Rev 19

ၵျၢမ်းပျႃႇတိၵ်ႉ

Chapter ၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆ ၁၇

၁၉

၁ လိုၼ်းၼၼ်ႉၵဝ်ငိၼ်းသဵင်ၶဝ်ၸိူဝ်းဢၼ်ၸူႉၵၼ်တုမ်ၵၼ်ၼမ်ၼႃႇၵႃႈၼိူဝ်ၵၢင်ႁၢဝ်ၼၼ်ႉလႄႈဝႃႈ၊-ႁႃလေႇလုယႃႇ။တၢင်းဢၼ်ၵတ်းယဵၼ်ၶျၢမ်းသႃႇ၊တၢင်းဢၼ်ၵႄႇၶျွတ်ႈဢဝ်မုၼ်သရေႇတၼ်းၶူဝ်းမီးတီႈၽြႃးပဵၼ်ၸဝ်ႈႁဝ်းတီႈၶႃႈဢေႃႈ။

၂ လွင်ႈတၢင်းဢၼ်မၼ်းၸဝ်ႈၸီႇယၢင်ႇၸိူဝ်းၼၼ်ႉမၢၼ်ႇမႅၼ်ႈၸိုဝ်ႈၸႂ်ႈသိုဝ်ႈတေႃႇတီႈၶႃႈဢေႃႈ။မၼ်းၸဝ်ႈၸႅတ်ႈတူၺ်းၸီႇယၢင်ႇမေႈမွၵ်ႇယႃႈလူင်ဢၼ်ႁႂ်ႈလိၼ်မိူင်းတူႇၼဝ်ႈၵွပ်ႈပိူဝ်ႈမေႇထုင်ႇဢၼ်ဢမ်ႇတြႃးမၼ်းၼၼ်ႉယဝ်ႉ။မၼ်းၸဝ်ႈပၼ်တၢမ်ႇဢပျႅတ်ႈၸွမ်းၼင်ႇလိူတ်ႈၶႃႈမၼ်းၸဝ်ႈတင်းလၢႆဢၼ်မၼ်းဢဝ်မိုဝ်းမၼ်းထွၵ်ႇပႅတ်ႈၼၼ်ႉတီႈၶႃႈယဝ်ႉဝႃႈၼင်ႇၼႆဢေႃႈ။

၃ ၵမ်းၼၼ်ႉပွၵ်ႈတုတိယၶဝ်လၢတ်ႈလႄႈဝႃႈ၊-ႁႃႇလေႇလုယႃႇ၊ဝႃႈၼင်ႇၼႆဢေႃႈ။ၵႂၼ်းၽႆးမၼ်းၼၼ်ႉၶိုၼ်ႈယူႇၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈဢေႃႈ။

၄ ၶဝ်ၸိူဝ်းဢၼ်ဢသၢၵ်ႈယႂ်ႇသၢဝ်းသီႇပႃး၊ဢိၵ်ႇတင်းသတ်ႉတဝႃႇသီႇပႃး၊ၶုပ်ႉမူပ်ႇလႄႈၵူဝ်းၵႂၢႆႇၽြႃးပဵၼ်ၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉသေလႄႈလၢတ်ႈဝႃႈ၊-ဢႃႈမိၼ်ႈ၊ႁႃႇလေႇလုယႃႇ၊ဝႃႈၼင်ႇၼႆဢေႃႈ။

၅ သဵင်ဢၼ်ဢွၵ်ႇသေၵႃႈၼႂ်းပလၢင်ႇၸဝ်ႈမႃးလႄႈဝႃႈၸမ်း၊-ၶႃႈၽြႃးပဵၼ်ၸဝ်ႈတင်းသဵင်ႈတင်းလူင်ဢိၵ်ႇတင်းၶဝ်ၸိူဝ်းဢၼ်ရူဝ်ႇသေႇၵူဝ်ယမ်မၼ်းၸဝ်ႈၸဵမ်လဵၵ်ႉၸဵမ်ယႂ်ႇၵႃႈမီးၶဝ်ဢိူၺ်း၊ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈႁဝ်းတႃႉ၊ဝႃႈၼင်ႇၼႆဢေႃႈ။

၆ ၵမ်းၼၼ်ႉၵဝ်ငိၼ်းသဵင်ပဵၼ်ၸိူဝ်ႉၼင်ႇသဵင်ၵူၼ်းၼမ်ၼႃႇဢၼ်ၸူႉၵၼ်တုမ်ၵၼ်ၸိူဝ်ႉၼင်ႇသဵင်ၼမ်ႉသမ်ႇမုၵ်ႉတြႃႇၸိူဝ်ႉၼင်ႇသဵင်ၽႃႉလင်ႊဢၼ်ႁႅင်းၼႃႇၼၼ်ႉလၢတ်ႈလႄႈဝႃႈ၊-ႁႃႇလေႇလုယႃႇ။ထႃႇဝရႃႉၽြႃးပဵၼ်ၸဝ်ႈႁဝ်းဢၼ်တဵမ်ဝႆႉတင်းဢၼၼ်ႇတႃႉတၼ်းၶူဝ်းၼၼ်ႉဢုပ်ႉပိူင်ႇၸၢမ်ႇၸႃးတီႈၶႃႈဢေႃႈ။

