Shan Missions

လိၵ်ႈဢေႃးဝႃႇတႃ့ယႃႇၵုပ်ႉ

Chapter           ၁          ၂          ၃          ၄          ၅         

၂

ဢမ်ႇတူၺ်းၼႃႈလဵၵ်ႉၼႃႈယႂ်ႇ

၁ ပီႈၼွင်ႉၵဝ်တင်းလၢႆဢိူၺ်း၊ၼႂ်းလွင်ႈတၢင်းဢၼ်ယုမ်ႇမၢတ်ႈၸဝ်ႈႁဝ်းၸဝ်ႈယေႇသုၶရိၸ်ႉဢၼ်မီးမူၼ်ယႂ်ႇၼႃႇၼၼ်ႉယႃႇပေတူၺ်းၼႃႈလဵၵ်ႉၼႃႈယႂ်ႇ။

၂ ပေႃးၵေႃႉဢၼ်တိုဝ်းမွင်းၵူၺ်းၶမ်းလႄႈၼုင်ႈၶူဝ်းဢၼ်ႁၢင်ႊလီႁၢင်ႊငၢမ်းၼၼ်ႉၵေႃႉၼိုင်ႈဢိၵ်ႇတင်းၵေႃႉဢၼ်ယၢၵ်ႈဢၼ်ၽၢၼ်လႄႈၼုင်ႈၶူဝ်းဢၼ်ယွၵ်းဢၼ်ၶၢတ်ႇၼၼ်ႉၵေႃႉၼိုင်ႈၶဝ်ႈမႃးၵႃႈၼႂ်းၸရွပ်ႈႁေႃးတြႃးၸိုင်

၃ ပေႃးသူလူႈတူၺ်းၵေႃႉဢၼ်ၼုင်ႈၶူဝ်းဢၼ်ႁၢင်ႊလီႁၢင်ႊငၢမ်းၼၼ်ႉလႄႈလၢတ်ႈတီႈမၼ်းဝႃႈ၊-ၼင်ႈၵႃႈတီႈဢၼ်လီဢၼ်ငၢမ်းၼႆႉသေၵမ်းၶႃႈ၊ဝႃႈၼင်ႇၼႆလႄႈသမ်ႉလၢတ်ႈတီႈၵေႃႉဢၼ်ယၢၵ်ႈဢၼ်ၽၢၼ်ၼၼ်ႉလႄႈဝႃ၊-ၸုၵ်းယူႇၵႃႈတီႈပုၼ်ႉတႃႉ။ဢမ်ႇၼၼ်ၵေႃႈတေဝႃႈ၊-

၄ ၼင်ႈၵႃႈတီႈႁိမ်းၶူင်ႇတီႈတၢင်ႇတိၼ်ၵဝ်ၼႆႉတႃႉ၊ဝႃႈၼင်ႇၼႆၸိုင်သူမီးၸႂ်ဢၼ်တူၺ်းၼႃႈလဵၵ်ႉၼႃႈယႂ်ႇလႄႈပဵၼ်ၵူၼ်းဢၼ်ပႃးတၢင်းၵျၢမ်ႇတၢင်းပွင်ဢၼ်ဢမ်ႇလီဢမ်ႇငၢမ်းဢမ်ႇၸႂ်ႈႁိုဝ်။

၅ ပီႈၼွင်ႉဢၼ်ၵဝ်ႁၵ်ႉၶဝ်ဢိူၺ်း၊ထွမ်ႇငိၼ်းသေၵမ်း။ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼႂ်းလေႃးၵႃႉၼႆႉႁႂ်ႈၶဝ်မၢၵ်ႈမီးၼႂ်းတၢင်းဢၼ်ယုမ်ႇမၢတ်ႈဢိၵ်ႇတင်းႁႂ်ႈၶဝ်ပဵၼ်ၵေႃႉဢၼ်ၶၢမ်ႇဢမူၺ်ႇမိူင်းၸဝ်ႈဢၼ်မၼ်းၸဝ်ႈဝႆႉၵတိလႄႈဝႃႈ၊-တၵ်းပၼ်တီႈၶဝ်ၸိူဝ်းဢၼ်ႁၵ်ႉမၼ်းၸဝ်ႈၼၼ်ႉဢေႃႈ၊ဝႃႈၼင်ႇၼႆဢမ်ႇၸႂ်ႈႁိုဝ်။

