Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၇

ၵႂၢမ်းသထေႇၽၢၼ်ႇလၢတ်ႈတေႃႇယိတ်ႉပရေႃးႁိၵ်ႈ

၁ မိူဝ်ႈၼၼ်ႉၶုၼ်ယိတ်ႉပရေႃးႁိၵ်ႈထၢမ်လႄႈဝႃႈ၊-လွင်ႈတၢင်းၸိူဝ်းၼႆႉၸွင်ႇၸႂ်ႈတႄႉႁိုဝ်မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈမွၵ်ႇလၢတ်ႈလႄႈဝႃႈ၊-ပီႈၼွင်ႉၶဝ်ဢိၵ်ႇတင်းပေႃႈၶဝ်ဢိူၺ်း၊ထွမ်ႇငိၼ်းသေၵမ်း။

၂ ၽြႃးပဵၼ်ၸဝ်ႈဢၼ်မူၼ်ၽုင်းယႂ်ႇၼႃႇၼၼ်ႉပေႃႇမႃးတီႈပေႃႈႁဝ်းဢႃႇပြႁၢမ်ႇၼႂ်းမိူဝ်ႈဢၼ်မၼ်းယင်းမီးယူႇၼႂ်းမိူင်းမေႇသေႃးပေႃးတႃႇမိၸူဝ်ႈဢၼ်မၼ်းယင်းဢမ်ႇပႆႇၵႂႃႇယူႇၵႃႈတီႈဝဵင်းၶႃႇၼၢၼ်ႇၼၼ်ႉလႄႈမီးဢမိင်ႉဝႃႈ၊-

၃ ဢွၵ်ႇသေၵႃႈၼႂ်းမိူင်းမႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းလႄႈၵႂႃႇၵႃႈတီႈမိူင်းဢၼ်ၵဝ်တၵ်းၼႄပၼ်တီႈမႂ်းၼၼ်ႉတႃႉ၊ဝႃႈၼင်ႇၼႆဢေႃႈ။

၄ မၼ်းၵေႃႈၸင်ႇဢွၵ်ႇသေၵႃႈၼႂ်းမိူင်းၵႃႇလတေႇလႄႈၵႂႃႇယူႇၵႃႈၼႂ်းဝဵင်းၶႃႇၼၢၼ်ႇဢေႃႈ။မိူဝ်ႈဢၼ်ပေႃႈမၼ်းတၢႆယဝ်ႉၼၼ်ႉၸိုင်မၼ်းၸဝ်ႈႁႂ်ႈမၼ်းၶၢႆႉမႃးၵႃႈတီႈမိူင်းဢၼ်သူယူႇတေႃႈလဵဝ်ၼႆႉဢေႃႈ။

၅ ပဵၵ်ႉသမ်ႉမၼ်းၸဝ်ႈဢမ်ႇပၼ်ဢမူၺ်ႇတီႈမၼ်းႁႂ်ႈတိၼ်မၼ်းၶွၼ်ၼိုင်ႈလႆႈယဵပ်ႇၼႂ်းမိူင်းၼႆႉသေၵေႃႈယႃႇမၼ်းၸဝ်ႈဝႆႉၵတိတီႈမၼ်းၸဵမ်မိူဝ်ႈဢၼ်မၼ်းဢမ်ႇပႆႇမီးလုၵ်ႈမီးလၢင်းသေၵေႃႉၼၼ်ႉဝႃႈ၊-

၆ လုၵ်ႈလၢၼ်မႂ်းတင်းလၢႆတၵ်းလႆႈပဵၼ်ၶႅၵ်ႇယူႇၵႃႈၼႂ်းမိူင်းဢၼ်ပိူၼ်ႈဢုပ်ႉပိူင်ႇၼၼ်ႉလႄႈလႆႈၶၢမ်ႇႁဵတ်းၶႃႈပိူၼ်ႈ၊ၶၢမ်ႇတၢင်းဢၼ်ပိူၼ်ႈၼိၵ်ႉၸၢၵ်ႈငႅၼ်းသေးသီႇပၢၵ်ႇပီႊဢေႃႈ။

၇ ၵူၺ်းၵႃႈမဵဝ်းၵူၼ်းဢၼ်ၸႂ်ႉၵိၼ်ၶဝ်ၼၼ်ႉၵဝ်တၵ်းၸီႇယၢင်ႇဢေႃႈ။လိုၼ်းၼၼ်ႉၶဝ်တၵ်းလႆႈဢွၵ်ႇသေၵႃႈၼႂ်းမိူင်းၼၼ်ႉမႃးလႄႈႁဵတ်းဝၢတ်ႈၵဝ်ၵႃႈတီႈၼႆႉဢေႃႈ၊ဝႃႈၼင်ႇၼႆဢေႃႈ။

