Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၁၈ 

ၸဝ်ႈယေႇသုၶၢမ်ႇတၢင်းဢၼ်တီႉဢဝ်

၁ ၸဝ်ႈယေႇသုၵေႃႈသူးတွင်းၸိူဝ်ႉၼင်ႇၼၼ်သေယဝ်ႉဢွၵ်ႇလူၺ်ႈၵၼ်တင်းတပႄးၸဝ်ႈတင်းလၢႆၵႂႃႇၵႃႈတီႈၽၢႆႇပုၼ်ႉဝၢၼ်ႈၵေႇတြုၼ်ႇတီႈဢၼ်မီးသူၼ်ဢူးယဵၼ်ႇၼၼ်ႉလႄႈၶဝ်ႈၵႂႃႇၵႃႈၼႂ်းၼၼ်ႉဢေႃႈ။

၂ ပိူဝ်ႈဢၼ်ၸဝ်ႈယေႇသုတင်းတပႄးၸဝ်ႈတင်းလၢႆၵႆႉၵႂႃႇၵႃႈတီႈၼၼ်ႉၶိူဝ်းၶိူဝ်းလႄႈယုတဢိသၵႃႇရေႇဢုတ်ႉဢၼ်တေဢဝ်မၼ်းၸဝ်ႈဢၢပ်ႈၼၼ်ႉႁူႉဢွင်ႈတီႈၼၼ်ႉဢေႃႈ။

၃ ပိူဝ်ႈၼႆလႄႈယုတဢိသၵႃႇရေႇဢုတ်ႉၼၼ်ႉပႃးဢဝ်တင်းၵူၼ်းသိုၵ်းတပ်ႉၼိုင်ႈဢိၵ်ႇတင်းၵူၼ်းဢွၼ်ႇၸၢႆးဢၼ်ယိတ်ႉပရေႃးႁိၵ်ႈလူင်တင်းၽႃႇရိသေးၶဝ်ပွႆႇၸႂ်ႉမႃးၸိူဝ်းၼၼ်ႉသေယဝ်ႉယိပ်းၵၢၼ်ၽႆးလႂ်ႁိူၼ်းၽႆးလႂ်လၢၵ်ႈၼၢၵ်ႈလႂ်သေလႄႈမႃးဢေႃႈ။

၄ ၸဝ်ႈယေႇသုႁူႉလွင်ႈတၢင်းဢၼ်တၵ်းပဵၼ်မႃးတီႈမၼ်းၸဝ်ႈၼၼ်ႉလႄႈမၼ်းၸဝ်ႈၵႂႃႇၸူးၵႃႈတီႈၶဝ်ၸိူဝ်းဢၼ်မႃးၼၼ်ႉလႄႈထၢမ်ဝႃႈ၊-သူႁႃၽူႈလႂ်ဝႃႈၼင်ႇၼႆဢေႃႈ။

၅ ၶဝ်ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ႁႃၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈလႄႈဝႃႈ၊-ပဵၼ်ၵဝ်ဢေႃႈ၊ဝႃႈၼင်ႇၼႆႉဢေႃႈ။ယုတဢိသၵႃႇရေႇဢုတ်ႉဢၼ်ဢဝ်မၼ်းၸဝ်ႈဢၢပ်ႈၼၼ်ႉၵေႃႈၸုၵ်းယူႇလူၺ်ႈၵၼ်တင်းၶဝ်ၼၼ်ႉဢေႃႈ။

၆ မိူဝ်ႈဢၼ်မၼ်းၸဝ်ႈလၢတ်ႈဝႃႈ၊ပဵၼ်ၵဝ်ဢေႃႈ၊ဝႃႈၼင်ႇၼႆၼၼ်ႉၶဝ်ၸိူဝ်းၼၼ်ႉသုတ်ႉတၢင်းလင်လႄႈပိၼ်ႈလူမ်ႉၵႂႃႇၵႃႈၼိူဝ်လိၼ်ဢေႃႈ။

