Shan Missions

ၵျၢမ်းပျႃႇတိၵ်ႉ

Chapter        ၁          ၂          ၃          ၄          ၅          ၆          ၇          ၈          ၉          ၁၀          ၁၁          ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁         ၂၂         

၁၇

မေႈယိင်းဢၼ်ၼင်ႈၼိူဝ်တူဝ်ထိူၼ်ႇ

၁ ၼႂ်းတမၢၼ်ႇၵၢင်ႁၢဝ်ၸဵတ်းပႃးဢၼ်မီးၵွၵ်းၸဵတ်းလုၵ်ႈၼၼ်ႉပႃးၼိုင်ႈမႃးတၵ်ႉလၢတ်ႈတီႈၵဝ်လႄႈဝႃႈ၊-မႃးတႃႉ။ၵဝ်တၵ်းၼႄပျႃႉတီႈသူတၢင်းဢၼ်ၸီႇယၢင်ႇဢမူႉတီႈမေႈမွၵ်ႇယႃႈလူင်ဢၼ်ၼင်ႈယူႇၵႃႈၼိူဝ်ၼမ်ႉဢၼ်ၼမ်ၼႃႇၼၼ်ႉဢေႃႈ။

၂ ၶုၼ်ႁေႃၶမ်းလေႃးၵီႇတင်းလၢႆႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းယဝ်ႉ။ၵူၼ်းၵႃႈၼိူဝ်လိၼ်မိူင်းတင်းလၢႆမဝ်းၼမ်ႉၸပိတ်ႉမေႇထုင်ႇဢၼ်ဢမ်ႇတြႃးမၼ်းၼၼ်ႉယဝ်ႉ၊ဝႃႈၼင်ႇၼႆလႄႈတမၢၼ်ႇၵၢင်ႁၢဝ်ၼၼ်ႉဢဝ်တင်းဝိၺိၺ်ႇၸဝ်ႈလႄႈၵႂႃႇၵႃႈၼႂ်းထိူၼ်ႇဢေႃႈ။

၃ ၵဝ်ႁၼ်မေႈယိင်းၵေႃႉၼိုင်ႈဢၼ်ၼင်ႈယူႇၵႃႈၼိူဝ်တူဝ်ထိူၼ်ႇလႅင်ႊဢၼ်ဢဝ်တင်းၼႃႇမႃႉၸိုဝ်သဵင်ဢၼ်ယႃႉသရေႇၽြႃးပဵၼ်ၸဝ်ႈၼၼ်ႉတႅမ်ႈႁူမ်ႇဝႆႉလႄႈမီးႁူဝ်ၸဵတ်းလုၵ်ႈၶဝ်သိပ်းလႅမ်ႈၼၼ်ႉဢေႃႈ။

၄ မေႈယိင်းၼၼ်ႉၼုင်ႈၶူဝ်းဢၼ်လႅင်ႊဢိၵ်ႇတင်းၶူဝ်းဢၼ်ၵမ်ႇသေလႄႈႁၢင်ႈၶိူင်ႈၶမ်းၶိူင်ႈသႅင်ၶိူင်ႈပူးလေးတင်းလၢႆယူႇဢေႃႈ။မၼ်းယိပ်းၵမ်ၵွၵ်းၶမ်းဢၼ်တဵမ်ဝႆႉတင်းၶိူင်ႈဢၼ်ဝူၺ်ႇဢၼ်ႁင်ႈဢိၵ်ႇတင်းတၢင်းဢၼ်ၵူဝ်ႈၵိူၵ်ႇမေႇထုင်ႇဢၼ်ဢမ်ႇတြႃးတူဝ်ၸဝ်ႈၵဝ်ႇၼၼ်ႉဢေႃႈ။

၅ ၼႃႇမႃႉၸိုဝ်ႈသဵင်ဢၼ်ဢဝ်တူဝ်လိၵ်ႈတႅမ်ႈသႂ်ႇၵႃႈတီႈၼႃႈၽၢၵ်ႇမၼ်းၼၼ်ႉမီးဝႆႉလႄႈဝႃႈ၊ပဵၼ်တၢင်းဢၼ်လိုၵ်ႉဢၼ်လမ်ႇဝဵင်းလူင်ပႃႇပုလုၼ်ႇမေႈမွၵ်ႇယႃႈ၊မေႈတၢင်းဢၼ်ဝူၺ်ႇဢၼ်ႁင်ႈတင်းလၢႆဢေႃႈ၊ဝႃႈၼင်ႇၼႆဢေႃႈ။

၆ ၵဝ်ႁၼ်မေႈယိင်းၼၼ်ႉမဝ်းလူၺ်ႈလိူတ်ႈၵူၼ်းမူတ်းၸၢင်ႇဢိၵ်ႇတင်းလိူတ်ႈၶဝ်ၸိူဝ်းဢၼ်ၶၢမ်ႇသၢၵ်ႈသေႇလွင်ႈၸဝ်ႈယေႇသုၼၼ်ႉဢေႃႈ။မိူဝ်ႈဢၼ်ႁၼ်ၸိူဝ်ႉၼင်ႇၼၼ်ၸိုင်ၵဝ်ဢၢမ်းၼႃႇလူင်လၢင်ဢေႃႈ။