၈ မၼ်းၸဝ်ႈပၼ်ပတိၺိၼ်ႇတြႃးဢၼ်ၸၢပ်ႈသႅင်ႇၵၼ်တင်းတၢင်းဢၼ်ထိူဝ်ႁိမ်းၼၼ်ႉတီႈဢႃႇပြႁၢမ်ႇဢေႃႈ။မၼ်းမီးမႃးလုၵ်ႈၸၢႆးဢိၸၢၵ်ႉလႄႈၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉမၼ်းပၼ်တၢင်းဢၼ်ထိူဝ်ႁိမ်းဢေႃႈ။ဢိၸၢၵ်ႉသမ်ႉမီးလုၵ်ႈၸၢႆးယႃႇၵုပ်ႉ၊ယႃႇၵုပ်ႉသမ်ႉမီးလုၵ်ႈၸၢႆးသိပ်းသွင်ၵေႃႉဢၼ်ပဵၼ်ပေႃႈၸိူဝ်ႉၶိူဝ်းႁဝ်းၸိူဝ်းၼၼ်ႉဢေႃႈ။

၉ ပေႃႈၸိူဝ်ႉၶိူဝ်းႁဝ်းၸိူဝ်းၼၼ်ႉမီးၸႂ်ဢၼ်သီႇၵေႉႁေႈတႃလႄႈၶၢႆယုဝ်းသႅပ်ႉပႅတ်ႈၵႂႃႇၵႃႈတီႈမိူင်းဢေႇၵႅပ်ႉတုပုၼ်ႉဢေႃႈ။ၽြႃးပဵၼ်ၸဝ်ႈပႂ်ႉလူပႂ်ႉတူၺ်းမၼ်းယူႇလႄႈၼုၵ်ႉဢဝ်မၼ်းဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်တင်းလၢႆသေယဝ်ႉ

၁၀ ပၼ်ၺၢၼ်ႇဢိၵ်ႇတင်းဢတၢတ်ႈပိင်ႇၺႃႇတီႈမၼ်းၽၢႆႇၼႃႈၶုၼ်ႁေႃၶမ်းၽႃႇရေႃးဢၼ်ဢုပ်ႉပိူင်ႇမိူင်းဢေႇၵႅပ်ႉတုၼၼ်ႉလႄႈၶုၼ်ႁေႃၶမ်းၼၼ်ႉၵေႃႈဢဝ်မၼ်းၶၢၼ်းဝႆႉၵႃႈၼႂ်းဢရႃႇၶုၼ်ဢၼ်လႆႈဢုပ်ႉပိူင်ႇမိူင်းဢေႇၵႅပ်ႉတုတင်းဢရႃႇဢၼ်ဢုပ်ႉပိူင်ႇႁေႃၶမ်းၼၼ်ႉဢေႃႈ။

၁၁ ၼႂ်းမိူင်းၶႃႇၼၢၼ်ႇတင်းမိူင်းဢေႇၵႅပ်ႉတုတင်းမိူင်းပဵၼ်တၢင်းဢၼ်ၶဝ်ႈၵႃႊမၢၵ်ႇပႅင်းဢိၵ်ႇတင်းတုၵ်ႉၶႃႉတၢင်းၽၢၼ်ယႂ်ႇၼႃႇလႄႈတီႈၼႃႈႁိူၼ်းပေႃႈႁဝ်းၼၼ်ႉဢမ်ႇမီးတၢင်းၵိၼ်တၢင်းၶူပ်းသင်ဢေႃႈ။

၁၂ မိူဝ်ႈဢၼ်ယႃႇၵုပ်ႉလႆႈငိၼ်းလွင်ႈဢၼ်ၶဝ်ႈပိူၵ်ႇၶဝ်ႈသၢၼ်ဢမ်ႇမီးၵႃႈၼႂ်းမိူင်းဢေႇၵႅပ်ႉတုယဝ်ႉၼၼ်ႉၸိုင်မၼ်းပွႆႇၸႂ်ႉပေႃႈႁဝ်းၸိူဝ်းၼၼ်ႉၵႂႃႇပွၵ်ႈပထမဢေႃႈ။

၁၃ မိူဝ်ႈပွၵ်ႈတုတိယၼၼ်ႉယုဝ်းသႅပ်ႉၽုၺ်ႇဢွၵ်ႇၼႄပျႃးလွင်ႈတူဝ်ၸဝ်ႈၵဝ်ႇတီႈပီႈၼွင်ႉမၼ်းတင်းလၢႆလႄႈၶုၼ်ႁေႃၶမ်းၽႃႇရေႃးၸင်ႇလႆႈႁူႉၸိူဝ်ႉၶိူဝ်းယုဝ်းသႅပ်ႉဢေႃႈ။

၁၄ မိူဝ်ႈၼၼ်ႉယုဝ်းသႅပ်ႉပွႆႇၸႂ်ႉၵႂႃႇႁႂ်ႈလႆႈႁွင်ႉပၢင်းဢဝ်ပေႃႈမၼ်းယႃႇၵုပ်ႉဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတင်းသဵင်ႈတင်းလူင်ၸဵတ်းသိပ်းပၢႆႁႃႈၵေႃႉၸိူဝ်းၼၼ်ႉမႃးဢေႃႈ။

