Shan Missions

လိၵ်ႈဢေႃးဝႃႇတႃႉႁေႇပြႄး

Chapter          ၁          ၂          ၃          ၄          ၅          ၆          ၇          ၈          ၉          ၁၀          ၁၁          ၁၂          ၁၃         

၈

ပတိၺိၺ်ႇတြႃးဢၼ်မႂ်ႇ

၁ ဢၼ်ႁူမ်ႇလူမ်ႈလွင်ႈတၢင်းၵႃႈဢၼ်ဝႃႈမႃးယဝ်ႉၸိူဝ်းၼၼ်ႉၸမ်းႁဝ်းမီးၶုၼ်ယိတ်ႉပရေႃးႁိၵ်ႈဢၼ်ၼင်ႈယူႇၵႃႈတီႈၽၢႆႇၶႂႃပလၢင်ႇမူၼ်ဢႃႇၼူႉၽေႃႇၸဝ်ႈ

၂ ၵႃႈၼိူဝ်မိူင်းၵၢင်ႁၢဝ်ပုၼ်ႉဢၼ်ပဵၼ်ၵေႃႉဢၼ်ႁဵတ်းဝၢတ်ႈၽြႃးၵႃႈၼႂ်းထႃႇၼႃႉတီႈမူတ်းၸၢင်ႇဢၼ်ဝႃႈသုမ်ႉထဵင်ၸဝ်ႈၸႅတ်ႈၸႅတ်ႈဢၼ်ဢမ်ႇၸႂ်ႈၵူၼ်းႁဵတ်းလႄႈပဵၼ်ထႃႇဝရႃႉၽြႃးႁဵတ်းဝႆႉၼၼ်ႉဢေႃႈ။

၃ ၶုၼ်ယိတ်ႉပရေႃးႁိၵ်ႈပႃးလႂ်သေဢမ်ႇဝႃႈၵွပ်ႈပိူဝ်ႈဢၼ်ၶၢၼ်းဝႆႉႁႂ်ႈလႆႈပုၵ်ႉၸေႃႇယိၸ်ႉတင်းလၢႆလႄႈၶုၼ်ယိတ်ႉပရေႃးႁိၵ်ႈႁဝ်းၵေႃႈတၵ်းလႆႈမီးယိၸ်ႉဢၼ်တၵ်းလႆႈပုၵ်ႉၸေႃႇသေၸိူဝ်ႉသေပိူင်ၼၼ်ႉဢေႃႈ။

၄ ပေႃးမၼ်းၸဝ်ႈမီးယူႇၵႃႈၼိူဝ်လိၼ်မိူင်းၼႆႉၸိုင်မၼ်းၸဝ်ႈဢမ်ႇပဵၼ်ယိတ်ႉပရေႃးႁိၵ်ႈ။လွင်ႈမၼ်းၸမ်းၼိူဝ်လိၼ်မိူင်းၼႆႉယင်းပေႃးမီးယိတ်ႉပရေႃးႁိၵ်ႈၼမ်ၼႃႇဢၼ်သၢၵ်ႈၵၢပ်ႈၶိူင်ႈတၢင်းပုၵ်ႉၸေႃႇၸွမ်းၼင်ႇပိင်းၺၢပ်ႈတြႃးၼၼ်ႉဢေႃႈ။

၅ ယိတ်ႉပရေႃးႁိၵ်ႈၸိူဝ်းၼၼ်ႉႁဵတ်းဝၢတ်ႈဢၼ်ၸၢပ်ႈသႅင်ႇၵၼ်တင်းပုင်ႇႁၢင်ႊသၢႆငၢႆလွင်ႈတၢင်းဢၼ်မီးယူႇၵႃႈၼိူဝ်ၵၢင်ႁၢဝ်ၸိူဝ်းၼၼ်ႉမႅၼ်ႈၸွမ်းၼင်ႇဢၼ်မုဝ်းသေႇလႆႈၶၢမ်ႇဢဝ်ပျႃႇတိၵ်ႈၸဝ်ႈမိူဝ်ႈဢၼ်မၼ်းၸမ်တၵ်းတႄႇႁဵတ်းသုမ်ႉထဵင်ၸဝ်ႈၼၼ်ႉလႄႈဝႃႈ၊-ႁဵတ်းသတိႁႂ်ႈလႆႈတႄႇႁဵတ်းတင်းသဵင်ႈတင်းလူင်ၸွမ်းၼင်ႇပုင်ႇႁၢင်ႊဢၼ်ၼႄပျႃးမႃးၵႃႈတီႈမႂ်းၵႃႈၼိူဝ်လွႆၼၼ်ႉတႃႉ၊ဝႃႈၼင်ႇၼႆၼၼ်ႉဢေႃႈ။

၆ လိူဝ်သေၼၼ်ႉၵႃႈၼင်ႇဢၼ်မၼ်းၸဝ်ႈပဵၼ်ၵူၼ်းဝူင်ႈၵၢင်ပတိၺိၺ်ႇတြႃးဢၼ်ယဵင်ႈၶႅၼ်းမျၢတ်ႈဢၼ်တႄႇယူႇၼႂ်းၵတိၸဝ်ႈဢၼ်ယဵင်ႈၶႅၼ်းမျၢတ်ႈတင်းလၢႆၼၼ်ႉမၼ်းၸဝ်ႈလႆႈဢၶႂၢင်ႉဢရႃႇတၢင်းဢၼ်ႁဵတ်းဝၢတ်ႈဢၼ်ယဵင်ႈၶႅၼ်းမျၢတ်ႈၼၼ်ႉဢေႃႈ။

