Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၁၁ 

ၸဝ်ႈယေႇသုႁႂ်ႈလႃႇၸရုလုၵ်ႉၶိုၼ်းလိပ်း

၁ ၵူၼ်းၵေႃႉၼိုင်ႈဢၼ်လႆႈၸိုဝ်လႃႇၸရုဢၼ်ပဵၼ်ၵူၼ်းဝၢၼ်ႈပေႇထၼိတီႈဢၼ်မႃႇထတင်းၼွင်ႉယိင်းမၼ်းမႃႇရိယူႇၼၼ်ႉမီးတၢင်းၶႆႈတၢင်းပဵၼ်ဢေႃႈ။

၂ မႃႇရိဢၼ်ပဵၼ်ၼွင်ႉယိင်းလႃႇၸရုၼၼ်ႉပဵၼ်မႃႇရိဢၼ်ဢဝ်ၼမ်ႉႁွမ်တႃးတူဝ်ၸဝ်ႈယေႇသုလႄႈသမ်ႉဢဝ်တင်းၶူၼ်ႁူဝ်မၼ်းၸဵတ်ႉတိၼ်မၼ်းၸဝ်ႈၼၼ်ႉဢေႃႈ။

၃ မေႈယိင်းသွင်ပီႈၼွင်ႉၼၼ်ႉပွႆႇၸႂ်ႉၵူၼ်းၵႂႃႇၵႃႈတီႈမၼ်းၸဝ်ႈႁႂ်ႈလႆႈလဝ်ႈလၢတ်ႈဝႃႈ၊-ၸဝ်ႈႁဝ်း၊ၵေႃႉဢၼ်ၸဝ်ႈႁဝ်းႁၵ်ႉၼၼ်ႉမီးတၢင်းၶႆႈတၢင်းပဵၼ်ယူႇၶႃႈဢေႃႈ၊ဝႃႈၼင်ႇၼႆဢေႃႈ။

၄ ၸဝ်ႈယေႇသုငိၼ်းၵႂၢမ်းၼၼ်ႉသေယဝ်ႉလၢတ်ႈဝႃႈ၊-တၢင်းၶႆႈတၢင်းပဵၼ်ၼၼ်ႉဢမ်ႇၸႂ်ႈတၢင်းၶႆႈတၢင်းပဵၼ်ဢၼ်တၵ်းလႆႈတၢႆ။ပဵၼ်တၢင်းၶႆႈတၢင်းပဵၼ်ဢၼ်တၵ်းႁႂ်ႈမူၼ်ၽုင်းၽြႃးပဵၼ်ၸဝ်ႈထၢင်ႇသႃးမႃးၼၼ်ႉၵူၺ်းဢေႃႈ။ၵႂပ်ႈပိူဝ်ႈတၢင်းၶႆႈတၢင်းပဵၼ်ၼၼ်ႉလုၵ်ႈၽြႃးပဵၼ်ၸဝ်ႈတၵ်းမီးတၢင်းဢၼ်မူၼ်ၽုင်းထၢင်ႇသႃးမႃးဢေႃႈ၊ဝႃႈၼင်ႇၼႆဢေႃႈ။

၅ ၸဝ်ႈယေႇသုႁၵ်ႉမႃႇထတင်းၼွင်ႉယိင်းမၼ်းတင်းလႃႇၸရုၶဝ်ၸိူဝ်းၼၼ်ႉဢေႃႈ။

၆ မိူဝ်ႈဢၼ်မၼ်းၸဝ်ႈငိၼ်းလွင်ႈဢၼ်ဝႃႈလႃႇၸရုပဵၼ်တၢင်းပဵၼ်ယူႇၼၼ်ႉၸိုင်မၼ်းၸဝ်ႈယင်းဢမ်ႇမႃးၵမ်းလဵဝ်လႄႈယူႇတီႈၼၼ်ႉသွင်ဝၼ်းဢေႃႈ။

၇ လိုၼ်းၼၼ်ႉယဝ်ႉမၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ႁဝ်းၵႂႃႇၵႃႈတီႈမိူင်းယုတပုၼ်ႉတႃႉႁဝ်း၊မိူဝ်ႈဢၼ်ဝႃႈၼင်ႇၼႆၸိုင်တပႄးၸဝ်ႈၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-

