Shan Missions

လိၵ်ႈဢေႃးဝႃႇတႃႉၵေႃးရဵၼ်ႇထုၽိုၼ်ပထမ

Chapter       ၁          ၂          ၃         ၄          ၅          ၆           ၇          ၈          ၉           ၁၀          ၁၁          ၁ ၂          ၁၃           ၁၄          ၁၅          ၁၆     

၁၂ 

သူႉၵျေးၸူးဢၼ်ပႅၵ်ႇပိူင်ႈၵၼ်

၁ ပီႈၼွင်ႉၶဝ်ဢိူၺ်း၊ၵဝ်ဢမ်ႇၶႂ်ႈႁႂ်ႈသူဢမ်ႇႁူႉလွင်ႈသူႉၵျေးၸူးဝိၺိၺ်ႇမူတ်းၸၢင်ႇၸဝ်ႈတင်းလၢႆၼၼ်ႉ။

၂ သူႁူႉလွင်ႈဢၼ်မိူဝ်ႈဢၼ်သူပဵၼ်ၵူၼ်းသႃႇသၼႃႇပႃႉၼၼ်ႉၵႃႈၼင်ႇဢၼ်သူလႆႈၶၢမ်ႇတၢင်းဢၼ်ၸူဝ်းဢဝ်ၵႂႃႇၼၼ်ႉသူပဵၼ်ၵေႃႉဢၼ်ပႃးၵႂႃႇၵႃႈတီႈရူၵ်ႈထူႉဢၼ်ဢမ်ႇၸၢင်ႊလၢတ်ႈၵႂၢမ်းလႆႈၼၼ်ႉဢေႃႈ။

၃ ပိူဝ်ႈၼႆလႄႈၵဝ်ပၼ်သတိသူႁႂ်ႈသူႁူႉလွင်ႈဢၼ်ဝႃႈ၊ၵေႃႉဢၼ်ပႃးဝိၺိၺ်ႇၽြႃးပဵၼ်ၸဝ်ႈၼၼ်ႉတေဢမ်ႇဝႃႈတၢင်းဢၼ်ၵိၼ်ႇလႃႇၸဝ်ႈယေႇသု။ၽူႈလႂ်သေဢမ်ႇဝႃႈပေႃးဢမ်ႇပႃးဝိၺိၺ်ႇမူတ်းၸၢင်ႇၸဝ်ႈၸိုင်မၼ်းတေဢမ်ႇဝႃႈ၊-ၸဝ်ႈယေႇသုပဵၼ်ၽြႃး။

၄ ပဵၵ်ႉသမ်ႉသူႉၵျေးၸူးၸဝ်ႈဢမ်ႇမိူၼ်ၵၼ်မီးလၢႆၸိူဝ်ႉလၢႆပိူင်သေၵေႃႈမီးဝိၺိၺ်ႇမူတ်းၸၢင်ႇၸဝ်ႈပႃးလဵဝ်ၵူၺ်းဢေႃႈ။

၅ ပဵၵ်ႉသမ်ႉဢမူႉတၢင်းဢၼ်ပွင်ႁဵတ်းၼၼ်ႉဢမ်ႇမိူၼ်ၵၼ်မီးလၢႆၸိူဝ်ႉလၢႆပိူင်သေၵေႃႈမီးၸဝ်ႈပႃးလဵဝ်ၵူၺ်းဢေႃႈ။

၆ ပဵၵ်ႉသမ်ႉၵၢၼ်တၢင်းႁဵတ်းဢမ်ႇမိူၼ်ၵၼ်မီးလၢႆၸိူဝ်ႉလၢႆပိူင်သေၵေႃႈမီးၽြႃးပဵၼ်ၸဝ်ႈပႃးလဵဝ်ၵူၺ်းဢၼ်ႁဵတ်းၵႃႈၼႂ်းၵူၼ်းတင်းသဵင်ႈတင်းလူင်ၼၼ်ႉဢေႃႈ။

