Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၂၆ 

၁ မိူဝ်ႈဢၼ်ၶုၼ်ဢၵိပ်ႉပလၢတ်ႈတီႈပေႃးလုလႄႈဝႃႈ၊-မႂ်းမီးဢၶႂၢင်ႉတႃႇတေလႆႈလၢတ်ႈပုၼ်ႈတူဝ်ၸဝ်ႈၵဝ်ႇယူႇဢေႃႈ၊ဝႃႈၼင်ႇၼႆၼၼ်ႉၸိုင်၊ပေႃးလုၵေႃႈယိုၼ်ႈမိုဝ်းလႄႈလၢတ်ႈၵႂၢမ်းၽေႇဢပျႅတ်ႈလႄႈဝႃႈ၊

၂ ၶုၼ်ႁေႃၶမ်းဢၵိပ်ႉပတီႈၶႃႈဢိူၺ်း၊ၵဝ်ၶႃႈၶႆႈၸႂ်လွင်ႈဢၼ်တၵ်းလႆႈလၢတ်ႈၵႂၢမ်းၽေႇဢပျႅတ်ႈလူၺ်ႈလွင်ႈတၢင်းၵႃႈဢၼ်ၵူၼ်းယုတတင်းလၢႆႁဵတ်းဢမူႉတီႈၵဝ်ၶႃႈၵႃႈတီႈၽၢႆႇၼႃႈၸဝ်ႈႁဝ်းဝၼ်းမိူဝ်ႈၼႆႉၼၼ်ႉဢမ်ႇၵႃး

၃ လွင်ႈဢၼ်ၸဝ်ႈႁဝ်းၸၢင်ႊႁူႉၸၢင်ႊမေႃထုင်းၽိင်ႈဢိၵ်ႇတင်းပုၵ်ႉသႃႇတီႈတွင်ႉတီႈထၢမ်တင်းလၢႆဢၼ်ၸၢပ်ႈသႅင်ႇၵၼ်တင်းၵူၼ်းယုတၸိူဝ်းၼၼ်ႉလႄႈၵဝ်ၶႃႈထၢင်ႇတူဝ်ၸဝ်ႈၵဝ်ႇမီးမင်ႇၵလႃႇၶႃႈဢေႃႈ။ပိူဝ်ႈၼႆလႄႈၼင်ႇႁိုဝ်ၸဝ်ႈႁဝ်းတၵ်းဢဝ်တင်းၸႂ်ဢၼ်ယိူၼ်ႉၶၢမ်ႇလႄႈထွမ်ႇငိၼ်းၵႂၢမ်းၵဝ်ၶႃႈၸိုင်ၵဝ်ၶႃႈတွင်းပၢၼ်ႇၸဝ်ႈႁဝ်းတီႈၶႃႈဢေႃႈ။

၄ တၢင်းဢၼ်ယူႇဢၼ်သဝ်းဢၼ်ႁဵတ်းဢၼ်သၢင်ႈၵဝ်ၶႃႈၸႃႉၸဵမ်မိူဝ်ႈလဵၵ်ႉမိူဝ်ႈဢွၼ်ႇဢၼ်မိူဝ်ႈၸႃႉမၼ်းပဵၼ်ၵႃႈတီႈၼႂ်းၸိူဝ်ႉၶိူဝ်းၵဝ်ၶႃႈၵႃႈၼႂ်းဝဵင်းယေႇရုသလႅမ်ႇၼၼ်ႉၸိုင်ၵူၼ်းယုတတင်းသဵင်ႈတင်းလူင်ႁူႉယူႇတီႈၶႃႈဢေႃႈ။

၅ ပေႃးၶဝ်ၶႂ်ႈၶၢမ်ႇသၢၵ်ႈသေႇၸိုင်၊ၶဝ်ႁူႉယူႇလွင်ႈဢၼ်ဝႃႈ၊ၸႃႉၸဵမ်မိူဝ်ႈဢွၼ်တၢင်းၼၼ်ႉၵဝ်ၶႃႈၼႆႉပဵၼ်ၵေႃႉဢၼ်ၶႅင်ၼႃႇသေပိူၼ်ႈၼႂ်းၸုမ်းဢၼ်ၵမ်ၵျၢင်ႉၼႂ်းၽႃႇသႃႇယုတၼၼ်ႉလႄႈပဵၼ်ၽႃႇရိသေးၼၼ်ႉၶႃႈဢေႃႈ။