၇ မၼ်းၸဝ်ႈသမ်ႉၶိုၼ်းထၢမ်ထႅင်ႈလႄႈဝႃႈ၊-သူႁႃၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၵေႃႈလၢတ်ႈလႄႈဝႃႈ၊-ႁႃၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉဢေႃႈ၊ဝႃႈၼင်ႇၼႆဢေႃႈ။

၈ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ပဵၼ်ၵဝ်ဢေႃႈ၊ဝႃႈၼႆၵဝ်လၢတ်ႈယဝ်ႉ။ပိူဝ်ႈၼႆလႄႈပေႃးသူႁႃၵဝ်ၸိုင်ပၼ်ဢၶႂၢင်ႉႁႂ်ႈၶဝ်ၸိူဝ်းၼႆႉၵႂႃႇသေၵမ်း၊ဝႃႈၼင်ႇၼႆဢေႃႈ။

၉ ၼင်ႇႁိုဝ်ၵႂၢမ်းဢၼ်မၼ်းၸဝ်ႈလၢတ်ႈဝႆႉဝႃႈ၊-ၼႂ်းၶဝ်ၸိူဝ်းဢၼ်ၸဝ်ႈႁဝ်းပၼ်တီႈၵဝ်ၶႃႈၼၼ်ႉၽူႈလႂ်သေၵေႃႉသေၵူၼ်းတၵ်းဢမ်ႇႁွတ်ႈထိုင်တၢင်းလူႉတၢင်းလႅဝ်တီႈၶႃႈ၊ဝႃႈၼင်ႇၼႆၼၼ်ႉတၵ်းတဵမ်ထူၼ်ႈၸိုင်ၸင်ႇပဵၼ်ဢေႃႈ။

၁၀ မိူဝ်ႈၼၼ်ႉသိမုၼ်ႇပေႇတရုတိုတ်ႉထွတ်ႇဢဝ်လၢပ်ႇဢၼ်မၼ်းပႃးမႃးၼၼ်ႉသေယဝ်ႉၼ်းသႂ်ႇၶႃႈယိတ်ႉပရေႃးႁိၵ်ႈၵေႃႉၼိုင်ႈလႄႈဝၢၼ်ႁူမၼ်းၽၢႆႇၶႂႃၶၢတ်ႇတူၵ်းၵႂႃႇဢေႃႈ။ၸိုဝ်သဵင်ၶႃႈၼၼ်ႉၸမ်းပဵၼ်မႃႇလၶုဢေႃႈ။

၁၁ ၸဝ်ႈယေႇသုၵေႃႈလၢတ်ႈတီႈပေႇတရုလႄႈဝႃႈ၊-ဢဝ်လၢပ်ႇမႂ်းသုပ်းသႂ်ႇဝႆႉၼႂ်းၵပ်းမၼ်းသေတႃႉ။ၵွၵ်းဢၼ်ပေႃႈၸဝ်ႈပၼ်တီႈၵဝ်ၼၼ်ႉၵဝ်တၵ်းဢမ်ႇလႆႈၵိၼ်ႁိုဝ်၊ဝႃႈၼင်ႇၼႆဢေႃႈ။

ဢဝ်ၸဝ်ႈယေႇသုၵႂႃႇၸူးတီႈၶုၼ်လူင်

၁၂ မိူဝ်ႈၼၼ်ႉၸႃႉၸဵမ်တပ်ႉမူးလႄႈၵူၼ်းသိုၵ်းဢိၵ်ႇတင်းၵူၼ်းဢွၼ်ႇၸၢႆးၶုၼ်ယုတၸိူဝ်းၼၼ်ႉတီႉဢဝ်ၸဝ်ႈယေႇသုလႄႈမတ်ႉၽုၵ်ႇသေယဝ်ႉဢဝ်ၵႂႃႇၸူးၵႃႈတီႈၶုၼ်ဢၼ်ႇၼတ်ႉဢွၼ်တၢင်းဢေႃႈ။

