Shan Missions

လိၵ်ႈဢေႃးဝႃႇတႃ့ထိၵ်ႈသႃႇလေႃးၼိၵ်ႈၽိုၼ်တုတိယ

Chapter          ၁          ၂          ၃         

၂

ၵေႃႉဢၼ်ဢမ်ႇမီးတြႃး

၁ ပီႈၼွင်ႉၶဝ်ဢိူၺ်း၊ၸၢပ်ႈသႅင်ႇလူၺ်ႈလွင်ႈတၢင်းဢၼ်ၸဝ်ႈႁဝ်းၸဝ်ႈယေႇသုၶရိၸ်ႉတၵ်းမႃးလႄႈ

၂ ႁဝ်းတၵ်းလႆႈၸူႉၵၼ်တုမ်ၵၼ်တီႈမၼ်းၸဝ်ႈၼၼ်ႉၸမ်း၊ၼင်ႇႁိုဝ်သူတၵ်းဢမ်ႇမီးတၢင်းဢၼ်ၸႂ်သုတ်ႈယွမ်းၵႂႃႇၶၼ်ၶၼ်ၽႂ်းၽႂ်းတၢင်းဢၼ်မႆႈၸႂ်ၵူဝ်ႁႄသၼ်ႇဝႆၵွပ်ႈပိူဝ်ႈဝိၺိၺ်ႇတၢင်ႇၸိူဝ်ႉတင်ႇမဵဝ်း၊ၵွပ်ႈပိူဝ်ႈၵႂၢမ်းဢၼ်ဢွၵ်ႇသူပ်းပိူၼ်ႈ၊ၵွပ်ႈပိူဝ်ႈလိၵ်ႈဢၼ်မိူၼ်ၼင်ႇႁၢင်ႊပဵၼ်လိၵ်ႈဢၼ်ႁဝ်းတႅမ်ႈလႄႈဝႃႈ၊-ဝၼ်းၸဝ်ႈၽြႃးပေႃးႁွတ်ႈမႃးယဝ်ႉ၊ဝႃႈၼင်ႇၼႆၼၼ်ႉၸိုင်ယႃႇပေယုမ်ႇ။

၃ ယႃႇပေႁႂ်ႈၽူႈလႂ်လႆႈပႅတ်ႉလႆႈလႅၼ်သူၼႂ်းလွင်ႈတၢင်းသေၸိူဝ်ႉသေပိူင်။ၸူဝ်ႈဢၼ်ဝၼ်းၼၼ်ႉဢမ်ႇပႆႇႁွတ်ႈပႆႇထိုင်ၼၼ်ႉၸိုင်၊တၢင်းဢၼ်ၽွၵ်ႈပျၢၼ်ႇၽႄၵိူင်းၶႂၢႆးၵိူင်းတၵ်းပဵၼ်ဢွၼ်တၢင်းလႄႈၵူၼ်းတူႉၸရိူၵ်ႈတၢင်းလူႉတၢင်းလႅဝ်ၼၼ်ႉတၵ်းပေႃႇမႃးဢေႃႈ။

၄ ၵေႃႉၼၼ်ႉႁဵတ်းတၢင်းဢၼ်ၶတ်းၵၼ်တင်းၽြႃး၊ၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇလိူဝ်တွၼ်းၼႃႇသေၽြႃးလႄႈၼင်ႈယူႇၵႃႈၼႂ်းႁိူၼ်းပိၵ်ႉမၢၼ်ႇၽြႃးပဵၼ်ၸဝ်ႈသေယဝ်ႉ၊ပဵၼ်ၵေႃႉဢၼ်ဢဝ်ပုင်ႇႁၢင်ႊၽြႃးလႄႈၼႄပျႃးတူဝ်ၸဝ်ႈၵဝ်ႇဢေႃႈ။

၅ ၸွင်ႇသူဢမ်ႇၶုၵ်းၸႂ်လႆႈလွင်ႈဢၼ်ၵဝ်လၢတ်ႈဝႆႉလွင်ႈတၢင်းၸိူဝ်းၼၼ်ႉမိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၼၼ်ႉႁိုဝ်။

