Shan Missions

လိၵ်ႈဢေႃးဝႃႇတႃ့ၵေႃးရဵၼ်ႇထုၽိုၼ်တုတိယ

Chapter     ၁          ၂          ၃          ၄          ၅          ၆          ၇          ၈          ၉          ၁၀           ၁၁          ၁၂          ၁၃     

၉

တၢင်းဢၼ်လူႇတၢၼ်းပုၼ်ႈၵူၼ်းမူတ်းၸၢင်ႇ

၁ လွင်ႈတၢင်းဢၼ်ႁဵတ်းလဵင်ႉႁဵတ်းလူၵူၼ်းမူတ်းၸၢင်ႇတင်းလၢႆၼၼ်ႉၸိုင်ၵဝ်ဢမ်ႇမီးတီႈဢၼ်တၵ်းလႆႈလၢတ်ႈၵႃႈသင်ထႅင်ႈတီႈသူ။

၂ လွင်ႈမၼ်းၸမ်းၵဝ်ႁူႉၸႂ်ၸေႇတၼႃႇသူလႄႈၵဝ်လႆႈဢုပ်ႇဝၢဝ်းလၢတ်ႈတီႈၵူၼ်းမႃႇၵေႇတေႃးၼိတင်းလၢႆလႄႈဝႃႈ၊-ၵူၼ်းမိူင်းဢၶႃႇယၸိူဝ်းၼၼ်ႉမႄးႁႅၼ်းဝႆႉတၢႆတေလႆႈလူႇပၼ်ၸဵမ်မိူဝ်ႈပီႊၵၢႆၼၼ်ႉယဝ်ႉ။လွင်ႈတၢင်းဢၼ်ၸႂ်ၸေႇတၼႃႇသူႁႅင်းယႂ်ႇၸိူဝ်ႉၼင်ႇၼႆၼၼ်ႉပဵၼ်တၢင်းဢၼ်တိုၵ်းသူၼ်းၵူၼ်းၼႂ်းၶဝ်ၼမ်ၼႃႇႁႂ်ႈလႆႈတူင်ႉတိုၼ်ႇဢေႃႈ။

၃ ၵႃႈၼင်ႇဢၼ်ႁဝ်းဢဝ်လွင်ႈသူဢုပ်ႇဝၢဝ်းၼၼ်ႉတၵ်းဢမ်ႇပဵၼ်ဢၼ်လၢႆလၢႆလွၵ်ႇလွၵ်ႇလႄႈသူတၵ်းမႄးႁႅၼ်းဝႆႉႁႂ်ႈမႅၼ်ႈၵၼ်တင်းၵႂၢမ်းၼၼ်ႉၸိုင်ၵဝ်ပွႆႇၸႂ်ႉပီႈၼွင်ႉၵမ်ႈၽွင်ႈၵႂႃႇဢေႃႈ။

၄ ပေႃးဢမ်ႇၼၼ်ပေႃးၵူၼ်းမႃႇၵေႇတေႃးၼိၵမ်ႈၽွင်ႈၸွမ်းၵဝ်မႃးလႄႈထူပ်းႁၼ်သူဢမ်ႇမႄးႁႅၼ်းဝႆႉၸိုင်သူတၵ်းဢူၵ်းဢၢႆၵူၺ်းဢမ်ႇၵႃး၊ႁဝ်းဢၼ်ဢုပ်ႇဝၢဝ်းတႄႉတႄႉဝႃႈဝႃႈၼၼ်ႉၵေႃႈတၵ်းလႆႈႁွတ်ႈထိုင်တၢင်းဢၼ်ဢူၵ်းဢၢႆဢေႃႈ။

၅ ပိူဝ်ႈၼႆလႄႈၵဝ်ထၢင်ႇပေႃးပီႈၼွင်ႉၸိူဝ်းၼၼ်ႉတၵ်းၵႂႃႇဢွၼ်တၢင်းတီႈသူလႄႈႁႂ်ႈတၢင်းလူႇတၢင်းတၢၼ်းဢၼ်သူလႆႈလၢတ်ႈဝႆႉယဝ်ႉဢွၼ်တၢင်းၼၼ်ႉတၵ်းၸုမ်ႇဝႆႉဢွၼ်တၢင်းၸိူဝ်ႉၼင်ႇဢၼ်မီးၸေႇတၼႃႇၼၼ်ႉဢေႃႈ။ယႃႇပေႁႂ်ႈလႆႈပဵၼ်မိူၼ်ၼင်ႇပွင်ႉၶင်းလႄႈပၼ်ၼၼ်ႉ။

