Shan Missions

လိၵ်ႈဢေႃးဝႃႇတႃႉႁေႇပြႄး

Chapter          ၁          ၂          ၃          ၄          ၅          ၆          ၇          ၈          ၉          ၁၀          ၁၁          ၁၂          ၁၃         

၁

ၸဝ်ႈၶရိၸ်ႉၼႄပျႃးၽြႃးပဵၼ်ၸဝ်ႈ

၁ မိူဝ်ႈၵွၼ်ႇဢွၼ်ၼၼ်ႉၽြႃးပဵၼ်ၸဝ်ႈဢဝ်တင်းပရေႃးၽႅတ်ႈတင်းလၢႆပၼ်ပျႃႇတိၵ်ႈတီႈပူႇမွၼ်ႇႁဝ်းၶိူဝ်းၶိူဝ်းယႂ်းယႂ်းလၢႆၸိူဝ်ႉလၢႆပိူင်ဢေႃႈ။

၂ ၶိင်ႇၵႃႇလႃႉလိုၼ်းလင်သုတ်းၼႆႉၽြႃးပဵၼ်ၸဝ်ႈဢဝ်တင်းလုၵ်ႈၸဝ်ႈပၼ်ပျႃႇတိၵ်ႈတီႈႁဝ်းယဝ်ႉ။လုၵ်ႈၸဝ်ႈၼၼ်ႉၸိုင်မၼ်းၸဝ်ႈၶၢၼ်းဝႆႉၼႂ်းဢရႃႇၸဝ်ႈဢၼ်တၵ်းလႆႈၶၢမ်ႇဢမူၺ်ႇၵႃႈမီးတင်းသဵင်ႈတင်းလူင်ဢေႃႈ။မၼ်းၸဝ်ႈဢဝ်တင်းလုၵ်ႈၸဝ်ႈၽၢၼ်ႇသၢင်းႁဵတ်းပဵၼ်လေႃးၵထၢတ်ႈတင်းလၢႆဢေႃႈ။

ၸဝ်ႈၶရိၸ်ႉပဵၼ်လုၵ်ႈၽြႃးပဵၼ်ၸဝ်ႈ

၃ လုၵ်ႈၸဝ်ႈၼၼ်ႉပဵၼ်သၢႆဢရွင်ႇမူၼ်ၽုင်းၸဝ်ႈဢိၵ်ႇတင်းပုင်ႇႁၢင်ႊပၵတိၸဝ်ႈလႄႈပဵၼ်ၵေႃႉဢၼ်ဢဝ်တင်းဢမိင်ႉတူဝ်ၸဝ်ႈၵဝ်ႇဢၼ်တဵမ်ထူၼ်ႈဝႆႉတင်းတၼ်းၶူဝ်းၼၼ်ႉထွၵ်ႈၵမ်ႉလွင်ႈတၢင်းၵႃႈမီးတင်းသဵင်ႈတင်းလူင်ယူႇသေလႄႈဢဝ်တူဝ်ၸဝ်ႈၵဝ်ႇပႄႇၽဵဝ်ႈပႅတ်ႈဢပျႅတ်ႈတင်းလၢႆသေယဝ်ႉၼင်ႈယူႇၵႃႈတီႈၽၢႆႇၶႂႃတၼ်းၶူဝ်းဢႃႇၼူႉၽေႃႇၵႃႈတီႈဢၼ်သုင်ပုၼ်ႉဢေႃႈ။

၄ မၼ်းၸဝ်ႈပဵၼ်ၵေႃႉဢၼ်ယႂ်ႇမျၢတ်ႈၼႃႇသေတမၢၼ်ႇၵၢင်ႁၢဝ်တင်းလၢႆမႅၼ်ႈၵႃႈၼင်ႇဢၼ်လႆႈၶၢမ်ႇဢဝ်ၼႃႇမႃႉၸိုဝ်သဵင်ဢၼ်မျၢတ်ႈၼႃႇသေၼႃႇမႃႉၸိုဝ်သဵင်ဢၼ်တမၢၼ်ႇၵၢင်ႁၢဝ်ၸိူဝ်းၼၼ်ႉလႆႈၶၢမ်ႇဢဝ်ၼၼ်ႉဢေႃႈ။

