Shan Missions

ၵျၢမ်းပျႃႇတိၵ်ႉ

Chapter        ၁          ၂          ၃          ၄          ၅          ၆          ၇          ၈          ၉          ၁၀          ၁၁          ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁         ၂၂         

၂၂

ၼမ်ႉတင်းတူၼ်ႈဢသၢၵ်ႈ

၁ ၵမ်းၼၼ်ႉတမၢၼ်ႇၵၢင်ႁၢဝ်ၼႄပျႃႉၼမ်ႉႁွင်ႊတီႈဢၼ်ၼမ်ႉဢသၢၵ်ႈလႆယူႇဢၼ်သႂ်လႅင်းၸိူဝ်ႉၼင်ႇမၢၵ်ႇႁိၼ်ၸိင်ႇဢၼ်လႆဢွၵ်ႇသေၵႃႈတီႈပလၢင်ႇၽြႃးပဵၼ်ၸဝ်ႈတင်းသူဝ်းဢွၼ်ႇၼၼ်ႉတီႈၵဝ်ဢေႃႈ။

၂ လႆယူႇၵႃႈၼႂ်းၵႄၵၢင်သဵၼ်ႈတၢင်းလူင်ၼႂ်းဝဵင်းလႄႈၵႃႈတီႈၼိူဝ်ၽင်ႇႁွင်ႊသွင်ၽၢႆႇၼၼ်ႉမီးတူၼ်ႈဢသၢၵ်ႈဢၼ်ၸၢင်ႊမၢၵ်ႇမၢၵ်ႇသိပ်းသွင်မဵဝ်းလႄႈပၼ်မၢၵ်ႇမၼ်းယူႇၵူႈလိူၼ်ၼၼ်ႉဢေႃႈ။

၃ မႂ်ႊမၼ်းၵေႃႈၸၢင်ႊႁႂ်ႈတၢင်းၶႆႈတၢင်းပဵၼ်ၵူၼ်းၵူႈၸိူဝ်ႉၵူႈမဵဝ်းႁၢႆဢေႃႈ။ၵမ်းလိုၼ်းၽေးတၢင်းဢၼ်ၵိၼ်ႇဢၼ်ဝႃႈတၵ်းဢမ်ႇလႆႈမီးသေၸိူဝ်ႉသေပိူင်။ပလၢင်ႇၽြႃးပဵၼ်ၸဝ်ႈဢိၵ်ႇတင်းသူဝ်းဢွၼ်ႇတၵ်းမီးယူႇၵႃႈၼိူဝ်ဝဵင်းၼၼ်ႉလႄႈၶႃႈၽြႃးပဵၼ်ၸဝ်ႈတင်းလၢႆတၵ်းဢွၼ်ၵၼ်ႁဵတ်းဝၢတ်ႈၽြႃးယူႇဢေႃႈ။

၄ ၶဝ်တၵ်းႁၼ်ၼႃႈမၼ်းၸဝ်ႈလႄႈၼႃႇမႃႉၸိုဝ်ႈသဵင်မၼ်းၸဝ်ႈၵေႃႈမီးဝႆႉယူႇၵႃႈၼိူဝ်ၼႃႈၽၢၵ်ႇၶဝ်ယူႇဢေႃႈ။ၼႂ်းဝဵင်းၼၼ်ႉၶိင်ႇၵၢင်ၶိုၼ်းတၵ်းဢမ်ႇမီး။ဢမ်ႇလူဝ်ႇၵွၵ်းၽႆး။

၅ သၢႆဢရွင်ႇၵၢင်ဝၼ်းၵေႃႈဢမ်ႇလူဝ်ႇ။လွင်ႈမၼ်းၸမ်းထႃႇဝရႃႉၽြႃးပဵၼ်ၸဝ်ႈတၵ်းပွႆႇသၢႆဢရွင်ႇမၼ်းၸဝ်ႈၸူးၵႃႈတီႈၶဝ်လႄႈၶဝ်တၵ်းလႆႈၸၢမ်ႇၸႃးယူႇၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈဢေႃႈ။

