Shan Missions

လိၵ်ႈဢေႃးဝႃႇတႃႉၵေႃးရဵၼ်ႇထုၽိုၼ်ပထမ

Chapter       ၁          ၂          ၃         ၄          ၅          ၆           ၇          ၈          ၉           ၁၀          ၁၁          ၁ ၂          ၁၃           ၁၄          ၁၅          ၁၆     

၃

ႁဝ်းပဵၼ်ၵူၼ်းႁဵတ်းႁူမ်ၵၼ်

၁ ပီႈၼွင်ႉၶဝ်ဢိူၺ်း၊ၵဝ်ဢမ်ႇၸၢင်ႊႁေႃးလၢတ်ႈတီႈသူၸိူဝ်ႉၼင်ႇၵူၼ်းဢၼ်မီးၸႂ်ပၵတိဝိၺိၺ်ႇၸဝ်ႈၼၼ်ႉ။ၵဝ်လႆႈႁေႃးလၢတ်ႈတီႈသူၸိူဝ်ႉၼင်ႇၵူၼ်းဢၼ်မီးၸႃႇတိပၵတိၵူၼ်းဢိၵ်ႇတင်းၸိူဝ်ႉၼင်ႇလုၵ်ႈဢွၼ်ႇၼႂ်းၸဝ်ႈၶရိၸ်ႉၼၼ်ႉၵူၺ်းဢေႃႈ။

၂ ပိူဝ်ႈဢၼ်သူဢမ်ႇပႆႇၵိၼ်ၶူပ်းလႆႈတၢင်းၵိၼ်တၢင်းၶူပ်းၼၼ်ႉလႄႈၵဝ်ၸင်ႇလႆႈဢဝ်ၼမ်ႉၼူမ်းသွမ်ပၼ်သူတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။

၃ တေႃႈလဵဝ်ၼႆႉၵေႃႈသူယင်းမီးတၢင်းဢၼ်ၶႄႉၶဵင်ႇၵၼ်တၢင်းဢၼ်ၽိတ်းၵၼ်တၢင်းဢၼ်ၽၢတ်ႇယၢၼ်ၵၼ်ယူႇလႄႈသူပဵၼ်ၵူၼ်းၸႃႇတိပၵတိယူႇဢမ်ႇၸႂ်ႈႁိုဝ်း။

၄ သူႁဵတ်းၸွမ်းၼင်ႇထုင်းၸၢမ်ႇၵူၼ်းလေႃးၵီႇယူႇဢမ်ႇၸႂ်ႈႁိုဝ်း။မိူဝ်ႈဢၼ်ၵေႃႉၼိုင်ႈဝႃႈၵဝ်ပဵၼ်တပႄးပေႃးလုဢေႃႈ၊ဝႃႈၼႆလႄႈၵေႃႉၼိုင်ႈသမ်ႉဝႃႈၵဝ်ပဵၼ်တပႄးဢႃႇပေႃးလုဢေႃႈ၊ဝႃႈၼႆႁင်းၽႂ်ႁင်းမၼ်းယူႇလႄႈသူပဵၼ်ၵူၼ်းၸႃႇတိပၵတိယူႇဢမ်ႇၸႂ်ႈႁိုဝ်။

၅ ပေႃးလုပဵၼ်ၽူႈလႂ်။ဢႃႇပေႃးလုပဵၼ်ၽူႈလႂ်။ပဵၼ်ၵူၼ်းတၢင်ႇတီႈသီႇလႅၼ်ဢမ်ႇၸႂ်ႈ။ၵႃႈၼင်ႇဢၼ်ထႃႇဝရႃႉၽြႃးပဵၼ်ၸဝ်ႈဢိတ်းလူပၼ်ဢၶႂၢင်ႉၼၼ်ႉပဵၼ်ထမ်ႇမႃႉသြႃႇဢၼ်ႁႂ်ႈသူႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။

၆ ၵဝ်ပဵၼ်ၵေႃႉဢၼ်ၽုၵ်ႇသွမ်ႈဢေႃႈ။ဢႃႇပေႃးလုပဵၼ်ၵေႃႉဢၼ်ႁူတ်းၼမ်ႉဢေႃႈ။ၵေႃႉဢၼ်ႁႂ်ႈယႂ်ႇမႃးၼၼ်ႉၸမ်းပဵၼ်ၽြႃးပဵၼ်ၸဝ်ႈဢေႃႈ။

၇ ၵေႃႉဢၼ်ၽုၵ်ႇသွမ်ႈၼၼ်ႉဢမ်ႇတတ်ႈၼိုင်ႇလႆႈ။ၵေႃႉဢၼ်ႁူတ်းၼမ်ႉၼၼ်ႉၵေႃႈဢမ်ႇတတ်ႈၼိုင်ႇလႆႈ။ၽြႃးပဵၼ်ၸဝ်ႈဢၼ်ႁႂ်ႈယႂ်ႇမႃးၼၼ်ႉၵူၺ်းတတ်ႈၼိုင်ႇလႆႈဢေႃႈ။

