Shan Missions

လိၵ်ႈဢေႃးဝႃႇတႃ့ၽိလေႇမုၼ်ႇ

Chapter          ၁         

 ၁

 ၵႂၢမ်းတၵ်ႉလၢတ်ႈ

၁ ၵဝ်၊ပေႃးလု၊ဢၼ်လႆႈၶၢမ်ႇတူၵ်းၵႅၼ်းၵွပ်ႈပိူဝ်ႈၸဝ်ႈယေႇသုၶရိၸ်ႉ၊ဢိၵ်ႇတင်းၼွင်ႉၵဝ်တိမေႃးသေႇလႆႈပၼ်ငိၼ်းၵႂႃႇတီႈသူၸႃႉၸဵမ်ၽိလေႇမုၼ်ႇၵေႃႉသေႈဢၼ်ႁဝ်းႁၵ်ႉပႅင်းလႄႈသၢင်ႈႁဵတ်းႁူမ်ႈၵၼ်ဢိၵ်ႇတင်း

၂ ဢပ်ႉပိဢၼ်ပဵၼ်ၼွင်ႉယိင်းဢၼ်ႁဝ်းႁၵ်ႉပႅင်းတင်းဢႃႇၶိပ်ႉပုဢၼ်ပဵၼ်ၵူၼ်းသိုၵ်းလူၺ်ႈၵၼ်တင်းႁဝ်းတင်းၸိူဝ်းၸဝ်ႈဢၼ်မီးၵႃႈၼႂ်းႁိူၼ်းမႂ်းၸိူဝ်းၼၼ်ႉဢေႃႈ။

၃ ႁႂ်ႈသူႉၵျေးၸူးဢိၵ်ႇတင်းတၢင်းၼိမ်ဢၼ်ပဵၼ်မႃးၵႃႈတီႈပေႃႈၽြႃးပဵၼ်ၸဝ်ႈဢိၵ်ႇတင်းၸဝ်ႈယေႇသုၶရိၸ်ႉၼၼ်ႉမီးၼိူဝ်သူသေၵမ်းလူၺ်ႈ။

ၵႂၢမ်းဢၼ်တၢင်ႇၵျေးၸူး

၄ ပိူဝ်ႈဢၼ်ၵဝ်လႆႈႁူႉလႆႈငိၼ်းလွင်ႈဢၼ်မႂ်းယုမ်ႇမၢတ်ႈၸဝ်ႈယေႇသုလႄႈႁၵ်ႉပႅင်းၵူၼ်းမူတ်းၸၢင်ႇတင်းသဵင်ႈတင်းလူင်ၼၼ်ႉလႄႈ

၅ ၵဝ်ယွင်ႈယေႃးၵျေးၸူးၽြႃးပဵၼ်ၸဝ်ႈသေႇသေႇလႄႈႁဵတ်းသူးတွင်းပထၼႃႇပုၼ်ႈမႂ်းယူႇဢေႃႈ။

၆ လွင်ႈဢၼ်ၵဝ်သူးတွင်းၸမ်းႁႂ်ႈဢႁူင်ႇတၢင်းဢၼ်သိူၵ်ႈသမ်ႇၵၼ်တင်းတၢင်းယုမ်ႇမၢတ်ႈမႂ်းၼၼ်ႉတၵ်းႁႅင်းယႂ်ႇပုၼ်ႈၸဝ်ႈယေႇသုၶရိၸ်ႉၼႂ်းတၢင်းဢၼ်ႁူႉၸႅင်ႈလွင်ႈတၢင်းၵႃႈဢၼ်လီငၢမ်းတင်းသဵင်ႈတင်းလူင်ၼၼ်ႉဢေႃႈ။

၇ ၼွင်ႉၸၢႆးၵဝ်ဢိူၺ်း၊ၵွပ်ႈလူၺ်ႈမႅတ်ႈတႃႇမႂ်းလႄႈၵဝ်မီးတၢင်းဢၼ်ၵတ်းယဵၼ်ၶျၢမ်းသႃႇတၢင်းဢၼ်သိူဝ်းပျေႃႇၼႃႇလူင်လၢင်ၼႂ်းတၢင်းဢၼ်မႂ်းႁႂ်ႈႁူဝ်ၸႂ်ၵူၼ်းမူတ်းၸၢင်ႇတင်းလၢႆသၢၵ်ႈသႃႇၼၼ်ႉဢေႃႈ။

ၵႂၢမ်းယွၼ်းတွင်းပၢၼ်ႇ

၈ ပဵၵ်ႉသမ်ႉၵဝ်မီးဢၶႂၢင်ႉဢၼ်ႁတ်းႁၢၼ်ၵွပ်ႈပိူဝ်ႈၸဝ်ႈၶရိၸ်ႉလႄႈႁႂ်ႈလႆႈဝႆႉပိင်းၺၢပ်ႈတီႈမႂ်းလွင်ႈဢၼ်မႂ်းထုၵ်ႇလီႁဵတ်းၼၼ်ႉသေၵေႃႈ၊ၵဝ်၊ပေႃးလု၊ၵေႃႉဢၼ်ဢသၢၵ်ႈယႂ်ႇ၊