၅ လွင်ႈမၼ်းၸမ်းမၼ်းၸဝ်ႈၸွင်ႇယၢမ်ႈတွၼ်ႉမီးဢမိင်ႉတီႈတမၢၼ်ႇၵၢင်ႁၢဝ်သေၵေႃႉဝႃႈ၊-မႂ်းပဵၼ်လုၵ်ႈၸၢႆးၵဝ်ဢေႃႈ။ၼႂ်းဝၼ်းမိူဝ်ႈၼႆႉၵဝ်ႁႂ်ႈမႂ်းၵိူတ်ႇလဵင်ႉပဵၼ်မႃးယဝ်ႉ။ၵဝ်တၵ်းပဵၼ်ပေႃႈမၼ်းဢေႃႈ။မၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ၊ဝႃႈၼင်ႇၼႆသေပွၵ်ႈႁိုဝ်။

၆ ၼႄးၼိုင်ႈၸမ်းမိူဝ်ႈဢၼ်မၼ်းၸဝ်ႈဢဝ်လုၵ်ႈတူၼ်သႂၢင်းသႂ်ႇၵႃႈၼႂ်းလေႃးၵႃႉၼႆႉၼၼ်ႉၸိုင်မၼ်းၸဝ်ႈမီးဢမိင်ႉလႄႈဝႃႈႁႂ်ႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းသဵင်ႈတင်းလူင်ၵူမ်ႈမုပ်ႇၵူဝ်းၵႂၢႆႇမၼ်းၸဝ်ႈသေၵမ်းလူၺ်ႈ၊ဝႃႈၼင်ႇၼႆဢေႃႈ။

၇ ၼႄးၼိုင်ႈၸမ်းဢဝ်လွင်ႈတမၢၼ်ႇၵၢင်ႁၢဝ်တင်းလၢႆလႄႈမီးဢမိင်ႉဝႃႈ၊-မၼ်းၸဝ်ႈႁႂ်ႈတမၢၼ်ႇတူဝ်ၸဝ်ႈၵဝ်ႇတင်းလၢႆပဵၼ်ၸိူဝ်ႉၼင်ႇလူမ်းလႄႈႁႂ်ႈၵူၼ်းၸႂ်ႉၵူၼ်းသွႆတူဝ်ၸဝ်ႈၵဝ်ႇတင်းလၢႆပဵၼ်ၸိူဝ်ႉၼင်ႇပိဝ်ၽႆးဢေႃႈ၊ဝႃႈၼင်ႇၼႆဢေႃႈ။

၈ ဢၼ်မႃးလူၺ်ႈလွင်ႈလုၵ်ႈမၼ်းၸဝ်ႈၼၼ်ႉလႄႈဝႃႈၸမ်းဢူဝ်းၽြႃးပဵၼ်ၸဝ်ႈပလၢင်ႇၸဝ်ႈႁဝ်းၼၼ်ႉပဵၼ်ပလၢင်ႇၼိၵ်ႉၸႃႉထႃႇဝရႃႉတီႈၶႃႈဢေႃႈ။ၵၢၼ်းႁွၵ်ႇယႃႇၸႃႉတၢင်းသိုဝ်ႈတေႃႇၼၼ်ႉပဵၼ်ၵၢၼ်းႁွၵ်ႇမိုဝ်းၸဝ်ႈႁဝ်းတီႈၶႃႈဢေႃႈ။

၉ ၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်တြႃးတၢင်းဢၼ်သိုဝ်ႈတေႃႇလႄႈဢမ်ႇလူဝ်ႇဢမ်ႇၵျိူၵ်ႈလွင်ႈတၢင်းဢၼ်ဢမ်ႇတြႃးၼၼ်ႉ။ပိူဝ်ႈၼႆလႄႈဢူဝ်းၽြႃးပဵၼ်ၸဝ်ႈ၊ၽြႃးၸဝ်ႈႁဝ်းယုၵ်ႉယွင်ႈၸဝ်ႈႁဝ်းၼႃႇလူင်လၢင်ၵႃႈၼိူဝ်ၵေႃႉသေႈၸဝ်ႈႁဝ်းတင်းလၢႆၼၼ်ႉလႄႈဢဝ်တင်းၼမ်ႉမၼ်းတၢင်းဢၼ်သိူဝ်းပျေႃႇၼၼ်ႉပၼ်ၽိၵ်ႉသိၵ်ႈတီႈၸဝ်ႈႁဝ်းၶႃႈယဝ်ႉ၊ဝႃႈၼင်ႇၼႆဢေႃႈ။