၁၅ ယႃႇၵုပ်ႉၵေႃႈလူင်းၵႂႃႇယူႇၵႃႈတီႈမိူင်းဢေႇၵႅပ်ႉတုတေႃႇထိုင်ႁွတ်ႈၸႃႉၸဵမ်တူဝ်ၸဝ်ႈၵဝ်ႇဢိၵ်ႇတင်းပေႃႈႁဝ်းၸိူဝ်းၼၼ်ႉတၢႆၵႂႃႇဝၢႆးၵႂႃႇၵႃႈတီႈၼၼ်ႉဢေႃႈ။

၁၆ တူဝ်တၢႆၶဝ်လႆႈၶၢမ်ႇဢဝ်တၢင်းဢၼ်ဢဝ်ၵႂႃႇသူင်ႇၵႃႈတီႈဝဵင်းသေႇၶိမ်ႇလႄႈသႂ်ႇဝႆႉၵႃႈၼႂ်းသၢင်းၶျႅင်းဢၼ်ဢႃႇပြႁၢမ်ႇဢဝ်တင်းငိုၼ်းသိုဝ်ႉဢဝ်တီႈၶဝ်ၸိူဝ်းဢၼ်ပဵၼ်လုၵ်ႈႁေႇမေႃႇ၊ဢၼ်ပဵၼ်ပေႃႈသေႇၶိမ်ႇ၊ၼၼ်ႉဢေႃႈ။

၁၇ မိူဝ်ႈဢၼ်ၶိင်ႇၵႃႇလႃႉၵတိၽြႃးပဵၼ်ၸဝ်ႈဢၼ်တိၵ်ႉထၢၼ်ႇဝႆႉၵႃႈတီႈဢႃႇပြႁၢမ်ႇၼၼ်ႉၸမ်တၵ်းႁွတ်ႈထိုင်မႃးၼၼ်ႉၸိုင်၊ၵူၼ်းမဵဝ်းၼၼ်ႉယႂ်ႇၵႂၢင်ႈလႄႈ

၁၈ ၼမ်မႃးၵိုၼ်းမႃးၵႃႈၼႂ်းမိူင်းဢေႇၵႅပ်ႉတုတေႃႇထိုင်ၸူဝ်ႈပၢၼ်ၶုၼ်ႁေႃၶမ်းပႃးၼိုင်ႈ၊ဢၼ်ဢမ်ႇႁူႉၸၵ်းယုဝ်းသႅပ်ႉၼၼ်ႉ၊ပေႃႇမႃးဢေႃႈ။

၁၉ ၶုၼ်ႁေႃၶမ်းၼၼ်ႉႁဵတ်းပရိယႄႇတီႈၸိူဝ်ႉၶိူဝ်းႁဝ်းလႄႈၼင်ႇႁိုဝ်တၵ်းလႆႈဢဝ်လုၵ်ႈၸၢႆးဢွၼ်ႇႁဝ်းတင်းလၢႆထိမ်ႈပႅတ်ႈဢမ်ႇႁႂ်ႈဢသၢၵ်ႈလႆႈလိပ်းၸိုင်ၶဝ်ၼိၵ်ႈၸၢၵ်ႈငႅၼ်းသေးပေႃႈႁဝ်းၸိူဝ်းၼၼ်ႉဢေႃႈ။

၂၀ မိူဝ်ႈၼၼ်ႉမုဝ်းသေႇဢၼ်မီးႁၢင်ႊၽၢင်ႁၢင်ႊလီၼၼ်ႉၵိူတ်ႇလဵင်ႉမႃးလႄႈလဵင်ႉလူလုမ်းလႃးဝႆႉၼႂ်းႁိူၼ်းပေႃႈမၼ်းသၢမ်လိူၼ်တဵမ်တဵမ်ဢေႃႈ။

၂၁ လိုၼ်းၼၼ်ႉမိူဝ်ႈဢၼ်ဢဝ်မၼ်းၵႂႃႇဝႆႉၵႃႈၼွၵ်ႈၼၼ်ႉၸိုင်လုၵ်ႈယိင်းသဝ်ၶုၼ်ႁေႃၶမ်းၽႃႇရေႃးၵဵပ်းဢဝ်လႄႈလဵင်ႉလူဝႆႉၸိူဝ်ႉၼင်ႇလုၵ်ႈဢွၵ်ႇတူဝ်ၸဝ်ႈၵဝ်ႇဢေႃႈ။

၂၂ မုဝ်းသေႇၵေႃႈသွၼ်ဢဝ်ဢတၢတ်ႈပိင်ႇၺႃႇၵႃႈမီးတင်းသဵင်ႈတင်းလူင်ၼႂ်းမိူင်းဢေႇၵႅပ်ႉတုလႄႈသူပ်းၸၢင်ႊလၢတ်ႈမိုဝ်းၸၢင်ႊႁဵတ်းဢေႃႈ။

၂၃ မိူဝ်ႈဢၼ်ဢသၢၵ်ႈလႆႈသီႇသိပ်းပီႊၼၼ်ႉမၼ်းမီးတၢင်းၵျၢမ်ႇတၢင်းပွင်ၼႂ်းၸႂ်ႈႁႂ်ႈလႆႈၵႂႃႇလူၵႂႃႇတူၺ်းပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇဢၼ်ပဵၼ်ၵူၼ်းဢိသရေႇလၸိူဝ်းၼၼ်ႉဢေႃႈ။

