်ႈၽွင်ႈဢၼ်ၸုၵ်းယူႇၵႃႈတီႈၼၼ်ႉငိၼ်းသေယဝ်ႉလၢတ်ႈဝႃႈ၊-မၼ်းႁွင်ႉႁႃဢေးလိယဢေႃႈ၊ဝႃႈၼင်ႇၼႆဢေႃႈ။ 

၄၈ ၵူၼ်းၵေႃႉၼိုင်ႈၶုၼ်ႇလႅၼ်ႈၵႂႃႇၵမ်းလဵဝ်လႄႈဢဝ်ႁဵပ်းၼမ်ႉဢၼ်ၼိုင်ႈၸုမ်ႇၼမ်ႉပုင်းယေႇသေယဝ်ႉသႂ်ႇပၢႆမႆႉဢေႃႈယဝ်ႉၸင်ႇယိုၼ်ႈပၼ်ႁႂ်ႈမၼ်းၸဝ်ႈၵိၼ်ဢေႃႈ။ 

၄၉ ၶဝ်ၸိူဝ်းဢၼ်ယင်းၵိုတ်းယူႇၸိူဝ်းၼၼ်ႉၵေႃႈလၢတ်ႈဝႃႈ၊-ယႃႇမၼ်းတႃႉ။ ဢေးလိယတၵ်းမႃးပွႆႇမၼ်းလွတ်ႈႁိုဝ်ဢမ်ႇမႃးႁိုဝ်ၼၼ်ႉႁဝ်းပႂ်ႉတူၺ်းလူးၵွၼ်ႇတႃႉ၊ဝႃႈၼင်ႇၼႆဢေႃႈ။ 

၅၀ ၸဝ်ႈယေႇသုသမ်ႉၶိုၼ်းဢဝ်တင်းသဵင်ဢၼ်ယႂ်ႇၼႃႇႁွင်ႉလႄႈတိုတ်ႉၸႂ်မၼ်းၸဝ်ႈၶၢတ်ႇသေဢေႃႈ။ 

၅၁ မိူဝ်ႈၼၼ်ႉၽႃႈၵင်ႈႁိူၼ်းပိၵ်ႉမၢၼ်ႇၸဝ်ႈသိၵ်ႇၶၢတ်ႇၵႂႃႇၸႃႉၸဵမ်ၵႃႈၼိူဝ်တေႃႇထိုင်ႁွတ်ႈၵႃႈတႂ်ႈဢေႃႈ။ 

၅၂ ဢိင်ႇၵေႃႈသၼ်ႇဢေႃႈ။ မၢၵ်ႇႁိၼ်တင်းလၢႆၵေႃႈတႅၵ်ႇဢေႃႈ။ ၶုမ်သၢင်းၶျႅင်းတင်းလၢႆၵေႃႈၽုၺ်ႇပိုတ်ႇလႄႈတူဝ်တၢႆၵူၼ်းဢၼ်မူတ်းၸၢင်ႇဢၼ်ၵိင်းၼွၼ်းယူႇၼမ်ၼႃႇၸိူဝ်းၼၼ်ႉၵေႃႈလုၵ်ႉၶိုၼ်းလႄႈဢွၵ်ႇသေၵႃႈၼႂ်းၶုမ်သၢင်းၶျႅင်းမႃးဢေႃႈ။ 

၅၃ ဝၢႆးသမေၼ်းၸဝ်ႈလုၵ်ႉၶိုၼ်းလိပ်းမႃးယဝ်ႉၼၼ်ႉၶဝ်ၶဝ်ႈၵႃႈၼႂ်းဝဵင်းဢၼ်မူတ်းၸၢင်ႇယဝ်ႉၸင်ႇထၢင်ႇသႃးပေႃႇမႃးတီႈၵူၼ်းၼမ်ၼႃႇဢေႃႈ။ 

