Shan Missions

ၵျၢမ်းပျႃႇတိၵ်ႉ

Chapter        ၁          ၂          ၃          ၄          ၅          ၆          ၇          ၈          ၉          ၁၀          ၁၁          ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁         ၂၂         

၁၆

ၵွၵ်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈၸဵတ်းလုၵ်ႈ

၁ ၵဝ်ငိၼ်းသဵင်ဢၼ်ယႂ်ႇၼႃႇၵႃႈၼႂ်းပိၵ်ႉမၢၼ်ႇၸဝ်ႈလၢတ်ႈတီႈတမၢၼ်ႇၵၢင်ႁၢဝ်ၸဵတ်းပႃးၼၼ်ႉလႄႈဝႃႈ၊-ၵႂႃႇတႃႉ။ဢဝ်ၵွၵ်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈၸဵတ်းလုၵ်ႈၼၼ်ႉသွၼ်းလေႃႇတူၵ်းသႂ်ႇၵႃႈၼိူဝ်လိၼ်မိူင်းတႃႉ၊ဝႃႈၼင်ႇၼႆဢေႃႈ။

၂ ပႃးပထမၼၼ်ႉၵႂႃႇလႄႈဢဝ်ၵွၵ်းမၼ်းသွၼ်းလေႃႇတူၵ်းသႂ်ႇၵႃႈၼိူဝ်လိၼ်မိူင်းသေယဝ်ႉ၊တုမ်ႇၸဵပ်းတုမ်ႇၽီဢၼ်ႁၢႆႉၼႃႇၼၼ်ႉဢွၵ်ႇၵႃႈတီႈၶဝ်ၸိူဝ်းဢၼ်ၶၢမ်ႇတၼ်းသိၵ်ႈလၢၵ်ႈမၢတ်ႈတူဝ်ထိူၼ်ႇႁၢႆႉလႄႈၵူဝ်းၵႂၢႆႇရူၵ်ႈထူႉမၼ်းၼၼ်ႉဢေႃႈ။

၃ ပႃးတုတိယၼၼ်ႉဢဝ်ၵွၵ်းမၼ်းသွၼ်းလေႃႇတူၵ်းသႂ်ႇၵႃႈၼိူဝ်ပၢင်ႇလၢႆႇသေယဝ်ႉပၢင်ႇလၢႆႇၼၼ်ႉပဵၼ်လိူတ်ႈၵႂႃႇမိူၼ်ၸိူဝ်ႉၼင်ႇလိူတ်ႈၵူၼ်းဢၼ်တၢႆၼၼ်ႉဢေႃႈ။သတ်ႉတဝႃႇဢၼ်ဢသၢၵ်ႈလိပ်းယူႇၵႃႈၼႂ်းပၢင်ႇလၢႆႇၼၼ်ႉတင်းသဵင်ႈတင်းလူင်တၢႆမူတ်းဢေႃႈ။

၄ ပႃးတတိယၼၼ်ႉဢဝ်ၵွၵ်းမၼ်းသွၼ်းလေႃႇတူၵ်းသႂ်ႇၵႃႈၼိူဝ်ၼမ်ႉႁွင်ႊၼမ်ႉၵႄးဢိၵ်ႇတင်းၼမ်ႉဢွၵ်ႇႁူးတင်းလၢႆသေယဝ်ႉၼမ်ႉၸိူဝ်းၼၼ်ႉပဵၼ်လိူတ်ႈၵႂႃႇ

ဢေႃႈ။

၅ ၵဝ်ငိၼ်းတမၢၼ်ႇၵၢင်ႁၢဝ်ဢၼ်ပႂ်ႉၼမ်ႉၸိူဝ်းၼၼ်ႉလဝ်ႈလၢတ်ႈလႄႈဝႃႈ၊-ၸဝ်ႈဢၼ်မီးယူႇပိတ်ႉၸူၵ်ႉပၢၼ်ႇဢတိၵ်ႈဢၼႃႇၵၢတ်ႈၵႃႇလႃႉသေႇသေႇတီႈၶႃႈ၊ၸဝ်ႈႁဝ်းသိုဝ်ႈတေႃႇၼႂ်းလွင်ႈတၢင်းဢၼ်ၸဝ်ႈႁဝ်းၸီႇယၢင်ႇတြႃးၸိူဝ်ႉၼင်ႇၼၼ်ၼၼ်ႉတီႈၶႃႈဢေႃႈ။

