Shan Missions

ၵျၢမ်းပျႃႇတိၵ်ႉ

Chapter        ၁          ၂          ၃          ၄          ၅          ၆          ၇          ၈          ၉          ၁၀          ၁၁          ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁         ၂၂         

၁

၁ ပျႃႇတိၵ်ႈၸဝ်ႈယေႇသုၶရိၸ်ႉဢၼ်ၽြႃးပဵၼ်ၸဝ်ႈဢၢပ်ႈပၼ်တီႈမၼ်းၸဝ်ႈပုၼ်ႈလွင်ႈၼင်ႇႁိုဝ်မၼ်းၸဝ်ႈတၵ်းလႆႈၼႄပျႃးတီႈၶႃႈမၼ်းၸဝ်ႈတင်းလၢႆလွင်ႈတၢင်းဢၼ်တၵ်းလႆႈပဵၼ်မႃးၼႂ်းၶိင်ႇၵႃႇလႃႉဢမ်ႇႁိုင်ဢမ်ႇၼၢၼ်းၼၼ်ႉၵဝ်တၵ်းဝႃႈလူးၵွၼ်ႇဢေႃႈ။

၂ မၼ်းၸဝ်ႈပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈမႃးလႄႈၼႄပျႃးသၢႆငၢႆပျႃႇတိၵ်ႈၸဝ်ႈတီႈယုဝ်းႁၢၼ်ႇဢၼ်ပဵၼ်ၶႃႈမၼ်းၸဝ်ႈဢၼ်ၶၢမ်ႇသၢၵ်ႈသေႇလွင်ႈၼုၵ်ႉၵပၢတ်ႈၽြႃးပဵၼ်ၸဝ်ႈဢိၵ်ႇတင်းလွင်ႈၸဝ်ႈယေႇသုၶရိၸ်ႉၸွမ်းၵႃႈၼင်ႇဢၼ်မၼ်းလႆႈႁၼ်ၼၼ်ႉဢေႃႈ။

၃ ပိူဝ်ႈဢၼ်ၶိင်ႇၵႃႇလႃႉၸမ်တၵ်းႁွတ်ႈထိုင်ယဝ်ႉလႄႈၶဝ်ၸိူဝ်းဢၼ်လူႈတူၺ်းၽတ်းဢၢၼ်ႇၵျၢမ်းဢၼႃႇၵၢတ်ႈတိၸိူဝ်းၼၼ်ႉသေလႄႈထွမ်ႇဢဝ်ပႂ်ႉၵမ်ပႂ်ႉၵျၢင်ႉၸွမ်းၵႃႈၼင်ႇဢၼ်တႅမ်ႈဝႆႉၼၼ်ႉမီးမင်ႇၵလႃႇဢေႃႈ။

တၢင်းဢၼ်တၵ်ႉလၢတ်ႈမင်ႇၵလႃႇ

၄ ၵဝ်၊ယုဝ်းႁၢၼ်ႇ၊ပၼ်ငိၼ်းၵႂႃႇတီႈၸိူဝ်းၸဝ်ႈၸဵတ်းပႃးဢၼ်မီးယူႇၵႃႈၼႂ်းမိူင်းဢႃႇသိၼၼ်ႉၶႃႈဢေႃႈ။ႁႂ်ႈၵျေးၸူးဢိၵ်ႇတင်းတၢင်းၼိမ်ဢၼ်ပဵၼ်မႃးၵႃႈတီႈၽြႃးပဵၼ်ၸဝ်ႈ၊ၸဝ်ႈဢၼ်မီးယူႇၼႂ်းပိတ်ႉၸူၵ်ႉပၢၼ်ႇဢတိၵ်ႈ၊ဢၼႃႇၵၢတ်ႈ၊ၵႃႇလႃႉသေႇသေႇၼၼ်ႉ

၅ ဢိၵ်ႇတင်းၵႃႈတီႈဝိၺိၺ်ႇၸဵတ်းပႃးဢၼ်မီးယူႇၵႃႈတီႈၽၢႆႇၼႃႈပလၢင်ႇၸဝ်ႈၼၼ်ႉတင်းၵႃႈတီႈၸဝ်ႈယေႇသုၶရိၸ်ႉဢၼ်ပဵၼ်ၸဝ်ႈဢၼ်ၶၢမ်ႇသၢၵ်ႈသေႇဢၼ်ပႂ်ႉသႅတ်ႈၸႃႇဢၼ်ပဵၼ်လုၵ်ႈတူၼ်ႈၼႂ်းၶဝ်ၸိူဝ်းဢၼ်တၢႆယဝ်ႉဢၼ်ပဵၼ်ပၢႆၸိၵ်းၸွမ်ၶုၼ်ႁေႃၶမ်းလေႃးၵီႇတင်းလၢႆၼၼ်ႉမီးၼိူဝ်သူသေၵမ်းလူၺ်ႈ။