၆ တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈ၊-ၵႂၢမ်းၼႆႉပဵၼ်ၵႂၢမ်းသႅတ်ႈၸႃႇၵႂၢမ်းဢၼ်မၢၼ်ႇမႅၼ်ႈၸိုဝ်ႈၸႂ်ႈဢေႃႈ။ထႃႇဝရႃႉၽြႃးပဵၼ်ၸဝ်ႈဢၼ်ဢုပ်ႉပိူင်ႇဝိၺိၺ်ႇပရေႃးၽႅတ်ႈတင်းလၢႆၼၼ်ႉပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈမႃးႁႂ်ႈလႆႈၼႄပျႃႉလွင်ႈတၢင်းဢၼ်တၵ်းပဵၼ်မႃးၼႂ်းၸူဝ်ႈၶိင်ႇၵႃႇလႃႉဢမ်ႇႁိုင်ဢမ်ႇၼၢၼ်းၸိူဝ်းၼၼ်ႉၵႃႈတီႈၶႃႈမၼ်းၸဝ်ႈတင်းလၢႆယဝ်ႉ။

၇ တူၺ်းလူႊ။ၵဝ်တၵ်းၸဵဝ်းမႃးၶၼ်ၶၼ်ၽႂ်းၽႂ်းဢေႃႈ။ၵေႃႉဢၼ်ပႂ်ႉၵမ်ပႂ်ႉၸွမ်းၵႂၢမ်းဢၼႃႇၵၢတ်ႈတီႉၽိုၼ်လိၵ်ႈၼႆႉၼၼ်ႉမီးမင်ႇၵလႃႇဢေႃႈ၊ဝႃႈၼင်ႇၼႆဢေႃႈ။

၈ ၵဝ်၊ယုဝ်းႁၢၼ်ႇ၊လႆႈငိၼ်းလႆႈႁၼ်လွင်ႈတၢင်းၸိူဝ်းၼႆႉဢေႃႈ။မိူဝ်ႈဢၼ်လႆႈငိၼ်းလႆႈႁၼ်ယဝ်ႉၼၼ်ႉၵဝ်ၶုပ်ႉမူပ်ႇႁႂ်ႈလႆႈၵူဝ်းၵႂၢႆႇၵႃႈတီႈႁိမ်းတိၼ်တမၢၼ်ႇၵၢင်ႁၢဝ်ဢၼ်ၼႄပျႃႉလွင်ႈတၢင်းၸိူဝ်းၼၼ်ႉတီႈၵဝ်ၼၼ်ႉဢေႃႈ။

၉ မၼ်းၵေႃႈလၢတ်ႈတီႈၵဝ်လႄႈဝႃႈ၊-ယႃႇပေႁဵတ်းသေၵမ်း။ၵဝ်ပဵၼ်ၵေႃႉဢၼ်သၢင်ႈႁဵတ်းလူၺ်ႈၵၼ်တင်းသူလႄႈၶဝ်ႈပႃးၼႂ်းပီႈၼႂ်းၼွင်ႉသူဢၼ်ဝႃႈပရေႃၽႅတ်ႈဢိၵ်ႇတင်းၶဝ်ၸိူဝ်းဢၼ်ပႂ်ႉၵမ်ပႂ်ႉၸွမ်းၵႂၢမ်းၽိုၼ်လိၵ်ႈၼႆႉၼၼ်ႉဢေႃႈ။ၵူဝ်းၵႂၢႆႇၽြႃးပဵၼ်ၸဝ်ႈတႃႉ၊ဝႃႈၼင်ႇၼႆဢေႃႈ။

၁၀ ၵမ်းၼၼ်ႉမၼ်းသမ်ႉလၢတ်ႈတီႈၵဝ်လႄႈဝႃႈ၊-ဢၼႃႇၵၢတ်ႈတိၽိုၼ်လိၵ်ႈၼႆႉၸိုင်ယႃႇပတွေၵ်ႇတၼ်းသိၵ်ႈ။လွင်ႈမၼ်းၸမ်းၶိင်ႇၵႃႇလႃႉၸမ်တၵ်းႁွတ်ႈထိုင်ယဝ်ႉ။

