Shan Missions

လိၵ်ႈဢေႃးဝႃႇတႃ့ၵေႃးရဵၼ်ႇထုၽိုၼ်တုတိယ

Chapter     ၁          ၂          ၃          ၄          ၅          ၆          ၇          ၈          ၉          ၁၀           ၁၁          ၁၂          ၁၃     

၁၀

ပေႃးလုသၢင်းလၢင်းႁႄႉၶႅၼ်တူဝ်ၸဝ်ႈၵဝ်ႇ

၁ ၵဝ်ပေႃးလု၊ဢၼ်မီးတၢင်းဢၼ်ၵူဝ်ႁႄမိူဝ်ႈဢၼ်မီးသိုဝ်ႈၼႃႈတႂ်ႈတႃသူလႄႈသမ်ႉမီးတၢင်းဢၼ်ႁတ်းႁၢၼ်မိူဝ်ႈမီးၵႃႈတီႈဢၼ်ၵႆၼၼ်ႉတွင်းပၢၼ်ႇသူၵႃႈၼႂ်းတၢင်းဢၼ်ဢူၼ်ႈဢွၼ်ႇၶျႃးတႅမ်ႇၸဝ်ႈၶရိၸ်ႉၼၼ်ႉဢေႃႈ။

၂ လွင်ႈၼင်ႇႁိုဝ်မိူဝ်ႈဢၼ်ၵဝ်ႁွတ်ႈထိုင်မႃးတီႈသူၼၼ်ႉၵဝ်တၵ်းဢမ်ႇလူဝ်ႇႁဵတ်းတၢင်းဢၼ်ႁတ်းႁၢၼ်တီႈသူၸိူဝ်ႉၼင်ႇဢၼ်ၵဝ်ၵျၢမ်ႇပွင်ႁဵတ်းတီႈၶဝ်ၸိူဝ်းဢၼ်မၢတ်ႈႁဝ်းပဵၼ်ၸိူဝ်ႉၼင်ႇၵေႃႉဢၼ်ၸွမ်းဢလူဝ်ႇၸႃႇတိပၵတိလႄႈၵမ်ၵျၢင်ႉၼၼ်ႉၸိုင်ၵဝ်တွင်းပၢၼ်ႇသူဢေႃႈ။

၃ ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်းပဵၵ်ႉသမ်ႉႁဝ်းပဵၼ်ၵူၼ်းၼႂ်းလေႃႉၵႃႉၼႆႉသေၵေႃႈယႃႇႁဝ်းဢမ်ႇတိုၵ်းသိုၵ်းၸွမ်းဢလူဝ်ႇၸႃႇတိပၵတိၵူၼ်း။

၄ လၢၵ်ႈၼၢၵ်ႈဢၼ်ႁဝ်းယိပ်းၵမ်လႄႈတိုၵ်းသိုၵ်းၼၼ်ႉၸမ်းပဵၼ်လၢၵ်ႈၼၢၵ်ႈၸႃႇတိပၵတိဢမ်ႇၸႂ်ႈ။ပဵၼ်လၢၵ်ႈၼၢၵ်ႈဢၼ်မီးတၼ်းၶူဝ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈၸၢင်ႊယႃႉၽဵဝ်ႈလမ်းဝဵင်းလမ်းတပ်ႉပႅတ်ႈဢေႃႈ။

၅ ႁဝ်းသုင်းတိုဝ်းလၢၵ်ႈၼၢၵ်ႈၼၼ်ႉသေလႄႈၶျူၵ်ႉဝႆႉတၢင်းၵျၢမ်ႇတၢင်းပွင်ၵူၼ်းတင်းလၢႆမႃႇၼႃႉၸႂ်သုင်ဢၼ်ႁႄႉၶႅၼ်ပိင်ႇၺႃႇဢၼ်ႁူႉၽြႃးပဵၼ်ၸဝ်ႈၵႃႈမီးတင်းသဵင်ႈတင်းလူင်ၸိူဝ်းၼၼ်ႉလႄႈႁႂ်ႈလႆႈထွမ်ႇဢဝ်ၵႂၢမ်းၸဝ်ႈၶရိၸ်ႉဢေႃႈ။

