Shan Missions

လိၵ်ႈဢေႃးဝႃႇတႃ့ယႃႇၵုပ်ႉ

Chapter           ၁          ၂          ၃          ၄          ၅         

၅

တၢင်းမၢၵ်ႈမီးဢၼ်လီၵူဝ်

၁ ၵူၼ်းမၢၵ်ႈၵူၼ်းမီးၶဝ်ဢိူၺ်း၊ဢွၼ်ၵၼ်မႃးတေႃႈလဵဝ်ၼႆႉတႃႉ။ဢွၼ်ၵၼ်ႁွင်ႉသႅၼ်ႇႁွင်ႉႁႆႈၵွပ်ႈပိူဝ်ႈၽေးတုၵ်ႉၶႃႉဝူၺ်ႇတၼႃႇဢၼ်တၵ်းႁွတ်ႈမႃးၵႃႈၼိူဝ်သူၼၼ်ႉတႃႉ။

၂ ဢုၵ်ႉၸႃႇၶိူင်ႈပိူင်သူတင်းလၢႆၼၼ်ႉပဵၼ်ဢၼ်တူႇဢၼ်ၼဝ်ႈဢေႃႈ။ၶူဝ်းၼုင်ႈၶူဝ်းမႆႊသူၵေႃႈမူင်ႈမႅင်းၶူပ်းၵိၼ်ယဝ်ႉယဝ်ႉ။

၃ ငိုၼ်းၶမ်းသူၵေႃႈႁေႃၵိၼ်လႄႈလူႉသဵင်ႈယဝ်ႉ။ႁေႃၼၼ်ႉတၵ်းပဵၼ်သၢၵ်ႈသေႇယူႇၽၢႆႇၼိုင်ႈတင်းသူလႄႈၵိၼ်ၼိူဝ်ႉသူမိူၼ်ၸိူဝ်ႉၼင်ႇၽႆးဢေႃႈ။သူသိမ်းပႅင်းၽၼ်ႇတႃႇဢုၵ်ႉၸႃႇသူဝႆႉၼႂ်းၶိင်ႇၵႃႇလႃႉၵမ်းလိုၼ်းသုတ်းၼၼ်ႉလူင်ပေႇ။

၄ တူၺ်းလူး။ၵႃႊႁႅင်းၶဝ်ၸိူဝ်းဢၼ်ပၢတ်ႇၶဝ်ႈၵႃႈၼႂ်းၼႃးသူဢၼ်သူပႅတ်ႉသူလႅၼ်ဢမ်ႇပၼ်ၵႃႊမၼ်းၶၼ်မၼ်းၼၼ်ႉႁွင်ႉသႅၼ်ႇယူႇဢေႃႈ။သဵင်ၶဝ်ၸိူဝ်းဢၼ်ပၢတ်ႇၶဝ်ႈႁွင်ႉသႅၼ်ႇၼၼ်ႉၶဝ်ႈႁွတ်ႈထိုင်ၵႃႈၼႂ်းႁူထႃႇဝရႃႉၽြႃးၸဝ်ႈပူဝ်ႇပႃႇၵၢင်ႁၢဝ်ပုၼ်ႉယဝ်ႉ။

၅ သူၸၢမ်ႇၸႃးၸေးၸိမ်ႇၵႃႇမၵုင်ႇၵႃႈၼိူဝ်လိၼ်မိူင်းၼႆႉလႄႈမူၼ်ႈပျေႃႇၼႃႇလူင်လၢင်ယဝ်ႉ။သူလဵင်ႉလူႁူဝ်ၸႂ်သူမိူၼ်ၸိူဝ်ႉၼင်ႇၼႂ်းဝၼ်းဢၼ်လႆႈဢဝ်တၢႆၼၼ်ႉယဝ်ႉ။

