Shan Missions

လိၵ်ႈဢေႃးဝႃႇတႃႉထိၵ်ႈသႃႇလေႃးၼိၵ်ႈၽိုၼ်ပထမ

Chapter          ၁          ၂          ၃          ၄          ၅         

၂

ၵၢၼ်ငၢၼ်းပေႃးလုတီႈဝဵင်းထိၵ်ႈသႃႇလေႃးၼိၵ်ႈ

၁ ပီႈၼွင်ႉၶဝ်ဢိူၺ်း၊သူႁူႉယူႇလွင်ႈဢၼ်ဝႃႈတၢင်းဢၼ်ႁဝ်းမႃးၵႃႈတီႈသူၼၼ်ႉဢမ်ႇပဵၼ်လၢႆလၢႆလွၵ်ႇလွၵ်ႇ။

၂ ႁဝ်းၶၢမ်ႇတၢင်းယၢပ်ႇတၢင်းၽိုတ်ႇဢိၵ်ႇတင်းတၢင်းဢၼ်ၼိၵ်ႈၸၢၵ်ႈငႅၼ်းသေးၵႃႈၼႂ်းဝဵင်းၽိလိပ်ႉပိၵႃႈၼင်ႇဢၼ်သူႁူႉၼၼ်ႉ၊ႁဝ်းဢိင်ပိုင်ႈၽြႃးပဵၼ်ၸဝ်ႈသေလႄႈပဵၵ်ႉသမ်ႉမီးတၢင်းဢၼ်လႆႈၶႄႉၶဵင်ႇၼမ်ၼႃႇလူင်လၢင်သေၵေႃႈႁဝ်းႁေႃးလၢတ်ႈတြႃးသတၢင်းသိူဝ်းပျေႃႇၽြႃးပဵၼ်ၸဝ်ႈတီႈသူႁတ်းႁတ်းႁၢၼ်ႁၢၼ်ယူႇဢေႃႈ။

၃ ႁဝ်းဢဝ်တင်းတၢင်းဢၼ်ၽိတ်းပိူင်ႈတၢင်းဢၼ်ၵူဝ်ႈၵိူၵ်ႇတၢင်းဢၼ်ပႅတ်ႉလႅၼ်သေလႄႈတိုၵ်းယူင်းၸူဝ်းဢဝ်သူဢမ်ႇၸႂ်ႈ။

၄ ႁဝ်းဢမ်ႇႁေႃးလၢတ်ႈႁဵတ်းႁႂ်ႈသူထုၵ်ႇၸႂ်သိူဝ်းၸူမ်းလၢႆလၢႆ။ႁဝ်းႁေႃးလၢတ်ႈမႅၼ်ႈၼင်ႇၵႃႈဢၼ်ၽြႃးပဵၼ်ၸဝ်ႈႁပ်ႉတုင်းဢဝ်ႁဝ်းႁႂ်ႈလႆႈပဵၼ်ၵေႃႉဢၼ်ထိူၵ်ႈပႂ်ႉတြႃးသတၢင်းသိူဝ်းပျေႃႇၼၼ်ႉ၊ႁဝ်းႁေႃးလၢတ်ႈၸွမ်းၼင်ႇဢၼ်ထုၵ်ႇၸႂ်ၽြႃးပဵၼ်ၸဝ်ႈဢၼ်ၸႅတ်ႈထၢမ်ၸၢမ်းတူၺ်းႁူဝ်ၸႂ်ႁဝ်းၼၼ်ႉဢေႃႈ။

၅ ၵႃႈၼင်ႇဢၼ်သူႁူႉယူႇၼၼ်ႉႁဝ်းဢမ်ႇသုင်းတိုဝ်းၵႂၢမ်းဢၼ်ၸၢင်ႊၶျေႃးၸၢင်ႊဝွၼ်းၼၼ်ႉသေပွၵ်ႈ။ႁဝ်းဢမ်ႇမီးၸႂ်သၽေႃးဢၼ်သိူင်ႇဝႆႉမႅပ်းဝႆႉသေဢိတ်းဢၼ်ဝႃႈၼၼ်ႉၽြႃးပဵၼ်ၸဝ်ႈပဵၼ်သၢၵ်ႈသေႇႁဝ်းယူႇဢေႃႈ။