၁၃ ၶုၼ်ဢၼ်ႇၼတ်ႉၸမ်းပဵၼ်ပူႇၼၢႆးၵႃႇယႃႇၽဢၼ်ပဵၼ်ၶုုၼ်ယိတ်ႉပရေႃးႁိၵ်ႈၼႂ်းပီႊၼၼ်ႉဢေႃႈ။

၁၄ ၵႃႇယႃႇၽၼၼ်ႉပဵၼ်ၵေႃႉဢၼ်ပၼ်ဢၵျၢမ်ႇၵူၼ်းယုတတင်းလၢႆဝႃႈ၊-တၢင်းဢၼ်ၵူၼ်းၵေႃႉၼိုင်ႈတၢႆပုၼ်ႈၵူၼ်းတင်းလၢႆၼၼ်ႉယဵင်ႈၶႅၼ်းလီဢေႃႈ၊ဝႃႈၼင်ႇၼႆၼၼ်ႉဢေႃႈ။

၁၅ သိမုၼ်ႇပေႇတရုတင်းတပႄးၸဝ်ႈတၢင်ႇၵေႃႉၵေႃႈၸွမ်းပႃႈလင်ၸဝ်ႈယေႇသုၵႂႃႇဢေႃႈ။တပႄးၸဝ်ႈၵေႃႉၼၼ်ႉပဵၼ်ၵေႃႉဢၼ်မိုတ်ႈၵိုဝ်းၵၼ်တင်းၶုၼ်ယိတ်ႉပရေႃးႁိၵ်ႈလႄႈမၼ်းၶဝ်ႈၸွမ်းၸဝ်ႈယေႇသုၵႂႃႇၵႃႈတီႈၼႂ်းတလၢင်းဢၼ်မီးၼႂ်းၵႄႈႁိူၼ်းၶုၼ်ယိတ်ႉပရေႃးႁိၵ်ႈၼၼ်ႉဢေႃႈ။

၁၆ ပေႇတရုၸုၵ်းယူႇၵႃႈတီႈႁိမ်းၽၵ်းတူၽၢႆႇၼွၵ်ႈဢေႃႈ။တပႄးၸဝ်ႈတၢင်ႇၵေႃႉဢၼ်မိုတ်ႈၵိုဝ်းၵၼ်တင်းၶုၼ်ယိတ်ႉပရေႃးႁိၵ်ႈၼၼ်ႉဢွၵ်ႇၵႂႃႇလၢတ်ႈတီႈမေႈယိင်းဢၼ်ပႂ်ႉၽၵ်းတူၼၼ်ႉသေယဝ်ႉဢဝ်ပေႇတရုၶဝ်ႈမႃးဢေႃႈ။

၁၇ ၵမ်းၼၼ်ႉမေႈယိင်းဢၼ်ပႂ်ႉၽၵ်းတူၼၼ်ႉလၢတ်ႈတီႈပေႇတရုလႄႈဝႃႈ၊-မႂ်းပဵၼ်တပႄးမၼ်းၵေႃႉၼိုင်ႈဢမ်ႇၸႂ်ႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈထဵင်ပႅတ်ႈလႄႈဝႃႈ၊-ၵဝ်ဢမ်ႇၸႂ်ႈ၊ဝႃႈၼင်ႇၼႆဢေႃႈ။

၁၈ ၶိင်ႇၼၼ်ႉပဵၼ်ၶိင်ႇၵတ်းလႄႈၶႃႈဢိၵ်ႇတင်းၵူၼ်းဢွၼ်ႇၸၢႆးၸိူဝ်းၼၼ်ႉသႂ်ႇၵွင်ထၢၼ်ႇၽႆးလႄႈၸုၵ်းယူႇၵႃႈတီႈၼၼ်ႉဢွမ်ႇၽႆးယူႇဢေႃႈ။ပေႇတရုၵေႃႈၸုၵ်းယူႇလူၺ်ႈၵၼ်တင်းၶဝ်လႄႈဢွမ်ႇၽႆးယူႇဢေႃႈ။