၆ ပိူဝ်ႈဢၼ်ၶဝ်ထွၵ်ႇလိူတ်ႈၵူၼ်းမူတ်းၸၢင်ႇဢိၵ်ႇတင်းပရေႃးၽႅတ်ႈတင်းလၢႆပႅတ်ႈလႄႈၸဝ်ႈႁဝ်းတိုၵ်းလိူတ်ႈပၼ်တီႈၶဝ်တီႈၶႃႈယဝ်ႉ။ၶဝ်ၵေႃႈထိူၵ်ႈၶၢမ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။

၇ ၵဝ်ငိၼ်းယိတ်ႉပလၢင်ႇလဝ်ႈလၢတ်ႈလႄႈဝႃႈ၊-ၸႂ်ႈတႄႉတႄႉဢေႃႈ။ထႃႇဝရႃႉၽြႃးပဵၼ်ၸဝ်ႈဢၼ်တဵမ်ဝႆႉတင်းဢၼၼ်ႇတႃႉတၼ်းၶူဝ်းတီႈၶႃႈ၊လွင်ႈတၢင်းဢၼ်ၸဝ်ႈႁဝ်းၸီႇယၢင်ႇၸိူဝ်းၼၼ်ႉမၢၼ်ႇမႅၼ်ႈၸိုဝ်ႈၸႂ်ႈသိုဝ်ႈတေႃႇတီႈၶႃႈဢေႃႈ၊ဝႃႈၼင်ႇၼႆဢေႃႈ။

၈ ပႃးၸတုၵ်ႉထၼၼ်ႉဢဝ်ၵွၵ်းမၼ်းသွၼ်းလေႃႇတူၵ်းသႂ်ႇၵႃႈၼိူဝ်ၵၢင်ဝၼ်းသေယဝ်ႉ၊ၵၢင်ဝၼ်းလႆႈဢၶႂၢင်ႉဢၼ်ႁႂ်ႈၽႆးမႆႈၵူၼ်းတင်းလၢႆဢေႃႈ။

၉ ၵူၼ်းတင်းလၢႆလႆႈၶၢမ်ႇတၢင်းဢၼ်မႆႈၵွပ်ႈပိူဝ်ႈဢႁူင်ႇဢၼ်မႆႈယႂ်ႇၼႃႇၼၼ်ႉလႄႈဢွၼ်ၵၼ်ၵိၼ်ႇလႃႇၼႃႇမႃႉၸိုဝ်သဵင်ၽြႃးပဵၼ်ၸဝ်ႈဢၼ်ဢုပ်ႉပိူင်ႇၽေးတၢမ်ႇၸိူဝ်းၼၼ်ႉဢေႃႈ။ၶဝ်ဢမ်ႇၶုၵ်းၸႂ်လႆႈမႆႈၸႂ်ႁႂ်ႈလႆႈယွင်ႈယေႃးၽြႃးပဵၼ်ၸဝ်ႈ။

၁၀ ပႃးပိၼ်ႇၸမၼၼ်ႉဢဝ်ၵွၵ်းမၼ်းသွၼ်းလေႃႇတူၵ်းသႂ်ႇၵႃႈၼိူဝ်ပလၢင်ႇတူဝ်ထိူၼ်ႇႁၢႆႉသေယဝ်ႉမိူင်းမၼ်းပဵၼ်ဢၼ်လပ်းသိင်ႇၵႂႃႇၽိတ်းၽိတ်းဢေႃႈ။ၵူၼ်းမိူင်းမၼ်းတင်းလၢႆယၢပ်ႇၸႂ်ႁႅင်းၼႃႇလႄႈၵဵဝ်ႉၵၢပ်ႈလိၼ်ႉတူဝ်ၸဝ်ႈၵဝ်ႇဢေႃႈ။

၁၁ ၵွပ်ႈပိူဝ်ႈဝူၺ်ႇတၼႃႇဢၼ်တူဝ်ၸဝ်ႈၵဝ်ႇလႆႈၶၢမ်ႇဢိၵ်ႇတင်းတုမ်ႇၸဵပ်းတုမ်ႇၽီတင်းလၢႆၼၼ်ႉလႄႈၶဝ်ဢွၼ်ၵၼ်ၵိၼ်ႇလႃႇၽြႃးပဵၼ်ၸဝ်ႈၸဝ်ႈမိူင်းၵၢင်ႁၢဝ်ၼၼ်ႉဢေႃႈ။ၶဝ်ဢမ်ႇၶုၵ်းၸႂ်လႆႈမႆႈၸႂ်လူၺ်ႈတၢင်းႁဵတ်းတၢင်းသၢင်ႈတူဝ်ၸဝ်ႈၵဝ်ႇတင်းလၢႆၼၼ်ႉ။