ၽြႃးပဵၼ်ၸဝ်ႈႁၵ်ႉၵေႃႉဢၼ်လူႇတၢၼ်း

၆ ၵေႃႉဢၼ်သေလၢႆလႄႈဝၢၼ်ႇၸိူဝ်ႉဝၢၼ်ႇၽၼ်းဢိတ်းၼိုင်ႈၼၼ်ႉတၵ်းလႆႈပၢတ်ႇဢိတ်းၼိုင်ႈၵူၺ်းဢေႃႈ။ၵေႃႉဢၼ်ဢမ်ႇသေလၢႆလႄႈဝၢၼ်ႇၸိူဝ်ႉဝၢၼ်ႇၽၼ်းၼမ်ၼမ်ၼၼ်ႉတၵ်းလႆႈပၢတ်ႇၼမ်ၼမ်ဢေႃႈ၊ဝႃႈၼႆမၢတ်ႈတွင်းဝႆႉတႃႉ။

၇ ၵူၼ်းၵူႈၵေႃႉတၵ်းလႆႈလူႇၸွမ်းၵႃႈၼင်ႇဢၼ်တူဝ်ၸဝ်ႈၵဝ်ႇမၵ်းၶၢၼ်းဝႆႉၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။ဢမ်ႇလႆႈမီးၸႂ်ဢၼ်သေလၢႆသေလႄႈလူႇ။ဢမ်ႇလႆႈမီးၸႂ်ဢၼ်ထၢင်ႇဝႃႈ၊-ပေႃးဢမ်ႇလူႇဢမ်ႇလႆႈဝႃႈၼႆသေလႄႈလူႇ။လွင်ႈမၼ်းၸမ်းၽြႃးပဵၼ်ၸဝ်ႈႁၵ်ႉၵေႃႉဢၼ်ပႃးတင်းၸႂ်ၸေႇတၼႃႇသေလႄႈလူႇၼၼ်ႉၵူၺ်းဢေႃႈ။

၈ လွင်ႈၼင်ႇႁိုဝ်သူတၵ်းမီးဢုၵ်ႉၸႃႇဢၼ်ၵုမ်ႇၸူၵ်းၵုမ်ႇၸၢႆႇသေႇသေႇၼႂ်းလွင်ႈၵူႈၸိူဝ်ႉၵူႈပိူင်လႄႈၼမ်ၵိုၼ်းတဵမ်ဝႆႉတင်းတၢင်းၵမ်တၢင်းၵျၢင်ႉဢၼ်လီဢၼ်ငၢမ်းၵူႈမဵဝ်းၼၼ်ႉၸိုင်ၽြႃးပဵၼ်ၸဝ်ႈတတ်ႈၼိုင်ႇႁႂ်ႈသူလႆႈၼမ်ၵိုၼ်းတဵမ်ဝႆႉတင်းသူႉၵျေးၸူးမင်ႇၵလႃႇၵူႈၸိူဝ်ႉၵူႈဢၼ်ယူႇဢေႃႈ။

၉ မႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-မၼ်းၼၼ်ႉၽေးၸွၼ်းယဝ်ႉ။မၼ်းယိုၼ်ႈမႅင်ႇပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ယဝ်ႉ။တၢင်းသိုဝ်ႈတေႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇဢေႃႈ၊ဝႃႈၼင်ႇၼႆဢေႃႈ။