၇ ပုၼ်ႈဢၵျူဝ်းဢၼ်လီၸိုင်မၼ်းၸၢဝ်ႈပၼ်ဝိၺိၺ်ႇမူတ်းၸၢင်ႇၸဝ်ႈတီႈၵူၼ်းၵူႈၵေႃႉႁင်းၽႂ်ႁင်းမၼ်းထၢင်ႇထၢင်ႇသႃးသႃးဢေႃႈ။

၈ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်းၸွမ်းလူၺ်ႈဝိၺိၺ်ႇမူတ်းၸၢင်ႇၸဝ်ႈၼၼ်ႉမၼ်းၸဝ်ႈပၼ်ပိင်ႇၺႃႇတီႈၵူၼ်းၵေႃႉၼိုင်ႈဢေႃႈ။ၸွမ်းလူၺ်ႈဝိၺိၺ်ႇမူတ်းၸၢင်ႇၸဝ်ႈၼၼ်ႉမၼ်းၸဝ်ႈပၼ်ၺၢၼ်ႇဢၼ်ၶုတ်းမူင်ႇၸီးၸွင်ႇႁူႉလႆႈၼၼ်ႉတီႈၵူၼ်းၵေႃႉၼိုင်ႈဢေႃႈ။

၉ ၸွမ်းလူၺ်ႈဝိၺိၺ်ႇမူတ်းၸၢင်ႇၸဝ်ႈၼၼ်ႉမၼ်းၸဝ်ႈပၼ်တၢင်းယုမ်ႇမၢတ်ႈၵႃႈတီႈၵူၼ်းၵေႃႉၼိုင်ႈဢေႃႈ။ၸွမ်းလူၺ်ႈဝိၺိၺ်ႇမူတ်းၸၢင်ႇၸဝ်ႈၼၼ်ႉမၼ်းၸဝ်ႈပၼ်ဢၶႂၢင်ႉတၢင်းဢၼ်ႁဵတ်းႁႂ်ႈတၢင်းၶႆႈတၢင်းပဵၼ်ႁၢႆၼၼ်ႉတီႈၵူၼ်းၵေႃႉၼိုင်ႈဢေႃႈ။

၁၀ မၼ်းၸဝ်ႈပၼ်ဢၶႂၢင်ႉဢၼ်ၸၢင်ႊၼႄပျႃးတၼ်းၶူဝ်းၼၼ်ႉတီႈၵေႃႉၼိုင်ႈဢၶႂၢင်ႉဢၼ်ၸၢင်ႊႁဵတ်းပရေႃးၽႅတ်ႈၼၼ်ႉတီႈၵေႃႉၼိုင်ႈဢၶႂၢင်ႉဢၼ်ၸၢင်ႊၸၵ်းၽႄလႄႈႁူႉၸႂ်ဝိၺိၺ်ႇတင်းလၢႆၼၼ်ႉတီႈၵေႃႉၼိုင်ႈ၊ဢၶႂၢင်ႉဢၼ်ၸၢင်ႊလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ၼၼ်ႉတီႈၵေႃႉၼိုင်ႈဢၶႂၢင်ႉဢၼ်ၸၢင်ႊၽုၺ်ႇၼႄဢထိၵ်ႈပႄႇၵႂၢမ်းၽႃႇသႃႇတၢင်ႇၸိူဝ်ႉတၢင်ႇမဵဝ်းၼၼ်ႉတီႈၵေႃႉၼိုင်ႈဢေႃႈ။

၁၁ ဢၶႂၢင်ႉၵႃႈမီးၸိူဝ်းၼႆႉပဵၼ်ဝိၺိၺ်ႇမူတ်းၸၢင်ႇၸဝ်ႈပႃးလဵဝ်ၵူၺ်းႁဵတ်းပဵၼ်လႄႈမၼ်းၸဝ်ႈမႅင်ႇပၼ်ဢၶႂၢင်ႉၼၼ်ႉတီႈၵူႈၵေႃႉၵူႈၵူၼ်းႁင်းၽႂ်ႁင်းမၼ်းၵႃႈၼင်ႇဢၼ်ဢလူဝ်ႇမၼ်းၸဝ်ႈမီးၼၼ်ႉဢေႃႈ။