၁၉ မိူဝ်ႈၼၼ်ႉၶုၼ်ယိတ်ႉပရေႃးႁိၵ်ႈၼၼ်ႉၸႅတ်ႈထၢမ်ၸႅတ်ႈတူၺ်းၸဝ်ႈယေႇသုလူၺ်ႈလွင်ႈတပႄးမၼ်းၸဝ်ႈတင်းလၢႆဢိၵ်ႇတင်းလူၺ်ႈလွင်ႈတေႇသၼႃႇဢၼ်မၼ်းၸဝ်ႈႁေႃးၼၼ်ႉဢေႃႈ။ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်ႁေႃးလၢတ်ႈထၢင်ႇထၢင်ႇသႃးသႃးၵႃႈၼႂ်းလေႃးၵႃႉၼႆႉယဝ်ႉ။

၂၀ ၵဝ်သင်ႇသွၼ်သုင်းမႃႉပၼ်ၵႃႈၼႂ်းၸရွပ်ႈႁေႃးတြႃးတင်းလၢႆဢိၵ်ႇတင်းၵႃႈၼႂ်းပိၵ်ႉမၢၼ်ႇၸဝ်ႈတီႈၵူၼ်းယုတတင်းသဵင်ႈတင်းလူင်ဢၼ်ၸူႉၵၼ်တုမ်ၵၼ်ၼၼ်ႉတႃႇသေႇဢမ်ႇထၢတ်ႇယဝ်ႉ။ၵဝ်ဢမ်ႇႁေႃးဢမ်ႇလၢတ်ႈၵႃႈၼႂ်းတီႈဢၼ်လပ်ႉသိူင်ႇၼၼ်ႉလႃးလႃး။

၂၁ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈတွင်ႈထၢမ်ၵဝ်။ၵဝ်ႁေႃးလၢတ်ႈၸိူဝ်ႉၼင်ႇႁိုဝ်ဝႃႈၼႆတွင်ႉထၢမ်ၶဝ်ၸိူဝ်းဢၼ်လႆႈထွမ်ႇလႆႈငိၼ်းတင်းလၢႆၸိူဝ်းၼၼ်ႉတႃႉ။ၶဝ်ႁူႉၵႂၢမ်းဢၼ်ၵဝ်လၢတ်ႈၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။

၂၂ မိူဝ်ႈဢၼ်မၼ်းၸဝ်ႈဝႃႈၸိူဝ်ႉၼင်ႇၼၼ်ၼၼ်ႉၵူၼ်းဢွၼ်ႇၸၢႆးဢၼ်ၸုၵ်းယူႇၵႃႈတီႈႁိမ်းၼၼ်ႉၵေႃႉၼိုင်ႈယႅၼ်ႉထုပ်ႉၸဝ်ႈယေႇသုသေလႄႈဝႃႈ၊-မႂ်းၶိုၼ်းလၢတ်ႈတီႈၶုၼ်ယိတ်ႉပရေႃးႁိၵ်ႈလူင်ၸိူဝ်ႉၼင်ႇၼႆႁိုဝ်း၊ဝႃႈၼင်ႇၼႆဢေႃႈ။

၂၃ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ပေႃးၵဝ်လၢတ်ႈဢၼ်ဢမ်ႇလီၸိုင်ၼႄပျႃႉလွင်ႈဢၼ်ဢမ်ႇလီၼၼ်ႉသေၵမ်း။ပေႃးၵဝ်လၢတ်ႈဢၼ်လီယူႇၸိုင်ၵွပ်ႈသင်လႄႈသူပေႃႉယႅၼ်ႉထုပ်ႉၵဝ်၊ဝႃႈၼင်ႇၼႆဢေႃႈ။

၂၄ ၶုၼ်ဢၼ်ႇၼတ်ႉၵေႃႈႁႂ်ႈဢဝ်မၼ်းၸဝ်ႈမတ်ႉၽုၵ်ႇသေလႄႈၵႂႃႇသူင်ႇၵႃႈတီႈၶုၼ်ယိတ်ႉပရေႃးႁိၵ်ႈလူင်ၵႃႇယႃႇၽဢေႃႈ။