၆ လိူဝ်သေၼၼ်ႉပဵၵ်ႉသမ်ႉႁဝ်းပဵၼ်တမၢၼ်ႇၸဝ်ႈၶရိၸ်ႉလႄႈမီးဢႃႇၼႃႇဢၼ်တၵ်းဢဝ်ၶူဝ်းဢၼ်ၼၵ်းတၢင်ႇသႂ်ႇၵႃႈၼိူဝ်သူသေၵေႃႈယႃႇႁဝ်းဢမ်ႇႁဵတ်း။

၇ ႁဝ်းဢမ်ႇႁႃဢဝ်ႁႂ်ႈလႆႈမူၼ်သရေႇဢၼ်သူပၼ်ၼၼ်ႉ။ၵႃႈၼႂ်းၵူၼ်းတၢင်ႇတီႈတၢင်ႇလႅၼ်ႈၵေႃႈႁဝ်းဢမ်ႇႁႃ။ႁဝ်းႁဵတ်းၼိမ်ၼိမ်လွႆးလွႆးတီႈသူမိူၼ်ၸိူဝ်ႉၼင်ႇဢၼ်မေႈၸဝ်ႈၼူမ်းလုမ်းလႃးလဵင်ႉလူလုၵ်ႈဢွၼ်ႇမၼ်းၼၼ်ႉဢေႃႈ။

၈ ၵွပ်ႈပိူဝ်ႈႁဝ်းႁၵ်ႉသူၼႃႇလူင်လၢင်လႄႈႁဝ်းပႃးတင်းတၢင်းဢၼ်ၸူမ်းသိူဝ်းသေယဝ်ႉၶႂ်ႈၽႄမႅင်ႇတြႃးသတၢင်းသိူဝ်းပျေႃႇပၼ်သူၵူၺ်ဢမ်ႇၵႃးယင်းၶႂ်ႈမႅင်ႇဢသၢၵ်ႈတူဝ်ၸဝ်ႈၵဝ်ႇပၼ်သူယူႇဢေႃႈ။

၉ ပီႈၼွင်ႉၶဝ်ဢိူၺ်း၊ၶုၵ်းၸႂ်လႆႈလွင်ႈဢၼ်ဝႃႈလွင်ႈၼင်ႇႁိုဝ်ႁဝ်းတၵ်းဢမ်ႇလႆႈပၼ်တၢင်းယၢပ်ႇၸႂ်တီႈသူသေၵေႃႉသေၵူၼ်းၸိုင်ႁဝ်းလႆႈဢဝ်ႁႅင်းၵျူဝ်းၸႃးႁဵတ်းသၢင်ႈယၢပ်ႇၼႃႇလူင်လၢင်ၵူႈဝၼ်းၵူႈၶိုၼ်းလႄႈႁေႃးလၢတ်ႈတြႃးသတၢင်းသိူဝ်းပျေႃႇၽြႃးပဵၼ်ၸဝ်ႈတီႈသူဢေႃႈ။

၁၀ သူဢိၵ်ႇတင်းၽြႃးပဵၼ်ၸဝ်ႈပဵၼ်သၢၵ်ႈသေႇလွင်ႈဢၼ်ႁဝ်းပဵၼ်ၵေႃဢၼ်မူတ်းၸၢင်ႇသိုဝ်ႈတေႃႇၵၢင်းလွတ်ႈတင်းတၢင်းဢၼ်တၢင်ႇဢပျႅတ်ႈၽၢႆႇၼႃႈသူဢၼ်ပဵၼ်ၵူၼ်းယုမ်ႇမၢတ်ႈၼၼ်ႉၸိူဝ်ႉၼင်ႇႁိုဝ်ၼၼ်ႉဢေႃႈ။