၁၁ ႁႂ်ႈၵေႃႉဢၼ်ဢမ်ႇတြႃးၼၼ်ႉႁဵတ်းဢၼ်ဢမ်ႇတြႃးယူႇလူးၵွၼ်ႇတႃႉ။ႁႂ်ႈၵေႃႉဢၼ်ၵူဝ်ႈၵိူၵ်ႇၼၼ်ႉၵူဝ်ႈၵိူၵ်ႇယူႇလူးၵွၼ်ႇတႃႉ။ႁႂ်ႈၵေႃႉဢၼ်သိုဝ်ႈတေႃႇၼၼ်ႉသိုဝ်ႈတေႃႇယူႇလူးၵွၼ်ႇတႃႉ။ႁႂ်ႈၵေႃႉဢၼ်မူတ်းၸၢင်ႇၼၼ်ႉမူတ်းၸၢင်ႇယူႇလူးၵွၼ်ႇတႃႉ။

၁၂ တူၺ်းလူႊၵဝ်တၵ်းၸဵဝ်းမႃးၶၼ်ၶၼ်ၽႂ်းၽႂ်းဢေႃႈ။ၵဝ်ပႃးဢဝ်ဢၵျူဝ်းဢပျႅတ်ႈမႃးလႄႈတၵ်းတႅၼ်းပၼ်ၸွမ်းၵႃႈၼင်ႇတၢင်းၵမ်တၢင်းၵျၢင်ႉတီႈၵူၼ်းၵူႈၵေႃႉၵူႈၵူၼ်းႁင်းၽႂ်ႁင်းမၼ်းဢေႃႈ။

၁၃ ၵဝ်ပဵၼ်ဢႃႇလၽႃႉဢေႃႈ။ဢေႃႇမေႇၶႃႉၵေႃႈပဵၼ်ဢေႃႈ။ၵဝ်ပဵၼ်ၵေႃႉဢွၼ်တၢင်းသုတ်းဢိၵ်ႇတင်းၵေႃႉလိုၼ်းလင်သုတ်းဢေႃႈ။တီႈတႄႇၸႃႉဢိၵ်ႇတင်းတီႈသုတ်းၵေႃႈပဵၼ်ဢေႃႈ။

၁၄ ၶဝ်ၸိူဝ်းဢၼ်သၢႆလွႆးၶူဝ်းၼုင်ႈတူဝ်ၸဝ်ႈၵဝ်ႇႁႂ်ႈလႆႈၸၢပ်ႈသႅင်ႇၵၼ်တင်းတူၼ်ႈဢသၢၵ်ႈလႄႈၶဝ်ႈၵႃႈၼႂ်းၽၵ်းတူဝဵင်းၼၼ်ႉမီးမင်ႇၵလႃႇဢေႃႈ။

၁၅ ၵႃႈတီႈၽၢႆႇၼွၵ်ႈၸမ်းမီးၵေႃႉဢၼ်ပဵၼ်မႃၵေႃႉဢၼ်ၸၢင်ႊၸေႃႉၸၢင်ႊႁဵတ်းတီႈပိူၼ်ႈၵေႃႉဢၼ်ႁဵတ်းမေႇထုင်ႇဢၼ်ဢမ်ႇတြႃး၊ၵေႃႉဢၼ်ဢဝ်ဢသၢၵ်ႈၵူၼ်းတၢႆ၊ၵေႃႉဢၼ်ၵူဝ်းၵႂၢႆႇရူၵ်ႈထူႉ၊ၵေႃႉဢၼ်ထုၵ်ႇၸႂ်ၵျိူၵ်ႈၸႂ်လွင်ႈတၢင်းဢၼ်ယႃႉသႅတ်ႈၸႃႇၼၼ်ႉလႄႈပွင်ႁဵတ်းယူႇတင်းသဵင်ႈတင်းလူင်ၼၼ်ႉဢေႃႈ။

၁၆ ၵဝ်၊ၸဝ်ႈယေႇသု၊ပွႆႇၸႂ်ႉတမၢၼ်ႇၵၢင်ႁၢဝ်ၵဝ်ၵႂႃႇႁႂ်ႈလႆႈၶၢမ်ႇသၢၵ်ႈသေႇတီႈသူပုၼ်ႈၸိူဝ်းၸဝ်ႈတင်းလၢႆဢေႃႈ။ၵဝ်ပဵၼ်ငဝ်ႈႁၢၵ်ႈတႃႇဝဵတ်ႉဢေႃႈ။ၸိူဝ်ႉၶိူဝ်းမၼ်းၵေႃႈပဵၼ်ဢေႃႈ။လၢဝ်လူင်ဢၼ်ႁိူဝ်ႈလႅင်းၵေႃႈပဵၼ်ဢေႃႈ။