ဢမ်ႇမိူၼ်ၵၼ်သေၵေႃႈတေလႆႈၽွမ်ႉၵၼ်

၁၂ ဢူႉပမႃႇမၼ်းၸမ်း၊ၸိူဝ်ႉၼင်ႇဢၼ်ၼႂ်းတူဝ်ဢၼ်ၼိုင်ႈမီးဢင်ႇၵႃႇၼမ်ၼႃႇသေၵေႃႈပဵၼ်တူဝ်ဢၼ်လဵဝ်ၵူၺ်းၼၼ်ႉၼႂ်းၸဝ်ႈၶရိၸ်ႉၵေႃႈပဵၼ်ၸိူဝ်ႉၼင်ႇၼၼ်ဢေႃႈ။

၁၃ လွင်ႈမၼ်းၸမ်းပဵၼ်ၵူၼ်းယုတသေဢမ်ႇဝႃႈ၊ပဵၼ်ၵူၼ်းႁေႇလသသေဢမ်ႇဝႃႈ၊ပဵၼ်ၶႃႈသေဢမ်ႇဝႃႈ၊ပဵၼ်ၵူၼ်းလွတ်ႈသေဢမ်ႇဝႃႈႁဝ်းၵႃႈမီးတင်းသဵင်ႈတင်းလူင်လႆႈၶၢမ်ႇပပ်ႉတိၸၢမ်ႇၼႂ်းဝိၺိၺ်ႇမူတ်းၸၢင်ႇၸဝ်ႈပႃးလဵဝ်ႁႂ်ႈၶဝ်ႈပႃးၼႂ်းတူဝ်ဢၼ်လဵဝ်ၵၼ်ဢေႃႈ။ႁဝ်းၵႃႈမီးတင်းသဵင်ႈတင်းလူင်လႆႈၵိၼ်တီႈဝိၺိၺ်ႇမူတ်းၸၢင်ႇၸဝ်ႈပႃးလဵဝ်ၵူၺ်းဢေႃႈ။

၁၄ ၼႂ်းတူဝ်ၼႆႉမီးဢင်ႇၵႃႇဢၼ်ၼိုင်ႈၵူၺ်းဢမ်ႇၸႂ်ႈ။မီးၼမ်ၼႃႇဢေႃႈ။

၁၅ ပေႃးတိၼ်ဝႃႈၵွပ်ႈပိူဝ်ႈၵဝ်ဢမ်ႇၸႂ်ႈမိုဝ်းလႄႈၵဝ်ဢမ်ႇၸၢပ်ႈသႅင်ႇၵၼ်တင်းတူဝ်ဝႃႈၼင်ႇၼႆၸိုင်ဢမ်ႇၸၢပ်ႈသႅင်ႇတႄႉႁိုဝ်။

၁၆ ႁူၵေႃႈပေႃးဝႃႈၵွပ်ႈပိူဝ်ႈၵဝ်ဢမ်ႇၸႂ်ႈတႃလႄႈၵဝ်ဢမ်ႇၸၢပ်ႈသႅင်ႇၵၼ်တင်းတူဝ်၊ဝႃႈၼင်ႇၼႆၸိုင်၊ဢမ်ႇၸၢပ်ႈသႅင်ႇတႄႉႁိုဝ်။

၁၇ ပေႃးတင်းတူဝ်တင်းၶိင်းပဵၼ်မၢၵ်ႇတႃၵူၺ်းၵူၺ်းၸိုင်တၢင်းဢၼ်တၵ်းငိၼ်းၼၼ်ႉတၵ်းမီးၵႃႈလႂ်။ပေႃးတင်းတူဝ်တင်းၶိင်းပဵၼ်ႁူၵူၺ်းၵူၺ်းၸိုင်တၢင်းဢၼ်တၵ်းၼူမ်ၼၼ်ႉတၵ်းမီးၵႃႈလႂ်။

၁၈ တေႃႈလဵဝ်ၸမ်းၽြႃးပဵၼ်ၸဝ်ႈၼၼ်ႉၸီႇယၢင်ႇၶၢၼ်းဝႆႉဢင်ႇၵႃႇတင်းလၢႆႁင်းၽႂ်ႁင်းမၼ်းၵႃႈၼႂ်းတူဝ်ၵႃႈၼင်ႇဢၼ်မၼ်းၸဝ်ႈမီးဢလူဝ်ႇၼၼ်ႉဢေႃႈ။