၇ တမၢၼ်ႇၵၢင်ႁၢဝ်ၼၼ်ႉၵေႃႈလၢတ်ႈတီႈၵဝ်လႄႈဝႃႈ၊-ႁဵတ်းသင်လႄႈမႂ်းဢၢမ်းၼႃႇလူင်လၢင်ယူႇၼင်ႇၼႆ။ၵဝ်တၵ်းလၢတ်ႈပၼ်တၢင်းဢၼ်လိုၵ်ႉဢၼ်လမ်ႇမေႈယိင်းၼၼ်ႉဢိၵ်ႇတင်းတၢင်းဢၼ်လိုၵ်ႉဢၼ်လမ်ႇတူဝ်ထိူၼ်ႇႁၢႆႉဢၼ်မီးႁူဝ်ၸဵတ်းလုၵ်ႈတင်းၶဝ်သိပ်းလႅမ်ႈၼၼ်ႉတီႈမႂ်းဢေႃႈ။

၈ တူဝ်ထိူၼ်ႇႁၢႆႉဢၼ်မႂ်းႁၼ်တေႃႈလဵဝ်ၼႆႉယၢမ်ႈလႆႈပဵၼ်မႃးယဝ်ႉလႄႈတိူၵ်ႉပဵၼ်ယူႇဢမ်ႇၸႂ်ႈၼၼ်ႉတၵ်းလုၵ်ႉသေၵႃႈၼႂ်းၶုမ်ၼႂ်းႁူးဢၼ်လိုၵ်ႉၼႃႇသေပိူၼ်ႈၼၼ်ႉၶိုၼ်ႈမႃးလႄႈၵႂႃႇၸူးၵႃႈတီႈတၢင်းလူႉတၢင်းလႅဝ်ဢေႃႈ။ၵူၼ်းၵႃႈၼိူဝ်လိၼ်မိူင်းဢၼ်ၸႃႉၸဵမ်ၵမ်ႇၽႃႇၸႃႉတႄႇလႄႈဢမ်ႇၶဝ်ႈၼႂ်းၸရၢင်းၽိုၼ်လိၵ်ႈဢသၢၵ်ႈၼၼ်ႉမိူဝ်ႈဢၼ်ႁၼ်တူဝ်ထိူၼ်ႇႁၢႆႉဢၼ်ယၢမ်ႈလႆႈပဵၼ်မႃးယဝ်ႉလႄႈတိူၵ်ႉပဵၼ်ယူႇဢမ်ႇၸႂ်ႈဢၼ်တၵ်းသမ်ႉပဵၼ်မႃးၼၼ်ႉၸိုင်တၵ်းဢၢမ်းၼႃႇလူင်လၢင်ဢေႃႈ။

၉ ၼႂ်းလွင်ႈတီႈႁႅင်းၼႆႉႁႂ်ႈမီးၺၢၼ်ႇဢၼ်ပျေႉၸုမ်ႇတင်းပိင်ႇၺႃႇၼၼ်ႉဢေႃႈ။ႁူဝ်ၸဵတ်းလုၵ်ႈၸမ်းပဵၼ်လွႆၸဵတ်းလုၵ်ႈဢၼ်မေႈယိင်းၼင်ႈယူႇၼၼ်ႉဢေႃႈ။

၁၀ ၶုၼ်ႁေႃၶမ်းၸဵတ်းပႃးၵေႃႈပဵၼ်ဢေႃႈ။ႁႃႈပႃးတူၵ်းယဝ်ႉ။ပႃးၼိုင်ႈယင်းမီးယူႇဢေႃႈ။ပႃးၼိုင်ႈတၵ်းပဵၼ်မႃးလူးၵွၼ်ႇဢေႃႈ။မိူဝ်ႈဢၼ်ပဵၼ်မႃးၼၼ်ႉၸိုင်မၼ်းတၵ်းလႆႈယူႇၵမ်းဢွၼ်ႇၼိုင်ႈၵူၺ်းဢေႃႈ။

၁၁ တူဝ်ထိူၼ်ႇႁၢႆႉဢၼ်ယၢမ်ႈပဵၼ်မႃးယဝ်ႉလႄႈတေႃႈလဵဝ်ဢမ်ႇမီးၼၼ်ႉပဵၼ်ၶုၼ်ႁေႃၶမ်းဢၼ်ထူၼ်ႈထိုင်ပႅတ်ႇပႃးၼၼ်ႉဢေႃႈ။မၼ်းၶဝ်ႈပႃးၼႂ်းၸဵတ်းပႃးၼၼ်ႉလႄႈတၵ်းလႆႈၵႂႃႇၸူးၵႃႈတီႈတၢင်းလူႉတၢင်းလႅဝ်ဢေႃႈ။