၆ သူၸီႇယၢင်ႇၵေႃႉဢၼ်သိုဝ်ႈတေႃႇၼၼ်ႉသေလႄႈဢဝ်တၢႆယဝ်ႉ။မၼ်းၵေႃႈဢမ်ႇႁႄႉၶႅၼ်သူ။

တၢင်းယိူၼ်ႉၶၢမ်ႇၵူၼ်းမူတ်းၸၢင်ႇ

၇ ပိူဝ်ႈၼႆလႄႈပီႈၼွင်ႉၶဝ်ဢိူၺ်း၊ဢွၼ်ၵၼ်ယိူၼ်ႉၶၢမ်ႇပႂ်ႉယူႇတေႃႇထိုင်ႁွတ်ႈၸဝ်ႈၽြႃးပေႃႇမႃးၼၼ်ႉတႃႉ။တူၺ်းလူး။ၵေႃႉဢၼ်ႁဵတ်းၼႃးၼၼ်ႉၸၢင်ႊယိူၼ်ႉၶၢမ်ႇယူႇလႄႈပႂ်ႉမၢၵ်ႇၼမ်ႉမၢၵ်ႇလိၼ်ဢၼ်ထိူၵ်ႈၵႃႈထိူၵ်ႈၶၼ်ၼၼ်ႉလႄႈဝႆႉၸႂ်ယိုၼ်းယၢဝ်းတေႃႇထိုင်ႁွတ်ႈၼမ်ႉႁူဝ်ၽူၼ်ၼမ်ႉႁၢင်ၽူၼ်တူၵ်းသူၵေႃႈယိူၼ်ႉၶၢမ်ႇလႄႈပႂ်ႉယူႇတႃႉ။

၈ ပိူဝ်ႈဢၼ်ၶိင်ႇဢၼ်ၸဝ်ႈၽြႃးတၵ်းပေႃႇမႃးၼၼ်ႉတၵ်းႁွတ်ႈထိုင်ယဝ်ႉလႄႈႁဵတ်းႁႂ်ႈႁူဝ်ၸႂ်တူဝ်ၸဝ်ႈၵဝ်ႇမၼ်ႈၶိူင်ႇယူႇတႃႉ။

၉ ပီႈၼွင်ႉၶဝ်ဢိူၺ်း၊ၼင်ႇႁိုဝ်တၵ်းၵၢင်းလွတ်ႈတင်းတၢင်းဢၼ်ၸႅတ်ႈထၢမ်ၸီႇယၢင်ႇၸိုင်ယႃႇပေႁဵတ်းတၢင်းဢၼ်ၵေႃႉၼိုင်ႈလႄႈၵေႃႉၼိုင်ႈတွပ်ႇၵၼ်ထဵင်ၵၼ်တၢင်ႇဢပျႅတ်ႈတီႈၵၼ်။တူၺ်းလူး။ၵေႃႉဢၼ်ပိူင်ႇၸီႇယၢင်ႇတြႃးၼၼ်ႉမီးယူႇၵႃႈတီႈၽၢႆႇၼႃႈၽၵ်းတူဢေႃႈ။

၁၀ ပီႈၼွင်ႉတင်းလၢႆဢိူၺ်း၊မၢတ်ႈတွင်းလွင်ႈဢၼ်ပရေႃးၽႅတ်ႈဢၼ်ဢိင်ပိုင်ႈၼႃႇမႃႉၸိုဝ်သဵင်ထႃႇဝရႃႉၽြႃးသေလႄႈႁေႃးလၢတ်ႈၸိူဝ်းၼၼ်ႉၼႄပျႃးပုင်ႇသၢၵ်ႈသေႇတၢင်းဢၼ်လႆႈထူပ်းတုၵ်ႉၶႃႉတၢင်းၽၢၼ်ဢိၵ်ႇတင်းတၢင်းဢၼ်လႆႈယိူၼ်ႉၶၢမ်ႇၼၼ်ႉတႃႉ။

