Shan Missions

လိၵ်ႈဢေႃးဝႃႇတႃႉယူဝ်းႁၢၼ်ႇၽိုၼ်ပထမ

Chapter         ၁          ၂          ၃          ၄          ၅         

၁

ၼုၵ်ႉၵပၢတ်ႈဢသၢၵ်ႈ

၁ လွင်ႈတၢင်းဢၼ်ပဵၼ်မႃးၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉတူဝ်ႁဝ်းလႆႈငိၼ်းမၢၵ်ႇတႃႁဝ်းလႆႈႁၼ်လႆႈလူႈလႆႈတူၺ်းၸေးၸေးၸွတ်ႇၸွတ်ႇလႄႈဢဝ်တင်းမိုဝ်းလုပ်ႈၵမ်ယဝ်ႉဢၼ်ပဵၼ်လွင်ႈတၢင်းဢၼ်ၸၢပ်ႈသႅင်ႇၵၼ်တင်းၼုၵ်ႉၵပၢတ်ႈၸဝ်ႈဢၼ်ဢသၢၵ်ႈလိပ်းယူႇၼၼ်ႉႁဝ်းၸင်ႇၼႄပျႃႉတီႈသူဢေႃႈ။

၂ ဢသၢၵ်ႈၼၼ်ႉထၢင်ႇသႃးမႃးယဝ်ႉ။ႁဝ်းၵေႃႈလႆႈႁၼ်ယဝ်ႉ။ႁဝ်းၶၢမ်ႇသၢၵ်ႈသေႇၼႄပျႃႉတီႈသူလွင်ႈထႃႇဝရႃႉဢသၢၵ်ႈဢၼ်မီးယူႇလူၺ်ႈၵၼ်တင်းပေႃႈၸဝ်ႈဢၼ်လႆႈထၢင်ႇသႃးမႃးတီႈႁဝ်းယဝ်ႉၼၼ်ႉဢေႃႈ။

၃ ႁဝ်းၼႄပျႃႉလွင်ႈတၢင်းဢၼ်ႁဝ်းလႆႈႁၼ်လႆႈငိၼ်းၼၼ်ႉတီႈသူႁႂ်ႈသူလႆႈမီးမိၵ်ႈသႁႃႇယႃႉတၢင်းဢၼ်ထုၵ်ႇၵၼ်ၼၼ်ႉလူၺ်ႈၵၼ်တင်းႁဝ်းဢေႃႈ။တၢင်းဢၼ်ႁဝ်းမီးမိၵ်ႈသႁႃႇယႃႉတၢင်းဢၼ်ထုၵ်ႇၵၼ်ၼၼ်ႉၸမ်းပဵၼ်တၢင်းဢၼ်ထုၵ်ႇၵၼ်တင်းပေႃႈၸဝ်ႈတင်းလုၵ်ႈၸဝ်ႈၸဝ်ႈယေႇသုၶရိၸ်ႉၼၼ်ႉဢေႃႈ။

၄ ႁဝ်းတႅမ်ႈလွင်ႈတၢင်းၸိူဝ်းၼႆႉပၼ်ၵႂႃႇတီႈသူႁႂ်ႈတၢင်းဢၼ်သူသိူဝ်းပျေႃႇၼၼ်ႉတၵ်းလႆႈၸေးၸုမ်ႇဢေႃႈ။

ၵႂႃႇမႃးၼႂ်းဢၼ်လႅင်း

၅ ၵႂၢမ်းတြႃးဢၼ်ႁဝ်းလႆႈငိၼ်းၵႃႈတီႈၼုၵ်ႉၵပၢတ်ႈၸဝ်ႈလႄႈၼႄပျႃႉတီႈသူၼႆႉၸမ်းပဵၼ်လွင်ႈဢၼ်ဝႃႈ၊-ၽြႃးပဵၼ်ၸဝ်ႈပဵၼ်ဢၼ်လႅင်းဢေႃႈ။ၼႂ်းၽြႃးပဵၼ်ၸဝ်ႈၼၼ်ႉဢမ်ႇမီးဢၼ်လပ်းသိင်ႇလႃးလႃး။