၉ ၵေႃႉဢၼ်လႆႈၶၢမ်ႇတူၵ်းၵႅၼ်းၵွပ်ႈပိူဝ်ႈၸဝ်ႈယေႇသုၶရိၸ်ႉၼႆႉဢဝ်တင်းမႅတ်ႈတႃႇၵူၺ်းလႄႈတွင်းပၢၼ်ႇမႂ်းယူႇဢေႃႈ။

၁၀ ၵဝ်တွင်းပၢၼ်ႇမႂ်းပုၼ်ႈဢေႃးၼေႇသိမ်ႇ၊ဢၼ်ပဵၼ်လုၵ်ႈၸၢႆးၵဝ်ၵႃႈၼႂ်းထွင်ႇၼႆႉ၊

၁၁ ၵေႃႉဢၼ်ဢမ်ႇမီးဢသုင်းၵႃႈသင်ပုၼ်ႈမႂ်းမိူဝ်ႈဢွၼ်ႈၼၼ်ႉ၊တေႃႈလဵဝ်ၼႆႉမၼ်းပဵၼ်ၵေႃႉဢၼ်မီးဢသုင်းပုၼ်ႈမႂ်းတင်းၵဝ်ယူႇဢေႃႈ။

၁၂ ၵဝ်ႁႂ်ႈမၼ်းၶိုၼ်းမိူဝ်းၵႂႃႇတီႈမႂ်းယဝ်ႉ။မႂ်းႁပ်ႉဢဝ်မၼ်းမိူၼ်ၸိူဝ်ႉၼင်ႇလိူတ်ႈႁူဝ်ၸႂ်ၵဝ်ၼၼ်ႉတႃႉ။

၁၃ ပဵၵ်ႉသမ်ႉၵဝ်ၶႂ်ႈဢဝ်မၼ်းဝႆႉတီႈၵဝ်ႁႂ်ႈမၼ်းလႆႈႁဵတ်းတၢင်တူဝ်မႂ်းႁႂ်ႈလႆႈလူႈတူၺ်းၵဝ်ၼႂ်းတၢင်းဢၼ်ၵဝ်လႆႈၶၢမ်ႇတၢင်းဢၼ်မတ်ႉၽုၵ်ႇယူႇၵွပ်ႈပိူဝ်ႈတြႃးသတၢင်းသိူဝ်းပျေႃႇၼႆႉသေၵေႃႈၵဝ်ဢမ်ႇမီးဢလူဝ်ႇၶႂ်ႈႁဵတ်းတၢင်းဢၼ်မႂ်းဢမ်ႇလႆႈၸႂ်ၼၼ်ႉ။

၁၄ တၢင်းဢၼ်မႂ်းႁဵတ်းၵျေးၸူးၼၼ်ႉႁႂ်ႈလႆႈပဵၼ်ၸွမ်းၼင်ႇဢလူဝ်ႇမႂ်းတႃႉ။

၁၅ လိူဝ်သေၼၼ်ႉမီးတီႈလၢတ်ႈဝႃႈလွင်ႈၼင်ႇႁိုဝ်မႂ်းတၵ်းလႆႈမၼ်းဝႆႉယူႇသေႇသေႇၸိုင်မၼ်းလႆႈၽၢတ်ႇယၢၼ်ၵၼ်တင်းမႂ်းၵႂႃႇၵမ်းဢွၼ်ႇၼိုင်ႈယဝ်ႉဢေႃႈ။

၁၆ မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်ဢမ်ႇၶႂ်ႈဝႃႈမႂ်းတၵ်းလႆႈမၼ်းဝႆႉမိူၼ်ၸိူဝ်ႉၼင်ႇၶႃႈ။ၵဝ်ၶႂ်ႈဝႃႈမႂ်းတၵ်းလႆႈမၼ်းဝႆႉမိူၼ်ၸိူဝ်ႉၼင်ႇၵေႃႉဢၼ်ယႂ်ႇလိူဝ်တွၼ်းသေၶႃႈ၊မိူၼ်ၸိူဝ်ႉၼင်ႇၼွင်ႉၸၢႆးဢၼ်ၵဝ်ႁၵ်ႉၼႃႇလူင်လၢင်ၼၼ်ႉဢေႃႈ။တီႈမႂ်းၵေႃႈႁႂ်ႈပဵၼ်ၸိူဝ်ႉၼင်ႇၼွင်ႉၸၢႆးဢၼ်ယဵင်ႈၶႅၼ်းႁၵ်ႉၼႃႇလူင်လၢင်ၵွပ်ႈပိူဝ်ႈၼိူဝ်ႉလိူတ်ႈဢိၵ်ႇတင်းၵွပ်ႈပိူဝ်ႈၸဝ်ႈၽြႃးၼၼ်ႉဢေႃႈ။