၆ ၵွပ်ႈပိူဝ်ႈလွင်ႈတၢင်းဢၼ်မုင်ႈထႃႈမွင်းထႃႈဢၼ်ၽြႃးပဵၼ်ၸဝ်ႈဝႆႉၵတိတီႈပူႇပေႃႈႁဝ်းၼၼ်ႉလႄႈၵဝ်ၶႃႈလႆႈၶၢမ်ႇတၢင်းဢၼ်ၸီႇယၢင်ႇၸႅတ်ႈထၢမ်တေႃႈလဵဝ်ၼႆႉတီႈၶႃႈဢေႃႈ။

၇ ၵူၼ်းဢိသရေႇလသိပ်းသွင်မဵဝ်းၶတ်းၸႂ်ႁဵတ်းဝၢတ်ႈၽြႃးပဵၼ်ၸဝ်ႈၵူႈဝၼ်းၵူႈၶိုၼ်းဢမ်ႇထၢတ်ႇလႄႈတၵ်းလႆႈၶၢမ်ႇၵတိၸဝ်ႈၼၼ်ႉ၊ဝႃႈၼႆမီးတၢင်းဢၼ်မုင်ႈထႃႈမွင်းထႃႈယူႇၶႃႈဢေႃႈ။ၶုၼ်ႁေႃၶမ်းတီႈၶႃႈဢိူၺ်း၊ၵူၼ်းယုတတင်းလၢႆဢဝ်လွင်ႈတြႃးတၢင်းဢၼ်မုင်ႈထႃႈမွင်းထႃႈၼၼ်ႉႁဵတ်းဢမူႉတီႈၵဝ်ၶႃႈတီႈၶႃႈဢေႃႈ။

၈ ပေႃးၽြႃးပဵၼ်ၸဝ်ႈႁႂ်ႈၶဝ်ၸိူဝ်းဢၼ်တၢႆယဝ်ႉၼၼ်ႉလုၵ်ႉၶိုၼ်းၸိုင်ႁဵတ်းသင်လႄႈသူၸဝ်ႈထၢင်ႇဝႃႈတီႈဢၼ်တၵ်းယုမ်ႇလႆႈဢမ်ႇမီး၊ဝႃႈၼင်ႇၼႆၼင်ႇႁိုဝ်ၶႃႈ။

၉ ၵဝ်ၶႃႈၵေႃႈယင်းလႆႈထၢင်ႇမႃးဝႃႈ၊ၵဝ်ၶႃႈထုၵ်ႇလီႁဵတ်းလွင်ႈတၢင်းဢၼ်ၶတ်းၵၼ်တင်းၼႃႇမႃႉၸိုဝ်သဵင်ၸဝ်ႈယေႇသု၊ၵူၼ်းဝဵင်းၼႃႇၸရႅတ်ႉၼၼ်ႉၼမ်ၼမ်ဢေႃႈ၊ဝႃႈၼႆသေယဝ်ႉ၊ႁဵတ်းလွင်ႈတၢင်းၸိူဝ်းၼၼ်ႉၵႃႈၼႂ်းဝဵင်းယေႇရုသလႅမ်ႇၶႃႈယဝ်ႉ။

၁၀ ၵဝ်ၶႃႈလႆႈဢၶႂၢင်ႉတီႈယိတ်ႉပရေႃးႁိၵ်ႈလူင်ၸိူဝ်းၼၼ်ႉႁႂ်ႈလႆႈဢဝ်ၵူၼ်းမူတ်းၸၢင်ႇၼမ်ၼႃႇၶင်ဝႆႉၵႃႈၼႂ်းထွင်ႇၵူၺ်းဢမ်ႇၵႃးမိူဝ်ႈဢၼ်ၶဝ်လႆႈၶၢမ်ႇတၢင်းတၢႆၼၼ်ႉၵေႃႈၵဝ်ၶႃႈၽွမ်ႉၶႃႈယဝ်ႉ။