၂၄ မိူဝ်ႈဢၼ်မၼ်းႁၼ်ပီႈၼွင်ႉၸိူဝ်ႉၶိူဝ်းမၼ်းၵေႃႉၼိုင်ႈလႆႈၶၢမ်ႇတၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသေးယူႇၼၼ်ႉၸိုင်၊မၼ်းယူႇၽၢႆႇၵေႃႉၼၼ်ႉသေယဝ်ႉပေႃႉယႅၼ်ႉၵူၼ်းဢေႇၵႅပ်ႉတုၼၼ်ႉတၢႆသေယဝ်ႉႁႂ်ႈၵေႃႉဢၼ်လႆႈၶၢမ်ႇတၢင်းဢၼ်ၼိၵ်ႉၸၢၵ်ႈငႅၼ်းသေးၼၼ်ႉပႄႉဢေႃႈ။

၂၅ ပဵၵ်ႉသမ်ႉမၼ်းထၢင်ႇပီႈၼွင်ႉမၼ်းၸိူဝ်းၼၼ်ႉတၵ်းႁူႉႁၼ်လွင်ႈဢၼ်ၽြႃးပဵၼ်ၸဝ်ႈတၵ်းဢဝ်တင်းမိုဝ်းမၼ်းလႄႈၵႄႇၼုၵ်ႈဢဝ်ၶဝ်ဢၼ်ဝႃႈၼၼ်ႉသေၵေႃႈ၊ၶဝ်ၼၼ်ႉဢမ်ႇႁူႉဢမ်ႇႁၼ်။

၂၆ ဝၼ်းမိူဝ်ႈၽုၵ်ႈမၼ်းသမ်ႉႁွတ်ႈမႃးၵႃႈတီႈဢၼ်ၵူၼ်းၶဝ်ၼင်ႇၵၼ်ၵၼ်ၽိတ်းၵၼ်ယူႇၼၼ်ႉၸိုင်မၼ်းၸူဝ်းၶဝ်ႁႂ်ႈၶဝ်တဵတ်ႇယဵၼ်လႄႈလၢတ်ႈဝႃႈ၊-ၵူၼ်းၶဝ်ဢိူၺ်း၊သူပဵၼ်ပီႈၼွင်ႉၵၼ်ဢမ်ႇၸႂ်ႈႁိုဝ်။ႁဵတ်းသင်ၵေႃႉၼိုင်ႈလႄႈၵေႃႉၼိုင်ႈၼိၵ်ႈၸၢၵ်ႈငႅၼ်းသေးၵၼ်ၸိူဝ်ႉၼႆ၊မိူဝ်ႈဢၼ်ဝႃႈၼင်ႇၼႆၸိုင်၊

၂၇ ၵေႃႉဢၼ်ၼိၵ်ႈၸၢၵ်ႈငႅၼ်းသေးၵူၼ်းႁိူၼ်းၸမ်ၵၼ်ၼၼ်ႉတဝ်ႉပႅတ်ႈမုဝ်းသေႇသေလႄႈဝႃႈ၊-ၽူႈလႂ်ၶၢၼ်းမႂ်းဝႆႉႁႂ်ႈမႂ်းမႃးႁဵတ်းၵူၼ်းယႂ်ႇၵူၼ်းလူင်ၵူၼ်းဢၼ်ၸီႇယၢင်ႇၵႃႈၼိူဝ်ႁဝ်း။

၂၈ မႂ်းၶႂ်ႈဢဝ်ၵဝ်တၢႆမိူၼ်ၸိူဝ်ႉၼင်ႇဢၼ်မႂ်းဢဝ်ၵူၼ်းဢေႇၵႅပ်ႉတုတၢႆမိူဝ်ႈဝႃးၼၼ်ႉႁိုဝ်၊ဝႃႈၼင်ႇၼႆဢေႃႈ။

၂၉ မုဝ်းသေႇငိၼ်းၵႂၢမ်းၼၼ်ႉသေယဝ်ႉ၊ဢွၵ်ႇပၢႆႊၵႂႃႇယူႇၵႃႈၼႂ်းမိူင်းမိတျၢၼ်ႇသေလႄႈတႄႇၼႃႈႁိူၼ်းၵႃႈတီႈၼၼ်ႉသေယဝ်ႉမီးလုၵ်ႈၸၢႆးသွင်ၵေႃႉဢေႃႈ။

၃၀ မိူဝ်ႈဢၼ်ပူၼ်ႉသီႇသိပ်းပီႊယဝ်ႉၼၼ်ႉတမၢၼ်ႇၵၢင်ႁၢဝ်ပေႃႇမႃးၵႃႈၼႂ်းယုမ်းဢၼႆ်းမႆႈယူႇၵႃႈတီႈၼႂ်းထိူၼ်ႇႁိမ်းတိၼ်လွႆသိၼႃႇၼၼ်ႉဢေႃႈ။