၁၉ လိူဝ်သေၼၼ်ႉပေႃးဢင်ႇၵႃႇၵႃႈမီးတင်းသဵင်ႈတင်းလူင်ပဵၼ်ဢင်ႇၵႃႇဢၼ်လဵဝ်ၵူၺ်းၸိုင်တူဝ်တၵ်းမီးၵႃႈလႂ်။

၂၀ တေႃႈလဵဝ်ၼႆႉပဵၵ်ႉသမ်ႉဢင်ႇၵႃႇၼမ်ၼႃႇသေၵေႃႈမီးတူဝ်ဢၼ်လဵဝ်ၵူၺ်းဢေႃႈ။

၂၁ ၵဝ်ဢမ်ႇလူဝ်ႇမႂ်းဝႃႈၼႆမၢၵ်ႇတႃဢမ်ႇလႆႈဝႃႈတီႈမိုဝ်း။ႁူဝ်ၵေႃႈဢမ်ႇလူဝ်ႇတိၼ်ဝႃႈၼႆဢမ်ႇဝႃႈလႆႈ။

၂၂ လိူဝ်သေၼၼ်ႉဢမ်ႇၵႃးဢင်ႇၵႃႇဢၼ်ႁဝ်းထၢင်ႇဝႃႈႁႅင်းလဵၵ်ႉႁႅင်းၵေႇၼၼ်ႉယဵင်ႈၶႅၼ်းၸၢင်ႊမီးတီႈဢၼ်လႆႈသုင်းတိုဝ်းဢေႃႈ။

၂၃ တီႈဢင်ႇၵႃႇဢၼ်ႁဝ်းထၢင်ႇဢမ်ႇပေႃးမီးႁၢင်ႊသရေႇၼၼ်ႉႁဝ်းၸၢင်ႊလႆႈသရေႇဢၼ်ယဵင်ႈၶႅၼ်းယႂ်ႇဢေႃႈ။

၂၄ ဢင်ႇၵႃႇဢၼ်ဢမ်ႇသၢင်ႇထုၵ်ႇၼၼ်ႉယဵင်ႈၶႅၼ်းလႆႈၶၢမ်ႇတၢင်းဢၼ်သၢင်ႇထုၵ်ႇဢေႃႈ။ဢင်ႇၵႃႇဢၼ်သၢင်ႇထုၵ်ႇတင်းလၢႆၼၼ်ႉဢမ်ႇလူဝ်ႇတၢင်းဢၼ်သၢင်ႇထုၵ်ႇတၢင်ႇၸိူဝ်ႉတၢင်ႇဢၼ်ထႅင်ႈ။

၂၅ လွင်ႈၼင်ႇႁိုဝ်တၵ်းဢမ်ႇမီးတၢင်းဢၼ်ၽၢတ်ႇၽႄၵၼ်ၼႂ်းတူဝ်ၶၼ်ႇထႃႇလႄႈဢင်ႇၵႃႇတင်းလၢႆတၵ်းပႂ်ႉလူလုမ်းလႃးၵၼ်ၸိုင်ၽြႃးပဵၼ်ၸဝ်ႈႁႂ်ႈတူဝ်ၶၼ်ႇထႃႇၵိုင်ႇၵၼ်လႅပ်ႈၵၼ်လႄႈပၼ်သရေႇဢၼ်ယဵင်ႈၶႅၼ်းၼမ်တီႈဢင်ႇၵႃႇဢၼ်ယုတ်ႈယွမ်းၸိူဝ်းၼၼ်ႉဢေႃႈ။

၂၆ ပိူဝ်ႈၼႆလႄႈပေႃးဢင်ႇၵႃႇဢၼ်ၼိုင်ႈလႆႈၶၢမ်ႇၸဵပ်းသႅပ်ႇၸိုင်ဢင်ႇၵႃႇၵႃႈမီးတင်းသဵင်ႈတင်းၵေႃႈလႆႈၶၢမ်ႇလူၺ်ႈၵၼ်ဢေႃႈ။ပေႃးဢင်ႇၵႃႇဢၼ်ၼိုင်ႈလႆႈၶၢမ်ႇတၢင်းဢၼ်ယုၵ်ႉယွင်ႈၸိုင်ဢင်ႇၵႃႇၵႃႈမီးတင်းသဵင်ႈတင်းလူင်လႆႈသိူဝ်းပျေႃႇလူၺ်ႈၵၼ်ဢေႃႈ။