၁၁ ၵဝ်ၶႃႈပၼ်တၢမ်ႇၶဝ်ၵႃႈၼႂ်းၸရွပ်ႈႁေႃးတြႃးတင်းသဵင်ႈတင်းလူင်ၶိူဝ်းၶိူဝ်းယႂ်းယႂ်းဢမ်ႇႁူႉလၢႆပွၵ်ႈယဝ်ႉလႄႈႁဵတ်းပႄႉႁဵတ်းၼႅင်ႇႁႂ်ႈၶဝ်သေႉသွမ်းၽြႃးပဵၼ်ၸဝ်ႈတီႈၶႃႈယဝ်ႉ။ပႃးတင်းတေႃးသႃႉၸႂ်မႆႈၶႂ်ႈၸႃႉဢၼ်ယႂ်ႇၼႃႇၼၼ်ႉသေလႄႈၼိၵ်ႈၸၢၵ်ႈငႅၼ်းသေးၶဝ်တေႃႇထိုင်ႁွတ်ႈတၢင်ႇဝၢၼ်ႈတၢင်ႇမိူင်းတီႈၶႃႈယဝ်ႉ။

၁၂ ၼႂ်းမိူဝ်ႈဢၼ်ၵဝ်ၶႃႈဢဝ်တင်းဢၶႂၢင်ႉဢရႃႇဢၼ်ယိတ်ႉပရေႃးႁိၵ်ႈလူင်တင်းလၢႆပၼ်ၼၼ်ႉလႄႈၵႂႃႇၵႃႈတီႈဝဵင်းထမ်ႇမသႅတ်ႈယူႇၼၼ်ႉၸိုင်မိူဝ်ႈၶိင်ႇၵၢင်ဝၼ်းတဵင်ႈၵဝ်ၶႃႈလႆႈႁၼ်ဢၼ်လႅင်းဢၼ်ႁိူဝ်ႈလႅင်းၼႃႇသေဢရွင်ႇၵၢင်ဝၼ်းၼၼ်ႉ

၁၃ ႁိူဝ်ႈလႅင်းမႃးၵႃႈၼိူဝ်ၽႃႉၵၢင်ႁၢဝ်ႁိမ်းၵဝ်ၶႃႈဢိၵ်ႇတင်းၵူၼ်းၸိူဝ်းဢၼ်ၸွမ်းလူၺ်ႈၵၼ်တင်းၵဝ်ၶႃႈၼၼ်ႉၵႃႈၼႂ်းသဵၼ်ႈတၢင်းၼၼ်ႉတီႈၶႃႈဢေႃႈ။

၁၄ မိူဝ်ႈဢၼ်ၵဝ်ၶႃႈဢိၵ်ႇတင်းၵူၼ်းတင်းသဵင်ႈတင်းလူင်လူမ်ႉၵႃႈၼိူဝ်လိၼ်ၼၼ်ႉၸိုင်ၵဝ်ၶႃႈလႆႈငိၼ်းသဵင်ဢၼ်ဢဝ်တင်းၵႂၢမ်းၽႃႇသႃႇႁေႇပြႄးလၢတ်ႈၼၼ်ႉဝႃႈ၊-သေႃးလုဢိူၺ်း၊သေႃးလုဢိူၺ်း၊ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသေးၵဝ်ၼင်ႇႁိုဝ်။ပေႃးမႂ်းပိတ်ႉသႂ်ႇမႆႉလႅမ်ၸိုင်မႂ်းတၵ်းၸဵပ်းၼႃႇလူင်လၢင်ဢေႃႈ၊ဝႃႈၼင်ႇၼႆၶႃႈဢေႃႈ။

၁၅ ၵဝ်ၶႃႈၵေႃႈလဝ်ႈထၢမ်လႄႈဝႃႈ၊-ၸဝ်ႈႁဝ်းပဵၼ်ၽူႈလႂ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-ၵဝ်ပဵၼ်ယေႇသုဢၼ်မႂ်းၼိၵ်ႈၸၢၵ်ႈငႅၼ်းသေးၼၼ်ႉဢေႃႈ။

၁၆ လုၵ်ႉလႄႈၸုၵ်းယူႇၼိူဝ်တိၼ်မႂ်းတႃႉ။ၵဝ်ပေႃႇမႃးၵႃႈတီႈမႂ်းႁႂ်ႈလႆႈၶၢၼ်းမႂ်းၼႂ်းဢရႃႇၶဝ်ၸိူဝ်းဢၼ်ပွင်ႁဵတ်းဢမူႉၸဝ်ႈလႄႈၶၢမ်ႇသၢၵ်ႈသေႇလွင်ႈတၢင်းဢၼ်မႂ်းလႆႈႁၼ်လွင်ႈတၢင်းဢၼ်မႂ်းတၵ်းလႆႈႁၼ်ၸိူဝ်းၼၼ်ႉဢေႃႈ။