၁၁ မႅၼ်ႈၼင်ႇဢၼ်သူႁူႉၼၼ်ႉႁဝ်းယုၵ်ႉယွင်ႈသူ၊ပၼ်ဢဵၼ်ပၼ်ႁႅင်းသူ၊သင်ႇသွၼ်သုင်းမႃႉသူမိူၼ်ၸိူဝ်ႉၼင်ႇပေႃႈႁဵတ်းတီႈလုၵ်ႈလၢင်းၼၼ်ႉ၊ႁႂ်ႈသူလႆႈၵမ်ၵျၢင်ႉ

၁၂ ဢၼ်ထိူၵ်ႈတၢၼ်ႇၵၼ်တင်းၽြႃးပဵၼ်ၸဝ်ႈဢၼ်ႁွင်ႉဢဝ်သူသႂၢင်းသႂ်ႇၵႃႈၼႂ်းမိူင်းၸဝ်ႈဢိၵ်ႇတင်းမူၼ်ၸဝ်ႈၼၼ်ႉဢေႃႈ။ၽြႃးပဵၼ်ၸဝ်ႈၵေႃႈပဵၼ်သၢၵ်ႈသေႇဢေႃႈ။

တၢင်းဢၼ်ၶဝ်ႁပ်ႉတုင်းဢဝ်ပေႃးလု

၁၃ ႁဝ်းထွၵ်ႈလူၺ်ႈလွင်ႈဢၼ်သူႁပ်ႉၶၢမ်ႇဢဝ်ၼုၵ်ႉၵပၢတ်ႈတြႃးၽြႃးပဵၼ်ၸဝ်ႈဢၼ်ႁဝ်းႁေႃးလၢတ်ႈတီႈသူၼၼ်ႉမိူၼ်ၼင်ႇႁပ်ႉဢဝ်ၵႂၢမ်းဢၼ်ဢွၵ်ႇသူပ်းၵူၼ်းဢမ်ႇၸႂ်ႈလႄႈမိူၼ်ၸိူဝ်ႉၼင်ႇပဵၼ်ၼုၵ်ႉၵပၢတ်ႈတြႃးဢၼ်မၢၼ်ႇဢၼ်မႅၼ်ႈဢၼ်ပွင်ႁဵတ်းၵႃႈၼႂ်းသူၸိူဝ်းဢၼ်ယုမ်ႇမၢတ်ႈၼၼ်ႉလႄႈႁဝ်းယွင်ႈယေႃးၵျေးၸူးၸဝ်ႈယူႇတႃႇသေႇဢမ်ႇထၢတ်ႇဢေႃႈ။

ပီႈၼွင်ႉၶဝ်ဢိူၺ်း၊သူပဵၼ်ၵူၼ်းၶဝ်ႈၸိူဝ်းၸဝ်ႈၽြႃးပဵၼ်ၸဝ်ႈဢၼ်ၶၢမ်ႇဢဝ်ၽႃႇသႃႇၸဝ်ႈယေႇသုၶရိၸ်ႉၼႂ်းမိူင်းယုတၼၼ်ႉဢေႃႈ။

၁၄ လွင်ႈမၼ်းၸမ်းၸိူဝ်ႉၼင်ႇဢၼ်ၶဝ်လႆႈၶၢမ်ႇတၢင်းယၢပ်ႇတၢင်းၽိုတ်ႇၼႂ်းမိုဝ်းၵူၼ်းယုတတင်းလၢႆၼၼ်ႉသူၵေႃႈလႆႈၶၢမ်ႇၸိူဝ်ႉၼင်ႇၼၼ်ၼႂ်းမိုဝ်းၵူၼ်းမဵဝ်းတူဝ်ၸဝ်ႈၵဝ်ႇဢေႃႈ။