သူႉၵျေးၸူးဢၼ်ၶၢၼ်းဝႆႉ

၂၇ သူပဵၼ်တူဝ်ၸဝ်ႈၶရိၸ်ႉ၊ပဵၼ်ဢင်ႇၵႃႇမၼ်းၸဝ်ႈႁင်းၽႂ်ႁင်းမၼ်းဢေႃႈ။ၽြႃးပဵၼ်ၸဝ်ႈၶၢၼ်းဝႆႉတမၢၼ်ႇၸဝ်ႈတင်းလၢႆၼႂ်းဢရႃႇပထမ၊ပရေႃးၽႅတ်ႈတင်းလၢႆၼႂ်းဢရႃႇတုတိယသြႃႇသွၼ်တင်းလၢႆၼႂ်းဢရႃႇတတိယ၊လိုၼ်းၼၼ်ႉၶဝ်ၸိူဝ်းဢၼ်ၼႄပျႃးတၼ်းၶူဝ်း၊

၂၈ လိုၼ်းၼၼ်ႉၶဝ်ၸိူဝ်းဢၼ်လႆႈဢၶႂၢင်ႉဢၼ်ႁဵတ်းႁႂ်ႈတၢင်းၶႆႈတၢင်းပဵၼ်ႁၢႆ၊ၶဝ်ၸိူဝ်းဢၼ်ၸွႆႈထႅမ်ပိူၼ်ႈ၊ၶဝ်ၸိူဝ်းဢၼ်ထတ်းသၢင်ႈဢုပ်ႉပိူင်ႇၶဝ်ၸိူဝ်းဢၼ်ၸၢင်ႊလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ၼၼ်ႉၼႂ်းၸိူဝ်းၸဝ်ႈဢေႃႈ။

၂၉ ၶဝ်ၵႃႈမီးတင်းသဵင်ႈတင်းလူင်ပဵၼ်တမၢၼ်ႇၸဝ်ႈႁိုဝ်။ၵႃႈမီးတင်းသဵင်ႈတင်းလူင်ပဵၼ်ပရေႃးၽႅတ်ႈႁိုဝ်။ၵႃႈမီးတင်းသဵင်ႈတင်းလူင်ပဵၼ်သြႃႇသွၼ်ႁိုဝ်။ၵႃႈမီးတင်းသဵင်ႈတင်းလူင်ၼႄပျႃးတၼ်းၶူဝ်းလႆႈႁိုဝ်။

၃၀ ၵႃႈမီးတင်းသဵင်ႈတင်းလူင်လႆႈဢၶႂၢင်ႉဢၼ်ႁဵတ်းႁႂ်ႈတၢင်းၶႆႈတၢင်းပဵၼ်ႁၢႆႁိုဝ်။ၵႃႈမီးတင်းသဵင်ႈတင်းလူင်ၸၢင်ႊလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ႁိုဝ်။ၵႃႈမီးတင်းသဵင်ႈတင်းလူင်ၸၢင်ႊၽုၺ်ႇၼႄဢထိၵ်ႈပႄႇၵႂၢမ်းၽႃႇသႃႇၼၼ်ႉႁိုဝ်။

၃၁ သူဢွၼ်ၵၼ်မီးဢလူဝ်ႇၶႂ်ႈလႆႈသူႉၵျေးၸူးၸဝ်ႈဢၼ်မျၢတ်ႈလီသေပိူၼ်ႈၼၼ်ႉတႃႉ။တေႃႈလဵဝ်ၵဝ်တၵ်းၼႄပျႃးသဵၼ်ႈတၢင်းဢၼ်ယဵင်ႈၶႅၼ်းမျၢတ်ႈၼႃႇၼၼ်ႉတီႈသူလူးၵွၼ်ႇဢေႃႈ။