၆ ပဵၵ်ႉသမ်ႉႁဝ်းဝႃႈႁဝ်းမီးမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းမၼ်းၸဝ်ႈယဝ်ႉဝႃႈၼႆသေၵေႃႈယႃႇပေႃးႁဝ်းသမ်ႉယင်းၵႂႃႇမႃးယူႇၵႃႈၼႂ်းဢၼ်လပ်းသိင်ႇယူႇၸိုင်ႁဝ်းပဵၼ်ၵေႃႉဢၼ်ယူႇၼႂ်းသႅတ်ႈၸႃႇတြႃးဢမ်ႇၸႂ်ႈ။ပဵၼ်ၵေႃႉဢၼ်လၢတ်ႈမူႉသႃႇၵူၺ်းဢေႃႈ။

၇ ပေႃးႁဝ်းၵႂႃႇမႃးၵႃႈၼႂ်းဢၼ်လႅင်းမိူၼ်ၸိူဝ်ႉၼင်ႇၽြႃးပဵၼ်ၸဝ်ႈမီးၼႂ်းဢၼ်လႅင်းၼၼ်ႉၸိုင်ႁဝ်းလႆႈမိၵ်ႈသႁႃႇယႃႉတၢင်းဢၼ်ၼင်ႇၵၼ်ၵၼ်ထုၵ်ႇၵၼ်ၼၼ်ႉလႄႈလိူတ်ႈၸဝ်ႈယေႇသုၶရိၸ်ႉလုၵ်ႈၽြႃးပဵၼ်ၸဝ်ႈၼၼ်ႉသုၵ်ႈပွတ်ႈဢပျႅတ်ႈဢၼ်ႁဝ်းမီးတင်းသဵင်ႈတင်းလူင်ၼၼ်ႉဢေႃႈ။

၈ပေႃးႁဝ်းဝႃႈႁဝ်းဢမ်ႇမီးဢပျႅတ်ႈဝႃႈၼင်ႇၼႆၸိုင်ႁဝ်းပဵၼ်ၵေႃႉဢၼ်ပႅတ်ႉလႅၼ်တူဝ်ၸဝ်ႈၵဝ်ႇဢေႃႈ။

၉ သႅတ်ႈၸႃႇတြႃးၵေႃႈဢမ်ႇမီးၵႃႈၼႂ်းႁဝ်းယဝ်ႉ။ပေႃးႁဝ်းၽုၺ်ႇဢွၵ်ႇၼႄပျႃႉဢပျႅတ်ႈလႄႈတွင်းပၢၼ်ႇၸိုင်ၽြႃးပဵၼ်ၸဝ်ႈဢၼ်တဵမ်ဝႆႉတင်းသႅတ်ႈၸႃႇတြႃးဢိၵ်ႇတင်းတြႃးတၢင်းဢၼ်သိုဝ်ႈတေႃႇၼၼ်ႉတၵ်းပွႆႇလွတ်ႈပၼ်ဢပျႅတ်ႈႁဝ်းလႄႈႁႂ်ႈႁဝ်းၵၢင်းလွတ်ႈတင်းတူႉၸရိူၵ်ႈၵႃႈမီးတင်းသဵင်ႈတင်းလူင်ၼၼ်ႉဢေႃႈ။

၁၀ ပေႃးႁဝ်းဝႃႈ၊-ႁဝ်းဢမ်ႇလႆႈႁဵတ်းတူႉၸရိူၵ်ႈသင်မႃး၊ဝႃႈၼင်ႇၼႆၸိုင်၊ႁဝ်းပဵၼ်ၵေႃႉဢၼ်ႁဵတ်းႁႂ်ႈၽြႃးပဵၼ်ၸဝ်ႈပဵၼ်ၸဝ်ႈဢၼ်လၢတ်ႈၵႂၢမ်းမူႉသႃႇၵႂႃႇယဝ်ႉ။ၼုၵ်ႉၵပၢတ်ႈၸဝ်ႈၵေႃႈဢမ်ႇမီးၵႃႈၼႂ်းႁဝ်းယဝ်ႉ။