၈ ၸဝ်ႈႁဝ်း၊ၵူၼ်းယုတၸိူဝ်းၼၼ်ႉၵျၢမ်ႇႁႃႁႂ်ႈလႆႈဢဝ်မၢၵ်ႇႁိၼ်ထိမ်ႈၸဝ်ႈႁဝ်းဢမ်ႇၸႂ်ႈႁိုဝ်။ၸဝ်ႈႁဝ်းတၵ်းၵႂႃႇၵႃႈတီႈၼၼ်ႉထႅင်ႈလူးၵွၼ်ႇၶႃႈႁိုဝ်၊ဝႃႈၼင်ႇၼႆဢေႃႈ။

၉ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၼႂ်းဝၼ်းၼိုင်ႈမီးသိပ်းသွင်ၼႃႇရီႇဢမ်ႇၸႂ်ႈႁိုဝ်။ပေႃးၵူၼ်းၵႂႃႇမႃးၼႂ်းၶိင်ႇၵၢင်ဝၼ်းၸိုင်ပိူဝ်ႈဢၼ်မီးဢရွင်ႇဢၼ်လႅင်းၵၢင်ဝၼ်းယူႇလႄႈဢမ်ႇၸၢင်ႊတိူဝ်ႉမႅၼ်ႈလႄႈလူမ်ႉ။

၁၀ ပေႃးၵႂႃႇမႃးၼႂ်းၶိင်ႇၵၢင်ၶိုၼ်းၸိုင်ပိူဝ်ႈဢၼ်ဢၼ်လႅင်းဢမ်ႇမီးလႄႈၸၢင်ႊတိူဝ်ႉမႅၼ်ႈလႄႈလူမ်ႉဢေႃႈ။

၁၁ မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-ၵေႃႉသေႈႁဝ်းလႃႇၸရုၼၼ်ႉၼွၼ်းလပ်းယူႇယဝ်ႉ။ၵဝ်တၵ်းၵႂႃႇလႄႈႁႂ်ႈလႆႈပူၵ်းမၼ်းတိုၼ်ႇဢေႃႈ၊ဝႃႈၼင်ႇၼႆဢေႃႈ။

၁၂ တပႄးၸဝ်ႈၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းပေႃးမၼ်းၼွၼ်းလပ်းၸိုင်မၼ်းတၵ်းသၢၵ်ႈသႃႇယူႇၶႃႈဢေႃႈ၊ဝႃႈၼင်ႇၼႆဢေႃႈ။

၁၃ ပဵၵ်ႉသမ်ႉၸဝ်ႈယေႇသုၶႂ်ႈဝႃႈလႃႇၸရုတၢႆယဝ်ႉသေၵေႃႈယႃႇတပႄးၸဝ်ႈၸိူဝ်းၼၼ်ႉထၢင်ႇဝႃႈမၼ်းၼွၼ်းလပ်းယူႇၵူၺ်းၼၼ်ႉဢေႃႈ။

၁၄ ပိူဝ်ႈၼႆလႄႈၸဝ်ႈယေႇသုသမ်ႉလၢတ်ႈလႅင်းလႅင်းလႄႈဝႃႈ၊-

၁၅ လႃႇၸရုတၢႆယဝ်ႉ။ၼင်ႇႁိုဝ်တၵ်းပဵၼ်ပုၼ်ႈဢၵျူဝ်းသူလႄႈသူတၵ်းယုမ်ႇမၢတ်ႈၸိုင်ၵဝ်လႆႈၸူမ်းၵႂပ်ႈပိူဝ်ႈဢၼ်ၵဝ်ဢမ်ႇမီးၵႃႈတီႈၼၼ်ႉဢေႃႈ။တေႃႈလဵဝ်ၼႆႉႁဝ်းဢွၼ်ၵၼ်ၵႂႃႇၵႃႈတီႈမၼ်းတႃႉႁဝ်း၊ဝႃႈၼင်ႇၼႆဢေႃႈ။

