Shan Missions

လိၵ်ႈဢေႃးဝႃႇတႃႉၽိလိပ်ႉပိ

Chapter          ၁          ၂           ၃          ၄         

၄

ႁႂ်ႈလႆႈၸူမ်းသိူဝ်းၼႂ်းၸဝ်ႈၽြႃး

၁ ပိူဝ်ႈၼႆလႄႈပီႈၼွင်ႉဢၼ်ၵဝ်ႁၵ်ႉလႄႈၸႂ်ထိုင်ၼႃႇဢၼ်ပဵၼ်ပၢၼ်းၵုမ်းသရၽူႇၵဝ်တၢင်းဢၼ်ၵဝ်သိူဝ်းပျေႃႇၶဝ်ဢိူၺ်း၊ဢွၼ်ၵၼ်တႄႇယူႇၼႂ်းၸဝ်ႈၽြႃးၸွမ်းၼင်ႇၵႃႈဢၼ်ၵဝ်ဝႃႈမႃးယဝ်ႉၼၼ်ႉတႃႉ။

၂ ပီႈၼွင်ႉဢၼ်ၵဝ်ႁၵ်ႉၶဝ်ဢိူၺ်း၊ၼင်ႇႁိုဝ်ဢေႇဝူဝ်ႇတိတင်းသုၼ်ႇတွၵ်ႇ၊သွင်ၶႃတၵ်းလႆႈမီးၸႂ်သၽေႃးဢၼ်မိူၼ်ၵၼ်ၼႂ်းၸဝ်ႈၽြႃးၸိုင်ၵဝ်တွင်းပၢၼ်ႇၸူဝ်းဢဝ်ၶဝ်ဢေႃႈ။

၃ ၵေႃႉသေႈၸႅတ်ႈၸႅတ်ႈဢၼ်သၢင်ႈႁဵတ်းလူၺ်ႈၵၼ်တင်းၵဝ်ဢိူၺ်း၊မႂ်းၵေႃႈၵဝ်တွင်းပၢၼ်ႇဢေႃႈ။ၸွႆႈထႅမ်မႃႉၸႃႉၽူႈယိင်းဢၼ်ၶတ်းၸႂ်ၸွႆႈထႅမ်ၵဝ်ၼႂ်းတၢင်းဢၼ်ႁေႃးလၢတ်ႈတြႃးသတၢင်းသိူဝ်းပျေႃႇၸိူဝ်းၼၼ်ႉဢိၵ်ႇတင်းၸႃႉၸဵမ်ၵလေႇမိၼ်ႇတင်းၵေႃႉသေႈၸႅတ်ႈၸႅတ်ႈဢၼ်ၵိုတ်းဢၼ်ၵျၢၼ်ႇဢၼ်သၢင်ႈႁဵတ်းလူၺ်ႈၵၼ်တင်းၵဝ်၊ဢၼ်ၸိုဝ်သဵင်ၶဝ်ပႃးၼႂ်းၸရၢင်းဢသၢၵ်ႈၸိူဝ်းၼၼ်ႉတႃႉ။

၄ မီးတၢင်းဢၼ်သိူဝ်းပျေႃႇၼႂ်းၸဝ်ႈၽြႃးတႃႇသေႇဢမ်ႇထၢတ်ႇတႃႉ။

၅ ၵဝ်သမ်ႉဝႃႈထႅင်ႈၸမ်းသိူဝ်းပျေႃႇတႃႉ။ႁႂ်ႈၸႂ်သၽေႃးသူဢၼ်ဢူၼ်ႈဢွၼ်ႇၼၼ်ႉထၢင်ႇသႃးၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်တႃႉ။

၆ ၸဝ်ႈၽြႃးမီးၸမ်ယူႇဢေႃႈ။ယင်းဢမ်ႇမီးတၢင်းဢၼ်မႆႈၸႂ်လူၺ်ႈလွင်ႈတၢင်းၵႃႈသင်လႄႈၼႂ်းလွင်ႈတၢင်းၵူႈၸိူဝ်ႉၵူႈပိူင်ဢဝ်တင်းတၢင်းဢၼ်ႁဵတ်းသူးတွင်းပထၼႃႇဢိၵ်ႇတင်းတၢင်းဢၼ်ယွင်ႈယေႃးၵျေးၸူးၸဝ်ႈသေလႄႈလဝ်ႈလၢတ်ႈတီႈၽြႃးပဵၼ်ၸဝ်ႈၵႃႈဢၼ်သူလူဝ်ႇထႅင်ႈတင်းသဵင်ႈတင်းလူင်ၼၼ်ႉတႃႉ။