၁၇ ပိူဝ်ႈၼႆလႄႈပေႃးမႂ်းမၢတ်ႈၵဝ်ပဵၼ်ၸိူဝ်ႉၼင်ႇၵေႃႉသေႈၸိုင်ႁပ်ႉတုင်းဢဝ်မၼ်းမိူၼ်ၸိူဝ်ႉၼင်ႇႁပ်ႉတုင်းဢဝ်ၵဝ်ၼၼ်ႉသေၵမ်း။

၁၈ ပေႃးမၼ်းမီးလွင်ႈတၢင်းဢၼ်ၽိတ်းပိူင်ႈတီႈမႂ်းဢိၵ်ႇတင်းလွင်ႈတၢင်းဢၼ်ထုၵ်ႇၼီႈထုၵ်ႇၶွတ်ႇသေၸိူဝ်ႉသေပိူင်ၸိုင်မၢတ်ႈပဵၼ်ပုၼ်ႈတႃႇၵဝ်တႃႉ။

၁၉ ၵဝ်တၵ်းတႅၼ်းပၼ်ဢေႃႈ၊ဝႃႈၼႆ၊ၵဝ်၊ပေႃးလု၊ဢဝ်တင်းမိုဝ်းတူဝ်ၸဝ်ႈၵဝ်ႇတႅမ်ႈဝႆႉဢေႃႈ။ၵူၺ်းၵႃႈၵဝ်ဢမ်ႇလၢတ်ႈလွင်ႈဢၼ်မႂ်းမီးတီႈဢၼ်တၵ်းလႆႈတႅၼ်းပၼ်ၼီႈတီႈၵဝ်ဢၼ်ပဵၼ်တူဝ်မႂ်းၼၼ်ႉ။

၂၀ ၼွင်ႉၸၢႆးဢိူၺ်း၊ႁဵတ်းၵျေးၸူးတီႈၵဝ်ၼႂ်းၸဝ်ႈၽြႃးသေၵမ်း။ႁႂ်ႈႁူဝ်ၸႂ်သၢၵ်ႈသႃႇၼႂ်းၸဝ်ႈၶရိၸ်ႉသေၵမ်း။

၂၁ မႂ်းတၵ်းထွမ်ႇဢဝ်ဝႃႈၼႆၵဝ်ယုမ်ႇယမ်ၵူၺ်းဢမ်ႇၵႃးၵဝ်ႁူႉလွင်ႈဢၼ်မႂ်းတၵ်းႁဵတ်းၼမ်ၼႃႇသေဢၼ်ၵဝ်လၢတ်ႈၼႆႉလႄႈၵဝ်ၸင်ႇတႅမ်ႈပၼ်ၵႂႃႇဢေႃႈ။

၂၂ လိူဝ်သေၼၼ်ႉမႄးႁႅၼ်းဝႆႉတီႈဢၼ်ၵဝ်တၵ်းယူႇသေၵမ်း။လွင်ႈမၼ်းၸမ်းၵွပ်ႈပိူဝ်ႈဢၼ်သူႁဵတ်းသူးတွင်းပထၼႃႇလႄႈမၼ်းၸဝ်ႈတၵ်းပၼ်ဢၶႂၢင်ႉႁႂ်ႈၵဝ်လႆႈႁွတ်ႈထိုင်မႃးၵႃႈတီႈဢၼ်သူမီးၼၼ်ႉဢေႃႈ၊ဝႃႈၼႆ၊ၵဝ်မီးတၢင်းဢၼ်မုင်ႈထႃႈမွင်းထႃႈယူႇဢေႃႈ။

ၵႂၢမ်းမင်ႇၵလႃႇ

၂၃ ၸႃႉၸဵမ်ဢေႇပၽြႃႉဢၼ်လႆႈၶၢမ်ႇတူၵ်းၵႅၼ်းလူၺ်ႈၵၼ်တင်းၵဝ်ၵွပ်ႈပိူဝ်ႈၸဝ်ႈယေႇသုၶရိၸ်ႉလႄႈ

၂၄ မႃႇၵုဢႃႇရိတ်ႉတႃႇၶု၊တေႇမ၊လုၵႃႇၵေႃႉသေႈဢၼ်သၢင်ႈႁဵတ်းႁူမ်ႈၵၼ်တင်းၵဝ်ၸိူဝ်းၼႆႉတၵ်ႉၼၢႆမႂ်းဢေႃႈ။

ႁႂ်ႈၵျေးၸူးၸဝ်ႈႁဝ်းၸဝ်ႈယေႇသုၶရိၸ်ႉၼၼ်ႉမီးလူၺ်ႈၵၼ်တင်းၸႂ်ဝိၺိၺ်ႇသူသေၵမ်းလူၺ်ႈ။ဢႃႈမိၼ်ႈ။