၆ ႁႂ်ႈၸဝ်ႈဢၼ်ႁၵ်ႉႁဝ်းလႄႈဢဝ်တင်းလိူတ်ႈမၼ်းၸဝ်ႈသုၵ်ႈပွတ်ႈဢပျႅတ်ႈႁဝ်းလႄႈဢဝ်ႁဝ်းၶၢၼ်းဝႆႉၵႃႈၼႂ်းဢရႃႇၶုၼ်ႁေႃၶမ်းဢိၵ်ႇတင်းၵႃႈၼႂ်းဢရႃႇယိတ်ႉပရေႃးႁိၵ်ႈၵႃႈတီႈၽၢႆႇၼႃႈပေႃႈမၼ်းၸဝ်ႈၽြႃးပဵၼ်ၸဝ်ႈၼၼ်ႉမီးမုၼ်သရေႇဢႃႇၼႃႇၸၢၵ်ႈၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈသေၵမ်းလူၺ်ႈ။ဢႃႈမိၼ်ႈ။

၇ တူၺ်းလူ။မၼ်းၸဝ်ႈတၵ်းမႃးလူၺ်ႈတင်းမွၵ်ႇၵုမ်ႈလႄႈမၢၵ်ႇတႃၵူၼ်းၵႃႈမီးတင်းသဵင်ႈတင်းလူင်ဢိၵ်ႇတင်းၶဝ်ၸိူဝ်းဢၼ်တႅင်းသႂ်ႇမၼ်းၸဝ်ႈတင်းလၢႆတၵ်းလႆႈတူၺ်းႁၼ်မၼ်းၸဝ်ႈဢေႃႈ။ၵူၼ်းၵႃႈၼိူဝ်လိၼ်မိူင်းၵႃႈမီးၵူႈၸိူဝ်ႉၵူႈၶိူဝ်းတၵ်းလႆႈႁႆႈလႆႈႁွင်ႉလႆႈပွင်ႉလႆႈၶင်းၵွပ်ႈပိူဝ်ႈမၼ်းၸဝ်ႈၼၼ်ႉဢေႃႈ။ၸိုဝ်ႈၸႂ်ႈတႄႉတႄႉဢေႃႈ။ဢႃႈမိၼ်ႈ။

၈ ၵဝ်ပဵၼ်ဢႃႇလၽႃႉဢေႃႈ။ဢေႃႇမေႇၵႃႉၵေႃႈပဵၼ်ဢေႃႈ၊ဝႃႈၼႆထႃႇဝရႃႉၽြႃးပဵၼ်ၸဝ်ႈဢၼ်မီးယူႇပိတ်ႉၸူၵ်ႉပၢၼ်ႇ၊ဢတိၵ်ႈ၊ဢၼႃႇၵၢတ်ႈ၊ၵႃႇလႃႉသေႇသေႇလႄႈတဵမ်ဝႆႉတင်းဢၼၼ်ႇတႃႉတၼ်းၶူဝ်းၼၼ်ႉမီးဢမိင်ႉဢေႃႈ။

ၵေႃႉဢၼ်မိူၼ်လုၵ်ႈၵူၼ်း

၉ ၼႂ်းမိူဝ်ႈဢၼ်ၵဝ်၊ယုဝ်းႁၢၼ်ႇ၊ဢၼ်ပဵၼ်ၸၢႆးသူဢၼ်ပဵၼ်ၵေႃႉသေႈဢၼ်သိူၵ်ႈသမ်ႇလူၺ်ႈၵၼ်တင်းသူၼႂ်းတုၵ်ႉၶႃႉတၢင်းၽၢၼ်ဢိၵ်ႇတင်းမိူင်းၸဝ်ႈတင်းတၢင်းဢၼ်မၼ်းၸဝ်ႈယိူၼ်ႉၶၢမ်ႇၼၼ်ႉၵွပ်ႈပိူဝ်ႈၼုၵ်ႉၵပၢတ်ႈတြႃးၽြႃးပဵၼ်ၸဝ်ႈဢိၵ်ႇတင်းသၢၵ်ႈသေႇၸဝ်ႈယေႇသုၶရိၸ်ႉၼၼ်ႉလႄႈ