၇ ဢွၼ်ၵၼ်ၸူမ်းသိူဝ်းလႄႈမူၼ်ႈပျေႃႇတႃႉႁဝ်း။ဢွၼ်ၵၼ်ယွင်ႈယေႃးမူၼ်မၼ်းၸဝ်ႈတႃႉႁဝ်း။လွင်ႈမၼ်းၸမ်းၶိင်ႇဢၼ်ၶၢမ်ႇပွႆးမင်ႇၵလႃႇသူဝ်းဢွၼ်ႇႁွတ်ႈထိုင်ယဝ်ႉ။ၽူႈယိင်းမၼ်းၵေႃႈႁၢင်ႈၶိူင်ႈတူဝ်ၸဝ်ႈၵဝ်ႇယဝ်ႉ၊ဝႃႈၼင်ႇၼႆဢေႃႈ။

၈ ၽူႈယိင်းၼၼ်ႉလႆႈၼုင်ႈမႆႊပိၵ်ႈၶျေႃးဢၼ်ႁိူဝ်ႈႁိူင်းလႄႈမူတ်းသႂ်ၼၼ်ႉဢေႃႈ။ပိၵ်ႈၶျေႃးၼၼ်ႉၸမ်းပဵၼ်တၢင်းဢၼ်သိုဝ်ႈတေႃႇၵူၼ်းမူတ်းၸၢင်ႇတင်းလၢႆဢေႃႈ။

တမၢၼ်ႇၵၢင်ႁၢဝ်ၼၼ်ႉၵေႃႈလၢတ်ႈလႄႈဝႃႈ၊-

၉ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းၵႂႃႇၵႃႈတီႈပွႆးသွင်ႇမင်ႇၵလႃႇသူဝ်းဢွၼ်ႇၼၼ်ႉမီးမင်ႇၵလႃႇဢေႃႈ၊ဝႃႈၼႆတႅမ်ႈဝႆႉတႃႉ၊ဝႃႈၼင်ႇၼႆဢေႃႈ။မၼ်းၵေႃႈသမ်ႉလၢတ်ႈလႄႈဝႃႈ၊-ၵႂၢမ်းၼႆႉပဵၼ်ၵႂၢမ်းဢၼ်ဢွၵ်ႇၵႃႈၼႂ်းသူပ်းၽြႃးပဵၼ်ၸဝ်ႈဢမၢၼ်ႇၶၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။

၁၀ ၵဝ်ၶုပ်ႉမူပ်ႇႁိမ်းတိၼ်မၼ်းလႄႈႁႂ်ႈလႆႈၵူဝ်းၵႂၢႆႇမၼ်းဢေႃႈ။မၼ်းၵေႃႈလၢတ်ႈတီႈၵဝ်လႄႈဝႃႈ၊-ယႃႇပေႁဵတ်းသေၵမ်း။ၵဝ်ၸမ်းပဵၼ်ၵေႃႉဢၼ်သၢင်ႈႁဵတ်းလူၺ်ႈၵၼ်တင်းသူလႄႈၶဝ်ႈပႃးၼႂ်းပီႈၼွင်ႉသူၸိူဝ်းဢၼ်ၶၢမ်ႇသၢၵ်ႈသေႇၸဝ်ႈယေႇသုၼၼ်ႉဢေႃႈ။ၵူဝ်းၵႂၢႆႇၽြႃးပဵၼ်ၸဝ်ႈတႃႉ။လွင်ႈမၼ်းၸမ်းသၢၵ်ႈသေႇၸဝ်ႈယေႇသုၸမ်းပဵၼ်သၽေႃးၵႂၢမ်းဢၼ်ပရေႃးၽႅတ်ႈတင်းလၢႆႁေႃးလၢတ်ႈဝႆႉယဝ်ႉၼၼ်ႉဢေႃႈ၊ဝႃႈၼင်ႇၼႆဢေႃႈ။

တၢင်းသုမ်းတူဝ်ထိူၼ်ႇႁၢႆႉတင်းမိၵ်ႉသႃႇပရေႃးၽႅတ်ႈ

၁၁ မိူဝ်ႈၼၼ်ႉၵဝ်ႁၼ်မိူင်းၵၢင်ႁၢဝ်ၽုၺ်ႇပိုတ်ႇဝႆႉဢေႃႈ။မီးမႃႉၽိူၵ်ႇလႄႈၵေႃႉဢၼ်ၶီႇမႃႉၼၼ်ႉလႆႈၼႃႇမႃႉၸိုဝ်သဵင်ဢၼ်ဝႃႈသႅတ်ႈၸႃႇ၊ဢိၵ်ႇတင်း၊သမ်ႇမႃႇဢေႃႈ။ၵေႃႉၼၼ်ႉၸၢင်ႊၸီႇယၢင်ႇၸွမ်းၼင်ႇတြႃးဢေႃႈ။