၁၂ ၶဝ်သိပ်းလႅမ်ႈဢၼ်သူလႆႈႁၼ်ၼၼ်ႉၸမ်းပဵၼ်ၶုၼ်ႁေႃၶမ်းသိပ်းပႃးဢၼ်ဢမ်ႇပႆႇလႆႈၵိၼ်မိူင်းၼၼ်ႉဢေႃႈ။ၶဝ်တၵ်းလႆႈဢႃႇၼႃႇၸၢၵ်ႈၶုၼ်ႁေႃၶမ်းလူၺ်ႈၵၼ်တင်းတူဝ်ထိူၼ်ႇႁၢႆႉၼၼ်ႉၼႃႇရီႇၼိုင်ႈဢေႃႈ။

၁၃ ၶဝ်ၼၼ်ႉသၽေႃးတၵ်းမိူၼ်ၵၼ်လႄႈဢဝ်တၼ်းၶူဝ်းဢႃႇၼႃႇၸၢၵ်ႈတူဝ်ၸဝ်ႈၵဝ်ႇဢၢပ်ႈပၼ်တီႈတူဝ်ထိူၼ်ႇႁၢႆႉၼၼ်ႉဢေႃႈ။

၁၄ ၶဝ်တၵ်းဢွၼ်ၵၼ်တိုၵ်းတေႃးသူဝ်းဢွၼ်ႇလႄႈသူဝ်းဢွၼ်ႇတၵ်းပႄႉၼႅင်ႇၶဝ်ဢေႃႈ။လွင်ႈမၼ်းၸမ်းသူဝ်းဢွၼ်ႇၼၼ်ႉပဵၼ်ၸဝ်ႈၼိူဝ်ၸဝ်ႈတင်းသဵင်ႈတင်းလူင်ၶုၼ်ႁေႃၶမ်းၼိူဝ်ၶုၼ်ႁေႃၶမ်းတင်းသဵင်ႈတင်းလူင်ဢေႃႈ။ၶဝ်ၸိူဝ်းဢၼ်မီးယူႇလူၺ်ႈၵၼ်တင်းမၼ်းၸဝ်ႈၼၼ်ႉပဵၼ်ၵေႃႉဢၼ်မၼ်းၸဝ်ႈႁွင်ႉဢဝ်ၵေႃႉဢၼ်မၼ်းၸဝ်ႈလိူၵ်ႈၵဵပ်းဢဝ်ၵေႃႉဢၼ်မီးသႅတ်ႈၸႃႇၼၼ်ႉဢေႃႈ။

၁၅ ၼမ်ႉတင်းလၢႆဢၼ်သူႁၼ်လႄႈမေႈမွၵ်ႇယႃႈၼင်ႈယူႇၼၼ်ႉၸမ်းပဵၼ်ၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ပဵၼ်မုၵ်ႉပဵၼ်ၸိူဝ်းဝႆႉၸိူဝ်းၼၼ်ႉဢေႃႈ။

၁၆ ၶဝ်သိပ်းလႅမ်ႈဢိၵ်ႇတင်းတူဝ်ထိူၼ်ႇႁၢႆႉဢၼ်သူႁၼ်ၼၼ်ႉတၵ်းၸင်းမေႈမွၵ်ႇယႃႈလႄႈယႃႉပႅတ်ႈၸေးၸိမ်ႇမၼ်းဢေႃႈ။တၵ်းထွတ်ႇၶူဝ်းၼုင်ႈမၼ်းလႄႈၶူပ်းၵိၼ်ၼိူဝ်ႉမၼ်းဢေႃႈ။တူဝ်မၼ်းၵေႃႈတၵ်းဢဝ်တုတ်ႇၽႆးပႅတ်ႈဢေႃႈ။

၁၇ လွင်ႈမၼ်းၸမ်းၽြႃးပဵၼ်ၸဝ်ႈပၼ်တၢင်းၵျၢမ်ႇတၢင်းပွင်တီႈၶဝ်ႁႂ်ႈၶဝ်လႆႈမီးၸႂ်သၽေႃးမိူၼ်ၵၼ်လႄႈဢဝ်မိူင်းတူဝ်ၸဝ်ႈၵဝ်ႇတင်းလၢႆဢၢပ်ႈပၼ်တီႈတူဝ်ထိူၼ်ႇႁၢႆႉတေႃႇထိုင်ႁွတ်ႈၸူဝ်ႈဢၼ်ၼုၵ်ႉၵပၢတ်ႈၸဝ်ႈဢမ်ႇပႆႇတဵမ်ထူၼ်ႈၼၼ်ႉဢေႃႈ။

၁၈ မေႈယိင်းဢၼ်သူႁၼ်ၼၼ်ႉၸမ်းပဵၼ်ဝဵင်းလူင်ဢၼ်ဢုပ်ႉပိူင်ႇၶုၼ်ႁေႃၶမ်းလေႃးၵီႇတင်းသဵင်ႈတင်းလူင်ၼၼ်ႉဢေႃႈ၊ဝႃႈၼင်ႇၼႆဢေႃႈ။