၁၁ တူၺ်းလူႊ။ႁဝ်းႁွင်ႉၶဝ်ၸိူဝ်းဢၼ်ယိူၼ်ႉၶၢမ်ႇလႆႈၼၼ်ႉပဵၼ်ၵေႃႉဢၼ်မီးမင်ႇၵလႃႇဢေႃႈ။သူလႆႈငိၼ်းလွင်ႈဢၼ်ယေႃႇၽယိူၼ်ႉၶၢမ်ႇၼၼ်ႉယဝ်ႉ။ၼႂ်းတီႈသုတ်းသူလႆႈႁူႉလႆႈႁၼ်လွင်ႈဢၼ်မၼ်းၸဝ်ႈႁၵ်ႉပႅင်းဢိတ်းလူမီးၸႂ်ၵရူႉၼႃႇလႄႈၶိုၼ်းတႅၼ်းပၼ်ၼၼ်ႉယဝ်ႉ။

၁၂ ပီႈၼွင်ႉၵဝ်တင်းလၢႆၶဝ်ဢိူၺ်း၊ၼႂ်းလွင်ႈတၢင်းၵူႈၸိူဝ်ႉၵူႈပိူင်တင်းသဵင်ႈတင်းလူင်ၼၼ်ႉသူယဵင်ႈၶႅၼ်းဝေႈပႅတ်ႈတၢင်းဢၼ်ၵိၼ်ႇဝႃႈတႃႉ။ယႃႇပေဢဝ်မိူင်းၵၢင်ႁၢဝ်ၵိၼ်ႇဝႃႈ။ယႃႇပေဢဝ်လိၼ်ႈမိူင်းၵိၼ်ႇဝႃႈ။ယႃႇပေဢဝ်လွင်ႈတၢင်းၵႃႈသင်လႄႈၵိၼ်ႇဝႃႈ။ၼင်ႇႁိုဝ်တၵ်းၵၢင်းလွတ်ႈတၢင်းဢၼ်ၸီႇယၢင်ႇဢပျႅတ်ႈၸိုင်ၵႂၢမ်းသူၼၼ်ႉပေႃးပဵၼ်ဢၼ်ၸႂ်ႈၸိုင်ႁႂ်ႈပဵၼ်ဢၼ်ၸႂ်ႈတႃႉ။ပေႃးပဵၼ်ဢၼ်ဢမ်ႇၸႂ်ႈၵေႃႈႁႂ်ႈပဵၼ်ဢၼ်ဢမ်ႇၸႂ်ႈၵူၺ်းတႃႉ။

တၢင်းသူးတွင်းလႄႈတွင်းပၢၼ်ႇ

၁၃ ၼႂ်းသူၼၼ်ႉပေႃးမီးၵေႃႉဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၸိုင်ႁႂ်ႈမၼ်းသူးတွင်းတႃႉ။ပေႃးမီးၵေႃႉဢၼ်သိူဝ်းပျေႃႇၸိုင်ႁႂ်ႈမၼ်းႁဵတ်းၵႂၢမ်းသႃႇလၢမ်ႇတႃႉ။

၁၄ ပေႃးမီးၵေႃႉဢၼ်မီးတၢင်းၶႆႈတၢင်းပဵၼ်ၸိုင်ႁႂ်ႈမၼ်းႁွင်ႉဢဝ်ၵူၼ်းဢုပ်ႉၸိူဝ်းၸဝ်ႈတင်းလၢႆမႃးလႄႈႁႂ်ႈၶဝ်ဢိင်ပိုင်ႈၼႃႇမႃႉၸိုဝ်သဵင်ၸဝ်ႈၽြႃးသေလႄႈဢဝ်ၼမ်ႉမၼ်းတႃးၵႃႈၼိူဝ်ၵူၼ်းပဵၼ်ၼၼ်ႉသေယဝ်ႉသူးတွင်းတႃႉ။

၁၅ ပေႃးႁဵတ်းၸိူဝ်ႉၼင်ႇၼၼ်ၸိုင်ၵႂၢမ်းသူးတွင်းတၢင်းဢၼ်ယုမ်ႇမၢတ်ႈၼၼ်ႉတၵ်းၵႄႇသႄႇလိတ်ႈဢဝ်ၵေႃႉဢၼ်ပဵၼ်ၼၼ်ႉလႄႈၸဝ်ႈၽြႃးတၵ်းႁႂ်ႈမၼ်းၶိုၼ်းလုၵ်ႉဢေႃႈ။ပဵၵ်ႉသမ်ႉမၼ်းႁဵတ်းၽိတ်းမႅၼ်ႈဢပျႅတ်ႈသေၵေႃႈမၼ်းၸဝ်ႈတၵ်းပွႆႇလွတ်ႈပၼ်ဢပျႅတ်ႈမၼ်းယူႇဢေႃႈ။