၁၇ ၵဝ်တၵ်းၵႄႇသႄႇၶျွတ်ႈဢဝ်မႂ်းသေၵႃႈၼႂ်းမိုဝ်းၸိူဝ်ႉၶိူဝ်းယုတဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆသေလႄႈတၵ်းပွႆႇၸႂ်ႉမႂ်းၵႂႃႇၵႃႈတီႈၶဝ်၊ႁႂ်ႈလႆႈၽုၺ်ႇပၼ်မၢၵ်ႇတႃၶဝ်ႁႂ်ႈၶဝ်ဢွၵ်ႇသေၵႃႈၼႂ်းဢၼ်လပ်းသိင်ႇသေယဝ်ႉမႃးၵႃႈတီႈဢၼ်လႅင်း၊

၁၈ ႁႂ်ႈၶဝ်ၶၢႆႉသေၵႃႈၼႂ်းဢႃႇၼႃႇၸႃႇတၢၼ်ႇမႃႇၼၢတ်ႈသေယဝ်ႉမႃးၵႃႈတီႈၽြႃးပဵၼ်ၸဝ်ႈ၊ႁႂ်ႈၶဝ်လႆႈၶၢမ်ႇဢဝ်ၵျေးၸူးတၢင်းဢၼ်ပွႆႇလွတ်ႈဢပျႅတ်ႈဢိၵ်ႇတင်းဢမူၺ်ႇၼႂ်းၶဝ်ၸိူဝ်းဢၼ်ႁွတ်ႈထိုင်တၢင်းဢၼ်မူတ်းၸၢင်ႇ၊ၵွပ်ႈပိူဝ်ႈတၢင်းယုမ်ႇမၢတ်ႈၼၼ်ႉဢေႃႈ။

၁၉ ၶုၼ်ႁေႃၶမ်းဢၵိပ်ႉပတီႈၶႃႈဢိူၺ်း၊ပျႃႇတိၵ်ႈၸဝ်ႈဢၼ်ပဵၼ်မႃးၵႃႈတီႈၵၢင်ႁၢဝ်ၼၼ်ႉၵဝ်ၶႃႈယင်းဢမ်ႇထွမ်ႇဢမ်ႇဢဝ်လႄႈဢမ်ႇယူႇလႆႈၶႃႈ။

၂၀ ၵူၼ်းႁဝ်းၼႆႉတၵ်းလႆႈၶုၵ်းၸႂ်လႆႈမႆႈၸႂ်တၵ်းလႆႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ၵိုင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ်လႄႈၶၢႆႉပုတ်ႈမႃးၸူးၵႃႈတီႈၽြႃးပဵၼ်ၸဝ်ႈဝႃႈၼႆ၊ၵဝ်ၶႃႈႁေႃးလၢတ်ႈၵႃႈၼႂ်းဝဵင်းထမ်ႇမသႅတ်ႈဢွၼ်တၢင်းသေယဝ်ႉၸင်ႇလႆႈႁေႃးလၢတ်ႈၵႃႈတီႈၶဝ်ၸိူဝ်းဢၼ်ယူႇၵႃႈၼႂ်းဝဵင်းယေႇရုသလႅမ်ႇတင်းမိူင်းယုတၵူႈတီႈၵူႈလႅၼ်ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတီႈၶႃႈဢေႃႈ။

၂၁ ၵွပ်ႈပိူဝ်ႈလွင်ႈတၢင်းၼၼ်ႉလႄႈၵူၼ်းယုတတင်းလၢႆတီႉဢဝ်ၵဝ်ၶႃႈၵႃႈၼႂ်းပိၵ်ႉမၢၼ်ႇၸဝ်ႈသေယဝ်ႉၶတ်းၸႂ်ႁႂ်ႈလႆႈဢဝ်ၵဝ်ၶႃႈတၢႆတီႈၶႃႈဢေႃႈ။