၁၀ ဢၼ်သမ်ႉမႃးထႅင်ႈလႄႈဝႃႈၸမ်း၊-ဢူဝ်း၊ထႃႇဝရႃႉၽြႃး၊မိူဝ်ႈၵေႃႇၸႃႉႁူဝ်ပိုင်းၼၼ်ႉၸဝ်ႈႁဝ်းတႄႇလိၼ်မိူင်းဝႆႉတီႈၶႃႈယဝ်ႉ။ၽႃႉၵၢင်ႁၢဝ်ၵေႃႈပဵၼ်လွင်ႈတၢင်းဢၼ်ၸဝ်ႈႁဝ်းဢဝ်တင်းမိုဝ်းၸဝ်ႈႁဝ်းၽၢၼ်ႇသၢင်းႁဵတ်းပဵၼ်တီႈၶႃႈဢေႃႈ။

၁၁ ပဵၵ်ႉသမ်ႉလွင်ႈတၢင်းၸိူဝ်းၼၼ်ႉတၵ်းႁွတ်ႈထိုင်တၢင်းလူႉတၢင်းလႅဝ်သေၵေႃႈၸဝ်ႈႁဝ်းတႄႇယူႇသေႇသေႇတီႈၶႃႈဢေႃႈ။

၁၂ ပဵၵ်ႉသမ်ႉလွင်ႈတၢင်းၵႃႈမီးၸိူဝ်းၼၼ်ႉႁွတ်ႈထိုင်တၢင်းဢၼ်ၵဝ်ႇၵႂႃႇမွင်ၵႂႃႇၸိူဝ်ႉၼင်ႇၶူဝ်းလဵင်းၼၼ်ႉလႄႈၸဝ်ႈႁဝ်းႁမ်းၵဵၼ်ၶဝ်ၸိူဝ်ႉၼင်ႇဢၼ်ႁမ်းၵဵၼ်ၶူဝ်းၼုင်ႈၼၼ်ႉလႄႈၶဝ်မီးတၢင်းဢၼ်ၶၢႆႉပုတ်ႈၵႂႃႇသေၵေႃႈယႃႇၸဝ်ႈႁဝ်းဢမ်ႇၶၢႆႉဢမ်ႇပုတ်ႈတီႈၶႃႈ။ၶူပ်ႇပီႊၸဝ်ႈႁဝ်းၼၼ်ႉၵေႃႈဢမ်ႇသုတ်းဢမ်ႇသဵင်ႈလႆႈတီႈၶႃႈ၊ဝႃႈၼင်ႇၼႆဢေႃႈ။

၁၃ လိူဝ်သေၼၼ်ႉမၼ်းၸဝ်ႈၸွင်ႇယၢမ်ႈတွၼ်ႉမီးဢမိင်ႉတီႈတမၢၼ်ႇၵၢင်ႁၢဝ်သေၵေႃႉလႄႈဝႃႈ၊-ၸူဝ်ႈဢၼ်ၵဝ်ဢမ်ႇပႆႇဢဝ်ရၢၼ်ႇသူႇမႂ်းတင်းလၢႆၶျႃးဝႆႉႁႂ်ႈပဵၼ်တီႈတၢင်ႇတိၼ်မႂ်းၼၼ်ႉၼင်ႈယူႇၵႃႈတီႈၽၢႆႇၶႂႃၵဝ်တႃႉ၊ဝႃႈၼင်ႇၼႆသေပွၵ်ႈႁိုဝ်။

၁၄ တမၢၼ်ႇၵၢင်ႁၢဝ်တင်းလၢႆၸမ်းပဵၼ်ၼၢမ်ႇဝိၺိၺ်ႇဢၼ်လႆႈၶၢမ်ႇတၢင်းၸႂ်ႉတၢင်းသွႆႁႂ်ႈလႆႈလူႈလႆႈတူၺ်းၶဝ်ၸိူဝ်းဢၼ်တၵ်းၶၢမ်ႇဢမူၺ်ႇၵျေးၸူးတၢင်းဢၼ်ၵႄႇၶျွတ်ႈဢဝ်ၼၼ်ႉဢမ်ႇၸႂ်ႈႁိုဝ်။