၁၂ ပႃးသထမၼၼ်ႉဢဝ်ၵွၵ်းမၼ်းသွၼ်းလေႃႇတူၵ်းသႂ်ႇၵႃႈၼိူဝ်ၼမ်ႉႁွင်ႊလူင်ဢူႉၽရၢတ်ႉသေယဝ်ႉပုၼ်ႈလွင်ႈၼင်ႇႁိုဝ်တၵ်းလႆႈမႄးသဵၼ်ႈတၢင်းသၢႆတႃပုၼ်ႈၶုၼ်ႁေႃၶမ်းမိူင်းတၢင်းဝၼ်းဢွၵ်ႇတင်းလၢႆတၵ်းၵႂႃႇၼၼ်ႉၸိုင်ၼမ်ႉၼႂ်းၼမ်ႉႁွင်ႊၼၼ်ႉယုတ်းႁႅင်ႈၵႂႃႇသေဢေႃႈ။

၁၃ မိူဝ်ႈၼၼ်ႉၵဝ်ႁၼ်ဝိၺိၺ်ႇဢၼ်ၵူဝ်ႈၵိူၵ်ႇသၢမ်ႇပႃးပဵၼ်မိူၼ်ၸိူဝ်ႉၼင်ႇတူဝ်ၶဵတ်ႇၼၼ်ႉဢွၵ်ႇသေၵႃႈၼႂ်းသူပ်းၼၵႃးၵႃႈၼႂ်းသူပ်းတူဝ်ထိူၼ်ႇႁၢႆႉၵႃႈၼႂ်းသူပ်းမိၵ်ႉသႃႇပရေႃးၽႅတ်ႈၸိူဝ်းၼၼ်ႉမႃးဢေႃႈ။

၁၄ ၶဝ်ၼၼ်ႉပဵၼ်ဝိၺိၺ်ႇၽီႁၢႆႉဢၼ်ၼႄပျႃႉၼီႉမိၵ်ႈလၵ်ႈၶၼႃႇၼမ်ၼႃႇၼၼ်ႉဢေႃႈ။ဝိၺိၺ်ႇၸိူဝ်းၼၼ်ႉဢွၵ်ႇၵႂႃႇၸူးၵႃႈတီႈၶုၼ်ႁေႃၶမ်းတင်းလၢႆဢၼ်မီးၵႃႈၼႂ်းမိူင်းလေႃးၵီႇတင်းသဵင်ႈတင်းလူင်လႄႈႁႂ်ႈၶဝ်ၸူႉၵၼ်တုမ်ၵၼ်ႁႂ်ႈလႆႈတိုၵ်းသိုၵ်းၼႂ်းဝၼ်းယႂ်ႇဝၼ်းလူင်ၽြႃးပဵၼ်ၸဝ်ႈဢၼ်တဵမ်ဝံႉတင်းဢၼၼ်ႇတႃႉတၼ်းၶူဝ်းၼၼ်ႉဢေႃႈ။

၁၅ သဵင်ၸဝ်ႈပဵၼ်မႃးၸမ်း၊-ၵဝ်မႃးၸိူဝ်ႉၼင်ႇၽူႈလၵ်ႉမႃးၼၼ်ႉဢေႃႈ။ၵေႃႉဢၼ်တိုၼ်ႇယူႇလႄႈၼုင်ႈၶူဝ်းၼုင်ႈတၢင်းမႆႊတူဝ်ၸဝ်ႈၵဝ်ႇယူႇ၊ဢမ်ႇႁႂ်ႈလႆႈယူႇတူဝ်ပူၺ်၊ယင်းဢမ်ႇႁႂ်ႈလႆႈပဵၼ်ၵေႃႉဢၼ်ဢမ်ႇမီးၶူဝ်းၼုင်ႈတၢင်းမႆႊလႄႈလီဢူၵ်းလီဢၢႆၵႃႈတီႈၽၢႆႇၼႃႈပိူၼ်ႈၼၼ်ႉမီးမင်ႇၵလႃႇဢေႃႈ၊ဝႃႈၼင်ႇၼႆဢေႃႈ။