၁၇ ဝိၺိၺ်ႇၸဝ်ႈဢိၵ်ႇတင်းလုၵ်ႈယိင်းသၢဝ်ဢၼ်သွင်ႇမင်ႇၵလႃႇၼၼ်ႉလၢတ်ႈလႄႈဝႃႈ၊-မႃးသေၵမ်း၊ဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ငိၼ်းၼၼ်ႉလၢတ်ႈလႄႈဝႃႈ၊-မႃးသေၵမ်း၊ဝႃႈၼင်ႇၼႆသေၵမ်းလူၺ်ႈ။ႁႂ်ႈၵေႃႉဢၼ်ယၢၵ်ႇၼမ်ႉၼၼ်ႉမႃးသေၵမ်းလူၺ်ႈ။ႁႂ်ႈၵေႃႉဢၼ်မီးဢလူဝ်ႇၶႂ်ႈလႆႈၼၼ်ႉယင်းဢမ်ႇပၼ်ၵႃႊမၼ်းၶၼ်မၼ်းလႄႈဢဝ်ၼမ်ႉဢသၢၵ်ႈလႄႈၵိၼ်သေၵမ်းလူၺ်ႈ။

၁၈ ၵဝ်ၶၢမ်ႇသၢၵ်ႈသေႇၵႃႈတီႈၶဝ်ၵႃႈဢၼ်ၵဝ်ငိၼ်းၵႂၢမ်းဢၼႃႇၵၢတ်ႈတိၽိုၼ်လိၵ်ႈၼႆႉၼၼ်ႉၸမ်းပေႃးသေၵေႃႉသေၵူၼ်းထၢပ်ႈလႄႈသႂ်ႇဢၼ်မႂ်ႇၵႃႈၼႂ်းလွင်ႈတၢင်းၸိူဝ်းၼႆႉထႅင်ႈၸိုင်ၽြႃးပဵၼ်ၸဝ်ႈတၵ်းႁႂ်ႈၽေးတၢမ်ႇဢၼ်တႅမ်ႈဝႆႉၵႃႈၼႂ်းလိၵ်ႈၼႆႉၼၼ်ႉႁွတ်ႈထိုင်ၵႃႈၼိူဝ်ၵေႃႉၼၼ်ႉဢေႃႈ။

၁၉ ပေႃးသေၵေႃႉသေၵူၼ်းၼုၵ်ႈဢွၵ်ႇပႅတ်ႈၵႂၢမ်းဢၼႃႇၵၢတ်ႈတိၼႂ်းၽိုၼ်လိၵ်ႈၼႆႉၵမ်ႈၽွင်ႈၸိုင်ၽြႃးပဵၼ်ၸဝ်ႈတၵ်းၼုၵ်ႈဢဝ်မၼ်းဢွၵ်ႇပႅတ်ႈသေဢၶႂၢင်ႉတၢင်းဢၼ်ၵေႃႉၼၼ်ႉၸၢပ်ႈသႅင်ႇၵၼ်တင်းတူၼ်ႈဢသၢၵ်ႈဢိၵ်ႇတင်းဝဵင်းဢၼ်မူတ်းၸၢင်ႇဢၼ်တႅမ်ႈဝႆႉၼႂ်းၽိုၼ်လိၵ်ႈၼႆႉၼၼ်ႉဢေႃႈ။

၂၀ ၸဝ်ႈဢၼ်ၶၢမ်ႇသၢၵ်ႈသေႇလွင်ႈတၢင်းၸိူဝ်းၼႆႉၼၼ်ႉလၢတ်ႈလႄႈဝႃႈ၊-ၵဝ်တၵ်းၸဵဝ်းမႃးၶၼ်ၶၼ်ၽႂ်းၽႂ်းဢမၢၼ်ႇၶၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။ဢႃႈမိၼ်ႈ။ၸဝ်ႈယေႇသုတီႈၶႃႈ၊ၶႅၼ်ႈတေႃႈမႃးသေၵမ်းတီႈၶႃႈ။

၂၁ ႁႂ်ႈၵျေးၸူးၸဝ်ႈယေႇသုမီးလူၺ်ႈၵၼ်တင်းၵူၼ်းမူတ်းၸၢင်ႇတင်းလၢႆသေၵမ်းလူၺ်ႈ။