၂၂ ၼႂ်းဝႃႈၼၼ်သေၵေႃႈ၊ၵဝ်ၶႃႈလႆႈၶၢမ်ႇၵျေးၸူးတၢင်းဢၼ်ၽြႃးပဵၼ်ၸဝ်ႈၸွႆႈထႅမ်မႃႉၸႃႉလႄႈမီးယူႇတေႃႇထိုင်ႁွတ်ႈမိူဝ်ႈလဵဝ်ၼႆႉသေယဝ်ႉလႆႈၶၢမ်ႇသၢၵ်ႈသေႇယူႇၵႃႈတီႈၵူၼ်းၸဵမ်လဵၵ်ႉၸဵမ်ယႂ်ႇသေလႄႈမွၵ်ႇလၢတ်ႈလွင်ႈတၢင်းဢၼ်မုဝ်းသေႇဢိၵ်ႇတင်းပရေႃးၽႅတ်ႈတင်းလၢႆႁေႃးလၢတ်ႈလႄႈဝႃႈ၊-တၵ်းပဵၼ်မႃးဢေႃႈဝႃႈၼင်ႇၼႆၸိူဝ်းၼၼ်ႉၵူၺ်းၶႃႈဢေႃႈ။

၂၃ ၸဝ်ႈၶရိၸ်ႉတၵ်းလႆႈၶၢမ်ႇတၢႆမၼ်းၸဝ်ႈတၵ်းလႆႈပဵၼ်ၵေႃႉဢၼ်လုၵ်ႉၵႃႈတၢင်းတၢႆၶိုၼ်းလိပ်းဢွၼ်တၢင်းပိူၼ်ႈလႄႈပၼ်ဢၼ်လႅင်းတီႈၵူၼ်းမဵဝ်းယုတဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။

၂၄ မိူဝ်ႈဢၼ်ပေႃးလုလဝ်ႈလၢတ်ႈၵႂၢမ်းၽေႇဢပျႅတ်ႈၸိူဝ်ႉၼင်ႇၼႆၼၼ်ႉၸိုင်ၶုၼ်ၽိတ်ႉတုႁွင်ႉသႅၼ်ႇလႄႈဝႃႈ၊-ပေႃးလုဢိူၺ်း၊မႂ်းၼႆႉပဵၼ်ၵူၼ်းယွင်ႇဢိူဝ်း။သွၼ်ဢဝ်ဢတၢတ်ႈပိင်ႇၺႃႇၼမ်ၼႃႇလႄႈထိုင်ပဵၼ်ၵူၼ်းယွင်ႇၵႂႃႇယဝ်ႉ၊ဝႃႈၼင်ႇၼႆဢေႃႈ။

၂၅ ပေႃးလုၵေႃႈလဝ်ႈလၢတ်ႈလႄႈဝႃႈ၊-ၶုၼ်ၽိတ်ႉတုဢၼ်မျၢတ်ႈၼႃႇၶႃႈဢိူၺ်း၊ၵဝ်ၶႃႈဢမ်ႇၸႂ်ႈၵူၼ်းယွင်ႇၶႃႈ။ၵဝ်ၶႃႈမီးတင်းႁူဝ်ၸႂ်ဢၼ်လီဢၼ်ငၢမ်းသေလႄႈလၢတ်ႈၵႂၢမ်းဢၼ်ၵိုင်ႇၵၼ်တင်းသမ်ႇမႃႇတြႃးၼၼ်ႉတီႈၶႃႈဢေႃႈ။

၂၆ ၶုၼ်ႁေႃၶမ်းဢၵိပ်ႉပႁူႉလွင်ႈတၢင်းၸိူဝ်းၼႆႉယူႇၶႃႈဢေႃႈ။ၵႃႈတီႈၽၢႆႇၼႃႈၶုၼ်ၼၼ်ႉၵဝ်ၶႃႈႁတ်းလဝ်ႈလၢတ်ႈလႅင်းလႅင်းၶႃႈဢေႃႈ။လွင်ႈတၢင်းၸိူဝ်းၼႆႉၸိုင်ၵဝ်ၶႃႈထၢင်ႇဢၼ်မၼ်းၸဝ်ႈဢမ်ႇႁူႉၼၼ်ႉဢမ်ႇမီးသေၸိူဝ်ႉသေပိူင်ၶႃႈဢေႃႈ။လွင်ႈမၼ်းၸမ်း၊လွင်ႈတၢင်းၼႆႉပဵၼ်လွင်ႈတၢင်းဢၼ်ႁဵတ်းတီႈၸွၵ်ႉတီႈၸဵင်ႇဢမ်ႇၸႂ်ႈၶႃႈ။