ၼႂ်းမိူဝ်ႈဢၼ်သိမုၼ်ႇပေႇတရုၸုၵ်းလႄႈဢွမ်ႇၽႆးယူႇၼၼ်ႉၵမ်ႈၽွင်ႈထၢမ်လႄႈဝႃႈ၊-

၂၅ မႂ်းပဵၼ်တပႄးမၼ်းၵေႃႉၼိုင်ႈဢမ်ႇၸႂ်ႈႁိုဝ်၊ဝႃႈၼင်ႇၼႆလႄႈပေႇတရုၵေႃႈထဵင်ပႅတ်ႈလႄႈဝႃႈ၊-ၵဝ်ဢမ်ႇၸႂ်ႈၵူၺ်း၊ဝႃႈၼင်ႇၼႆဢေႃႈ။

၂၆ ၶႃႈၶုၼ်ယိတ်ႉပရေႃးႁိၵ်ႈၵေႃႉၼိုင်ႈဢၼ်ပဵၼ်ၸိူဝ်ႉၶိူဝ်းလဵဝ်ၵၼ်တင်းၵေႃႉဢၼ်ပေႇတရုၽၼ်းဝၢၼ်ႁူမၼ်းၶၢတ်ႇၼၼ်ႉၵေႃႈလၢတ်ႈဝႃႈ၊-

၂၇ ၵဝ်ႁၼ်မႂ်းမီးယူႇလူၺ်ႈၵၼ်တင်းၸဝ်ႈယေႇသုၵႃႈၼႂ်းသူၼ်ဢူးယဵၼ်ႇၼၼ်ႉယဝ်ႉဢမ်ႇၸႂ်ႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ပေႇတရုသမ်ႉၶိုၼ်းထဵင်ပႅတ်ႈထႅင်ႈဢေႃႈ။

၂၈ မိူဝ်ႈၼၼ်ႉၵႆႇၶၼ်ၵမ်းလဵဝ်ဢေႃႈ။မိူဝ်ႈဢၼ်ထိုင်ၶိင်ႇၵၢင်ၼႂ်ၸဝ်ႉၸဝ်ႉၸိုင်ၶဝ်ဢဝ်ၸဝ်ႈယေႇသုဢွၵ်ႇသေၵႃႈတီႈၵႃႇယႃႇၽလႄႈၵႂႃႇၵႃႈတီႈႁေႃဢေႃႈ။ၵူၺ်းၵႃႈၶဝ်ၼၼ်ႉၼင်ႇႁိုဝ်တၵ်းၵၢင်းလွတ်ႈတင်းဢႃႇပၢတ်ႈတူဝ်ၸဝ်ႈၵဝ်ႇၼၼ်ႉၸိုင်ၶဝ်ဢမ်ႇၶဝ်ႈၵႃႈၼႂ်းႁေႃလႄႈၵႂႃႇၶၢမ်ႇပွႆးပႃသၶႃႇသေဢေႃႈ။

၂၉ ပိူဝ်ႈၼႆလႄႈၶုၼ်ပိလၢတ်ႉဢွၵ်ႇၸူးၵႃႈတီႈဢၼ်ၶဝ်မီးၼၼ်ႉသေယဝ်ႉထၢမ်ဝႃႈ၊-သူမီးတၢင်းဢၼ်ႁဵတ်းဢမူႉတေႃႇၵေႃႉၼႆႉၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈၶိုၼ်းလဝ်ႈလၢတ်ႈလႄႈဝႃႈ၊-

၃၀ ပေႃးၵေႃႉၼႆႉဢမ်ႇၸႂ်ႈၵူၼ်းဢၼ်မီးဢပျႅတ်ႈၸိုင်ႁဝ်းၶႃႈဢမ်ႇဢဝ်မၼ်းမႃးဢၢပ်ႈတီႈၸဝ်ႈႁဝ်းၶႃႈၵူၺ်း၊ဝႃႈၼင်ႇၼႆဢေႃႈ။