၆ မိူဝ်ႈဢၼ်တၢင်းဢၼ်သူထွမ်ႇဢဝ်ၼၼ်ႉတဵမ်ထူၼ်ႈယဝ်ႉၸိုင်ႁဝ်းမႄးႁႅၼ်းႁႂ်ႈလႆႈတၼ်းဝႆႉၼင်ႇႁိုဝ်တၵ်းလႆႈပၼ်တၢမ်ႇၶဝ်ၸိူဝ်းဢၼ်ဢမ်ႇထွမ်ႇဢဝ်တင်းသဵင်ႈတင်းလူင်ၼၼ်ႉဢေႃႈ။

၇ သူတူၺ်းၽၢႆႇတၢင်းၼွၵ်ႈမၼ်းၵူၺ်းႁိုဝ်။ပေႃးသေၵေႃႉသေၵူၼ်းဝႃႈမၼ်းပဵၼ်ၵူၼ်းၸဝ်ႈၶရိၸ်ႉဢေႃႈ၊ဝႃႈၼင်ႇၼႆၸိုင်ႁႂ်ႈမၼ်းသမ်ႉၶဝ်ႈၸႂ်လႄႈဝႃႈ၊ၸိူဝ်ႉၼင်ႇဢၼ်မၼ်းပဵၼ်ၵူၼ်းၸဝ်ႈၶရိၸ်ႉၼၼ်ႉႁဝ်းၵေႃႈပဵၼ်ၵူၼ်းၸဝ်ႈၶရိၸ်ႉၼၼ်ႉတႃႉ။

၈ ပဵၵ်ႉသမ်ႉၵဝ်ယဵင်ႈၶႅၼ်းလႆႈဢုပ်ႇဝၢဝ်းလူၺ်ႈလွင်ႈတၼ်းၶူဝ်းဢၼ်ၽြႃးပဵၼ်ၸဝ်ႈဢၢပ်ႈပၼ်တီႈႁဝ်းၼၼ်ႉပဵၼ်ပုၼ်ႈဢၼ်တၵ်းယႃႉၽဵဝ်ႈသူပႅတ်ႈဢမ်ႇၸႂ်ႈ။ပဵၼ်ပုၼ်ႈဢၼ်တၵ်းတႄႇႁဵတ်းသူလႄႈၵဝ်ဢမ်ႇမီးလွင်ႈဢၼ်တၵ်းလႆႈဢူၵ်းလႆႈဢၢႆ။

၉ ၵဝ်မီးၸႂ်ဢၼ်ဢဵၼ်းဢၢၼ်းဢဝ်တင်းလိၵ်ႈၽိုၼ်ၼႆႉသေလႄႈလွၵ်ႇသူဢမ်ႇၸႂ်ႈ။လွင်ႈမၼ်းၸမ်းမၢင်ႈၵေႃႉလၢတ်ႈဝႃႈ၊-လိၵ်ႈမၼ်းၼၼ်ႉပဵၼ်လိၵ်ႈဢၼ်ၼၵ်းၼႃႇလႄႈႁဵင်းၼႃႇဢေႃႈ။

၁၀ တူဝ်မၼ်းၸမ်းပဵၼ်ၵေႃႉဢၼ်ဢမ်ႇမီးႁႅင်းလႄႈၵႂၢမ်းမၼ်းၵေႃႈပဵၼ်လၢႆလၢႆဢမ်ႇပွင်ႇလွင်ႈၵႃႈသင်၊ဝႃႈၼင်ႇၼႆၼၼ်ႉဢေႃႈ။

၁၁ ႁႂ်ႈၶဝ်ၸိူဝ်းၼၼ်ႉႁူႉလွင်ႈဢၼ်ဝႃႈ၊ႁဝ်းတၵ်းႁဵတ်းမိူဝ်ႈဢၼ်ႁဝ်းမီးယူႇသိုဝ်ႈၼႃႈတႂ်ႈတႃသူၵႃႈၼင်ႇဢၼ်ႁဝ်းလၢတ်ႈဝႆႉၵႃႈၼႂ်းလိၵ်ႈမိူဝ်ႈဢၼ်ႁဝ်းမီးၵႆၼၼ်ႉဢေႃႈ။

