Shan Missions

လိၵ်ႈဢေႃးဝႃႇတႃ့ပေႇတရုၽိုၼ်တုတိယ

Chapter          ၁           ၂          ၃         

၁

ၵႂၢမ်းတၵ်ႉလၢတ်ႈ

၁ ၵဝ်၊သိမုၼ်ႇပေႇတရု၊ဢၼ်ပဵၼ်ၶႃႈၵူၼ်းၸႂ်ႉတမၢၼ်ႇၸဝ်ႈယေႇသုၶရိၸ်ႉလႆႈပၼ်ငိၼ်းၵႂႃႇတီႈၶဝ်ၸိူဝ်းဢၼ်လႆႈတၢင်းယုမ်ႇမၢတ်ႈဢၼ်မျၢတ်ႈလီမႅၼ်ႈၼင်ႇတၢင်းဢၼ်ႁဝ်းယုမ်ႇမၢတ်ႈတြႃးတၢင်းသိုဝ်ႈတေႃႇၽြႃးပဵၼ်ၸဝ်ႈႁဝ်းၸဝ်ႈယေႇသုၶရိၸ်ႉၸဝ်ႈဢၼ်ၵႄႇၶျွတ်ႈဢဝ်ႁဝ်းၼၼ်ႉဢေႃႈ။

၂ ႁႂ်ႈၵျေးၸူးၸဝ်ႈဢိၵ်ႇတင်းတၢင်းၼိမ်ၼမ်ၵိုၼ်းယႂ်ႇမႃးၵႃႈတီႈသူၼႂ်းၺၢၼ်ႇတၢင်းဢၼ်ႁူႉၽြႃးပဵၼ်ၸဝ်ႈဢိၵ်ႇတင်းၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉသေၵမ်းလူၺ်ႈ။

တၢင်းဢၼ်ယႂ်ႇမႃးၼႂ်းပႃႇရမီႇ

၃ တၼ်းၶူဝ်းမၼ်းၸဝ်ႈပၼ်လွင်ႈတၢင်းၵႃႈမီးတင်းသဵင်ႈပုၼ်ႈဢသၢၵ်ႈပုၼ်ႈတၢင်းဢၼ်မူၼ်ႈပျေႃႇၼႂ်းဝၢတ်ႈၽြႃးတီႈႁဝ်းၸိူဝ်ႉၼင်ႇၼၼ်လႄႈၼႂ်းတၢင်းဢၼ်လႆႈႁူႉၽြႃးပဵၼ်ၸဝ်ႈဢၼ်ဢဝ်တင်းမူၼ်ၽုင်းတၼ်းၶူဝ်းႁွင်ႉဢဝ်ႁဝ်းၼၼ်ႉယဝ်ႉ။

၄ ၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉလႄႈမၼ်းၸဝ်ႈဢဝ်ၵတိဢၼ်မျၢတ်ႈလီထိူၵ်ႈၵႃႊထိူၵ်ႈၶၼ်ယႂ်ႇၼႃႇၼၼ်ႉဢၢပ်ႈပၼ်တီႈႁဝ်းဢေႃႈ။သူတၵ်းလႆႈဢိင်ပိုင်ႈၵတိၸဝ်ႈၸိူဝ်းၼၼ်ႉသေယဝ်ႉႁႂ်ႈၵၢင်းလွတ်ႈတင်းတၢင်းဢၼ်ၵူဝ်ႈၵိူၵ်ႇဢၼ်မီးၼႂ်းလေႃးၵႃႉဢၼ်ၸႂ်ၸပ်းၸႂ်ၸွႆးၼၼ်ႉသေယဝ်ႉပဵၼ်ၵေႃႉဢၼ်လႆႈၶဝ်ႈပႃးၵႃႈၼႂ်းပၵတိၽြႃးပဵၼ်ၸဝ်ႈၼၼ်ႉဢေႃႈ။