၃၁ ၶုၼ်ပိလၢတ်ႉၵေႃႈလၢတ်ႈလႄႈဝႃႈ၊-ဢဝ်မၼ်းလႄႈၸီႇယၢင်ႇၸွမ်းၼင်ႇထမ်ႇမသၢတ်ႈသူတႃႉ၊ဝႃႈၼင်ႇၼႆဢေႃႈ။ၵူၼ်းယုတၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ႁဝ်းၶႃႈဢမ်ႇပိူင်ႇဢဝ်ၽူႈလႂ်တၢႆသေၵေႃႉသေၵူၼ်းၶႃႈ၊ဝႃႈၼင်ႇၼႆဢေႃႈ။

၃၂ လွင်ႈဢၼ်လဝ်ႈလၢတ်ႈၸိူဝ်ႉၼင်ႇၼႆၼၼ်ႉၸမ်းၼင်ႇႁိုဝ်ၵႂၢမ်းဢၼ်ၸဝ်ႈယေႇသုလၢတ်ႈၼႄလွင်ႈဢၼ်မၼ်းၸဝ်ႈတၵ်းလႆႈၶၢမ်ႇတၢႆၸိူဝ်ႉၼင်ႇႁိုဝ်ၼၼ်ႉတၵ်းလႆႈတဵမ်ထူၼ်ႈၸိုင်ၸင်ႇပဵၼ်ဢေႃႈ။

၃၃ ၶုၼ်ပိလၢတ်ႉသမ်ႉၶိုၼ်းၶဝ်ႈၵႂႃႇၵႃႈၼႂ်းႁေႃလႄႈႁွင်ႉဢဝ်ၸဝ်ႈယေႇသုသေယဝ်ႉထၢမ်လႄႈဝႃႈ၊-မႂ်းၸႂ်ႈၶုၼ်ႁေႃၶမ်းယုတႁိုဝ်၊ဝႃႈၼင်ႇၼႆဢေႃႈ။

၃၄ ၸဝ်ႈယေႇသုၵေႃႈထၢမ်လႄႈဝႃႈ၊-ၶုၼ်လူင်ထၢမ်ၸိူဝ်ႉၼင်ႇၼႆၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇႁိုဝ်။ဢမ်ႇၼၼ်ၵေႃႈပိူၼ်ႈတၢင်ႇၵေႃႉလဝ်ႈလၢတ်ႈဝႆႉလွင်ႈၵဝ်ၶႃႈယဝ်ႉႁိုဝ်၊ဝႃႈၼင်ႇၼႆဢေႃႈ။

၃၅ ၶုၼ်ပိလၢတ်ႉၵေႃႈၶိုၼ်းလၢတ်ႈလႄႈဝႃႈ၊-ၵဝ်ပဵၼ်ၵူၼ်းယုတႁိုဝ်။ၵူၼ်းမဵဝ်းမႂ်းဢိၵ်ႇတင်းယိတ်ႉပရေႃးႁိၵ်ႈလူင်ၸိူဝ်းၼၼ်ႉဢဝ်မႂ်းဢၢပ်ႈတီႈၵဝ်ယဝ်ႉ။မႂ်းႁဵတ်းမႅၼ်ႈၸိူဝ်ႉၼင်ႇႁိုဝ်ယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-

၃၆ မိူင်းၵဝ်ဢမ်ႇၸၢပ်ႈသႅင်ႇၵၼ်တင်းလေႃးၵႃႉၼႆႉ။ပေႃးမိူင်းၵဝ်ၸၢပ်ႈသႅင်ႇၵၼ်တင်းလေႃးၵႃႉၼႆႉၸိုင်ၵူၼ်းၵဝ်တင်းလၢႆတၵ်းတိုၵ်းတေႃးလႄႈတၵ်းဢမ်ႇႁႂ်ႈၵဝ်လႆႈႁွတ်ႈထိုင်ၼႂ်းမိုဝ်းၵူၼ်းယုတတင်းလၢႆ။တေႃႈလဵဝ်ၼႆႉၸမ်းမိူင်းၵဝ်ၼႆႉဢမ်ႇၸၢပ်ႈသႅင်ႇၵၼ်တင်းလိၼ်မိူင်းၼႆႉ၊ဝႃႈၼင်ႇၼႆဢေႃႈ။