၁၆ ထုဝ်းမဢၼ်လႆႈၸိုဝ်တိတုမုၼၼ်ႉၵေႃႈလၢတ်ႈတီႈတပႄးၸဝ်ႈၼင်ႇၵၼ်ၸိူဝ်းၼၼ်ႉလႄႈဝႃႈ၊-ႁဝ်းၵေႃႈၸွမ်းၵႂႃႇလႄႈၶၢမ်ႇတၢႆလူၺ်ႈၵၼ်တင်းမၼ်းၸဝ်ႈတႃႉႁဝ်း၊ဝႃႈၼင်ႇၼႆဢေႃႈ။

၁၇ ၸဝ်ႈယေႇသုႁွတ်ႈထိုင်သေယဝ်ႉလႆႈႁူႉလွင်ႈဢၼ်ဝႃႈပေႃးလႆႈသၢင်းၵျူဝ်ႇလႃႇၸရုယဝ်ႉၵႃႈၼႂ်းၶုမ်သၢင်းၶျႅင်းသီႇဝၼ်းယဝ်ႉၼၼ်ႉဢေႃႈ။

၁၈ ဝၢၼ်ႈပေႇထၼိၼၼ်ႉၵႆၵၼ်တင်းဝဵင်းယေႇရုသလႅမ်ႇလၵ်းၼိုင်ႈၵူၺ်းလႄႈၵူၼ်းယုတၼမ်ၼႃႇမႃးမူၼ်မႃႇထတင်းမႃႇရိႁႂ်ႈလႆႈဢုၼ်ႇၸႂ်ၼိမ်ၸႂ်ၼႂ်းလွင်ႈဢၼ်ပီႈၸၢႆးၶဝ်တၢႆၼၼ်ႉဢေႃႈ။

၁၉ မိူဝ်ႈဢၼ်မႃႇထငိၼ်းလွင်ႈဢၼ်ၸဝ်ႈယေႇသုႁွတ်ႈၽႅဝ်မႃးၼၼ်ႉၸိုင်မၼ်းၵႂႃႇႁႂ်ႈလႆႈႁပ်ႉႁူဝ်တၢင်းမၼ်းၸဝ်ႈဢေႃႈ။

၂၀ မႃႇရိၸမ်းၼင်ႈၵိုတ်းယူႇၵႃႈၼႂ်းႁိူၼ်းဢေႃႈ။

၂၁ မႃႇထၵေႃႈလဝ်ႈလၢတ်ႈတီႈၸဝ်ႈယေႇသုလႄႈဝႃႈ၊-

ၸဝ်ႈႁဝ်း၊သင်ဝႃႈၸဝ်ႈႁဝ်းမီးယူႇၵႃႈတီႈၼႆႉၸိုင်ပီႈၸၢႆးၵဝ်ၶႃႈတၵ်းဢမ်ႇလႆႈတၢႆၶႃႈ။

၂၂ ၵူၺ်းၵႃႈတေႃႈလဵဝ်ၼႆႉၵေႃႈၶႃႈၸဝ်ႈႁူႉလွင်ႈဢၼ်ဝႃႈၽြႃးပဵၼ်ၸဝ်ႈတၵ်းပၼ်ၵႃႈၼင်ႇဢၼ်ၸဝ်ႈႁဝ်းသူးတွင်းၼၼ်ႉယူႇၶႃႈဢေႃႈ၊ဝႃႈၼင်ႇၼႆဢေႃႈ။

၂၃ ၸဝ်ႈယေႇသုၵေႃႈလၢတ်ႈလႄႈဝႃႈ၊-ပီႈၸၢႆးမႂ်းတၵ်းလုၵ်ႉၶိုၼ်းဢေႃႈဝႃႈၼင်ႇၼႆဢေႃႈ။

၂၄ မႃႇထၵေႃႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁူႉလွင်ႈဢၼ်ဝႃႈမၼ်းတၵ်းလုၵ်ႉၶိုၼ်းၼႂ်းဝၼ်းဢၼ်သုတ်းဢၼ်ၵွႆဢၼ်ဝႃႈၶိင်ႇၵႃႇလႃႉဢၼ်လုၵ်ႉၶိုၼ်းၼၼ်ႉယူႇၶႃႈဢေႃႈ၊ဝႃႈၼင်ႇၼႆဢေႃႈ။