၈ ၵူၺ်းၵႃႈၵႃႉဢၼ်ၽုၵ်ႇသွမ်ႈဢိၵ်ႇတင်းၵေႃႉဢၼ်ႁူတ်းၼမ်ႉၼၼ်ႉပဵၼ်ဢၼ်လဵဝ်ၵၼ်လႄႈၸွမ်းၼင်ႇဢၼ်တူဝ်ၸဝ်ႈၵဝ်ႇႁဵတ်းႁင်းၽႂ်ႁင်းမၼ်းၼၼ်ႉတၵ်းလႆႈၶၢမ်ႇဢၵျူဝ်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းဢေႃႈ။

၉ ႁဝ်းပဵၼ်ၵေႃႉဢၼ်ႁဵတ်းႁူမ်ၵၼ်တင်းၽြႃးပဵၼ်ၸဝ်ႈဢေႃႈ။သူပဵၼ်ဢူးယဵၼ်ႇၽြႃးပဵၼ်ၸဝ်ႈဢေႃႈ။တိူၵ်ႈၵျွင်းၽြႃးပဵၼ်ႈၸဝ်ႈၵေႃႈပဵၼ်ဢေႃႈ။

ၸဝ်ႈယေႇသုပဵၼ်ငဝ်ႈႁၢၵ်ႈ

၁၀ ၸွမ်းၼင်ႇဢၼ်ၵဝ်လႆႈၶၢမ်ႇၵျေးၸူးၽြႃးပဵၼ်ၸဝ်ႈၼၼ်ႉ၊ၵဝ်ပဵၼ်ၸိူဝ်ႉၼင်ႇလၢၵ်ႈသမႃးသြႃႇလူင်ဢၼ်လၵ်းလႅမ်ၼၼ်ႉလႄႈၶျႃးငဝ်ႈႁၢၵ်ႈတိူၵ်ႈဢေႃႈ။ၵူၼ်းတၢင်ႇၵေႃႉသမ်ႉထၢပ်ႈထႅင်ႈလႄႈတႄႇႁဵတ်းဢေႃႈ။ၼႂ်းဝႃႈၼၼ်သေၵေႃႈတေလႆႈထၢပ်ႈထႅင်ႈလႄႈတႄႇႁဵတ်းၸိူဝ်ႉၼင်ႇႁိုဝ်ဝႃႈၼႆႁႂ်ႈၵူႈၵေႃႉၵူႈၵူၼ်းႁဵတ်းသတိသေၵမ်း။

၁၁ လွင်ႈမၼ်းၸမ်းလိူဝ်သေငဝ်ႈႁၢၵ်ႈတိူၵ်ႈဢၼ်ၶျႃးဝႆႉမီးယူႇဢၼ်ပဵၼ်ၸဝ်ႈယေႇသုၼၼ်ႉၽူႈလႂ်ဢမ်ႇၶျႃးငဝ်ႈႁၢၵ်ႈတိူၵ်ႈတၢင်ႇၸိူဝ်ႉတၢင်ႇဢၼ်လႆႈ။

၁၂ ၵႃႈၼိူဝ်ငဝ်ႈႁၢၵ်ႈတိူၵ်ႈၼၼ်ႉပေႃးၶဝ်ဢဝ်ၶမ်း၊ငိုၼ်း၊သႅင်လီ၊မႆႉ၊ယိူဝ်ႈ၊ၽိူင်းသေလႄႈထၢပ်ႈထႅင်ႈတႄႇႁဵတ်းၸိုင်တၢင်းႁဵတ်းၽႂ်တၢင်းႁဵတ်းမၼ်းတၵ်းထၢင်ႇသႃးမႃးၼႂ်းၶိင်ႇဝၼ်းဢၼ်ၽုၺ်ႇဢွၵ်ႇၼႄပျႃးၼၼ်ႉဢေႃႈ။

၁၃ တၵ်းလႆႈၶၢမ်ႇဢဝ်တင်းၽႆးသေလႄႈၸႅတ်ႈတူၺ်းတၢင်းႁဵတ်းဢၼ်ၵူၼ်းၵူႈၵေႃႉႁဵတ်းၼၼ်ႉပဵၼ်တၢင်းႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။

၁၄ ပေႃးတၢင်းႁဵတ်းၵေႃႉဢၼ်ထၢပ်ႈထႅင်ႈလႄႈတႄႇႁဵတ်းၵႃႈၼိူဝ်ငဝ်ႈႁၢၵ်ႈတိူၵ်ႈၼၼ်ႉမၼ်ႈၶိူင်ႇၸိုင်ၵေႃႉၼၼ်ႉတၵ်းလႆႈၶၢမ်ႇဢၵျူဝ်းဢေႃႈ။