၆ သူႁဵတ်းဢမ်ႇပေႃးၼင်ႇႁိုဝ်ၵႃႈတီႈၵူၼ်းဢၼ်ယၢၵ်ႈဢၼ်ၽၢၼ်ၼၼ်ႉလူင်ပေႇ။ၶဝ်ၸိူဝ်းဢၼ်မၢၵ်ႈမီးၼၼ်ႉၼိၵ်ႈၸၢၵ်ႈငႅၼ်းသေးသူဢမ်ႇၸႂ်ႈႁိုဝ်။

၇ တိုတ်ႉၸၼ်ဢဝ်သူၵႂႃႇၵႃႈတီႈလုမ်းဢၼ်ၸီႇယၢင်ႇတြႃးၼၼ်ႉဢမ်ႇၸႂ်ႈႁိုဝ်။ၶဝ်သေႉသွမ်းၼႃႇမႃႉၸိုဝ်သဵင်ၸဝ်ႈမျၢတ်ႈဢၼ်သူလႆႈၶၢမ်ႇတၢင်းဢၼ်ႁွင်ႉႁိၵ်ႈၸွမ်းယဝ်ႉၼၼ်ႉဢမ်ႇၸႂ်ႈႁိုဝ်။

၈ ပေႃးသူပႂ်ႉၵမ်ပႂ်ႉၸွမ်းပိင်းၺၢပ်ႈၶမ်းၸဝ်ႈၵႃႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-မႂ်းတၵ်းလႆႈႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉမိူၼ်ၸိူဝ်ႉၼင်ႇမႂ်းႁၵ်ႉတူဝ်မႂ်းၼၼ်ႉဢေႃႈ၊ဝႃႈၼင်ႇၼႆၼၼ်ႉၸိုင်၊သူပဵၼ်ၵေႃႉဢၼ်ၵမ်ၵျၢင်ႉလီလီငၢမ်းငၢမ်းယဝ်ႉ။

၉ ပေႃးဢမ်ႇၼၼ်ပေႃးသူတူၺ်းၼႃႈၵူၼ်းၸိုင်သူပဵၼ်ၵေႃႉဢၼ်ႁဵတ်းဢပျႅတ်ႈတူႉၸရိူၵ်ႈဢေႃႈ။လွင်ႈဢၼ်ဝႃႈသူပဵၼ်ၵေႃႉဢၼ်ပူၼ်ႉလိူဝ်တြႃးၼၼ်ႉထၢင်ႇသႃးဝႆႉယူႇၵွပ်ႈပိူဝ်ႈပိင်းၺၢပ်ႈတြႃးၸဝ်ႈဢေႃႈ။

၁၀ ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်းၽူႈလႂ်သေဢမ်ႇဝႃႈပေႃးၽိတ်းပိူင်ႈပိင်းၺၢပ်ႈတြႃးမဵဝ်းၼိုင်ႈၵူၺ်းၼႆၵေႃႈပဵၼ်ၵေႃႉဢၼ်မီးဢပျႅတ်ႈမိူၼ်ၸိူဝ်ႉၼင်ႇပူၼ်ႉလိူဝ်ပိင်းၺၢပ်ႈတြႃးတင်းသဵင်ႈတင်းမူတ်းၼၼ်ႉဢေႃႈ။