၁၆ သူၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈၽုၺ်ႇဢွၵ်ႇၼႄပျႃးဢပျႅတ်ႈတူဝ်ၸဝ်ႈၵဝ်ႇတီႈၵၼ်သေလႄႈတွင်းပၢၼ်ႇၵၼ်တႃႉ။ၼင်ႇႁိုဝ်တၵ်းလႆႈၵတ်းယဵၼ်ၶျၢမ်းသႃႇၸိုင်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်သူးတွင်းပုၼ်ႈၵၼ်တႃႉ။ပထၼႃႇဢၼ်ၵူၼ်းသိုဝ်ႈတေႃႇသူးတွင်းၼၼ်ႉမီးဢရူင်ႇယႂ်ႇၼႃႇလႄႈပႃးတၼ်းၶူဝ်းၼမ်ၼႃႇဢေႃႈ။

၁၇ ဢေးလိယၼၼ်ႉပဵၵ်ႉသမ်ႉပဵၼ်ၵူၼ်းဢၼ်ၸၢပ်ႈသႅင်ႇၵၼ်တင်းတြႃးလေႃးၵထမ်ႇမိူၼ်ၸိူဝ်ႉၼင်ႇႁဝ်းၼႆႉသေၵေႃႈၼင်ႇႁိုဝ်ၽူၼ်တၵ်းဢမ်ႇလႆႈတူၵ်းၸိုင်မၼ်းသူးတွင်းယႂ်ႇၼႃႇလူင်လၢင်လႄႈသၢမ်ပီႊပၢႆႁူၵ်းလိူၼ်တဵမ်တဵမ်ၽူၼ်ဢမ်ႇတူၵ်းသေမဵတ်ႉၵႃႈၼိူဝ်လိၼ်မိူင်း။

၁၈ ၵမ်းၼၼ်ႉယဝ်ႉမၼ်းသမ်ႉၶိုၼ်းသူးတွင်းလႄႈၽႃႉၵၢင်ႁၢဝ်ႁႂ်ႈၽူၼ်တူၵ်းမႃးဢေႃႈ။လိၼ်မိူင်းၵေႃႈႁႂ်ႈမၢၵ်ႇမၢၵ်ႇမႃးဢေႃႈ။

၁၉ ပီႈၼွင်ႉၶဝ်ဢိူၺ်း၊ၼႂ်းသူၼၼ်ႉပေႃးသေၵေႃႉသေၵူၼ်းၽိတ်းပိူင်ႈသဵၼ်ႈတၢင်းသမ်ႇမႃႇတြႃးၵႂႃႇလႄႈပိူၼ်ႈတၢင်ႇၵေႃႉႁႂ်ႈမၼ်းၶိုၼ်းမႃးၸိုင်ႁႂ်ႈမၼ်းႁူႉလွင်ႈဢၼ်ဝႃႈ၊

၂၀ ၵေႃႉဢၼ်ႁႂ်ႈၵူၼ်းဢၼ်မီးဢပျႅတ်ႈလုၵ်ႉသေၵႃႈတီႈတၢင်းဢၼ်ၽိတ်းပိူင်ႈၶိုၼ်းမႃးၼၼ်ႉ၊ပဵၼ်တၢင်းဢၼ်ၵႄႇၶျွတ်ႈဢဝ်ဝိၺိၺ်ႇသဵၼ်ႈၼိုင်ႈၵႃႈၼႂ်းတၢင်းတၢႆလႄႈႁူမ်ႇဝႆႉဢပျႅတ်ႈၼမ်ၼႃႇၼၼ်ႉတႃႉ။