၃၁ မိူဝ်ႈဢၼ်မုဝ်းသေႇႁၼ်ၼၼ်ႉၸိုင်မၼ်းဢၢမ်းၼႃႇလူင်လၢင်လႄႈသုတ်ႉၸမ်ႁႂ်ႈလႆႈယႅၵ်ႉတူၺ်းၸေးၸေးၸွတ်ႇၸွတ်ႇဢေႃႈ။

၃၂ မိူဝ်ႈၼၼ်ႉသဵင်ပျႃႇတိၵ်ႈထႃႇဝရႃႉၽြႃးပေႃႇမႃးလႄႈဝႃႈ၊-ၵဝ်ပဵၼ်ၽြႃးၸူဝ်ႈပူႇၸူဝ်ႈပၢၼ်ပေႃႈသူ၊ၽြႃးဢႃႇပြႁၢမ်ႇ၊ၽြႃးဢိၸၢၵ်ႉ၊ၽြႃးယႃႇၵုပ်ႉ၊ၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉမုဝ်းသေႇသၼ်ႇဝႆယူႇလႄႈဢမ်ႇႁတ်းယႅၵ်ႉတူၺ်းၸေးၸေးၸွတ်ႇၸွတ်ႇ။

၃၃ ထႃႇဝရႃႉၽြႃးၵေႃႈမီးဢမိင်ႉလႄႈဝႃႈ၊-ထွတ်ႇၶႅပ်းတိၼ်မႂ်းတႃႉ။တီႈဢၼ်မႂ်းယဵပ်ႇၼၼ်ႉပဵၼ်လိၼ်ဢၼ်မူတ်းၸၢင်ႇဢေႃႈ။ၵဝ်လႆႈႁၼ်တၢင်းဢၼ်ၼိၵ်ႈၸၢၵ်ႈငႅၼ်းသေးဢၼ်ၵူၼ်းၵဝ်တင်းလၢႆလႆႈၶၢမ်ႇၵႃႈၼႂ်းမိူင်းဢေႇၵႅပ်ႉတုၼၼ်ႉတင်းသဵင်ႈတင်းမူတ်းယဝ်ႉ။

၃၄ သဵင်ဢၼ်ၶဝ်ၶင်းၶီၶင်းၽၢၼ်ၼၼ်ႉၵေႃႈၵဝ်လႆငိၼ်းယဝ်ႉ။ၵဝ်လူင်းမႃးႁႂ်ႈလႆႈၼုၵ်ႈဢဝ်ၶဝ်ၼၼ်ႉယဝ်ႉ။တေႃႈလဵဝ်ၼႆႉမႂ်းၵႂႃႇတႃႉ။ၵဝ်တၵ်းပွႆႇၸႂ်ႉမႂ်းၵႂႃႇၵႃႈတီႈမိူင်းဢေႇၵႅပ်ႉတုပုၼ်ႉဢေႃႈ၊ဝႃႈၼင်ႇၼႆဢေႃႈ။

၃၅ ၼႆႉပဵၼ်မုဝ်းသေႇဢၼ်ၶဝ်ဢဝ်တင်းၵႂၢမ်းဝႃႈ၊-ၽူႈလႂ်ၶၢၼ်းမႂ်းႁႂ်ႈမႂ်းမႃးႁဵတ်းၵူၼ်းယႂ်ႇၵူၼ်းလူင်ဢၼ်ၸီႇယၢင်ႇၵႃႈတီႈႁဝ်း၊ဝႃႈၼင်ႇၼႆလႄႈပႄႇပႅတ်ႈၼၼ်ႉဢေႃႈ။ၽြႃးပဵၼ်ၸဝ်ႈဢဝ်မိုဝ်းတမၢၼ်ႇၵၢင်ႁၢဝ်ဢၼ်ပေႃႇမႃးၵႃႈၼႂ်းယုမ်းမႆႈၽႆးၼၼ်ႉၶၢၼ်းမၼ်းဝႆႉႁႂ်ႈပဵၼ်ၵူၼ်းယႂ်ႇၵူၼ်းလူင်ဢၼ်ၵႄႇသႄႇၼုၵ်ႈဢဝ်ၶဝ်ၼၼ်ႉဢေႃႈ။

၃၆ ၵေႃႉၼၼ်ႉၼုၵ်ႈဢဝ်ၶဝ်သေလႄႈႁဵတ်းၼီႉမိၵ်ႈလၵ်ႈၶၼႃႇဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆၵႃႈၼႂ်းမိူင်းဢေႇၵႅပ်ႉတုတင်းၵႃႈၼႂ်းပၢင်ႇလၢႆႇဢေႇတုင်ႇတင်းၵႃႈၼႂ်းထိူၼ်ႇသီႇသိပ်းပီႊတဵမ်တဵမ်ဢေႃႈ။

၃၇ ၵေႃႉၼၼ်ႉပဵၼ်မုဝ်းသေႇ၊ဢၼ်လၢတ်ႈၵႃႈတီႈၵူၼ်းဢိသရေႇလတင်းလၢႆဝႆႉလႄႈဝႃႈ-ၽြႃးပဵၼ်ၸဝ်ႈတၵ်းႁႂ်ႈပရေႃးၽႅတ်ႈဢၼ်မိူၼ်ၸိူဝ်ႉၼင်ႇၵဝ်ၼၼ်ႉၵေႃႉၼိုင်ႈပေႃႇဢွၵ်ႇမႃးၵႃႈၼႂ်းပီႈၼွင်ႉၸိူဝ်ႉၶိူဝ်းသူဢေႃႈ။