၁၆ ၶဝ်ႁႂ်ႈၶုၼ်ႁေႃၶမ်းၸိူဝ်းၼၼ်ႉၸူႉၵၼ်တုမ်ၵၼ်ၵႃႈတီႈဢၼ်ၵႂၢမ်းၽႃႇသႃႇႁေႇပြႄးႁွင်ႉဝႃႈ၊-ဢႃႇမၵေႇတုင်ႇၼၼ်ႉဢေႃႈ။

၁၇ ပႃးသတ်ႉတမၼၼ်ႉဢဝ်ၵွၵ်းမၼ်းသွၼ်းလေႃႇတူၵ်းသႂ်ႇၵႃႈၼိူဝ်ဢႃႇၵႃႇသႃႉၵၢင်ႁၢဝ်သေယဝ်ႉသဵင်ယႂ်ႇသဵင်လူင်ဢၼ်လၢတ်ႈလႄႈဝႃႈ၊-ယဝ်ႉတူဝ်ယဝ်ႉ၊ဝႃႈၼင်ႇၼႆၼၼ်ႉဢွၵ်ႇသေၵႃႈၼႂ်းပလၢင်ႇၸဝ်ႈဢၼ်မီးၵႃႈၼႂ်းပိၵ်ႉမၢၼ်ႇၵၢင်ႁၢဝ်ၼၼ်ႉပေႃႇပဵၼ်မႃးဢေႃႈ။

၁၈ မိူဝ်ႈၼၼ်ႉတၢင်းဢၼ်ၽႃႉမႅပ်ႈ၊တၢင်းဢၼ်သဵင်လင်ႊသဵင်မေႃး၊တၢင်းဢၼ်ၽႃႉလင်ႊ၊တၢင်းဢၼ်ဢိင်ႇသၼ်ႇဢၼ်ယႂ်ႇၼႃႇပဵၼ်မႃးဢေႃႈ။ၸႃႉၸဵမ်ၶိင်ႇၵႃႇလႃႉဢၼ်ၵူၼ်းပဵၼ်မႃးၵႃႈၼိူဝ်လိၼ်မိူင်းၼႆႉၼၼ်ႉၼီႉမိၵ်ႈလၵ်ႈၶၼႃႇၸိူဝ်ႉၼင်ႇၼႆဢိၵ်ႇတင်းတၢင်းဢၼ်ဢိင်ႇသၼ်ႇဢၼ်ယႂ်ႇၼႃႇထၢၼ်ႇၼႆႉဢမ်ႇပႆႇတွၼ်ႉပဵၼ်သေပွၵ်ႈ။

၁၉ ဝဵင်းလူင်ၼၼ်ႉတႅၵ်ႇပဵၼ်သၢမ်ၽၢၵ်ႇၵႂႃႇလႄႈဝဵင်းဢၼ်ၵူၼ်းၵူႈၸိူဝ်ႉၵူႈၶိူဝ်းယူႇသဝ်းၼၼ်ႉလူမ်ႉပင်းဢေႃႈ။ၽြႃးပဵၼ်ၸဝ်ႈၶုၵ်းၸႂ်လႆႈဝဵင်းပႃႇပုလုၼ်ႇၼၼ်ႉလႄႈဢဝ်ၵွၵ်းၼမ်ႉၸပိတ်ႉတေႃးသႃႉတင်းၸႂ်မႆႈမၼ်းၸဝ်ႈၼၼ်ႉတိုၵ်းပၼ်ဢေႃႈ။

၂၀ ၵုၼ်ၵႃႈမီးတင်းသဵင်ႈတင်းလူင်လႅၼ်ႈပၢႆႈဢွၵ်ႇပၢႆႈလႄႈလွႆတင်းလၢႆၵေႃႈဢမ်ႇႁၼ်လႆႈဢေႃႈ။

၂၁ မၢၵ်ႇႁဵပ်းလူင်ဢၼ်တၢင်းၼၵ်းယေႈလုၵ်ႉမီးသိပ်းၸွႆႉၼၼ်ႉလုၵ်ႉသေၵႃႈၼိူဝ်ၵၢင်ႁၢဝ်တူၵ်းသႂ်ႇၵႃႈၼိူဝ်ၵူၼ်းတင်းလၢႆဢေႃႈ။ပိူဝ်ႈဢၼ်မၢၵ်ႇႁဵပ်းၼၼ်ႉပဵၼ်ၽေးတၢမ်ႇဢၼ်ယႂ်ႇၼႃႇလႄႈၵူၼ်းတင်းလၢႆဢွၼ်ၵၼ်ၵိၼ်ႇလႃႇၽြႃးပဵၼ်ၸဝ်ႈဢေႃႈ။