၁၂ ၸၢင်ႊတိုၵ်းသိုၵ်းၸွမ်းၼင်ႇတြႃးဢေႃႈ။မၢၵ်ႇတႃၸဝ်ႈၼၼ်ႉပဵၼ်ၸိူဝ်ႉၼင်ႇပိဝ်ၽႆးဢေႃႈ။ၵႃႈၼိူဝ်ႁူဝ်ၸဝ်ႈၵေႃႈတိုဝ်းသရၽူႇၼမ်ၼႃႇဢေႃႈ။ၼႃႇမႃႉၸိုဝ်သဵင်ဢၼ်ၽူႈလႂ်ဢမ်ႇႁူႉလႄႈတူဝ်ၸဝ်ႈၵဝ်ႇၵူၺ်းႁူႉၼၼ်ႉတႅမ်ႈဝႆႉၵႃႈၼိူဝ်မၼ်းၸဝ်ႈဢေႃႈ။

၁၃ မၼ်းၸဝ်ႈၼုင်ႈမႆႊၶူဝ်းၼုင်ႈဢၼ်ၸုမ်ႇသႂ်ႇၵႃႈၼႂ်းလိူတ်ႈၼၼ်ႉဢေႃႈ။မၼ်းၸဝ်ႈမီးၼႃႇမႃႉၸိုဝ်ႈသဵင်ဢၼ်ႁွင်ႉႁိၵ်ႈဝႃႈၼုၵ်ႉၵပၢတ်ႈၽြႃးပဵၼ်ၸဝ်ႈ၊ဢၼ်ဝႃႈၼၼ်ႉဢေႃႈ။

၁၄ ပူဝ်ႇပႃႇၵၢင်ႁၢဝ်တင်းလၢႆၶီႇမႃႉၽိူၵ်ႇလႄႈၼုင်ႈမႆႊပိၵ်ႈၶျေႃးၽိူၵ်ႇဢၼ်မူတ်းသႂ်ယူႇသေလႄႈၸွမ်းၽၢႆႇတၢင်းလင်မၼ်းၸဝ်ႈဢေႃႈ။

၁၅ လၢပ်ႇသၢၼ်ႇလျၢၵ်ႈဢၼ်ၽၢႆၼႃႇၼၼ်ႉဢွၵ်ႇၵႃႈၼႂ်းသူပ်းမၼ်းၸဝ်ႈမႃးပုၼ်ႈဢၼ်တၵ်းလႆႈပၼ်တၢမ်ႇတီႈၵူၼ်းမဵဝ်းတင်းလၢႆဢေႃႈ။မၼ်းၸဝ်ႈတၵ်းဢဝ်တင်းၵၼ်းႁွၵ်ႇလဵၵ်းလႄႈဢုပ်ႉပိူင်ႇၶဝ်ဢေႃႈ။တၵ်းတဵင်ယဵပ်ႇတီႈဢၼ်ယဵပ်ႇမၢၵ်ႇၸပိတ်ႉတေႃးသႃႉတင်းၸႂ်မႆႈၽြႃးပဵၼ်ၸဝ်ႈဢၼၼ်ႇတႃႉတၼ်းၶူဝ်းၼၼ်ႉဢေႃႈ။

၁၆ ၼႃႇမႃႉၸိုဝ်သဵင်ဢၼ်ဝႃႈ၊-ၶုၼ်ႁေႃၶမ်းၼိူဝ်ၶုၼ်ႁေႃၶမ်းတင်းသဵင်ႈတင်းလူင်ၸဝ်ႈၼိူဝ်ၸဝ်ႈတင်းသဵင်ႈတင်းလူင်ဝႃႈၼင်ႇၼႆၼၼ်ႉတႅမ်ႈဝႆႉမီးယူႇၵႃႈတီႈၶူဝ်းၼုင်ႈမၼ်းၸဝ်ႈဢိၵ်ႇတင်းၵႃႈတီႈတပ်ႉၶႃမၼ်းၸဝ်ႈဢေႃႈ။

၁၇ ၵဝ်ႁၼ်တမၢၼ်ႇၵၢင်ႁၢဝ်ပႃးၼိုင်ႈၸုၵ်းယူႇၵႃႈၼႂ်းလႅတ်ႇဢေႃႈ။မၼ်းႁဵတ်းတင်းသဵင်ဢၼ်ယႂ်ႇၼႃႇႁွင်ႉတီႈၼူၵ်ႉဢၼ်ၸၢင်ႊမိၼ်ၼိူဝ်ၽႃႉၵၢင်ႁၢဝ်ၵႃႈမီးၼၼ်ႉလႄႈဝႃႈ၊-