၇ ပေႃးပတိၺိၺ်ႇတြႃးပထမၼၼ်ႉဢမ်ႇမီးတီႈဢၼ်တၵ်းလႆႈတၢင်ႇဢပျႅတ်ႈၸိုင်ႁဵတ်းသင်လႄႈသမ်ႉတၵ်းႁႃပတိၺိၺ်ႇတြႃးတုတိယထႅင်ႈလူးၵွၼ်ႇ။

၈ ထႃႇဝရႃႉၽြႃးတၢင်ႇဢပျႅတ်ႈတီႈၶဝ်လႄႈဝႃႈၸမ်း၊-ၶိင်ႇၵႃႇလႃႉဢၼ်ၵဝ်တၵ်းဢဝ်ပတိၺိၺ်ႇတြႃးဢၼ်မႂ်ႇဢၼ်ပႅၵ်ႇပိူင်ႈၵၼ်တင်းပတိၺိၺ်ႇတြႃးဢၼ်ၵဝ်ႇဢၼ်ပၼ်မႃးၵႃႈတီႈပူႇမွၼ်ႇၵူၼ်းမဵဝ်းဢိသရေႇလဢိၵ်ႇတင်းၵူၼ်းမဵဝ်းယုတတင်းလၢႆၼၼ်ႉတၵ်းႁွတ်ႈထိုင်မႃးယူႇဢေႃႈ။

၉ ပတိၺိၺ်ႇတြႃးၼၼ်ႉဢမ်ႇမိူၼ်ၵၼ်တင်းပတိၺိၺ်ႇတြႃးဢၼ်ပၼ်မႃးၵႃႈတီႈပူႇမွၼ်ႇၶဝ်မိူဝ်ႈဢၼ်ၵဝ်တိုတ်ႉၸုင်ဢဝ်မိုဝ်းၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉ။ၶဝ်ဢမ်ႇႁဵတ်းၸွမ်းပတိၺိၺ်ႇတြႃးဢၼ်ၵဝ်ပၼ်မိူဝ်ႈဢွၼ်တၢင်းၼၼ်ႉလႄႈၵဝ်ၵေႃႈဢမ်ႇလူႈဢမ်ႇတူၺ်းၶဝ်လႄႈယူႇဢေႃႈ။

၁၀ ပတိၺိၺ်ႇတြႃးဢၼ်ၵဝ်တၵ်းပၼ်တီႈၵူၼ်းမဵဝ်းဢိသရေႇလမိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉၸမ်း၊ၵဝ်ထႃႇဝရႃႉၽြႃးတၵ်းဢဝ်ပိင်းၺၢပ်ႈတြႃးၵဝ်သႂၢင်းသႂ်ႇၵႃႈၼႂ်းဝိၺိၺ်ႇၶဝ်ဢေႃႈ။

၁၁ တၵ်းတႅမ်ႈသႂ်ႇဝႆႉၵႃႈၼိူဝ်ႁူဝ်ၸႂ်ၶဝ်ဢေႃႈ။ၵဝ်တၵ်းပဵၼ်ၽြႃးၶဝ်ဢေႃႈ။ၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ။ၶဝ်ၼၼ်ႉမဵဝ်းၸိူဝ်ႉၶိူဝ်းၵၼ်ပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈတၵ်းဢမ်ႇလူဝ်ႇသင်ႇသွၼ်ၵၼ်ဝႃႈ၊ႁူႉၸၵ်းထႃႇဝရႃႉၽြႃးတႃႉ၊ဝႃႈၼင်ႇၼႆၼၼ်ႉ။လွင်ႈမၼ်းၸမ်း၊ၶဝ်ၵႃႈမီးတင်းသဵင်ႈတင်းလူင်ၸႃႉၸဵမ်ၵေႃႉဢၼ်လဵၵ်ႉသေပိူၼ်တေႃႇထိုင်ႁွတ်ႈၵေႃႉဢၼ်ယႂ်ႇသေပိူၼ်ၼၼ်ႉတၵ်းႁူႉၵဝ်ယူႇဢေႃႈ။

၁၂ လွင်ႈမၼ်းၸမ်းၵဝ်တၵ်းယိူၼ်ႉၶၢမ်ႇဢပျႅတ်ႈၶဝ်ဢေႃႈ။ၵဝ်တၵ်းဢမ်ႇမၢတ်ႈဢမ်ႇတွင်းတၢင်းဢၼ်ၶဝ်ၽိတ်းပိူင်ႈပူၼ်ႉလိူဝ်တင်းလၢႆၼၼ်ႉ၊ဝႃႈၼႆ၊ထႃႇဝရႃႉၽြႃးပဵၼ်ၸဝ်ႈမီးဢမိင်ႉဢေႃႈ။

၁၃ ၼႂ်းလွင်ႈဢၼ်မၼ်းၸဝ်ႈဝႃႈပတိၺိၺ်ႇတြႃးဢၼ်မႂ်ႇဝႃႈၼင်ႇၼႆၼၼ်ႉ၊မၼ်းၸဝ်ႈႁႂ်ႈပတိၺိၺ်ႇတြႃးပထမၼၼ်ႉၵဝ်ႇၵႂႃႇဢေႃႈ။လွင်ႈတၢင်းဢၼ်သုတ်ႈယွမ်းလႄႈၵဝ်ႇၵႂႃႇၼၼ်ႉၸမ်တၵ်းႁွတ်ႈထိုင်တၢင်းဢၼ်ႁၢႆလၢႆဢေႃႈ။