၅၄ ၸႃႉၸဵမ်တပ်ႉမူးလႄႈၶဝ်ၸိူဝ်းဢၼ်ပႂ်ႉၸဝ်ႈယေႇသုယူႇၸိူဝ်းၼၼ်ႉႁၼ်လွင်ႈတၢင်းဢၼ်ဢိင်ႇသၼ်ႇဢိၵ်ႇတင်းလွင်ႈတၢင်းဢၼ်ပဵၼ်မႃးၵူႈၸိူဝ်ႉၵူႈပိူင်ၼၼ်ႉလႄႈတူၵ်းၸႂ်ၼႃႇလူင်လၢင်လႄႈဝႃႈ၊-ၸႂ်ႈတႄႉယဝ်ႉ။ ၵေႃႉၼႆႉပဵၼ်လုၵ်ႈၽြႃးပဵၼ်ၸဝ်ႈတႄႉဢေႃႈ၊ဝႃႈၼင်ႇၼႆဢေႃႈ။ 

၅၅ မႄႈယိင်းဢၼ်လုၵ်ႉသေၵႃတီႈမိူင်းၵႃႇလိလႄးၸွမ်းပႃႈလင်ၸဝ်ႈယေႇသုမႃးလႄႈႁဵတ်းလဵင်ႉႁဵတ်းလူမၼ်းၸဝ်ႈၸိူဝ်းၼၼ်ႉၵေႃႈယူႇတီႈဢၼ်ၵႆလႄႈလွမ်တူၺ်းယူႇဢေႃႈ။ 

၅၆ ၼႂ်းၶဝ်ၸိူဝ်းၼၼ်ႉပႃးမႃႇရိမႃႇၵတလ၊မႃႇရိဢၼ်ပဵၼ်မႄႈယႃႇၵုပ်ႉတင်းယုဝ်းသေႇ၊ဢိၵ်ႇတင်းမႄႈလုၵ်ႈၸၢႆးၸေႇပေႇတေးၸိူဝ်းၼၼ်ႉဢေႃႈ။ 

တၢင်းဢၼ်သၢင်းၵျူဝ်ႇၸဝ်ႈယေႇသု

၅၇ မိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၸိုင်သထေးၵေႃႉၼိုင်ႈဢၼ်ပဵၼ်ၵူၼ်းဝဵင်းဢရိမသေႇဢၼ်ၸိုဝ်ယုဝ်းသႅပ်ႉဢၼ်ပဵၼ်တပႄးၸဝ်ႈယေႇသုၼၼ်ႉမၼ်းၶဝ်ႈၸူးတီႈၶုၼ်ပိလၢတ်ႉလႄႈယွၼ်းဢဝ်တူဝ်တၢႆၸဝ်ႈယေႇသုဢေႃႈ။ 

၅၈ မိူဝ်ႈၼၼ်ႉၶုၼ်ပိလၢတ်ႉမီးဢမိင်ႉႁႂ်ႈပၼ်တူဝ်တၢႆမၼ်းၸဝ်ႈဢေႃႈ။ 

၅၉ ယုဝ်းသႅပ်ႉၵေႃႈဢဝ်တူဝ်တၢႆမၼ်းၸဝ်ႈသေယဝ်ႉဢဝ်ပိၵ်ႉၶျေႃးဢၼ်မူတ်းသႂ်ၼၼ်ႉႁေႃႇၶဵၼ်းယဝ်ႉၸင်ႇဢဝ်သႂၢင်းသႂ်ႇဝႆႉၵႃႈၼႂ်းၶုမ်သၢင်းၶျႅင်းဢၼ်မႂ်ႇဢၼ်မၼ်းၶုတ်ႉဝႆႉၵႃႈၼႂ်းမၢၵ်ႇႁိၼ်ၼၼ်ႉဢေႃႈ။ 

၆၀ မၢၵ်ႇႁိၼ်ဢၼ်ယႂ်ႇၼႃႇၵေႃႈမၼ်းၵိင်ႈသေလႄႈဢဝ်ဢိုတ်းႁူးၶုမ်သၢင်းၶျႅင်းဝႆႉယဝ်ႉၸင်ႇမိူဝ်းၵႂႃႇဢေႃႈ။ 

၆၁ မႃႇရိမႃႇၵတလတင်းမႃႇရိတၢင်ႇၵေႃႉမီးယူႇၵႃႈတီႈၼၼ်ႉလႄႈၼင်ႈယူႇၵႃႈတီႈၽၢႆႇၼႃႈၶုမ်သၢင်းၶျႅင်းမၼ်းၸဝ်ႈဢေႃႈ။ 