၁၈ ဢွၼ်ၵၼ်မႃးတႃႉ။ၸူႉၵၼ်တုမ်ၵၼ်တီႈပွႆးၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇၼႆႉလႄႈႁႂ်ႈလႆႈၵိၼ်ၼိူဝ်ႉၶုၼ်ႁေႃၶမ်း၊ၼိူဝ်ႉၵူၼ်းလူင်ဢၼ်ဢုပ်ႉသိုၵ်း၊ၼိူဝ်ႉၵူၼ်းဢၼ်ႁတ်းႁၢၼ်ၼိူဝ်ႉမႃႉ၊ၼိူဝ်ႉၶဝ်ၸိူဝ်းဢၼ်ၶီႇမႃႉ၊ၼိူဝ်ႉၵူၼ်းၵူႈမဵဝ်း၊ၸႃႉၸဵမ်ၶႃႈတင်းၵူၼ်းလွတ်ႈလဵၵ်ႉလဵၵ်ႉယႂ်ႇယႂ်ႇၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။

၁၉ ၵဝ်ႁၼ်ၸႃႉၸဵမ်တူဝ်ထိူၼ်ႇႁၢႆႉလႄႈၶုၼ်ႁေႃၶမ်းလေႃးၵီႇဢိၵ်ႇတင်းပူဝ်ႇပႃႇၶဝ်တင်းလၢႆၼၼ်ႉၸူႉၵၼ်တုမ်ၵၼ်ယူႇႁႂ်ႈလႆႈတိုၵ်းတေႃးၸဝ်ႈဢၼ်ၶီႇမႃႉဢိၵ်ႇတင်းပူဝ်ႇပႃႇမၼ်းၸဝ်ႈၸိူဝ်းၼၼ်ႉဢေႃႈ။

၂၀ တူဝ်ထိူၼ်ႁၢႆႉၼၼ်ႉလႆႈၶၢမ်ႇတၢင်းဢၼ်တီႉဢဝ်လူၺ်ႈၵၼ်တင်းမိၵ်ႉသႃႇပရေႃးၽႅတ်ႈဢၼ်ၸၢင်ႊႁဵတ်းၼီႉမိၵ်ႈလၵ်ႈၶၼႃႇၵႃႈတီႈၽၢႆႇၼႃႈတူဝ်ထိူၼ်ႇႁၢႆႉသေလႄႈပႅတ်ႉလႅၼ်ၶဝ်ၸိူဝ်းဢၼ်ၶၢမ်ႇတၼ်းသိၵ်ႈလၢၵ်ႈမၢတ်ႈတူဝ်ထိူၼ်ႇႁၢႆႉလႄႈၵူဝ်းၵႂၢႆႇရူၵ်ႈထူႉမၼ်းၸိူဝ်းၼၼ်ႉဢေႃႈ။သွင်ၶႃၼၼ်ႉဢသၢၵ်ႈလိပ်းယူႇသေလႄႈလႆႈၶၢမ်ႇတၢင်းဢၼ်ၶျႃးတူၵ်းသႂ်ႇၵႃႈၼႂ်းၼွင်ၽႆးဢၼ်မႆႈယူႇတင်းၵၢၼ်ႉၼၼ်ႉဢေႃႈ။

၂၁ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉလႆႈၶၢမ်ႇတၢင်းဢၼ်ဢဝ်တၢႆလူၺ်ႈလၢပ်ႇသၢၼ်ႇလျၢၵ်ႈဢၼ်ဢွၵ်ႇၵႃႈၼႂ်းသူပ်းၸဝ်ႈဢၼ်ၶီႇမႃႉၼၼ်ႉဢေႃႈ။ၼူၵ်ႉတင်းသဵင်ႈတင်းလူင်ၵိၼ်ၼိူဝ်ႉၶဝ်လႄႈဢိမ်ႇတဵမ်ဢေႃႈ။

ထမ်ႇမႃႉ ၵျၢမ်းၵဝ်ႇ

ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ

ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု

လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ

ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ

ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ

ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ

လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ

ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ

ၵျၢမ်းလိၵ်ႈတေႇသၼႃႇ

လိၵ်ႈႁဵတ်းၵႂၢမ်းသေႃးလမုၼ်ႇ ၵျၢမ်းဢၼႃႇၵၢတ်ႈတိဢိသႃႇယ

ၵျၢမ်းဢၼႃႇၵၢတ်ႈတိယေႇရမိ တၢင်းဢၼ်ယေႇရမိပွင်ႉၶင်းပွင်ႉဝႃႈ