၁၁ မၼ်းၸဝ်ႈပိင်းၺၢပ်ႈဝႆႉလႄႈဝႃႈ၊-ယႃႇပေၽိတ်းပိူင်ႈမေးပိူၼ်ႈ၊ဝႃႈၼင်ႇၼႆဢေႃႈ။သမ်ႉပိင်းၺၢပ်ႈဝႆႉထႅင်ႈလႄႈဝႃႈ၊-ယႃႇပေဢဝ်ဢသၢၵ်ႈၵူၼ်းတၢႆ၊ဝႃႈၼင်ႇၼႆဢေႃႈ။ပိူဝ်ႈၼႆလႄႈပဵၵ်ႉသမ်ႉဝႃႈမႂ်းဢမ်ႇၽိတ်းဢမ်ႇပိူင်ႈမေးပိူၼ်ႈသေၵေႃႈယႃႇပေႃးမႂ်းဢဝ်ဢသၢၵ်ႈၵူၼ်းတၢႆၸိုင်ပဵၼ်ဢၼ်ပူၼ်ႉလိူဝ်ပိင်းၺၢပ်ႈတြႃးယဝ်ႉဢေႃႈ။

၁၂ လၢတ်ႈၵႂၢမ်းလႄႈၵမ်ၵျၢင်ႉမိူၼ်ၸိူဝ်ႉၼင်ႇၵေႃႉဢၼ်တၵ်းလႆႈၶၢမ်ႇတၢင်းဢၼ်ၸီႇယၢင်ႇၸွမ်းၼင်ႇတြႃးတၢင်းဢၼ်ပွႆႇလွတ်ႈၼၼ်ႉတႃႉ။

၁၃ လွင်ႈမၼ်းၸမ်းၵေႃႉဢၼ်ဢမ်ႇမီးၵရူႉၼႃႇၼၼ်ႉယင်းဢမ်ႇလႆႈၶၢမ်ႇဢဝ်ၵရူႉၼႃႇလႄႈတၵ်းလႆႈၶၢမ်ႇတၢင်းဢၼ်ၸီႇယၢင်ႇတြႃးဢေႃႈ။ၵရူႉၼႃႇၸိုင်ၸၢင်ႊပႄႉၼႅင်ႇတၢင်းဢၼ်ၸီႇယၢင်ႇတြႃးလႄႈဢုပ်ႇဝၢဝ်းဢေႃႈ။

တၢင်းႁဵတ်းပဵၼ်သၢၵ်ႈသေႇတၢင်းယုမ်ႇမၢတ်ႈ

၁၄ ပီႈၼွင်ႉၵဝ်တင်းလၢႆၶဝ်ဢိူၺ်း၊ပေႃးသေၵေႃႉသေၵူၼ်းဝႃႈ၊-ၵဝ်မီးတၢင်းယုမ်ႇမၢတ်ႈဢေႃႈ၊ဝႃႈၼင်ႇၼႆသေလႄႈယင်းဢမ်ႇမီးတၢင်းႁဵတ်းတၢင်းသၢင်ႈၸိုင်တၵ်းမီးဢၵျူဝ်းၵႃႈသင်။တၢင်းယုမ်ႇမၢတ်ႈမၼ်းတၵ်းၵႄႇၶျွတ်ႈဢဝ်မၼ်းလႆႈႁိုဝ်။

၁၅ ပေႃးပီႈၸၢႆးၼွင်ႉၸၢႆးလႂ်ပီႈၼၢင်းၼွင်ႉယိင်းလႂ်ဢမ်ႇမီးၶူဝ်းၼုင်ႈတင်းမႆႊဢမ်ႇမီးတၢင်းၵိၼ်တၢင်းၶူပ်းသေဝၼ်းၵေႃႈပေႃးသူသမ်ႉၵူၺ်းလၢတ်ႈတီႈၶဝ်လႄႈဝႃႈ၊-ၵႂႃႇၼိမ်ၼိမ်တႃႉ။ဢုၼ်ႇလီလီတႃႉ။