၁၅ ပေႃးတၢင်းႁဵတ်းၵေႃႉၼၼ်ႉမႆႈၽႆးလိူမ်ႈမူတ်းၵႂႃႇၸိုင်ၵေႃႉၼၼ်ႉတၵ်းသုမ်းဢေႃႈ။ၵူၺ်းၵႃႈမၼ်းတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်မိူၼ်ၸိူဝ်ႉၼင်ႇၵေႃႉဢၼ်လွတ်ႈတင်းၽႆးၼၼ်ႉယူႇဢေႃႈ။

၁၆ သူဢမ်ႇႁူႉလွင်ႈဢၼ်သူပဵၼ်ပဵၵ်ႉမၢၼ်ႇၽြႃးပဵၼ်ၸဝ်ႈလႄႈဝိၺိၺ်ႇၽြႃးပဵၼ်ႈၸဝ်ႈၵိင်းဝၢပ်ႈယူႇၵႃႈၼႂ်းသူၼၼ်ႉႁိုဝ်။

၁၇ ပေႃးၵေႃႉၼိုင်ႈယႃႉပႅတ်ႈပဵၵ်ႉမၢၼ်ႇၽြႃးပဵၼ်ၸဝ်ႈၸိုင်ၽြႃးပဵၼ်ၸဝ်ႈတၵ်းယႃႉမၼ်းပႅတ်ႈဢေႃႈ။ပဵၵ်ႉမၢၼ်ႇၽြႃးပဵၼ်ၸဝ်ႈၼၼ်ႉမူတ်းၸၢင်ႇဢေႃႈ။

၁၈ သူၵေႃႈပဵၼ်ပဵၵ်ႉမၢၼ်ႇၸဝ်ႈၼၼ်ႉဢေႃႈ။ယႃႇပပေႅတ်ႉလႅၼ်တူဝ်ၸဝ်ႈၵဝ်ႇ။ၼႂ်းသူၼႆႉပေႃးသေၵေႃႉသေၵူၼ်းထၢင်ႇတူဝ်ၸဝ်ႈၵဝ်ႇပဵၼ်ၵူၼ်းမီးပိင်ႇၺႃႇၼႂ်းလေႃးၵီႇဝႃႈၼႆၸိုင်ႁႂ်ႈမၼ်းပဵၼ်ၵူၼ်းငိူဝ်ႈယဝ်ႉၸင်ႇႁႂ်ႈလႆႈပဵၼ်ၵေႃႉဢၼ်မီးပိင်ႇၺႃႇသေၵမ်း။

၁၉ လွင်ႈမၼ်းၸမ်းပိင်ႇၺႃႇလေႃးၵီႇၼႆႉပဵၼ်ဢၼ်ငိူဝ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်း၊-မၼ်းၸဝ်ႈသႅဝ်ႈဢဝ်ၶဝ်ၸိူဝ်းဢၼ်မီးပိင်ႇၺႃႇၼႂ်းပရိယႄႇၶဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၂၀ သမ်ႉမႃးထႅင်ႈၵမ်းၼိုင်ႈလႄႈဝႃႈၸမ်း၊-ထႃႇဝရႃႉၽြႃးပဵၼ်ၸဝ်ႈႁူႉတၢင်းၵျၢမ်ႇတၢင်းပွင်ၶဝ်ၸိူဝ်းဢၼ်မီးပိင်ႇၺႃႇၼၼ်ႉပဵၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။

၂၁ ပေႃးပဵၼ်ၸိူဝ်ႉၼင်ႇၼႆၸိုင်ယႃႇပေႁႂ်ႈၽူႈလႂ်ဢုပ်ႇဝၢဝ်းမူင်မႅၼ်လွင်ႈၵူၼ်း။လွင်ႈတၢင်းၵႃႈမီးတင်းသဵင်ႈတင်းလူင်ပဵၼ်ပုၼ်ႈသူဢေႃႈ။

၂၂ ပေႃးလုသေဢမ်ႇဝႃႈ၊ဢႃႇပေႃးလုသေဢမ်ႇဝႃႈ၊ၵေႇၽသေဢမ်ႇဝႃႈ၊လေႃးၵႃႉၼႆႉသေဢမ်ႇဝႃႈ၊တၢင်းဢၼ်ဢသၢၵ်ႈလိပ်းသေဢမ်ႇဝႃႈ၊တၢင်းတၢႆသေဢမ်ႇဝႃႈ၊လွင်ႈတၢင်းသိုဝ်ႈၼႃႈတႂ်ႈတႃၼႆႉသေဢမ်ႇဝႃႈ၊လွင်ႈတၢင်းဢၼ်တၵ်းမႃးၵမ်းလိုၼ်းၼၼ်ႉသေဢမ်ႇဝႃႈ၊

၂၃ လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉပဵၼ်ပုၼ်ႈသူဢေႃႈ။သူပဵၼ်ပုၼ်ႈၸဝ်ႈၶရိၸ်ႉဢေႃႈ။ၸဝ်ႈၶရိၸ်ႉၵေႃႈပဵၼ်ပုၼ်ႈၽြႃးပဵၼ်ၸဝ်ႈဢေႃႈ။