၃၇ ၶုၼ်ပိလၢတ်ႉၵေႃႈထၢမ်လႄႈဝႃႈ၊-ပေႃးပဵၼ်ၸိူဝ်ႉၼင်ႇၼႆၸိုင်မႂ်းၸႂ်ႈၶုၼ်ႁေႃၶမ်းႁိုဝ်၊ဝႃႈၼင်ႇၼႆလႄႈၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်ပဵၼ်ၶုၼ်ႁေႃၶမ်းမႅၼ်ႈၸွမ်းၵႃႈၼင်ႇဢၼ်ၶုၼ်လူင်ထၢမ်ၼႆႉယဝ်ႉ။ၼင်ႇႁိုဝ်တၵ်းလႆႈၶၢမ်ႇသၢၵ်ႈသေႇၵႃႈတီႈၽၢႆႇသမ်ႇမႃႇတြႃးၸိုင်ၵဝ်ၶၢမ်ႇတၢင်းဢၼ်ၵိူတ်ႇလဵင်ႉမႃးၼႂ်းလေႃးၵႃႉၼႆႉယဝ်ႉ။ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းသမ်ႇမႃႇတြႃးၵႃႈမီးတင်းသဵင်ႈတင်းလူင်ၼၼ်ႉထွမ်ႇဢဝ်ၵႂၢမ်းၵဝ်ဢေႃႈ၊ဝႃႈၼင်ႇၼႆဢေႃႈ။

၃၈ ၶုၼ်ပိလၢတ်ႉၵေႃႈထၢမ်လႄႈဝႃႈ၊-သမ်ႇမႃႇတြႃးၼၼ်ႉပဵၼ်ၸိူဝ်ႉၼင်ႇႁိုဝ်၊ဝႃႈၼင်ႇၼႆသေယဝ်ႉသမ်ႉၶိုၼ်းဢွၵ်ႇၵႂႃႇၸူးၵႃႈတီႈၵူၼ်းယုတၸိူဝ်းၼၼ်ႉလႄႈလၢတ်ႈဝႃႈ၊-ၵဝ်ဢမ်ႇႁၼ်ဢပျႅတ်ႈတီႈၵေႃႉၼႆႉသေၸိူဝ်ႉသေပိူင်။

၃၉ တေႃႈလဵဝ်ၼႆႉႁဝ်းမီးထုင်းၸၢမ်ႇဢၼ်ၵဝ်တၵ်းလႆႈပွႆႇလွတ်ႈၵူၼ်းတူၵ်းထွင်ႇၵေႃႉၼိုင်ႈပၼ်တီႈသူၼႂ်းပွႆးပႃသၶႃႇၼႆႉဢိူဝ်း။သူၶႂ်ႈႁႂ်ႈၵဝ်ပွႆႇလွတ်ႈၶုၼ်ႁေႃၶမ်းယုတၼႆႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊

၄၀ ၶဝ်တင်းသဵင်ႈတင်းလူင်ၸိူဝ်းၼၼ်ႉၵေႃႈႁွင်ႉသႅၼ်ႇလဝ်ႈလၢတ်ႈလႄႈဝႃႈ၊-ဢမ်ႇၶႂ်ႈပွႆႇလွတ်ႈၵေႃႉၼႆႉၶႃႈ။ၶႂ်ႈႁႂ်ႈပွႆႇလွတ်ႈပႃႇရၢပ်ႉပၼၼ်ႉၵူၺ်းၶႃႈဢေႃႈ၊ဝႃႈၼင်ႇၼႆဢေႃႈ။ပႃႇရၢပ်ႉပႃႉၸမ်းပဵၼ်ၵူၼ်းၸူၼ်ဢေႃႈ။