၁၆ ဢိမ်ႇဢိမ်ႇတဵမ်တဵမ်တႃႉ၊ဝႃႈၼင်ႇၼႆၵူၺ်းလႄႈယင်းဢမ်ႇပၼ်ဢၼ်ၶဝ်လူဝ်ႇပုၼ်ႈတူဝ်ၶဝ်ၼၼ်ႉၸိုင်တၵ်းပွင်ႇလွင်ႈၵႃႈသင်။

၁၇ မိူၼ်ၸိူဝ်ႉၼင်ႇၼၼ်တၢင်းယုမ်ႇမၢတ်ႈဢၼ်ဢမ်ႇမီးတၢင်းႁဵတ်းတၢင်းသၢင်ႈၸွမ်းၼၼ်ႉပဵၼ်ဢၼ်တၢႆၵႃႈၼႂ်းတူဝ်ၸဝ်ႈၵဝ်ႇဢေႃႈ။

၁၈ ၼႄးၼိုင်ႈၸမ်းၵမ်ႈၽွင်ႈတၵ်းမီးတီႈဢၼ်လၢတ်ႈလႄႈဝႃႈ၊-မႂ်းမီးတၢင်းယုမ်ႇမၢတ်ႈဢေႃႈ။ၵဝ်မီးတၢင်းႁဵတ်းတၢင်းသၢင်ႈဢေႃႈ။ပိူဝ်ႈၼႆလႄႈယင်းဢမ်ႇမီးတၢင်းႁဵတ်းတၢင်းသၢင်ႈလႄႈၼႄပျႃႉတၢင်းယုမ်ႇမၢတ်ႈမႂ်းလူး။ၵဝ်ၸမ်းတၵ်းဢဝ်တၢင်းႁဵတ်းတၢင်းသၢင်ႈၵဝ်သေလႄႈၼႄပျႃႉတၢင်းယုမ်ႇမၢတ်ႈၵဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၁၉ ၽြႃးပဵၼ်ၸဝ်ႈမီးသူႇလဵဝ်ၵူၺ်းဝႃႈၼႆမႂ်းယုမ်ႇဢေႃႈ။လီယဝ်ႉ။ၽီႁၢႆႉတင်းလၢႆၵေႃႈယုမ်ႇၸိူဝ်ႉၼႆယူႇလႄႈၵူဝ်ႁႄၼႃႇထၼ်ႈပေႃးသၼ်ႇသၢႆယူႇဢေႃႈ။

၂၀ ဢူဝ်း၊ၵေႃႉဢၼ်မဝ်မၢင်ႈၼႆႉဢိူၺ်း၊တၢင်းယုမ်ႇမၢတ်ႈဢၼ်ဢမ်ႇမီးတၢင်းႁဵတ်းတၢင်းသၢင်ႈၸွမ်းၼၼ်ႉပဵၼ်ဢၼ်တၢႆဢၼ်ဝႃႈၼၼ်ႉမႂ်းၶႂ်ႈႁူႉႁိုဝ်။

၂၁ ပေႃႈႁဝ်းဢႃႇပြႁၢမ်ႇၼၼ်ႉမိူဝ်ႈဢၼ်မၼ်းဢဝ်လုၵ်ႈၸၢႆးမၼ်းတၢင်ႇသႂ်ႇၵႃႈၼိူဝ်ယိၸ်ႉပလၢင်ႇသေလႄႈလူႇတၢၼ်းၼၼ်ႉမၼ်းႁွတ်ႈထိုင်တၢင်းသိုဝ်ႈတေႃႇၵွပ်ႈပိူဝ်ႈတၢင်းႁဵတ်းမၼ်းၼၼ်ႉဢမ်ႇၸႂ်ႈႁိုဝ်။