၃၈ ၵေႃႉၼၼ်ႉပဵၼ်ၵေႃႉဢၼ်လႆႈမီးယူႇၵႃႈၼႂ်းမုၵ်ႉၵူၼ်းၸိူဝ်းၵူၼ်းၵႃႈၼႂ်းထိူၼ်ႇလူၺ်ႈၵၼ်တင်းတမၢၼ်ႇၵၢင်ႁၢဝ်ဢၼ်တၵ်ႉလၢတ်ႈမၼ်းၵႃႈၼိူဝ်လွႆသိၼႃႇဢိၵ်ႇတင်းလူၺ်ႈၵၼ်တင်းပေႃႈႁဝ်းၸိူဝ်းၼၼ်ႉဢေႃႈၵေႃႉၼၼ်ႉလႆႈၶၢမ်ႇဢဝ်ပျႃႇတိၵ်ႈဢၼ်ႁႂ်ႈဢသၢၵ်ႈလိပ်းၼၼ်ႉလႄႈႁႂ်ႈလႆႈဢၢပ်ႈပၼ်တီႈႁဝ်းဢေႃႈ။

၃၉ ၵႂၢမ်းၵေႃႉၼၼ်ႉၸိုင်ပူႇပေႃႈႁဝ်းၸိူဝ်းၼၼ်ႉယင်းဢမ်ႇၶႂ်ႈထွမ်ႇၶႂ်ႈဢဝ်လႄႈပႄႇပႅတ်ႈသေယဝ်ႉမီးၸႂ်ဢၼ်ၶႂ်ႈၶိုၼ်းမိူဝ်းၵႂႃႇၵႃႈတီႈမိူင်းဢေႇၵႅပ်ႉတုလႄႈလၢတ်ႈတီႈဢႃႇရုၼ်ႇလႄႈဝႃႈ၊-

၄၀ ႁဵတ်းၽြႃးဢၼ်တၵ်းဢွၼ်ႁူဝ်ႁဝ်းၵႂႃႇၼၼ်ႉသေၵမ်း။ႁဝ်းဢမ်ႇႁူႉမုဝ်းသေႇဢၼ်ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉပဵၼ်ဝႆႉၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။

၄၁ မိူဝ်ႈၶိင်ႇဝၼ်းၼၼ်ႉၶဝ်ႁဵတ်းဝူဝ်းဢွၼ်ႇသေယဝ်ႉပုၵ်ႉၸေႃႇတီႈရူၵ်ႉထူႉၼၼ်ႉလႄႈမူၼ်ႈပျေႃႇၵႃႈၼႂ်းလွင်ႈတၢင်းဢၼ်မိုဝ်းတူဝ်ၸဝ်ႈၵဝ်ႇႁဵတ်းၼၼ်ႉဢေႃႈ။

၄၂ ၽြႃးပဵၼ်ၸဝ်ႈဝၢႆႇၼႃႈပႅတ်ႈၶဝ်သေယဝ်ႉၸုၼ်ႉပႅတ်ႈၶဝ်ႁႂ်ႈၶဝ်လႆႈႁဵတ်းဝၢတ်ႈၵႃႈတီႈၶိူင်ႈပိူင်ၵၢင်ႁၢဝ်တင်းလၢႆၼၼ်ႉဢေႃႈ။ၼင်ႇၼၼ်လႄႈဢၼ်တႅမ်ႈဝႆႉၼႂ်းၵျၢမ်းဢၼႃႇၵၢတ်ႈတိဝႆႉလႄႈဝႃႈၸမ်း၊-မဵဝ်းဢိသရေႇလဢိူၺ်း၊သူလႆႈဢွၼ်ၵၼ်ဢဝ်တရိၵ်ႉသၢၼ်ႇဢိၵ်ႇတင်းယိၸ်ႉတင်းလၢႆပုၵ်ႉၸေႃႇၵဝ်ၵႃႈၼႂ်းထိူၼ်ႇၼၼ်ႉသီႇသိပ်းပီႊတဵမ်တဵမ်ႁိုဝ်။

၄၃ သူႁၢပ်ႇဢဝ်ပႃးဢဝ်သုမ်ႉထဵင်မူးလွၵ်ႇတင်းလၢဝ်ၽြႃးရိမ်ႇၽၢၼ်ႇ၊ဢၼ်ပဵၼ်ပုင်ႇႁၢင်ႊဢၼ်သူႁဵတ်းပုၼ်ႈဢၼ်တၵ်းလႆႈၵူဝ်းၵႂၢႆႇၸိူဝ်းၼၼ်ႉယဝ်ႉလူင်ပေႇ။ပိူဝ်ႈၼႆလႄႈၵဝ်တၵ်းဢဝ်သူၵႂႃႇၵႃႈတီႈၽၢႆႇပုၼ်ႉပႃႇပုလုၼ်ႇဢေႃႈ၊ဝႃႈၼႆမီးမႃးၼင်ႇၼႆဢေႃႈ။