၁၅ ၵူၼ်းယုတၸိူဝ်းၼၼ်ႉဢဝ်ၸႃႉၸဵမ်ၸဝ်ႈယေႇသုဢိၵ်ႇတင်းပရေႃးၽႅတ်ႈတင်းလၢႆတၢႆယဝ်ႉ။ႁဝ်းၵေႃႈၶဝ်ၼိၵ်ႈၸၢၵ်ႈလႄႈႁေႃႈဢွၵ်ႇပႅတ်ႈယဝ်ႉ။ၶဝ်ဢမ်ႇၸွမ်းၼင်ႇဢလူဝ်ႇၽြႃးပဵၼ်ၸဝ်ႈ။ၶဝ်ၶတ်းၵၼ်တင်းၵူၼ်းတင်းသဵင်ႈတင်းလူင်ဢေႃႈ။

၁၆ ၶဝ်ႁႄႉၶႅၼ်လွင်ႈတၢင်းဢၼ်ႁဝ်းႁေႃးလၢတ်ႈဢၼ်ႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉလႄႈၶဝ်ႁႂ်ႈဢပျႅတ်ႈတူဝ်ၸဝ်ႈၵဝ်ႇတဵမ်ဝႆႉယူႇသေႇသေႇဢေႃႈ။တၢင်းၸႂ်မႆႈၶႂ်ႈၸႃႉမၼ်းၸဝ်ႈလႆႈႁွတ်ႈထိုင်ၵႃႈၼိူဝ်ၶဝ်ၼၼ်ႉသဵင်ႈသဵင်ႈမူတ်းမူတ်းဢေႃႈ။

၁၇ ပီႈၼွင်ႉၶဝ်ဢိူၺ်း၊ပဵၵ်ႉသမ်ႉတူဝ်ၵႃႇယႃႉႁဝ်းလႆႈၽၢတ်ႇယၢၼ်ၵၼ်တင်းသူၵမ်းဢွၼ်ႇၼိုင်ႈယဝ်ႉသေၵေႃႈႁူဝ်ၸႂ်ႁဝ်းဢမ်ႇၽၢတ်ႇဢမ်ႇယၢၼ်ၵၼ်တင်းသူလႄႈႁဝ်းမီးတၢင်းဢၼ်ၸႂ်ထိုင်ၼႃႇလူင်လၢင်လႄႈယဵင်ႈၶႅၼ်းၶတ်းၸႂ်ႁႂ်ႈလႆႈႁၼ်ၼႃႈသူယူႇဢေႃႈ။

၁၈ ပိူဝ်ႈၼႆလႄႈပဵၵ်ႉသမ်ႉၵဝ်၊ပေႃးလု၊မီးဢလူဝ်ႇၶႂ်ႈမႃးၸူးတီႈသူထူၼ်ႈထိုင်သွင်ပွၵ်ႈယဝ်ႉသေၵေႃႈၸႃႇတၢၼ်ႇမႃႇၼၢတ်ႈႁႄႉၶႅၼ်ႁဝ်းယူႇဢေႃႈ။

၁၉ လွင်ႈတၢင်းဢၼ်ႁဝ်းမုင်ႈထႃႈမွင်းထႃႈလွင်ႈတၢင်းဢၼ်ႁဝ်းသိူဝ်းပျေႃႇလွင်ႈတၢင်းဢၼ်ႁဝ်းဢုပ်ႇဝၢဝ်းၼႂ်းသရၽူႇပၢၼ်းၵုမ်းၵႃႈတီႈၽၢႆႇၼႃႈၸဝ်ႈႁဝ်းၸဝ်ႈယေႇသုၶရိၸ်ႉမိူဝ်ႈဢၼ်မၼ်းၸဝ်ႈမႃးၼၼ်ႉပဵၼ်ဢီႈသင်။

၂၀ ပဵၼ်သူဢမ်ႇၸႂ်ႈႁိူဝ်။သူပဵၼ်မူၼ်သရေႇႁဝ်းဢိၵ်ႇတင်းတၢင်းသိူဝ်းပျေႃႇဢေႃႈ။