၂၂ မႂ်းလႆႈႁူႉလႆႈႁၼ်လွင်ႈဢၼ်ဝႃႈတၢင်းယုမ်ႇမၢတ်ႈၼၼ်ႉပွင်ႁဵတ်းပွင်မႄးလူၺ်ႈၵၼ်တင်းတၢင်းႁဵတ်းတၢင်းသၢင်ႈလႄႈႁွတ်ႈထိုင်တၢင်းဢၼ်ၸေးၸုမ်ႇၵွပ်ႈပိူဝ်ႈတၢင်းႁဵတ်းတၢင်းသၢင်ႈၼၼ်ႉဢေႃႈ။

၂၃ ၵႂၢမ်းၵျၢမ်းလိၵ်ႈဢၼ်ဝႃႈ၊ဢႃႇပြႁၢမ်ႇယုမ်ႇမၢတ်ႈၽြႃးပဵၼ်ၸဝ်ႈလႄႈမၼ်းၸဝ်ႈမၢတ်ႈတၢင်းယုမ်ႇမၢတ်ႈမၼ်းပဵၼ်ၸိူဝ်ႉၼင်ႇတၢင်းဢၼ်သိုဝ်ႈတေႃႇဢေႃႈ၊ဝႃႈၼင်ႇၼႆၼၼ်ႉ၊တဵမ်ထူၼ်ႈယဝ်ႉဢေႃႈ။ဢႃႇပြႁၢမ်ႇၼၼ်ႉၵေႃႈလႆႈၶၢမ်ႇတၢင်းဢၼ်ႁွင်ႉႁိၵ်ႈၵေႃႉသေႈၽြႃးပဵၼ်ၸဝ်ႈဢေႃႈ။

၂၄ သူလႆႈႁူႉလႆႈႁၼ်လွင်ႈဢၼ်ဝႃႈၵူၼ်းႁဝ်းဢမ်ႇႁွတ်ႈထိုင်တၢင်းဢၼ်သိုဝ်ႈတေႃႇလႆႈၵွပ်ႈပိူဝ်ႈတၢင်းဢၼ်ယုမ်ႇမၢတ်ႈဢၼ်လဵဝ်ၵူၺ်းၼၼ်ႉလႄႈႁွတ်ႈထိုင်တၢင်းဢၼ်သိုဝ်ႈတေႃႇၵွပ်ႈပိူဝ်ႈႁဵတ်းၸွမ်းၼၼ်ႉဢေႃႈ။

၂၅ မိူၼ်ၸိူဝ်ႉၼင်ႇမေႈမွၵ်ႇယႃႈရႃႇၶၢပ်ႉၼၼ်ႉပိူဝ်ႈဢၼ်မၼ်းႁပ်ႉတုင်းဢဝ်ၵူၼ်းၸႂ်ႉၵူၼ်းသွႆၸိူဝ်းၼၼ်ႉလႄႈပွႆႇၶဝ်ၵႂႃႇၸွမ်းတၢင်းတၢင်ႇသဵၼ်ႈၼၼ်ႉမၼ်းႁွတ်ႈထိုင်တၢင်းဢၼ်သိုဝ်ႈတေႃႇၵွပ်ႈပိူဝ်ႈတၢင်းႁဵတ်းမၼ်းၼၼ်ႉဢမ်ႇၸႂ်ႈႁိုဝ်။

၂၆ ၸိူဝ်ႉၼင်ႇဢၼ်တူဝ်ၵႃႇယႃႉဢၼ်ၵၢင်းလွတ်ႈတင်းၸႂ်ဝိၺိၺ်ႇၼၼ်ႉပဵၼ်ဢၼ်တၢႆၼၼ်ႉတၢင်းယုမ်ႇမၢတ်ႈဢၼ်ဢမ်ႇမီးတၢင်းႁဵတ်းတၢင်းသၢင်ႈၼၼ်ႉၵေႃႈပဵၼ်ဢၼ်တၢႆဢေႃႈ။