၇ ပေႃးႁဵတ်းၸိူဝ်ႉၼင်ႇၼၼ်ၸိုင်တၢင်းၼိမ်ၽြႃးပဵၼ်ၸဝ်ႈဢၼ်ၽူႈလႂ်ၵျၢမ်ႇပွင်လႄႈဢမ်ႇၶိုတ်းဢမ်ႇထိုင်လႆႈၼၼ်ႉတၵ်းပႂ်ႉၸွႆႈပႂ်ႉထႅမ်ႁူဝ်ၸႂ်သူၼႂ်းၸဝ်ႈယေႇသုၶရိၸ်ႉဢေႃႈ။

၈ ၵႂၢမ်းဢၼ်ယင်းၵိုတ်းယင်းၵျၢၼ်ႇၸမ်းပီႈၼွင်ႉၶဝ်ဢိူၺ်း၊လွင်ႈတၢင်းဢၼ်ၸၢပ်ႈသႅင်ႇၵၼ်တင်းသမ်ႇမႃႇတြႃးလႂ်လွင်ႈတၢင်းဢၼ်သၢင်ႇထုၵ်ႇလႂ်၊လွင်ႈတၢင်းဢၼ်သိုဝ်ႈတေႃႇလႂ်ႈ၊လွင်ႈတၢင်းဢၼ်ၶၢဝ်ၸၢင်ႇလႂ်၊လွင်ႈတၢင်းဢၼ်ထုၵ်ႇၸႂ်ပိူၼ်ႈလႂ်၊လွင်ႈတၢင်းဢၼ်လီဢွၼ်လီယွင်ႈလႂ်၊ၵႃႈမီးတင်းသဵင်ႈတင်းလူင်လႄႈသင်၊ပေႃးမီးလွင်ႈတၢင်းဢၼ်ၸၢပ်ႈသႅင်ႇၵၼ်တင်းပႃႇရမီႇသပေႃးပႃးၼၼ်ႉလႄႈသင်၊ပေႃးမီးလွင်ႈတၢင်းဢၼ်ၸၢပ်ႈသႅင်ႇၵၼ်တင်းသတၢင်းဢၼ်လီဢၼ်ငၢမ်းသပေႃးပႃးၼၼ်ႉလႄႈသင်၊ဢွၼ်ၵၼ်ဢဝ်သႂၢင်းသႂ်ႇဝႆႉၼႂ်းႁူဝ်ၸႂ်တႃႉ။

၉ သူဢွၼ်ၵၼ်ၵမ်ၵျၢင်ႉၵႃႈဢၼ်သူလႆႈသွၼ်ဢဝ်လႆႈငိၼ်းဢဝ်လႆႈႁၼ်ဢဝ်တီႈၵဝ်တင်းသဵင်ႈတင်းလူင်ၼၼ်ႉတႃႉ။ၽြႃးပဵၼ်ၸဝ်ႈၸဝ်ႈတၢင်းၼိမ်ၼၼ်ႉတၵ်းမီးယူႇလူၺ်ႈၵၼ်တင်းသူဢေႃႈ။

၁၀ တေႃႈလဵဝ်ၼႆႉၵွပ်ႈပိူဝ်ႈသူသမ်ႉမီးၸႂ်ၸေႇတၼႃႇဢၼ်ၶႂ်ႈလူႈၶႂ်ႈတူၺ်းၵဝ်လႄႈၵဝ်မီးတၢင်းဢၼ်သိူဝ်းပျေႃႇၼႂ်းၸဝ်ႈၽြႃးၼႃႇလူင်လၢင်ဢေႃႈ။သူမီးၸႂ်ႈၸေႇတၼႃႇတႄႉဢေႃႈ။ၼႂ်းဝႃႈၼၼ်သေၵေႃႈ၊သူဢမ်ႇမီးဢၶႂၢင်ႉဢၼ်လႆႈႁဵတ်းၼႄ။