၅ ပုၼ်ႈလွင်ႈၼင်ႇႁိုဝ်တၵ်းပဵၼ်ၸိူဝ်ႉၼင်ႇၼၼ်ၸိုင်တီႈတၢင်းဢၼ်ယုမ်ႇမၢတ်ႈၼၼ်ႉဢဝ်သီႇလႃႉ၊တီႈသီႇလႃႉၼၼ်ႉဢဝ်ပိင်ႇၺႃႇ၊တီႈပိင်ႇၺႃႇၼၼ်ႉ

၆ ဢဝ်တၢင်းဢၼ်ၶျူၵ်ႈၵႃႇမၵုင်ႇ၊တီႈဢၼ်ၶျူၵ်ႈၵႃႇမၵုင်ႇၼၼ်ႉဢဝ်တၢင်းဢၼ်ယိူၼ်ႉၶၢမ်ႇ၊တီႈတၢင်းဢၼ်ယိူၼ်ႉၶၢမ်ႇၼၼ်ႉဢဝ်တၢင်းဢၼ်ႁဵတ်းဝၢတ်ႈၽြႃးလႄႈမူၼ်ႈပျေႃႇ၊

၇ တီႈဢၼ်မူၼ်ႈပျေႃႇၼၼ်ႉဢဝ်တၢင်းဢၼ်ၸူမ်းပႅင်းပီႈၼွင်ႉၵၼ်၊တီႈတၢင်းဢၼ်ၸူမ်းပႅင်းပီႈၼွင်ႉၵၼ်ၼၼ်ႉဢဝ်တၢင်းႁၵ်ႉမႅတ်ႈတႃႇထၢပ်ႈထႅင်ႈလႄႈဢဝ်ႁႅင်းၶတ်းၸႂ်တႃႉ။

၈ လွင်ႈမၼ်းၸမ်းပေႃးပႃႇရမီႇၸိူဝ်းၼၼ်ႉမီးယူႇၵႃႈၼႂ်းသူလႄႈတဵမ်ထူၼ်ႈၼမ်ၵိုၼ်းယူႇၸိုင်ၸၢင်ႊပွင်ႁဵတ်းပွင်မႄးႁႂ်ႈသူဢမ်ႇလႆႈၶၢၼ်ႉလႆႈဢိူၼ်၊ႁႂ်ႈသူဢမ်ႇလႆႈသုမ်းဢၵျူဝ်းၼႂ်းတၢင်းဢၼ်သူႁူႉၸၵ်းၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉဢေႃႈ။

၉ ၵေႃႉဢၼ်ဢမ်ႇမီးပႃႇရမီႇၸိူဝ်းၼၼ်ႉၸမ်းပဵၼ်ၵေႃႉဢၼ်မၢၵ်ႇတႃမွတ်ႇဢေႃႈ။မၼ်းဢိုတ်းမၢၵ်ႇတႃမၼ်းဝႆႉဢေႃႈ။မၼ်းလိုမ်းပႅတ်ႈလွင်ႈတၢင်းဢၼ်မၼ်းလႆႈၶၢမ်ႇတၢင်းဢၼ်သုၵ်ႈပွတ်ႈဢပျႅတ်ႈမၼ်းယဝ်ႉၼၼ်ႉဢေႃႈ။

၁၀ ပိူဝ်ႈၼႆလႄႈပီႈၼွင်ႉၶဝ်ဢိူၺ်း၊ယဵင်ႈၶႅၼ်းဢဝ်ႁႅင်းၶတ်းၸႂ်ႁဵတ်းႁႂ်ႈတၢင်းဢၼ်မၼ်းၸဝ်ႈႁွင်ႉဢဝ်တၢင်းဢၼ်မၼ်းၸဝ်ႈလိူၵ်ႈၵဵပ်းဢဝ်ဢၼ်သူလႆႈၶၢမ်ႇၼၼ်ႉတႄႇမၼ်ႈယူႇတႃႉ။ပေႃးသူႁဵတ်းၸိူဝ်ႉၼင်ႇၼၼ်ၸိုင်သူတၵ်းၵၢင်းလွတ်ႈတင်းတၢင်းဢၼ်တိူဝ်ႉမႅၼ်ႈလႄႈလူမ်ႉဢေႃႈ။