၆ ၼင်ႇႁိုဝ်ၵေႃႉၼၼ်ႉတၵ်းလႆႈထၢင်ႇသႃးၼႂ်းၶိင်ႇၵႃႇလႃႉဢၼ်ထုၵ်ႇၼၼ်ႉၸိုင်တေႃႈလဵဝ်ၼႆႉယင်းမီးတၢင်းဢၼ်တိုတ်ႉၸၼ်မၼ်းဝႆႉယူႇဢေႃႈ၊ဝႃႈၼႆသူႁူႉယူႇဢေႃႈ။

၇ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်းတၢင်းဢၼ်လိုၵ်ႉဢၼ်လမ်ႇဢၼ်ဢမ်ႇတြႃးၼၼ်ႉတေႃႈလဵဝ်ၼႆႉယင်းတိုၵ်ႉပွင်ႁဵတ်းယူႇဢေႃႈ။ၵေႃႉဢၼ်ႁႄႉဢၼ်ၶႅၼ်ဢၼ်ဢမ်ႇတြႃးၼၼ်ႉၵေႃႈတၵ်းႁႄႉၶႅၼ်ယူႇတေႃႇထိုင်ႁွတ်ႈၸူဝ်ႈဢၼ်မၼ်းဢမ်ႇပႆႇလႆႈႁွတ်ႈထိုင်တၢင်းဢၼ်ဢဝ်ပႅတ်ႈၼၼ်ႉဢေႃႈ။

၈ မိူဝ်ႈဢၼ်ၸဝ်ႈယေႇသုဢဝ်တင်းလူမ်းဢၼ်ဢွၵ်ႇသူပ်းမၼ်းၸဝ်ႈသေလႄႈယႃႉပႅတ်ႈ၊ဢဝ်တင်းသၢႆဢရွင်ႇမၼ်းသေလႄႈပႄႇၽဵဝ်ႈပႅတ်ႈၼၼ်ႉ၊ၵူၼ်းဢၼ်ဢမ်ႇတြႃးၸိူဝ်းၼၼ်ႉတၵ်းထၢင်ႇသႃးမႃးယူႇဢေႃႈ။

၉ လွင်ႈတၢင်းဢၼ်ၵူၼ်းဢၼ်ဢမ်ႇတြႃးပေႃႇမႃးၼၼ်ႉၸမ်းမၼ်းတၵ်းပႃးဢဝ်တင်းတၼ်းၶူဝ်းၼီႉမိၵ်ႈလၵ်ႈၶၼႃႇဢၼ်လီဢၢမ်းၵူႈၸိူဝ်ႉၵူႈပိူင်ၼႂ်းၸႃႇတၢၼ်ႇမႃႇၼၢတ်ႈဢၼ်ပဵၼ်ဢၼ်ပႅတ်ႉဢၼ်လႅၼ်ဢၼ်ဢမ်ႇတြႃးၵူႈၸိူဝ်ႉၵူႈပိူင်သေယဝ်ႉ

၁၀ ပႅတ်ႉလႅၼ်ၶဝ်ၸိူဝ်းဢၼ်ႁွတ်ႈထိုင်တၢင်းလူႉတၢင်းလႅဝ်ၼၼ်ႉဢေႃႈ။ၶဝ်ၼၼ်ႉဢမ်ႇၶၢမ်ႇဢမ်ႇဢဝ်သမ်ႇမႃႇတြႃးဢၼ်သိုဝ်တေႃႇလႄႈလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉဢေႃႈ။

၁၁ ပိူဝ်ႈၼႆလႄႈလွင်ႈၼင်ႇႁိုဝ်ၶဝ်ၸိူဝ်းဢၼ်ဢမ်ႇယုမ်ႇမၢတ်ႈသမ်ႇမႃႇတြႃးလႄႈမူၼ်ပျေႃႇၼႂ်းဢမူႉဢၼ်ဢမ်ႇတြႃးၼၼ်ႉတင်းသဵင်ႈတင်းလူင်တၵ်းလႆႈႁွတ်ႈထိုင်တၢင်းဢၼ်လူႉသုမ်းၸိုင်