၁၀ ၸဝ်ႈဢၼ်ပၼ်ၸိူဝ်ႉပၼ်ၽၼ်းတီႈၵေႃႉဢၼ်ဝၢၼ်ၸိူဝ်ႉဝၢၼ်ႇၽၼ်းဢိၵ်ႇတင်းဢႁႃႇရႃႉတၢင်းၵိၼ်ၼၼ်ႉတၵ်းပၼ်ၸိူဝ်ႉပၼ်ၽၼ်းတီႈသူႁႂ်ႈမၼ်းၼမ်မႃးၵိုၼ်းမႃးဢေႃႈ။ဢၵျူဝ်းတၢင်းသိုဝ်ႈတေႃႇသူၼၼ်ႉၵေႃႈမၼ်းၸဝ်ႈတၵ်းႁႂ်ႈၽႄၵႂၢင်ႈၼမ်ၵိုၼ်းမႃးဢေႃႈ။

၁၁ ၼင်ႇၼၼ်လႄႈသူမီးတၢင်းဢၼ်လိူင်ႇၼမ်မၢၵ်ႈမီးၼႂ်းၵူႈၸိူဝ်ႉၵူႈပိူင်သေယဝ်ႉတၵ်းမီးၸႂ်ၸေႇတၼႃႇၽေးၸွၼ်းယိုၼ်ႈမႅင်ႇၵူႈၸိူဝ်ႉၵူႈမဵဝ်းဢၼ်ပွင်ႁဵတ်းတၢင်းဢၼ်ယွင်ႈယေႃးၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈႁဝ်းၼၼ်ႉယူႇဢေႃႈ။

၁၂ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်းလွင်ႈတၢင်းဢၼ်ႁဵတ်းလဵင်ႉႁဵတ်းလူၼၼ်ႉၸွႆႈထႅမ်တၢင်းယၢၵ်ႈတၢင်းၽၢၼ်ၵူၼ်းမူတ်းၸၢင်ႇတင်းလၢႆၵူၺ်းဢမ်ႇၵႃး၊တဵမ်ဝႆႉတင်းလွင်ႈတၢင်းဢၼ်လီယွင်ႈယေႃးၵျေးၸူးၽြႃးပဵၼ်ၸဝ်ႈၼမ်ၼႃႇဢေႃႈ။

၁၃ မိူဝ်ႈဢၼ်ၶဝ်ထွၵ်ႈလူၺ်ႈလၢၵ်ႈၶၼႃႇသၢၵ်ႈသေႇဢၼ်သူႁဵတ်းလဵင်ႉႁဵတ်းလူၼၼ်ႉၸိုင်ၶဝ်ယွင်ႈယေႃးၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈလွင်ႈတၢင်းဢၼ်သူၸွမ်းဢလူဝ်ႇတြႃးသတၢင်းသိူဝ်းပျေႃႇၸဝ်ႈၶရိၸ်ႉထၢင်ႇထၢင်ႇသႃးသႃး၊ဢိၵ်ႇတင်းၵွပ်ႈပိူဝ်ႈလွင်ႈတၢင်းဢၼ်သူမီးၸႂ်ၸေႇတၼႃႇသေလႄႈၽေးၸွၼ်းယိုၼ်ႈမႅင်ႇၼမ်ၼႃႇတီႈၶဝ်ဢိၵ်ႇတင်းၵူၼ်းတင်းသဵင်ႈတင်းလူင်ၼၼ်ႉဢေႃႈ။

၁၄ ၶဝ်ၼၼ်ႉသူးတွင်းပုၼ်ႈသူလႄႈမီးၸႂ်ဢၼ်ႁၵ်ႉႁူမ်ၸူမ်းတွၼ်ႈသူၼႃႇလူင်လၢင်ၵွပ်ႈပိူဝ်ႈဢၼ်ၶဝ်ထွၵ်ႈလူၺ်ႈၵျေးၸူးၽြႃးပဵၼ်ၸဝ်ႈဢၼ်မျၢတ်ႈလီၼႃႇၼႂ်းသူၼၼ်ႉဢေႃႈ။

၁၅ ႁႂ်ႈမီးတၢင်းဢၼ်ယွင်ႈယေႃးၽြႃးပဵၼ်ၸဝ်ႈၵွပ်ႈပိူဝ်ႈသူႉၵျေးၸူးမၼ်းၸဝ်ႈဢၼ်လၢတ်ႈဢမ်ႇသဵင်ႈလႆႈၼၼ်ႉသေၵမ်းလူၺ်ႈ။