၄၄ သုမ်ႉထဵင်ၸဝ်ႈဢၼ်ၶၢမ်ႇသၢၵ်ႈသေႇၼၼ်ႉလႆႈမီးၵႃႈတီႈပေႃႈႁဝ်းၸိူဝ်းၼၼ်ႉၵႃႈၼႂ်းထိူၼ်ႇၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉတီႈမုဝ်းသေႇလွင်ႈၼင်ႇႁိုဝ်မၼ်းၸဝ်ႈတၵ်းႁဵတ်းသုမ်ႉထဵင်ၸဝ်ႈမိူၼ်ၸိူဝ်ႉၼင်ႇပုင်ႇႁၢင်ႊဢၼ်မၼ်းလႆႈႁၼ်ယဝ်ႉၼၼ်ႉဢေႃႈ။

၄၅ ပူႇပေႃႈႁဝ်းဢၼ်မႃးလိုၼ်းၶဝ်လူၺ်ႈၵၼ်တင်းယေႃးသုၼၼ်ႉဢွၼ်ၵၼ်ၶၢမ်ႇဢဝ်သုမ်ႉထဵင်ၸဝ်ႈၼၼ်ႉသေယဝ်ႉသႂၢင်းသႂ်ႇၵႃႈၼႂ်းလိၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ၽြႃးပဵၼ်ၸဝ်ႈႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈပူႇပေႃႈႁဝ်းၸိူဝ်းၼၼ်ႉ

၄၆ တေႃႇထိုင်ႁွတ်ႈၸူဝ်ႈပၢၼ်ႈတႃႇဝိတ်ႉၵေႃႉဢၼ်လႆႈၶၢမ်ႇၵျေးၸူးသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈလႄႈယွၼ်းဢဝ်ႁႂ်ႈလႆႈထူပ်းထႃႇၼႃႉတီႈဢၼ်ၽြႃးယႃႇၵုပ်ႉတၵ်းၵိင်းၼွၼ်းၼၼ်ႉဢေႃႈ။

၄၇ ၵူၺ်းၵႃႈသေႃးလမုၼ်ႇလႆႈႁဵတ်းပိၵ်ႉမၢၼ်ႇပုၼ်ႈမၼ်းၸဝ်ႈဢေႃႈ။

၄၈ ၼႂ်းဝႃႈၼၼ်သေၵေႃႈၽြႃးဢၼ်သုင်ၼႃႇသေပိူၼ်ႈၼၼ်ႉၵိင်းၼွၼ်းယူႇၵႃႈၼႂ်းပိၵ်ႉမၢၼ်ႇဢၼ်ဢဝ်မိုဝ်းၵူၼ်းႁဵတ်းၼၼ်ႉဢမ်ႇၸႂ်ႈ။

၄၉ ၵႃႈၼင်ႇဢၼ်ပရေႃးၽႅတ်ႈဢဝ်ပျႃႇတိၵ်ႈလဝ်ႈလၢတ်ႈဝႆႉလႄႈဝႃႈ၊-ၽႃႉၵၢင်ႁၢဝ်ပဵၼ်ပလၢင်ႇၵဝ်ဢေႃႈလိၼ်မိူင်းပဵၼ်ၶူင်ႇတီႈတၢင်ႇတိၼ်ၵဝ်ဢေႃႈ။တၵ်းတႄႇႁဵတ်းပိၵ်ႉမၢၼ်ႇၸိူဝ်ႉၼင်ႇႁိုဝ်ပုၼ်ႈၵဝ်။

၅၀ တီႈလႂ်တၼ်းလႂ်တၵ်းပဵၼ်တီႈဢၼ်ၵဝ်ၵိင်းၼွၼ်း။မိုဝ်းၵဝ်ၼႆႉၽၢၼ်ႇသၢင်းႁဵတ်းပဵၼ်လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉဢမ်ႇၸႂ်ႈႁိုဝ်၊ဝႃႈၼႆမီးမႃးၼင်ႇၼႆဢေႃႈ။

၅၁ ၵူၼ်းဢၼ်ၶေႃးၶႅင်လႄႈဢမ်ႇထိူဝ်ႁိမ်းၵႃႈတီႈႁူဝ်ၸႂ်ဢိၵ်ႇတင်းၵႃႈတီႈႁူၶဝ်ဢိူၺ်းသူၶတ်းၵၼ်တင်းဝိၺိၺ်ႇမူတ်းၸၢင်ႇၸဝ်ႈယူႇတႃႇသေႇဢေႃႈ။သူႁဵတ်းၸိူဝ်ႉၼင်ႇဢၼ်ပူႇပေႃႈသူႁဵတ်းၼၼ်ႉဢေႃႈ။