၁၀ မီးယူႇၵႃႈၼႂ်းၵုၼ်ပတ်ႉမုယူႇၼၼ်ႉၸိုင်ၵဝ်လႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈၼႂ်းဝၼ်းၸဝ်ႈၽြႃးသေယဝ်ႉငိၼ်းသဵင်ဢၼ်ယႂ်ႇၼႃႇမေႃးမႃးၵႃႈတီႈၽၢႆႇလင်ၵဝ်မိူၼ်ၸိူဝ်ႉၼင်ႇသဵင်ၼႄးၶရႃႇၼၼ်ႉဢေႃႈ။

၁၁ သဵင်ဢၼ်မေႃးမႃးၼၼ်ႉဝႃႈ၊-တႅမ်ႈလွင်ႈတၢင်းဢၼ်မႂ်းႁၼ်ၼႆႉဝႆႉၼႂ်းၽိုၼ်လိၵ်ႈသေလႄႈပၼ်ၵႂႃႇၵႃႈတီႈၸိူဝ်းၸဝ်ႈၸဵတ်းပႃးဢၼ်မီးယူႇၵႃႈၼႂ်းဝဵင်းဢေးၽႅတ်ႈ၊ဝဵင်းသမိုဝ်ႇၼ၊ဝဵင်းပေႇရၵမ်ႇ၊ဝဵင်းသႂႃႇတိရ၊ဝဵင်းသႃႇတိ၊ဝဵင်းၽိလတေႇလၽိ၊ဝဵင်းလေႃႇတိၵိၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။

၁၂ ၼင်ႇႁိုဝ်တၵ်းလႆႈႁၼ်ၵေႃႉဢၼ်ႁဵတ်းသဵင်မေႃးသေလႄႈလၢတ်ႈၵႂၢမ်းတေႃႇၵၼ်တင်းၵဝ်ၼၼ်ႉၸိုင်ၵဝ်ဝၢႆႇတူၺ်းဢေႃႈ။

၁၃ ၵဝ်ဝၢႆႇတူၺ်းသေယဝ်ႉလႆႈႁၼ်ၶူင်ႇတီႈတႆႈၽႆးၶမ်းၸဵတ်းဢၼ်ဢိၵ်ႇတင်းၵေႃႉဢၼ်မိူၼ်ၸိူဝ်ႉၼင်ႇလုၵ်ႈၵူၼ်းၼၼ်ႉၵေႃႉၼိုင်ႈၵႃႈတီႈၼႂ်းၶိုင်ႈၵၢင်ၶူင်ႇတီႈတႆႈၽႆးၸဵတ်းဢၼ်ၼၼ်ႉဢေႃႈ။ၵေႃႉၼၼ်ႉၼုင်ႈၶူဝ်းႁူမ်ႇသုမ်ႇလူင်းတေႃႇထိုင်ႁွတ်ႈၵႃႈတီႈတိၼ်လႄႈဢဝ်သၢႆဢႅဝ်ၶမ်းႁတ်ႉၵႃႈတီႈဢူၵ်းဝႆႉဢေႃႈ။

၁၄ ႁူဝ်မၼ်းၸဝ်ႈဢိၵ်ႇတင်းၶူၼ်ႁူဝ်မၼ်းၸဝ်ႈၼၼ်ႉၶၢဝ်ဝႆႉမိူၼ်ၸိူဝ်ႉၼင်ႇၶူၼ်သူဝ်းဢၼ်ၶၢဝ်ဢိၵ်ႇတင်းမိူၼ်ၸိူဝ်ႉၼင်ႇမူၺ်ႁႃႇၼၼ်ႉဢေႃႈ။မၢၵ်ႇတႃမၼ်းၸဝ်ႈၵေႃႈမိူၼ်ၸိူဝ်ႉၼင်ႇပိဝ်ၽႆးဢေႃႈ။

၁၅ တိၼ်မၼ်းၸဝ်ႈၵေႃႈမိူၼ်ၸိူဝ်ႉၼင်ႇတွင်းလိူင်ၸႅတ်ႈၸႅတ်ႈဢၼ်လႅင်ႊၸၢင်ႇၵႃႈၼႂ်းၽႆးၼၼ်ႉဢေႃႈ။သဵင်မၼ်းၵေႃႈမိူၼ်ၸိူဝ်ႉၼင်ႇသဵင်ၼမ်ႉသမ်ႇမုၵ်ႉတြႃႇဢေႃႈ။