၁၁ မိူဝ်ႈဢၼ်ၵဝ်ဝႃႈၸိူဝ်ႉၼင်ႇၼၼ်ၸိုင်၊ၵဝ်ဢဝ်လွင်ႈတၢင်းဢၼ်ၵဝ်ယၢၵ်ႈၵဝ်ၽၢၼ်ၼၼ်ႉဝႃႈဢမ်ႇၸႂ်ႈ။လွင်ႈမၼ်းၸမ်းလွင်ႈၼင်ႇႁိုဝ်ၵဝ်တၵ်းမီးတၢင်းဢၼ်ဢိမ်ႇၸႂ်ၼိမ်ၸႂ်ၼႂ်းလွင်ႈတၢင်းၵူႈၸိူဝ်ႉၵူႈပိူင်ၸိုင်ၵဝ်လႆႈသွၼ်ဢဝ်ယဝ်ႉ။

၁၂ ၵဝ်ႁူႉတၢင်းဢၼ်ၶျႃးတူၵ်းတီႈတႅမ်ႇဢေႃႈ။ၵဝ်ႁူႉတၢင်းဢၼ်တဵမ်ထူၼ်ႈလိူင်ႇၸႂ်ဢေႃႈ။ၵဝ်လႆႈသွၼ်ဢဝ်တၢင်းဢၼ်ၵိၼ်ဢိမ်ႇၵိၼ်တဵမ်၊တၢင်းဢၼ်ဢိုပ်းဢၼ်ယၢၵ်ႈ၊တၢင်းဢၼ်မီးၸေးၸိမ်ႇ၊တၢင်းဢၼ်ယၢၵ်ႈဢၼ်ၽၢၼ်ၸိူဝ်းၼၼ်ႉၵူႈၸိူဝ်ႉၵူႈပိူင်ၵႃႈမီးတင်းသဵင်ႈတင်းလူင်ယဝ်ႉ။

၁၃ ၵဝ်တတ်ႈၼိုင်ႇလႆႈလွင်ႈတၢင်းၵႃႈမီးတင်းသဵင်ႈတင်းလူင်ၼႂ်းၸဝ်ႈဢၼ်ႁႂ်ႈၵဝ်တဵမ်ထူၼ်ႈတင်းႁႅင်းၼၼ်ႉယူႇဢေႃႈ။

၁၄ ၵူၺ်းၵႃႈၵွပ်ႈပိူဝ်ႈဢၼ်သူၸုၵ်းၶၢမ်ႇလူၺ်ႈၵၼ်တင်းၵဝ်ၼႂ်းမိူဝ်ဢၼ်ၵဝ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉပဵၼ်တၢင်းဢၼ်သူႁဵတ်းဢၼ်လီယဝ်ႉ။

၁၅ ၵူၼ်းဝဵင်းၽိလိပ်ႉပိၶဝ်ဢိူၺ်း၊ၼႂ်းမိူဝ်ႈဢၼ်ၵဝ်တႄႇၸႃႉႁေႃးလၢတ်ႈတြႃးသတၢင်းသိူဝ်းပျေႃႇလႄႈဢွၵ်ႇသေၵႃႈၼႂ်းမိူင်းမႃႇၵေႇတေႃးၼိၵႂႃႇယူႇၼၼ်ႉၸိုင်လိူဝ်သေၼၼ်ႉၼၼ်ႉ၊ၸိူဝ်းၸဝ်ႈဢၼ်လႂ်ၵေႃႈဢမ်ႇပၼ်တၢင်းလူႇတၢင်းတၢၼ်း၊ဢမ်ႇၶၢမ်ႇဢဝ်တၢင်းလူႇတၢင်းတၢၼ်းလူၺ်ႈၵၼ်တင်းၵဝ်။

၁၆ ၼႂ်းမိူဝ်ႈဢၼ်ၵဝ်မီးယူႇၼႂ်းဝဵင်းထိတ်ႉသႃႇလေႃးၼိၵ်ႈၼၼ်ႉၵေႃႈ၊သူပၼ်မႃးလွင်ႈတၢင်းဢၼ်ၵဝ်လူဝ်ႇထႅင်ႈၼၼ်ႉထူၼ်ႈထိုင်သွင်ပွၵ်ႈဢေႃႈ။