၁၂ ႁဝ်းဢမ်ႇႁတ်းဢဝ်တူဝ်ႁဝ်းတႅၵ်ႈၼိူင်းလူၺ်ႈၵၼ်တင်းၶဝ်၊ၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ်တႅၵ်ႈၼိူင်းတူဝ်ၸဝ်ႈၵဝ်ႇလႄႈယွင်ႈယေႃးတူဝ်ၸဝ်ႈၵဝ်ႇၼၼ်ႉ။ပိူဝ်ႈဢၼ်ၶဝ်ဢဝ်တူဝ်ၸဝ်ႈၵဝ်ႇတႅၵ်ႈၼိူင်းၵၼ်ၼၼ်ႉၶဝ်ပဵၼ်ၵေႃႉဢၼ်ဢမ်ႇမီးၺၢၼ်ႇဢေႃႈ။

ပေႃးလုဢမ်ႇယူႇပူၼ်ႉလိူဝ်

၁၃ လိူဝ်သေၼၼ်ႉႁဝ်းဢမ်ႇႁဵတ်းတၢင်းဢၼ်ဢုပ်ႇဝၢဝ်းပူၼ်ႉလိူဝ်။ႁဝ်းမီးတၢင်းဢၼ်ဢုပ်ႇဝၢဝ်းၵႃႈၼႂ်းတၢင်းဢၼ်ၽြႃးပဵၼ်ၸဝ်ႈမႅင်ႇပၼ်တီႈႁဝ်းဢၼ်ၶိုတ်းထိုင်ႁွတ်ႈတီႈသူၼၼ်ႉၵူၺ်းဢေႃႈ။

၁၄ ႁဝ်းဢုပ်ႇဝၢဝ်းပူၼ်ႉလိူဝ်သေလႄႈဢမ်ႇၶိုတ်းထိုင်ႁွတ်ႈတီႈသူဢမ်ႇၸႂ်ႈ။လွင်ႈမၼ်းၸမ်း၊ႁဝ်းႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၶရိၸ်ႉလႄႈႁွတ်ႈထိုင်ၵႃႈတီႈဢၼ်သူမီးၼၼ်ႉယဝ်ႉ။

၁၅ ႁဝ်းမီးတၢင်းဢၼ်ဢုပ်ႇဝၢဝ်းပူၼ်ႉလိူဝ်ၵႃႈၼႂ်းတၢင်းႁဵတ်းပိူၼ်ႈဢမ်ႇၸႂ်ႈ။

၁၆ ပေႃးပႃႇရမီႇတၢင်းယုမ်ႇမၢတ်ႈသူယႂ်ႇၵႂၢင်ႈၼမ်မႃးယဝ်ႉၸိုင်၊ႁဝ်းမုင်ႈမွင်းတၢင်းႁဵတ်းသၢင်ႈႁဝ်းၵႃႈၼႂ်းသူၼၼ်ႉတၵ်းယႂ်ႇၵႂၢင်ႈၼမ်ၵိုၼ်းမႃးလႄႈႁဝ်းတၵ်းလႆႈဢၶႂၢင်ႉဢၼ်လႆႈၶၢမ်ႈၵႂႃႇၵႃႈတီႈၽၢႆႇပုၼ်ႉမိူင်းသေလႄႈႁေႃးလၢတ်ႈတြႃးသတၢင်းသိူဝ်းပျေႃႇဢေႃႈ။

၁၇ ပိူဝ်ႈၼႆလႄႈႁႂ်ႈၵေႃႉဢၼ်ၶႂ်ႈဢုပ်ႇဝၢဝ်းၼၼ်ႉဢုပ်ႇဝၢဝ်းၼႂ်းၽြႃးပဵၼ်ၸဝ်ႈသေၵမ်း။

၁၈ လွင်ႈမၼ်းၸမ်းၵေႃႉဢၼ်ယွင်ႈယေႃးတူဝ်ၸဝ်ႈၵဝ်ႇၼၼ်ႉပဵၼ်ၵေႃႉဢၼ်မၼ်းၸဝ်ႈမၢတ်ႈဢမ်ႇၸႂ်ႈ။ၵေႃႉဢၼ်လႆႈၶၢမ်ႇၸဝ်ႈၽြႃးယွင်ႈယေႃးၼၼ်ႉၵူၺ်းပဵၼ်ၵေႃႉဢၼ်မၼ်းၸဝ်ႈမၢတ်ႈဢေႃႈ။