၁၁ လွင်ႈမၼ်းၸမ်းမၼ်းၸဝ်ႈတၵ်းဢိတ်းလူပၼ်ဢၶႂၢင်ႉတၢင်းဢၼ်ၶဝ်ႈၸၢမ်ႇၸႃးၵႃႈၼႂ်းမိူင်းထႃႇဝရႃႉၸဝ်ႈယေႇသုၶရိၸ်ႉၸဝ်ႈဢၼ်ၵႄႇၶျွတ်ႈဢဝ်ႁဝ်းၼၼ်ႉတီႈသူၼမ်ၵိုၼ်းၼႃႇလူင်လၢင်ဢေႃႈ။

၁၂ ပိူဝ်ႈၼႆလႄႈပဵၵ်ႉသမ်ႉသူႁူႉလွင်ႈတၢင်းၸိူဝ်းၼၼ်ႉလႄႈတႄႇယူႇၼႂ်းသမ်ႇမႃႇတြႃးဢၼ်ႁေႃးလၢတ်ႈတေႃႈလဵဝ်ၼႆႉၼၼ်ႉယူႇသေၵေႃႈၵဝ်တၵ်းဢဝ်တင်းၵႂၢမ်းၸိူဝ်ႉၼင်ႇၼၼ်လႄႈပၼ်သတိသူယူႇသေႇသေႇဢေႃႈ။

၁၃ ၵဝ်ႁူႉလွင်ႈဢၼ်ဝႃႈဢမ်ႇႁိုင်ဢမ်ႇၼၢၼ်းၵဝ်တၵ်းလႆႈၸုၼ်ႉပႅတ်ႈတူဝ်ၶိင်းဢၼ်ပဵၼ်သုမ်ႉထဵင်ဢၼ်ၵဝ်ယူႇၼႆႉသေလႄႈဢွၵ်ႇၵႂႃႇၵႃႈၼင်ႇဢၼ်ၸဝ်ႈႁဝ်း

၁၄ ၸဝ်ႈယေႇသုၶရိၸ်ႉပၼ်ပျႃႇတိၵ်ႈဝႆႉၼၼ်ႉလႄႈၵဝ်လီပၼ်သတိတိုၵ်းယူင်းသူၼႂ်းမိူဝ်ႈဢၼ်ၵဝ်ယင်းမီးယူႇၼႂ်းသုမ်ႉထဵင်ၼႆႉဢေႃႈ၊ဝႃႈၼႆၵဝ်မီးသၽေႃးယူႇဢေႃႈ။

၁၅ ၼင်ႇႁိုဝ်သူတၵ်းၶုၵ်းၸႂ်လႆႈလွင်ႈတၢင်းၸိူဝ်းၼႆႉတင်းသဵင်ႈတင်းလူင်လိုၼ်းသေၵဝ်လႆႈၽၢတ်ႇယၢၼ်ၵႂႃႇယဝ်ႉၼၼ်ႉၸိုင်ၵဝ်တၵ်းဢဝ်ႁႅင်းၶတ်းၸႂ်ယူႇဢေႃႈ။

၁၆ မိူဝ်ႈဢၼ်ႁဝ်းႁေႃးလၢတ်ႈလွင်ႈတၼ်းၶူဝ်းၸဝ်ႈႁဝ်းၸဝ်ႈယေႇသုၶရိၸ်ႉဢိၵ်ႇတင်းလွင်ႈတၢင်းဢၼ်မၼ်းၸဝ်ႈတၵ်းၶိုၼ်းမႃးၼၼ်ႉၸိုင်ႁဝ်းဢမ်ႇဢဝ်ၵႂၢမ်းတၼ်ႇတႃႇရီႇၵႂၢမ်းပရီႉယႄႇသေလႄႈလၢတ်ႈ။ႁဝ်းပဵၼ်သၢၵ်ႈသေႇဢၼ်တူဝ်ၸဝ်ႈၵဝ်ႇလႆႈႁၼ်မူၼ်ဢႃႇၼူႉၽေႃႇၸဝ်ႈၼၼ်ႉဢေႃႈ။