၁၇ မိူဝ်ႈဢၼ်ၵဝ်ဝႃႈၸိူဝ်ႉၼင်ႇၼႆၸိုင်၊ၵဝ်ႁႃဢဝ်တၢင်းလူႇတၢင်းတၢၼ်းဢမ်ႇၸႂ်ႈ။ၵဝ်ႁႃဢဝ်ဢၵျူဝ်းဢၼ်တဵမ်ထူၼ်ႈလိူင်ႇၸႂ်ၼၼ်ႉၵႃႈတီႈသူဢေႃႈ။

၁၈ မိူဝ်ႈလဵဝ်ၼႆႉၵဝ်လႆႈၶၢမ်ႇတၢင်းဢၼ်ပၼ်ၼႂ်းလွင်ႈတၢင်းၵူႈၸိူဝ်ႉၵူႈပိူင်ပေႃးၵုမ်ႇၼမ်သေဢၼ်ၵဝ်လူဝ်ႇၼၼ်ႉဢေႃႈ။ၵွပ်ႈပိူဝ်ႈဢၼ်ၵဝ်လႆႈၶၢမ်ႇဢဝ်လွင်ႈတၢင်းၸိူဝ်းဢၼ်သူပၼ်မႃးဢၼ်ဝႃႈ၊ဢၢႆႁွမ်ဢၢႆႁူၺ်းယိၸ်ႉဢၼ်ၽြႃးပဵၼ်ၸဝ်ႈထုၵ်ႇၸႂ်ၵျိူၵ်ႈၸႂ်ၼၼ်ႉၵႃႈၼႂ်းမိုဝ်းဢေႇပၽရေႃႇတိတ်ႉလႄႈၵဝ်တဵမ်ထူၼ်ႈလိူင်ႇၸႂ်ယူႇဢေႃႈ။

၁၉ ၽြႃးပဵၼ်ၸဝ်ႈၵဝ်ၼၼ်ႉတၵ်းႁႂ်ႈၵႃႈဢၼ်သူမီးဢလူဝ်ႇၼၼ်ႉတဵမ်ထူၼ်ႈၼႂ်းၸဝ်ႈယေႇသုၶရိၸ်ႉၸွမ်းၵႃႈၼင်ႇဢၼ်မၼ်းၸဝ်ႈမီးၸေးၸိမ်ႇဢၼ်မၼ်းၸဝ်ႈၸၢမ်ႇၸႃးၼႂ်းမူၼ်ဢႃႇၼူႉၽေႃႇၸဝ်ႈယူႇၼၼ်ႉဢေႃႈ။

၂၀ ႁႂ်ႈမူၼ်ၽုင်းၽြႃးပဵၼ်ၸဝ်ႈႁဝ်းဢၼ်ပဵၼ်ၸဝ်ႈပေႃႈၼၼ်ႉယႂ်ႇၼႃႇၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈသေၵမ်းလူၺ်ႈ။ဢႃႈမိၼ်ႈ။

၂၁ တၵ်ႉလၢတ်ႈၵူၼ်းမူတ်းၸၢင်ႇဢၼ်မီးၼႂ်းၸဝ်ႈယေႇသုၶရိၸ်ႉၼၼ်ႉၵူႈၵေႃႉၵူႈၵူၼ်းတႃႉ။ပီႈၼွင်ႉဢၼ်မီးယူႇလူၺ်ႈၵၼ်တင်းၵဝ်ၸိူဝ်းၼႆႉတၵ်ႉၼၢႆသူဢေႃႈ။

၂၂ ၵူၼ်းမူတ်းၸၢင်ႇတင်းသဵင်ႈတင်းလူင်တၵ်ႉၼၢႆသူဢေႃႈ။ၵူၼ်းမူတ်းၸၢင်ႇဢၼ်ယူႇၼႂ်းႁေႃၶမ်းၶုၼ်လူင်ၵေႇသႃႇတင်းလၢႆတၵ်ႉၼၢႆသူလူင်လူင်လၢင်လၢင်ဢေႃႈ။

ႁႂ်ႈၵျေးၸူးၸဝ်ႈယေႇသုၶရိၸ်ႉမီးၼိူဝ်သူတင်းသဵင်ႈတင်းလူင်သေၵမ်းလူၺ်ႈ။ဢႃႈမိၼ်ႈ။