၁၂ ၽြႃးပဵၼ်ၸဝ်ႈပွႆႇပၼ်ဢၶႂၢင်ႉႁႂ်ႈတၢင်းဢၼ်မိၵ်ႉသႃႇတိၵ်ႉထီႉပွင်ႁဵတ်းၼၼ်ႉႁႂ်ႈၶဝ်လႆႈယုမ်ႇၵႂၢမ်းမူႉသႃႇဢေႃႈ။

တၢင်းဢၼ်တၢင်ႇၵျေးၸူး

၁၃ ၵူၺ်းၵႃႈပီႈၼွင်ႉဢၼ်ၸဝ်ႈၽြႃးႁၵ်ႉၶဝ်ဢိူၺ်း၊ႁဝ်းတၵ်းလႆႈယွင်ႈယေႃးၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈသူယူႇတႃႇသေႇဢမ်ႇထၢတ်ႇၵွပ်ႈပိူဝ်ႈဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်သူၸဵမ်မိူဝ်ႈဢွၼ်ၼႆႉၼၼ်ႉႁႂ်ႈသူလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈတၢင်းဢၼ်ဝိၺိၺ်ႇမူတ်းၸၢင်ႇၸဝ်ႈႁႂ်ႈသူမူတ်းၸၢင်ႇဢိၵ်ႇတင်းတၢင်းဢၼ်ယုမ်ႇမၢတ်ႈသမ်ႇမႃႇတြႃးၼၼ်ႉဢေႃႈ။

၁၄ ပုၼ်ႈလွင်ႈၼင်ႇႁိုဝ်တၵ်းပဵၼ်ၸိူဝ်ႉၼင်ႇၼၼ်ၸိုင်မၼ်းၸဝ်ႈႁွင်ႉဢဝ်သူၵွပ်ႈပိူဝ်ႈတြႃးသတၢင်းသိူဝ်းပျေႃႇႁဝ်းၼၼ်ႉယဝ်ႉ။ၼင်ႇၼၼ်လႄႈသူလႆႈပိူင်ႇထိူၵ်ႈမူၼ်ၽုင်းၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉဢေႃႈ။

၁၅ ၵွပ်ႈႁွႆးၼႆႉလႄႈပီႈၼွင်ႉၶဝ်ဢိူၺ်း၊ယိပ်းၵမ်ဢဝ်ၼႄးဢူႉပတေႇဢၼ်ႁဝ်းလႆႈဢဝ်တင်းၵႂၢမ်းဢၼ်ဢွၵ်ႇသူပ်းႁဝ်းလႄႈသင်ၸွမ်းလူၺ်ႈလိၵ်ႈဢၼ်ႁဝ်းတႅမ်ႈပၼ်ၼၼ်ႉလႄႈ

၁၆ သင်ဢွၼ်ၵၼ်ၸွႆးၸပ်းယူႇမၼ်ႈမၼ်ႈၶိူင်ႇၶိူင်ႇတႃႉ။ႁႂ်ႈတူဝ်ၸဝ်ႈႁဝ်းၸဝ်ႈယေႇသုၶရိၸ်ႉဢိၵ်ႇတင်းၽြႃးပဵၼ်ၸဝ်ႈပေႃႈႁဝ်းဢၼ်ႁၵ်ႉႁဝ်းလႄႈပၼ်တၢင်းဢၼ်သၢၵ်ႈသႃႇထႃႇဝရႃႉ

၁၇ ဢိၵ်ႇတင်းတၢင်းဢၼ်မုင်ႈထႃႈမွင်းထႃႈဢၼ်လီဢၼ်ငၢမ်းၸွမ်းၼင်ႇၵျေးၸူးၸဝ်ႈၼၼ်ႉႁႂ်ႈႁူဝ်ၸႂ်သူသၢၵ်ႈသႃႇလႄႈႁႂ်ႈသူမၼ်ႈၶိူင်ႇယူႇၼႂ်းတၢင်းႁဵတ်းဢၼ်လီဢၼ်ငၢမ်းဢိၵ်ႇတင်းၼႂ်းၶေႃႈၵႂၢမ်းဢၼ်လီဢၼ်ငၢမ်းၵူႈၸိူဝ်ႉၵူႈပိူင်သေၵမ်းလူၺ်ႈ။