၁၆ မိုဝ်းၶွၼ်ၶႂႃမၼ်းၸဝ်ႈၵေႃႈယိပ်းၵမ်လၢဝ်ၸဵတ်းလုၵ်ႈယူႇဢေႃႈ။ၵႃႈၼႂ်းသူပ်းမၼ်းၸဝ်ႈၵေႃႈလၢပ်ႇသၢၼ်ႇလျၢၵ်ႈဢၼ်မီးၶူမ်းသွင်ၽၢႆႇဢၼ်ၽၢႆၼႃႇၼၼ်ႉဢွၵ်ႇဝႆႉဢေႃႈ။ၼႃႈမၼ်းၸဝ်ႈၵေႃႈမိူၼ်ၸိူဝ်ႉၼင်ႇၵၢင်ဝၼ်းဢၼ်ပႃးတင်းဢႁူင်ႇတၼ်းၶူဝ်းသေလႄႈႁိူဝ်ႈလႅင်းၼၼ်ႉဢေႃႈ။

၁၇ မိူဝ်ႈဢၼ်ၵဝ်ႁၼ်မၼ်းၸဝ်ႈၸိူဝ်ႉၼၼ်ၼၼ်ႉၸိုင်ၵဝ်ၶုပ်ႉမူပ်ႇယူႇၵႃႈတီႈႁိမ်းတိၼ်မၼ်းၸဝ်ႈလႄႈပဵၼ်ၸိူဝ်ႉၼင်ႇတၵ်းတၢႆဢေႃႈ။မၼ်းၸဝ်ႈၼၼ်ႉဢဝ်တင်းမိုဝ်းၶွၼ်ၶႂႃမၼ်းၸဝ်ႈတၢင်ႇသႂ်ႇၵႃႈၼိူဝ်ၵဝ်သေလႄႈဝႃႈ၊-ယႃႇပေမီးတၢင်းဢၼ်ၵူဝ်ဢၼ်ႁႄ။ၵဝ်ပဵၼ်ၵေႃႉဢွၼ်တၢင်းဢိၵ်ႇတင်းၵေႃႉလိုၼ်းသုတ်းဢေႃႈ။

၁၈ ၵေႃႉဢၼ်ဢသၢၵ်ႈလိပ်းၵေႃႈၸႂ်ႈဢေႃႈ။ၵဝ်လႆႈတၢႆယဝ်ႉလႄႈတူၺ်းလူးၵဝ်တဵမ်ဝႆႉတင်းဢသၢၵ်ႈယူႇၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈဢေႃႈ။ၵဝ်ဢုပ်ႉပိူင်ႇမရႃႇၼႃႉတင်းမိူင်းမရႃႇၼႃႉဢေႃႈ။

၁၉ ပိူဝ်ႈၼႆလႄႈတႅမ်ႈလွင်ႈတၢင်းဢၼ်မႂ်းႁၼ်ယဝ်ႉၼၼ်ႉဢိၵ်ႇတင်းလွင်ႈတၢင်းဢၼ်မီးယူႇတေႃႈလဵဝ်ၼႆႉဢိၵ်ႇတင်းလွင်ႈတၢင်းဢၼ်တၵ်းပဵၼ်မႃးၵမ်းလိုၼ်းၸိူဝ်းၼၼ်ႉဝႆႉတႃႉ။

၂၀ တၢင်းဢၼ်လိုၵ်ႉဢၼ်လမ်ႇလၢဝ်ၸဵတ်းလုၵ်ႈဢၼ်မီးယူႇၵႃႈၼႂ်းမိုဝ်းၶွၼ်ၶႂႃၵဝ်ဢိၵ်ႇတင်းၶူင်ႇတီႈတႆႈၽႆးၶမ်းၸဵတ်းဢၼ်ၼႆႉၸမ်းၶႂ်ႈပွင်ႇဝႃႈၶူင်ႇတီႈတႆႈၽႆးၶမ်းၸဵတ်းဢၼ်ၼႆႉပဵၼ်ၸိူဝ်းၸဝ်ႈၸဵတ်းပႃးဢေႃႈ။လၢဝ်ၸဵတ်းလုၵ်ႈၵေႃႈပဵၼ်တမၢၼ်ႇဢၼ်ဢုပ်ႉပိူင်ႇၸိူဝ်းၸဝ်ႈၸဵတ်းပႃးၼၼ်ႉဢေႃႈ။