၂၇ ၶုၼ်ႁေႃၶမ်းဢၵိပ်ႉပတီႈၶႃႈဢိူၺ်း။ၸဝ်ႈႁဝ်းယုမ်ႇၵျၢမ်းဢၼႃႇၵၢတ်ႈတိယူႇၶႃႈႁိုဝ်။လွင်ႈဢၼ်ၸဝ်ႈႁဝ်းယုမ်ႇၼၼ်ႉၵဝ်ၶႃႈႁူႉယူႇတီႈၶႃႈဢေႃႈ၊ဝႃႈၼင်ႇၼႆဢေႃႈ။

၂၈ ၶုၼ်ဢၵိပ်ႉပၵေႃႈလၢတ်ႈတီႈပေႃးလုလႄႈဝႃႈ၊-မႂ်းႁဵတ်းဢိတ်းဢွၼ်ႇၼိုင်ႈၵူၺ်းလႄႈတၵ်းၸူဝ်းဢဝ်ၵဝ်ႁႂ်ႈလႆႈပဵၼ်ၶရိၸ်ႉယၢၼ်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ပေႃးလုၵေႃႈလၢတ်ႈလႄႈဝႃႈ၊-

၂၉ ႁဵတ်းဢိတ်းဢွၼ်ႇၼိုင်ႈသေဢမ်ႇဝႃႈ၊ႁဵတ်းၼမ်ၼမ်သေဢမ်ႇဝႃႈ၊ၼွၵ်ႈသေၸိူၵ်ႈလဵၵ်းၸိူဝ်းၼႆႉ၊ၼင်ႇႁိုဝ်ၸဝ်ႈႁဝ်းဢိၵ်ႇတင်းၶဝ်ၸိူဝ်းဢၼ်လႆႈငိၼ်းၵႂၢမ်းၵဝ်ၶႃႈဝၼ်းမိူဝ်ႈၼႆႉတင်းသဵင်ႈတင်းလူင်ၼႆႉတၵ်းပဵၼ်ၸိူဝ်ႉၼင်ႇၵဝ်ၶႃႈၸိုင်ၵဝ်ၶႃႈသူးတွင်းတီႈၽြႃးပဵၼ်ၸဝ်ႈယူႇၶႃႈဢေႃႈ၊ဝႃႈၼင်ႇၼႆဢေႃႈ။

၃၀ မိူဝ်ႈၼၼ်ႉၸႃႉၸဵမ်ၶုၼ်ႁေႃၶမ်းဢၵိပ်ႉပတင်းပေႇရၼိတ်ႉဢိၵ်ႇတင်းၶုၼ်ၽိတ်ႉတုတင်းၶဝ်ၸိူဝ်းဢၼ်ၼင်ႈယူႇၵႃႈတီႈၼၼ်ႉၸိူဝ်းၼၼ်ႉလုၵ်ႉၵႂႃႇတၢင်ႇတီႈသေယဝ်ႉၼင်ႇၵၼ်ၵၼ်လၢတ်ႈၵၼ်လႄႈဝႃႈ၊-

၃၁ ၵေႃႉၼႆႉမၼ်းဢမ်ႇႁဵတ်းၽိတ်းဢမူႉဢီႈသင်ဢၼ်ထိူၵ်ႈလႆႈတၢႆၼၼ်ႉ။ဢမူႉဢၼ်ထိူၵ်ႈတၵ်းလႆႈတူၵ်းၵႅၼ်းၵေႃႈဢမ်ႇမီး၊ဝႃႈၼင်ႇၼႆဢေႃႈ။

၃၂ ၶုၼ်ဢၵိပ်ႉပၵေႃႈလၢတ်ႈတီႈၶုၼ်ၽိတ်ႉတုလႄႈဝႃႈ၊-သင်မၼ်းဢမ်ႇလႆႈဝႃႈမၼ်းတၵ်းၶၢမ်ႇဢယူႇတီႈၶုၼ်ႁေႃၶမ်းၵေႇသႃႇဝႃႈၼႆၸိုင်၊ႁဝ်းထုၵ်ႇလီပွႆႇမၼ်းလွတ်ႈယဝ်ႉ၊ဝႃႈၼင်ႇၼႆဢေႃႈ။