၂၅ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ပဵၼ်လွင်ႈတၢင်းဢၼ်လုၵ်ႉၶိုၼ်းဢိၵ်ႇတင်းလွင်ႈတၢင်းဢၼ်ဢသၢၵ်ႈလိပ်းဢေႃႈ။ၵေႃႉဢၼ်ယုမ်ႇမၢတ်ႈၵဝ်ၼၼ်ႉပဵၵ်ႉသမ်ႉတၢႆၵႂႃႇယဝ်ႉသေၵေႃႈယႃႇတၵ်းလိပ်းဢေႃႈ။

၂၆ ၶဝ်ၸိူဝ်းဢၼ်ယုမ်ႇမၢတ်ႈၵဝ်ဢၼ်ဢသၢၵ်ႈလိပ်းယူႇၵႃႈမီးတင်းသဵင်ႈတင်းလူင်ၸိူဝ်းၼၼ်ႉၵေႃႈတၵ်းၵၢင်းလွတ်ႈတင်းတၢင်းတၢႆယူႇတႃႇသေႇဢေႃႈ။ယုမ်ႇၵႂၢမ်းၵဝ်ၼႆႉႁိုဝ်၊ဝႃႈၼႆမိူဝ်ႈဢၼ်မၼ်းၸဝ်ႈထၢမ်ၼၼ်ႉၸိုင်မႃႇထၵေႃႈလဝ်ႈလၢတ်ႈလႄႈဝႃႈ၊-

၂၇ ၸႂ်ႈၶႃႈယဝ်ႉၸဝ်ႈ။ၶႃႈၸဝ်ႈယုမ်ႇလွင်ႈဢၼ်ၸဝ်ႈႁဝ်းပဵၼ်ၸဝ်ႈၶရိၸ်ႉလုၵ်ႈၽြႃးပဵၼ်ၸဝ်ႈဢၼ်မႃးၼႂ်းလေႃးၵႃႉၼႆႉၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။

၂၈ မၼ်းၸဝ်ႈလၢတ်ႈၸိူဝ်ႉၼင်ႇၼႆယဝ်ႉၸင်ႇမႃႇထၵေႃႈၵႂႃႇလႄႈႁွင်ႉဢဝ်ၼွင်ႉယိင်းမၼ်းမႃႇရိၼၼ်ႉမႃးတဵတ်ႇတဵတ်ႇသေယဝ်ႉလၢတ်ႈဝႃႈ၊-သြႃႇၸဝ်ႈႁွတ်ႈမႃးယဝ်ႉ။မၼ်းၸဝ်ႈႁွင်ႉမႂ်းဢေႃႈ၊ဝႃႈၼင်ႇၼႆဢေႃႈ။

၂၉ မႃႇရိငိၼ်းၵႂၢမ်းၼၼ်ႉသေယဝ်ႉလုၵ်ႉၶၼ်ၶၼ်ၽႂ်းၽႂ်းလႄႈၵႂႃႇၸူးၵႃႈတီႈမၼ်းၸဝ်ႈဢေႃႈ။

၃၀ မိူဝ်ႈၼၼ်ႉၸဝ်ႈယေႇသုယင်းဢမ်ႇပႆႇၶဝ်ႈၵႃႈၼႂ်းဝၢၼ်ႈလႄႈမီးယူႇၵႃႈတီႈဢၼ်မႃႇထမႃးႁပ်ႉႁူဝ်တၢင်းမၼ်းၸဝ်ႈၼၼ်ႉဢေႃႈ။