၁၇ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်းၸဝ်ႈၼၼ်ႉလႆႈၶၢမ်ႇၵုင်ႇသရေႇမူၼ်ဢႃႇၼူႉၽေႃႇၵႃႈတီႈၸဝ်ႈပေႃႈၽြႃးပဵၼ်ၸဝ်ႈၼႂ်းမိူဝ်ႈဢၼ်သဵင်ၸဝ်ႈဢၼ်လၢတ်ႈလႄႈဝႃႈ၊-ၵေႃႉၼႆႉပဵၼ်လုၵ်ႈဢၼ်ၵဝ်ႁၵ်ႉၼႃႇၵေႃႉဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊ဝႃႈၼင်ႇၼႆၼၼ်ႉဢွၵ်ႇသေၵႃႈၼႂ်းငဝ်းဢရွင်ႇဢၼ်မျၢတ်ႈလိူဝ်တွၼ်းၼႃႇၼၼ်ႉမႃးလႄႈႁွတ်ႈထိုင်ၵႃႈတီႈမၼ်းၸဝ်ႈၼၼ်ႉဢေႃႈ။

၁၈ သဵင်ၸဝ်ႈဢၼ်လုၵ်ႉသေၵႃႈၼိူဝ်ၵၢင်ႁၢဝ်ႁွတ်ႈမႃးၼၼ်ႉႁဝ်းလႆႈငိၼ်းၼႂ်းမိူဝ်ႈဢၼ်ႁဝ်းမီးယူႇလူၺ်ႈၵၼ်တင်းၸဝ်ႈၽြႃးၵႃႈတီႈၼိူဝ်လွႆဢၼ်မူတ်းၸၢင်ႇၼၼ်ႉဢေႃႈ။

၁၉ လိူဝ်သေၼၼ်ႉၵႂၢမ်းဢၼႃႇၵၢတ်ႈတိၸဝ်ႈဢၼ်ယဵင်ႈၶႅၼ်းမၼ်ႈၶိူင်ႇၼၼ်ႉယင်းမီးယူႇတီႈႁဝ်းဢေႃႈ။သူထုၵ်ႇလီမၢတ်ႈတွင်းဝႆႉၵႂၢမ်းဢၼႃႇၵၢတ်ႈတိၼၼ်ႉမိူၼ်ၸိူဝ်ႉၼင်ႇၵွၵ်းၽႆးဢၼ်ႁိူဝ်ႈလႅင်းၵႃႈၼႂ်းတီႈဢၼ်လပ်းသိင်ႇတေႃႇထိုင်ႁွတ်ႈၶိင်ႇၵႃႇလႃႉႁူဝ်မိူင်းသႂ်လႄႈလၢဝ်လႅင်းဢွၵ်ႇမႃးၵႃႈၼႂ်းႁူဝ်ၸႂ်သူၼၼ်ႉဢေႃႈ။

၂၀ ၵႂၢမ်းဢၼႃႇၵၢတ်ႈတိဢၼ်ပႃးၼႂ်းၵျၢမ်းလိၵ်ႈၼၼ်ႉဢထိၵ်ႈပႄႇမၼ်းဢမ်ႇပေႃႇဢမ်ႇဢွၵ်ႇၸွမ်းၼင်ႇဢလူဝ်ႇၵူၼ်းဝႃႈၼႆႁူႉၸႅင်ႈမၢတ်ႈတွင်းဝႆႉတႃႉ။

၂၁ လွင်ႈမၼ်းၸမ်းၵႂၢမ်းဢၼႃႇၵၢတ်ႈတိၼၼ်ႉတႄႇပဵၼ်မႃးၵႃႈၼႂ်းၵူၼ်းဢမ်ႇၸႂ်ႈ။ပဵၼ်ၵူၼ်းမူတ်းၸၢင်ႇၽြႃးပဵၼ်ၸဝ်ႈၸိူဝ်းၼၼ်ႉလႆႈၶၢမ်ႇတၢင်းဢၼ်ဝိၺိၺ်ႇမူတ်းၸၢင်ႇၸဝ်ႈတိုၵ်းယူင်းလႄႈႁေႃးလၢတ်ႈၵႂၢမ်းၽြႃးပဵၼ်ၸဝ်ႈၵူၺ်းဢေႃႈ။