လုၵ်ႈသိုၵ်းပႂ်ႉၶုမ်သၢင်းၶျႅင်း

၆၂ မိူဝ်ႈဢၼ်ပူၼ်ႉဝၼ်းၽိတ်ႈလႄႈႁွတ်ႈထိုင်ဝၼ်းမိူဝ်ႈၽုၵ်ႈၼၼ်ႉၸိုင်ယိတ်ႉပရေႃးႁိၵ်ႈလူင်ဢိၵ်ႇတင်းၽႃႇရိသေးတင်းလၢႆၸူႉၵၼ်တုမ်ၵၼ်တီႈၶုၼ်ပိလၢတ်ႉသေလႄႈလဝ်လၢတ်ႈလႄႈဝႃႈ၊-

၆၃ ၸဝ်ႈႁဝ်းတီႈၶႃႈ၊ႁဝ်းၶႃႈတွင်းၵႂၢမ်းၵေႃႉဢၼ်ၸၢင်ႊပႅတ်ႉၸၢင်ႊလႅၼ်ၼၼ်ႉလၢတ်ႈဝႆႉမိူဝ်ႈဢၼ်မၼ်းဢမ်ႇပႆႇတၢႆၼၼ်ႉၶႃႈဢေႃႈ။ 

၆၄ မၼ်းဝႃႈ၊-ၵဝ်ၼႆႉပေႃးတၢႆယဝ်ႉလႆႈသၢမ်ဝၼ်းၸိုင်တၵ်းလုၵ်ႉၶိုၼ်းဢေႃႈ၊ဝႃႈၼင်ႇၼႆၶႃႈဢေႃႈ။ ၵွပ်ႈႁွႆးၼႆႉလႄႈၼင်ႇႁိုဝ်တၵ်းပႂ်ႉၶုမ်သၢင်းၶျႅင်းၼၼ်ႉလီလီငၢမ်းငၢမ်းတေႃႇထိုင်ႁွတ်ႈလႆႈသၢမ်ဝၼ်းၸိုင်ၸဝ်ႈႁဝ်းၶႅၼ်းတေႃႈမီးဢမိင်ႉသေၵမ်းၶႃႈ။ ႁဝ်းၶႃႈၵူဝ်တပႄးမၼ်းတင်းလၢႆတၵ်းမႃးၶိင်ႇၵၢင်ၶိုၼ်းလႄႈလၵ်ႉဢဝ်တူဝ်တၢႆမၼ်းၵႂႃႇသေယဝ်ႉသမ်ႉၶိုၼ်းတၵ်းလၢတ်ႈတီႈၵူၼ်းတင်းသဵင်ႈတင်းလူင်ဝႃႈ၊-မၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းယဝ်ႉ၊ဝႃႈၼင်ႇၼႆဢေႃႈ။ ပိူဝ်ႈၼႆလႄႈတၢင်းဢၼ်ပႅတ်ႉၵမ်းလိုၼ်းတၵ်းယဵင်ႈၶႅၼ်းႁၢႆႉၼႃႇသေတၢင်းဢၼ်ပႅတ်ႉၵမ်းဢွၼ်တၢင်းၶႃႈဢေႃႈ၊ဝႃႈၼင်ႇၼႆလႄႈၶုၼ်ပိလၢတ်ႉၵေႃႈလၢတ်ႈလႄႈဝႃႈ၊-

၆၅ ၵႃႈတီႈသူမီးၵူၼ်းပႂ်ႉၸုမ်းၼိုင်ႈဢမ်ႇၸႂ်ႈႁိုဝ်း။ ၵႂႃႇတႃႉ။ ၵႃႈၼင်ႇဢၼ်တၢတ်ႈၼိုင်ႇလႆႈၼၼ်ႉႁႂ်ႈပႂ်ႉလီလီငၢမ်းငၢမ်းတႃႉ၊ဝႃႈၼင်ႇၼႆဢေႃႈ။ 

၆၆ၶဝ်တင်းၵူၼ်းပႂ်ႉၸိူဝ်းၼၼ်ႉၵေႃႈၵႂႃႇလႄႈတွၵ်ႇတၼ်းသိၵ်ႈတီႈမၢၵ်ႇႁိၼ်ၼၼ်ႉသေယဝ်ႉႁႂ်ႈပႂ်ႉၶုမ်သၢင်းၶျႅင်းမၼ်းၸဝ်ႈလီလီငၢမ်းငၢမ်းဢေႃႈ။