၃၁ ပိူဝ်ႈၼႆလႄႈၵူၼ်းယုတဢၼ်မီးယူႇလူၺ်ႈၵၼ်တင်းမႃႇရိၵႃႈၼႂ်းႁိူၼ်းဢၼ်မႃးမူၼ်ၶဝ်ၸိူဝ်းၼၼ်ႉမိူဝ်ႈဢၼ်လႆႈႁၼ်မႃႇရိၵိုင်ႉၵၢင်ႉလုၵ်ႉလႄႈဢွၵ်ႇၵႂႃႇၼၼ်ႉၸိုင်ၶဝ်ထၢင်ႇဝႃႈမၼ်းတေၵႂႃႇၵႃႈတီႈသၢင်းၶျႅင်းႁႂ်ႈလႆႈႁႆႈလႆႈႁွင်ႉၵႃႈတီႈၼၼ်ႉဢေႃႈ၊ဝႃႈၼႆလႄႈၶဝ်ၵေႃႈၸွမ်းပႃႈလင်မၼ်းၵႂႃႇဢေႃႈ။

၃၂ မႃႇရိၼၼ်ႉႁွတ်ႈထိုင်ၵႃႈတီႈဢၼ်ၸဝ်ႈယေႇသုမီးၼၼ်ႉလႄႈထူပ်းႁၼ်မၼ်းၸဝ်ႈသေယဝ်ႉၶုပ်ႉမူပ်ႇႁိမ်းတိၼ်မၼ်းၸဝ်ႈသေလႄႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊သင်ဝႃႈၸဝ်ႈႁဝ်းလႆႈမီးယူႇၵႃႈတီႈၼႆႉၸိုင်ပီႈၸၢႆးၵဝ်ၶႃႈတၵ်းဢမ်ႇလႆႈတၢႆၶႃႈ၊ဝႃႈၼင်ႇၼႆဢေႃႈ။

၃၃ မိူဝ်ႈဢၼ်ၸဝ်ႈယေႇသုႁၼ်မႃႇရိဢိၵ်ႇတင်းၵူၼ်းယုတဢၼ်ၸွမ်းလူၺ်ႈၵၼ်တင်းမၼ်းမႃးၸိူဝ်းၼၼ်ႉႁွင်ႉႁႆႈယူႇၼၼ်ႉၸိုင်မၼ်းၸဝ်ႈမီးတၢင်းဢၼ်တိူဝ်ႉၸႂ်ၼႃႇလူင်လၢင်လႄႈထၢမ်ဝႃႈ၊-

၃၄ သူဢဝ်တူဝ်တၢႆမၼ်းဝႆႉၵႃႈတီႈလႂ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊မႃးလႄႈတူၺ်းသေၵမ်းၶႃႈ၊ဝႃႈၼင်ႇၼႆဢေႃႈ။

၃၅ ၸဝ်ႈယေႇသုၵေႃႈၼမ်ႉတႃတူၵ်းဢေႃႈ။ပိူဝ်ႈၼႆလႄႈၵူၼ်းယုတၸိူဝ်းၼၼ်ႉလၢတ်ႈဝႃႈ၊-

၃၆ တူၺ်းလူႊ၊မၼ်းၸဝ်ႈႁၵ်ႉလႃႇၸရုၼႃႇလူင်လၢင်ဢေႃႈ၊ဝႃႈၼင်ႇၼႆဢေႃႈ။ၵမ်ႈၽွင်ႈၵေႃႈဝႃႈ၊-

၃၇ ၵေႃႉဢၼ်ၽုၺ်ႇမၢၵ်ႇတႃၵူၼ်းတႃမွတ်ႇလႆႈၼၼ်ႉၼင်ႇႁိုဝ်လႃႇၸရုတၵ်းဢမ်ႇတၢႆၸိုင်ဢမ်ႇတတ်ႈၼိုင်ႇလႆႈႁိုဝ်း၊ဝႃႈၼင်ႇၼႆဢေႃႈ။

၃၈ ပိူဝ်ႈၼႆလႄႈၸဝ်ႈယေႇသုမီးတၢင်းဢၼူ်တိဝ်ႉၸႂ်လႄႈႁွတ်ႈထိုင်ၵႂႃႇၵႃႈတီႈၶုမ်သၢင်းၶျႅင်းဢေႃႈ။ၶုမ်သၢင်းၶျႅင်းၼၼ်ႉပဵၼ်ႁူးထမ်ႈလႄႈဢဝ်မၢၵ်ႇႁိၼ်ဢိုတ်းဝႆႉဢေႃႈ။