၅၂ ပူႇပေႃႈသူၼၼ်ႉယင်းဢမ်ႇၼိၵ်ႈၸၢၵ်ႈငႅၼ်းသေးပရေႃးၽႅတ်ႈၵႃႈလႂ်သေၵေႃႉသေၵူၼ်းလႄႈယူႇႁိုဝ်း။ၶဝ်ဢဝ်တၢႆၶဝ်ၸိူဝ်းဢၼ်ႁေႃးလၢတ်ႈၽုၺ်ႇၼႄလွင်ႈၸဝ်ႈသိုဝ်ႈတေႃႇဢၼ်တၵ်းမႃးၼၼ်ႉဢေႃႈ။မၼ်းၸဝ်ႈၼၼ်ႉၵေႃႈတေႃႈလဵဝ်ၼႆႉသူဢဝ်ဢၢပ်ႈလႄႈဢဝ်တၢႆယဝ်ႉ။

၅၃ သူၼႆႉပဵၵ်ႉသမ်ႉလႆႈၶၢမ်ႇဢဝ်ပိင်းၺၢပ်ႈတြႃးၸဝ်ႈၵႃႈၼင်ႇဢၼ်တမၢၼ်ႇၵၢင်ႁၢဝ်မၵ်းၶၢၼ်းဝႆႉၼၼ်ႉသေၵေႃႈယႃႇ၊ဢမ်ႇၵမ်ဢမ်ႇၸွမ်းလူင်ပေႇ၊ဝႃႈၼင်ႇၼႆဢေႃႈ။

သထေႇၽၢၼ်ႇလႆႈၶၢမ်ႇတၢင်းဢၼ်ဢဝ်တၢႆ

၅၄ ၶဝ်ငိၼ်းၵႂၢမ်းၼၼ်ႉသေယဝ်ႉႁူဝ်ၸႂ်မႆႈၼႃႇမိူၼ်ၼင်ႇတၵ်းတႅၵ်ႇတၵ်းလႅဝ်ၵႂႃႇယဝ်ႉလႄႈၵတ်းၶဵဝ်ႈၵတ်းၽၢၼ်ႈတေႃႇသထေႇၽၢၼ်ႇဢေႃႈ။

၅၅ သထေႇၽၢၼ်ႇၸမ်းတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈယူႇလႄႈႁႅၼ်တူၺ်းၵၢင်ႁၢဝ်ၸေးၸေးသေယဝ်ႉႁၼ်မူၼ်ၽုင်းၽြႃးပဵၼ်ၸဝ်ႈဢိၵ်ႇတင်းၸဝ်ႈယေႇသုၸုၵ်းယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈၼၼ်ႉလႄႈလၢတ်ႈဝႃႈ၊-

၅၆ တူၺ်းလူ၊ၵဝ်ႁၼ်ၵၢင်ႁၢဝ်ၽုၺ်ႇပိုတ်ႇလႄႈလုၵ်ႈၵူၼ်းၸုၵ်းယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈယူႇဢေႃႈ၊ဝႃႈၼင်ႇၼႆဢေႃႈ။

၅၇ ၶဝ်ၼၼ်ႉႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇသေလႄႈဢိုတ်းႁူၶဝ်ယူႇသေယဝ်ႉၽွမ်ႉၵၼ်ၶုၼ်ႇလႅၼ်ႈၵႂႃႇၸူးမၼ်းလႄႈဢဝ်မၼ်းဢွၵ်ႇၵႂႃႇၵႃႈၼွၵ်ႈဝဵင်းသေယဝ်ႉဢဝ်မၢၵ်ႇႁိၼ်ထိမ်ႈသႂ်ႇမၼ်းဢေႃႈ။

၅၈ ၵူၼ်းၶၢမ်ႇသၢၵ်ႈသေႇၸိူဝ်းၼၼ်ႉၵေႃႈဢဝ်ၶူဝ်းၼုင်ႈၶဝ်တမ်းဝႆႉၵႃႈတီႈႁိမ်းတိၼ်ၵူၼ်းဢွၼ်ႇၵေႃႉၼိုင်ႈဢၼ်လႆႈမီးၸိုဝ်သေႃးလုၼၼ်ႉဢေႃႈ။

၅၉ ၼႂ်းမိူဝ်ႈဢၼ်ၶဝ်ဢဝ်မၢၵ်ႇႁိၼ်ထိမ်ႈသႂ်ႇယူႇၼၼ်ႉသထေႇၽၢၼ်ႇသူးတွင်းလႄႈဝႃႈ၊-ၸဝ်ႈယေႇသုတီႈၶႃႈ၊ၶႅၼ်းတေႃႈသိမ်းဢဝ်ဝိၺိၺ်ႇၵဝ်ၶႃႈသေၵမ်းတီႈၶႃႈ၊ဝႃႈၼင်ႇၼႆဢေႃႈ။

၆၀ မၼ်းၶုပ်ႉၶဝ်ႇယူႇသေယဝ်ႉႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊-ၸဝ်ႈႁဝ်းတီႈၶႃႈ၊ယႃႇပေဢဝ်တူႉၸရိူၵ်ႈဢပျႅတ်ႈၼႆႉတၢင်ႇသႂ်ႇၵႃႈၼိူဝ်ၶဝ်ၶႃႈ၊ဝႃႈၼင်ႇၼႆသေယဝ်ႉ၊ၵိင်းၼွၼ်းၵႂႃႇဢေႃႈ။