၃၉ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၶၢႆႉမၢၵ်ႇႁိၼ်ၼၼ်ႉပႅတ်ႈတႃႉ၊မိူဝ်ႈဢၼ်ဝႃႈၼင်ႇၼႆၸိုင်မႃႇထၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းတေႃႈလဵဝ်ၼႆႉမၼ်းတၵ်းမဵၼ်တူႇၶႃႈယဝ်ႉ။တၢႆလႆႈသီႇဝၼ်းၶႃႈယဝ်ႉ၊ဝႃႈၼင်ႇၼႆဢေႃႈ။

၄၀ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်လၢတ်ႈဝႆႉလႄႈဝႃႈပေႃးမႂ်းယုမ်ႇၸိုင်မႂ်းတၵ်းႁၼ်မူၼ်ၽုင်းဢႃႇၼူႉၽေႃႇၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆယဝ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။

၄၁ မိူဝ်ႈၼၼ်ႉၶဝ်ၶၢႆႉမၢၵ်ႇႁိၼ်ၵႃႈတီႈၶုမ်သၢင်းၶျႅင်းၼၼ်ႉပႅတ်ႈဢေႃႈ။ၸဝ်ႈယေႇသုၵေႃႈႁႅၼ်တူၺ်းၵႃႈၼိူဝ်ၵၢင်ႁၢဝ်သေလႄႈဝႃႈ၊-ပေႃႈၸဝ်ႈတီႈၶႃႈ။ၵျေးၸူးၸဝ်ႈႁဝ်းဢၼ်ထွမ်ႇဢဝ်ၵႂၢမ်းၵဝ်ၶႃႈၼၼ်ႉယႂ်ႇၼႃႇတီႈၶႃႈဢေႃႈ။

၄၂ ၵဝ်ၶႃႈႁူႉလွင်ႈဢၼ်ၸဝ်ႈႁဝ်းထွမ်ႇဢဝ်ၵႂၢမ်းၵဝ်ၶႃႈတႃႇသေႇယူႇၶႃႈဢေႃႈ။ၼႂ်းဝႃႈၼၼ်သေၵေႃႈၼင်ႇႁိုဝ်ၵူၼ်းတင်းသဵင်ႈတင်းလူင်ဢၼ်လွမ်ႉႁွပ်ႈယူႇၸိူဝ်းၼႆႉတၵ်းယုမ်ႇမၢတ်ႈလွင်ႈဢၼ်ဝႃႈၸဝ်ႈႁဝ်းပွႆႇၸႂ်ႉၵဝ်ၶႃႈမႃးဢၼ်ဝႃႈၼၼ်ႉၸိုင်ၵဝ်ၶႃႈထွၵ်ႈလူၺ်ႈဢၵျူဝ်းၶဝ်ၼၼ်ႉသေလႄႈ

၄၃ လဝ်ႈလၢတ်ႈၸိူဝ်ႉၼင်ႇၼႆတီႈၶႃႈဢေႃႈ၊ဝႃႈၼင်ႇၼႆယဝ်ႉၸင်ႇႁဵတ်းတင်းသဵင်ဢၼ်ယႂ်ႇၼႃႇႁွင်ႉလႄႈဝႃႈ၊-လႃႇၸရုဢိူၺ်းဢွၵ်ႇမႃးတႃႉ၊ဝႃႈၼင်ႇၼႆဢေႃႈ။

၄၄ မိူဝ်ႈၼၼ်ႉၵမ်းလဵဝ်လႃႇၸရုဢၼ်တၢႆၵႂႃႇယဝ်ႉၼၼ်ႉလုၵ်ႉဢွၵ်ႇမႃးဢေႃႈ။ၵႃႈတီႈတိၼ်မၼ်းမိုဝ်းမၼ်းၼၼ်ႉၽႃႈဝဵၼ်းႁေႃႇဝႆႉယူႇလႄႈၵႃႈတီႈၼႃႈမၼ်းၵေႃႈၽႃႈၸဵတ်ႉမတ်ႉႁေႃႇဝႆႉယူႇဢေႃႈ။ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵႄႈၽႃႈၸိူဝ်းၼၼ်ႉပၼ်လႄႈႁႂ်ႈမၼ်းၵႂႃႇတႃႉ၊ဝႃႈၼင်ႇၼႆဢေႃႈ။

တၢင်းဢၼ်ၵျၢမ်ႇႁႃႁႂ်ႈလႆႈဢဝ်ၸဝ်ႈယေႇသုတၢႆ

၄၅ ၵူၼ်းယုတဢၼ်မႃးၵႃႈတီႈမႃႇရိၸိူဝ်းၼၼ်ႉလႆႈႁၼ်လွင်ႈတၢင်းဢၼ်မၼ်းၸဝ်ႈႁဵတ်းၼၼ်ႉလႄႈယုမ်ႇမၢတ်ႈမၼ်းၸဝ်ႈဢေႃႈ။

၄၆ ၵမ်ႈၽွင်ႈသမ်ႉၵႂႃႇၵႃႈတီႈၽႃႇရိသေးတင်းလၢႆလႄႈလၢတ်ႈၼႄလွင်ႈတၢင်းဢၼ်ၸဝ်ႈယေႇသုႁဵတ်းၸိူဝ်းၼၼ်ႉဢေႃႈ။

၄၇ မိူဝ်ႈၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၽႃႇရိသေးၸိူဝ်းၼၼ်ႉႁႂ်ႈၶုၼ်တီႈလုမ်းလူင်တင်းလၢႆၸူႉၵၼ်တုမ်ၵၼ်သေယဝ်ႉလၢတ်ႈလႄႈဝႃႈ၊-ႁဝ်းတၵ်းယူႇဝႆႉၸိူဝ်ႉၼႆႁိုဝ်း။ၵေႃႉၼၼ်ႉၼႄပျႃးၼီႉမိၵ်ႈလၵ်ႈၶၼႃႇၼမ်ၼႃႇယဝ်ႉ။

၄၈ ပေႃးပွႆႇမၼ်းဝႆႉၸိူဝ်ႉၼႆၸိုင်ၵူၼ်းတင်းသဵင်ႈတင်းလူင်တၵ်းယုမ်ႇမၢတ်ႈမၼ်းယဝ်ႉ။ၵူၼ်းရူဝ်းမတင်းလၢႆၵေႃႈတၵ်းမႃးလႄႈယႃႉၽဵဝ်ႈပႅတ်ႈတီႈယူႇႁဝ်းၸိူဝ်ႉၶိူဝ်းႁဝ်းယဝ်ႉ၊ဝႃႈၼင်ႇၼႆဢေႃႈ။

၄၉ ဢၼ်ၶဝ်ႈပႃးၼႂ်းၶဝ်ၼၼ်ႉၵေႃႉၼိုင်ႈဢၼ်လႆႈၸိုဝ်ၵႃႇယႃႇၽဢၼ်ပဵၼ်ၶုၼ်ယိတ်ႉပရေႃးႁိၵ်ႈၼႂ်းပီႊၼၼ်ႉၵေႃႈလၢတ်ႈလႄႈဝႃႈ၊-

၅၀ သူၼႆႉဢမ်ႇႁူႉၵႃႈသင်လႃးလႃး။သူဢမ်ႇၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ဝႃႈၵူၼ်းၵေႃႉၼိုင်ႈတၢႆပုၼ်ႈၵူၼ်းတင်းသဵင်ႈတင်းလူင်ၼၼ်ႉယဵင်ႈၶႅၼ်းလီၼႃႇသေမဵဝ်းၵူၼ်းယုတတင်းသဵင်ႈတင်းလူင်တၵ်းလႆႈလူႉလႅဝ်ၼၼ်ႉလူင်ပေႇ၊ဝႃႈၼင်ႇၼႆဢေႃႈ။

၅၁ ၵႂၢမ်းၼၼ်ႉၸိုင်ပဵၼ်တၢင်းဢၼ်မၼ်းလၢတ်ႈဝႃႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။မၼ်းပဵၼ်ၶုၼ်ယိတ်ႉပရေႃးႁိၵ်ႈၼႂ်းပီႊၼၼ်ႉလႄႈမၼ်းပႃးတင်းၺၢၼ်ႇပရေႃးၽႅတ်ႈလႄႈႁေႃးလၢတ်ႈလွင်ႈဢၼ်

၅၂ ၸဝ်ႈယေႇသုတၵ်းလႆႈၶၢမ်ႇတၢႆပုၼ်ႈၵူၼ်းမဵဝ်းၼၼ်ႉၵူၺ်းဢမ်ႇၵႃးတၵ်းလႆႈႁဵတ်းႁႂ်ႈလုၵ်ႈလၢင်းၽြႃးပဵၼ်ၸဝ်ႈဢၼ်ၽၢတ်ႇၽႄၵၼ်ဢၼ်မီးယူႇၵူႈတီႈၵူႈလႅၼ်ၸိူဝ်းၼၼ်ႉလႆႈၸူႉလႆႈတုမ်ၵၼ်ၼၼ်ႉဢေႃႈ။

၅၃ ၸႃႉၸဵမ်ဝၼ်းၼၼ်ႉလႄႈၶဝ်တိူင်ႇပၢင်ႇၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆဢေႃႈ။

၅၄ ပိူဝ်ႈၼႆလႄႈလိုၼ်းၼၼ်ႉၸဝ်ႈယေႇသုဢမ်ႇလႄႇလဵပ်ႈထၢင်ႇထၢင်ႇသႃးသႃးၵႃႈၼႂ်းၵူၼ်းယုတတင်းလၢႆလႄႈဢွၵ်ႇသေၵႃႈတီႈဢၼ်ၸမ်ၵၼ်တင်းထိူၼ်ႇၵႃႈတီႈဝဵင်းဢၼ်လႆႈၸိုဝ်ဢေးၽရိမ်ႇၼၼ်ႉလႄႈယူႇလူၺ်ႈၵၼ်တင်းတပႄးၸဝ်ႈတင်းလၢႆဢေႃႈ။

၅၅ မိူဝ်ႈၼၼ်ႉပွႆးပႃသၶႃႇၵူၼ်းယုတၶဝ်ၸမ်တၵ်းႁွတ်ႈထိုင်မႃးယဝ်ႉလႄႈၵူၼ်းၼမ်ၼႃႇၼင်ႇႁိုဝ်တၵ်းလႆႈႁႂ်ႈတူဝ်ၸဝ်ႈၵဝ်ႇမူတ်းသႂ်ၸိုင်ဢွၼ်ၵၼ်လုၵ်ႉသေၵႃႈတီႈဝၢၼ်ႈၼွၵ်ႈၼႃးပၢင်ႇမႃးၵႃႈတီႈဝဵင်းယေႇရုသလႅမ်ႇၸူဝ်ႈဢၼ်ဢမ်ႇပႆႇၶၢမ်ႇပွႆးၼၼ်ႉဢေႃႈ။

၅၆ ၶဝ်ၼၼ်ႉၸုၵ်းယူႇၵႃႈၼႂ်းပိၵ်ႉမၢၼ်ႇၸဝ်ႈသေလႄႈႁႃၸဝ်ႈယေႇသုဢေႃႈ။ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊-သူထၢင်ႇၸိူဝ်ႉၼင်ႇႁိုဝ်။မၼ်းၸဝ်ႈဢမ်ႇမႃးၵႃႈတီႈပွႆးၼႆႉႁိုဝ်း၊ဝႃႈၼင်ႇၼႆဢေႃႈ။

၅၇ မိူဝ်ႈၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၽႃႇရိသေးၸိူဝ်းၼၼ်ႉသင်ႇလၢတ်ႈၵႂၢမ်းဝႆႉဝႃႈပေႃးႁူႉတီႈဢၼ်မၼ်းၸဝ်ႈမီးၼၼ်ႉၸိုင်ႁႂ်ႈလၢတ်ႈၼႄပၼ်ၶဝ်ႁႂ်ႈၶဝ်လႆႈတီႉဢဝ်မၼ်းၸဝ်ႈၼၼ်ႉဢေႃႈ။